Ti Panangmatmat ti Biblia

Bautismo​—Agpaay Aya kadagiti Maladaga?

“IDI naaddaanak kadagiti annak,” kuna ti maysa a naganak, “inapurak ti pannakabautismoda. . . . Diak ammo no umiso ti inaramidko.” Apay? Dua kadagiti tallo nga annakna ti nangilaksid ti pammatida.

Nalabit dakayo kas nagannak addaankayo ti umas-asping a panagduadua maipapan iti panangidauloyo iti anakyo iti relihionyo. No kasta, nalabit pagaammoyo a dagiti papangulo ti simbaan​—agpadpada ti Katoliko ken Protestante​—bassit ti naaramidanda a namagtalna iti isipyo. Padakkelenda ti panagduadua babaen ti panagsusuppiatda maipapan iti bautismo ti maladaga. Kuna dagiti repormador a dayta ket sobsobra ti an-anito iti edad-media. Nupay kasta, dagiti mangsalsalimetmet iti tradision awaganda ti panangilibak iti bautismo a “kontra iti Nakristianuan a panagrikrikna.”

Babaen iti kasta a panagrason, dagiti papangulo iti simbaan “agum-umada laeng iti panangtuktukay iti emosion kas kasukat a maipaay iti pudpudno a panagrason.” (Infant Baptism and the Covenant of Grace, ni Paul K. Jewett) Ngarud, sadino, ti pakasarakanyo kadagiti autoritatibo a sungbat iti salsaludsodyo maipapan iti bautismo dagiti maladaga? Dagitoy a sungbat ti masapul a sapulen ida idiay Sao ti Dios.

Naikeddeng a Mapan iti Impierno?

Dagiti manangbautisar kadagiti maladaga kaaduanna padpadasenda nga ibasar ti kasoda kadagiti sasao ni Jesus idiay Juan 3:5: “No ti maysa saan a maiyanak iti danum ken iti espiritu, saanna a mabalin ti sumrek iti pagarian ti Dios.” Ikalinteganda a yantangay ti bautismo iti danum ket kasapulan nga agpaay iti iseserrek idiay langit, rebbeng met a mabautisaran dagiti maladaga tapno maliklikan ti panagsagabada iti umap-apuy nga impierno​—wenno agpalpallailang iti limbo.a

Nupay kasta, kuna ti Biblia a “dagiti natay dida ammo ti aniaman.” (Eclesiastes 9:5; idiligyo iti Salmo 146:4.) Yantangay awan ti ammo dagiti natay, saanda a mabalinan ti aniaman a kita iti panagsagaba. Ngarud, dagiti nagannak, di kasapulan a pagbutnganda ti nakabutbuteng nga ibungana no saanda a mapabautisaran dagiti maladagada.

Kaskasdi, adda met daydiay pannakaseknan a dagiti di nabautisaran ket saanda a makastrek idiay langit. Daytoy, nupay kasta, dina kaipapanan a saanda a maisalakan. Kuna ni Jesus: “Adda met sabsabali a karnerok a saanda a naitipon ditoy a [nailangitan] a pagtaraknan.” (Juan 10:16) Ditoy ken iti pangngarig a nailanad idiay Mateo 25:31-46, impamatmat ni Jesus nga addada dagidiay naisalakan a saan a mapan idiay langit. Sadino ngay ti papananda? Imbaga ni Jesus iti daydiay managdakdakes a naibayubay iti sibayna: “Makipagiankanto kaniak idiay Paraiso.”​—Lucas 23:43.

Daydiay kadi managdakdakes ti “naiyanak iti danum” babaen iti bautismo? Kaawatan a saan, ket ngarud napunitanen ti langit kenkuana. Sadino, ngarud, ti yan ti “Paraiso”? Laglagipenyo a ti Dios inkabilna ti immuna a natauan a pagasawaan iti maysa a naindagaan a paraiso, nga addaan namnama nga agbiag sadiay iti agnanayon. (Genesis 1:28; 2:8) Ngem, da Adan ken Eva, pinilida ti immalsa ket naparuarda manipud napintas a minuyongan a pagtaenganda. Ti kadi naindagaan a Paraiso ti napukaw nga agnanayonen? Saan, ta pagbalinen a nabatad dagiti Kasuratan a ti Dios inton agangay isublinanto ti Paraiso ditoy daga. (Mateo 5:5; 6:9, 10; Efeso 1:9-11; Apocalipsis 21:1-5) Ket iti daytoy naindagaan a Paraiso a kaaduan kadagidiay natnatay​—agraman dagiti maladaga​—mapagungardanto.​—Juan 5:28, 29.

Masapul kadi a mabautisaran ti maysa a tao tapno makiraman iti daytoy naindagaan a panagungar? Saan a kasapulan a kasta. Adu dagiti natnatay iti naespirituan a kinakuneng. (Idiligyo iti Jonas 4:11.) Yantangay dida pay naikkan gundaway a nakaammo ti maipapan iti Dios, saanda a naidedikar dagiti bagbagida kenkuana. Napukaw kadi nga agnanayonen dagiti kakasta? Saan, ta kuna ni apostol Pablo: “Addanto panagungar dagiti nalinteg ken dagiti nakillo.” (Aramid 24:15) Awan duadua a nairaman kadagidiay umariwekwek a mapagungar isudanto dagiti maladaga. Gapuna, ti panagkuna a kasapulan ti bautismo tapno maisalakan dagiti maladaga ti interamente nga awan nakaibatayanna.

Panagkugit ken Bautismo

Dagidiay mangpabpabor iti bautismo ti maladaga, nupay kasta, itudtudoda a dagiti maladaga idiay Israel makugitda di agbayag kalpasan pannakaipasngayda. (Genesis 17:12) Irasrasonda a ti bautismo isut’ nangala ti lugar ti panagkugit kas pamay-an a panangisalakan kadagiti maladaga.

Nupay kasta, ti kadi panagkugit nagserbi kas pamay-an a maipaay iti pannakaisalakan? Saan, dayta ti maysa laeng a makitkita a “pagilasinan iti tulag” nga inaramid ti Dios ken ni Abraham. (Genesis 17:11) Mainayon pay, dagiti laeng lallaki ti makugit. No ti bautismo ket katupagna ti panagkugit, nainkalintegan aya iti di panangbautisar kadagiti maladaga a babbai? Nalawag, dayta a panangiyasping ti di maiyanatop. Laglagipen met koma nga espisipiko nga imbilin ti Kasuratan kadagiti nagannak a Judio a kugiten dagiti annakda a lallaki. No ti pannakaisalakan ket nairaman koma, apay nga awan ti umas-asping a bilin kadagiti Kristiano a nagannak maipapan iti bautismo?

Pudno, kinuna ni Jesus: “Bay-anyo dagiti ubbing a babassit nga umayda kaniak . . . ta dagitoy isuda dagiti agtagikua iti pagarian ti Dios.” (Marcos 10:14) Ngem saan nga ibagbaga ni Jesus ditoy a ti langit ket matagitauanto kadagiti ubbing. Makapainteres, ti Protestante a teologo a ni A. Campbell kunana maipapan iti nailangitan a Pagarian: “Daytat’ saan a buklen dagiti ub-ubbing no di ket dagidiay kas kadakuada a naamo, napakumbaba ken naemma.”

Ti Annak ti Manamati “Nasantuanda”

Binilin ni Jesus dagiti paspasurotna “inkayo . . . ket agaramidkayo ti ad-adalan [wenno, dagiti nasursuruan] kadagiti tattao iti isuamin a nasion, a bautisaranyo ida.” (Mateo 28:19) Ngarud dagidiay natataenganen ti agbalin nga adalan, wenno nasursuruan, ti mabautisaran. Gapuna, dagiti pudno a Kristiano itatta pagreggetanda a sanayen​—saan a bautisaran​—dagiti annakda manipud kinamaladagada. (2 Timoteo 3:15) Bayat a dagiti annak mapadakkelda “iti disiplina ken panangiturong-panunot ni Jehova,” mapatanordanto ti bukodda a pammati.​—Efeso 6:4.

Kabayatanna, di rebbeng a pagbutngan dagiti nagannak a ti agnanayon a pagimbagan dagiti ub-ubbing nga annakda ket agpegpeggad no saanda a mabautisaran. Idiay 1 Corinto 7:14 nangted pammatalged ni apostol Pablo a ti annak dagiti Kristiano a nagannak ket “nasantuanda.” Daytoy ket saan a gapu iti ilalasatda iti maysa a pormalistiko a seremonia no di ket gapu ta siaasi nga inyawat ti Dios ti nadalus a takder kadakuada la ketdi no maysa kadagiti nagannak kadakuada ket agtalinaed a matalek kas maysa a Kristiano.

Ti matalek nga ulidan dagiti nagannak, agraman ti pannakasanay iti Biblia nga awaten dagiti annakda, ti agangay mangtignayto kadagiti agtutubo a mangidedikar iti bagbagida iti Dios ken isimbolo daytoy babaen iti bautismo. Dagiti manangipateg a puspusoda ti mangtignayto kadakuada nga agtultuloy babaen ti panangipaay ‘iti sagrado a serbisio agraman ti panagrasonda.’ (Roma 12:1) Dagitoy dagiti bambanag a di pulos matarusan iti bassit a maladaga.

[Dagiti Footnote]