Asino Dagiti Mayanak a Mabaliwan?
MAPAN kadi amin a naimbag a tattao idiay langit? Adut’ mamati a kasta, ngem saan nga immanamong ni Jesu-Kristo. Iti pannakipatangna iti maysa a Judio nga agturay a ni Nicodemo, a sililimed nga immay kenkuana iti rabii, kinuna ni Jesus: “Awan ti immuli sadi langit.”—Juan 3:13.
Ngem, impakita ni Jesus ken ni Nicodemo a dumtengto ti tiempo nga addanto dagiti tattao a maikkan iti gundaway a sumrek iti Pagarian ti langit. Maipapan kadagitoy kinuna ni Jesus: “No ti maysa a tao saan a mayanak iti danum ken espiritu, saanna a mabalin ti sumrek iti pagarian ti Dios. Ti mayanak iti lasag, isu lasag, ket ti mayanak iti espiritu, isu espiritu. Dika pagsiddaawan a kinunak kenka, Masapul kadakayo ti mayanak a mabaliwan.” Ngem nagsiddaaw ni Nicodemo no kasano a ti maysa mayanak a mabaliwan.—Juan 3:1-9.
Nalabit pagsiddaawanyo met no aniat’ kayat a sawen ni Jesus. Mabalin ngata nga agaplikar dagiti sasaona kadagiti giddato a kapadasan iti pannakakumberte nga ibagbaga ti adu a mangipagarup a napnoda iti nasantuan nga espiritu ti Dios?
Rikrikna ken ti Isip
Kuna ti dadduma nga iti panangikeddeng no nabaliwanen a nayanak ti maysa a tao, ti pagsammakedan isu ti pannakarikna iti pannakabalin ti espiritu. Kaskasdi, mabalin nga allilawennatayo ti puso ken isiptayo, aglalo no naimpluensiaantayo iti napigsa nga emosion.—Jeremias 17:9.
Ni Willian Sargant, maysa a managsukisok kadagiti epekto ti emosion iti isip, dakamatenna ti pannakasapul “iti panagannad kadagiti pammati a magun-od bayat ti irurugso ti emosion iti kanito a nalabit lipliputannatayo ti utektayo.” Sigun ken Sargant, maysa a pangarigan isu ti epekto ti napabaro a panangaskasaba ken pammutbuteng ti pannusa iti impierno. Asino koma ti madi a mayanak a mabaliwan tapno makapan sadi langit no ti panagsagaba iti agnanayon a panagtutuok ti nabati a pagpilian? Kunaen ni Sargant nga iti sidong dayta a pannakakibur ti rikna, “maiwalin ti panunot, temporario nga agsardeng nga agtignay ti normal a kompiuter ti utek, ket maawat nga awan panagduadua dagiti baro nga idea ken pammati.”—The Mind Possessed.
No kasta, ngarud, kasano a maibaga ti maysa no ti panamati iti pannakayanak a mabaliwan ket ‘‘naawat nga awan panagduadua’’? Ti kurso ti pudno a sirib isu ti panagpaidalan iti amin nga impailanad ti nasantuan nga espiritu ti Dios kadagiti mannurat ti Biblia. Naiparegta kadagiti Kristiano a dayawenda ti Dios ‘buyogen ti pannakabalin ti panunot’ ken nasken a siertuenda a pudno ti patpatienda.—Roma 12:1, 2; 1 Tesalonica 5:21.
Ti pannakayanak a mabaliwan luktanna ti maysa kadagiti kapatgan a pribilehio a naipaay kadagiti tattao. Nainaig dayta iti naisangsangayan nga irarang-ay ti kaitungpalan ti panggep ti Dios. Nupay pudno amin daytoy, tumaud dagiti saludsod, kas dagitoy: Asino dagiti mayanak a mabaliwan? Kasano a mapasamak daytoy? Ania a gundaway ti naidatag kadagita nga indibidual? Ken isuda laeng kadi ti maisalakan?
[Ladawan iti panid 3]
Nagsiddaaw ni Nicodemo no kasano a ti maysa mayanak a mabaliwan