Salsaludsod Dagiti Agbasbasa
Ania ti kayat a sawen ni Jesus idi kinunana ken ni Nicodemo: “Awan ti tao nga immuli sadi langit no di daydiay bimmaba manipud langit, ti Anak ti tao”?—Juan 3:13.
Adda pay la idi ditoy daga ni Jesus, saan pay a nagsubli idiay langit. Nupay kasta, makatulong dagiti impormasion nga ammotayo maipapan ken ni Jesus ken ti konteksto ti sinaona tapno matarusantayo no ania ti kayatna a sawen.
Nupay agnanaed idi ni Jesus iti lugar dagiti espiritu iti denna ni Amana, isu ket “bimmaba manipud langit” iti naituding a tiempo babaen ti pannakayakarna iti aanakan ni Maria, ket naipasngay kas tao. (Lucas 1:30-35; Galacia 4:4; Hebreo 2:9, 14, 17) Kalpasan ti ipapatayna, napagungar ni Jesus kas maysa nga espiritu ket nagsubli iti denna ni Jehova. Gapuna, sakbay unay ti pannakapapatayna, inkararag ni Jesus: “Ama, padayagennak iti sibaymo iti dayag nga adda kaniak idi iti sibaymo sakbay a naadda ti lubong.”—Juan 17:5; Roma 6:4, 9; Hebreo 9:24; 1 Pedro 3:18.
Idi kasarsarita ni Jesus ni Nicodemo, maysa a Fariseo ken mannursuro idiay Israel, saan pay idi a nagsubli ni Jesus idiay langit. Wen, awan pay idi ti sabali a tao a natay sa napan idiay langit, ti lugar dagiti espiritu. Ni Jesus a mismo ti nagkuna a nupay ni Juan a Mammautisar ket naisangsangayan a propeta ti Dios, “daydiay a nanumnumo iti pagarian ti langlangit ket dakdakkel ngem isu.” (Mateo 11:11) Ni met apostol Pedro kinunana a natay ni matalek nga Ari David ngem kaskasdi nga adda pay laeng iti tanemna; saan a nagpalangit ni David. (Aramid 2:29, 34) Adda rason no apay a saan a nagpalangit ni David, ni Juan a Mammautisar, ken ti dadduma pay a matalek a tattao a natay sakbay ni Jesus. Natayda ngamin sakbay a linuktan ni Jesus ti dalan wenno gundaway a mapagungar dagiti tattao iti nailangitan a biag. Insurat ni apostol Pablo a ni Jesus, kas iti maysa a manangyuna, ‘inaguraranna ti maysa a baro ken nabiag a dalan’ agturong idiay langit.—Hebreo 6:19, 20; 9:24; 10:19, 20.
Gapu ta saan pay idi a natay ken nagungar ni Jesus, ania ti kayatna a sawen idi kinunana ken ni Nicodemo: “Awan ti tao nga immuli sadi langit no di daydiay bimmaba manipud langit, ti Anak ti tao”? (Juan 3:13) Usigentayo ti konteksto, wenno ti pannakisarita ni Jesus ken ni Nicodemo.
Iti daydi a rabii a napan ken ni Jesus ti Judio nga agturay, kinuna kenkuana ni Jesus: “Pudno unay kunak kenka, Malaksid no ti asinoman mayanak manen, saanna a mabalin a kitaen ti pagarian ti Dios.” (Juan 3:3) Inyimtuod ni Nicodemo: ‘Mabalin kadi dayta? Kasano koma a mamindua a mayanak ti maysa a tao?’ Dina naawatan ti nadibinuan a sursuro maipapan iti iseserrek iti Pagarian ti Dios. Adda kadi pamay-an tapno matarusanna dayta? Bueno, saanna a maadal dayta iti sabali a tao yantangay awan ti tao a napan idiay langit tapno mangilawlawag koma no kasano ti sumrek iti Pagarian. Ni Jesus laeng ti makabael a mangaramid iti dayta. Mabalinna nga isuro ni Nicodemo ken dagiti dadduma gapu ta isu ket naggapu idiay langit ken kualipikado a mangisuro kadagiti tattao maipapan kadagita a bambanag.
No kasta, ti saludsod iti daytoy a teksto ket mangisuro iti napateg a leksion no maipapan iti panagadal iti Sao ti Dios. Saan koma a pakaupayan ti maysa no adda teksto a kasla narigatna a matarusan. Ti ibaga ti Biblia iti maysa a teksto ket nasken a mamatmatan babaen ti tulong ti dadduma pay a teksto ken masapul a maitunos kadagita. Maysa pay, masansan a makatulong ti konteksto―ti kasasaad wenno ti topiko―tapno masarakantayo ti rasonable ken lohikal a kaipapanan ti maysa a mamagpanunot a teksto.