Kasanoka a Maaddaan iti Biag nga Agnanayon?
Sungbat ti Biblia
Ikari ti Biblia: “Ti tao a mangar-aramid iti kayat ti Dios agbiag nga agnanayon.” (1 Juan 2:17, Holy Bible—Easy-to-Read Version) Ania ti kayat ti Dios nga aramidem?
Adalem ti maipapan iti Dios ken iti Anakna a ni Jesus. Imbaga ni Jesus iti kararagna iti Dios: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) Ania ti ramanen ti ‘pananggun-od iti pannakaammo’ maipapan iti Dios ken ni Jesus? Maam-ammotayo ida babaen ti panangadaltayo iti Biblia ken panangyaplikar iti mensahe dayta.a Ipakita ti Biblia ti pampanunot ti Namarsua kadatayo a ni Jehova a Dios, ti Gubuayan ti biagtayo. (Aramid 17:24, 25) Ibaga pay ti Biblia ti maipapan iti Anakna a ni Jesus, ti nangisuro iti “sasao ti agnanayon a biag.”—Juan 6:67-69.
Ipakitam ti pammatim iti daton a subbot ni Jesus. Immay ni Jesus ditoy daga “tapno agserbi ken tapno itedna ti kararuana kas subbot.” (Mateo 20:28) Gapu iti daton a subbot ni Jesus, naaddaan dagiti tattao iti gundaway nga agbiag nga agnanayon iti Paraiso a daga.b (Salmo 37:29) Kinuna ni Jesus: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.” (Juan 3:16) Kayatna a sawen, saan nga umdas ti basta panamati ken Jesus. Masapul a ‘watwatentayo ti pammatitayo kenkuana,’ ket pilientayo ti agbiag maitunos kadagiti pannursurona ken iti pagayatan ni Amana.—Mateo 7:21; Santiago 2:17.
Pabilgem ti pannakigayyemmo iti Dios. Kayat ti Dios nga umasideg ken makigayyemtayo kenkuana. (Santiago 2:23; 4:8) Awan nangrugian ti Dios. Saan a pulos matay, ket kayatna nga agbiag met nga agnanayon dagiti gayyemna. Babaen ti Saona, imbaga ti Dios ti kayatna para iti amin a mangbirbirok kenkuana: “Agbiagkayonto koma iti agnanayon.”—Salmo 22:26, New World Translation.
Di Umiso a Kapanunotan Maipapan iti Panagbiag nga Agnanayon
Di Umiso: Mangyeg iti biag nga agnanayon ti panangikagumaan dagiti tattao.
Umiso: Nupay ikagkagumaan ti dadduma a panagrang-ay iti medisina a paatiddogen ti biag ti tao, saan a mangyeg dayta iti biag nga agnanayon. Ti laeng Dios ti makaited kadatayo iti biag nga agnanayon ta isu laeng ti “ubbog ti biag.” (Salmo 36:9) Inkarina nga “alimonennanto ni patay iti agnanayon” ken ikkanna iti biag nga agnanayon ti amin a matalek a tattao.—Isaias 25:8; 1 Juan 2:25.
Di Umiso: Adda laeng dagiti puli ti tao nga agbiagto nga agnanayon.
Umiso: Awan ti pabpaboran ti Dios. Imbes ketdi, “iti tunggal nasion anamonganna ti tao nga agbuteng kenkuana ken agaramid iti kinalinteg.” (Aramid 10:34, 35) Mabalin nga agbiag nga agnanayon dagiti tattao nga agtultulnog iti Dios aniaman ti puli ken kulturada.
Di Umiso: Makaumanto ti agbiag nga agnanayon.
Umiso: Ti biag nga agnanayon ket ituktukon ti Dios, a mangay-ayat kadatayo ken kayatna a naragsaktayo. (Santiago 1:17; 1 Juan 4:8) Ammona a masapul a maaddaantayo iti makapnek a trabaho tapno agbalintayo a naragsak. (Eclesiastes 3:12) Ikari ti Dios a dagiti agbiag nga agnanayon ditoy daga ket maaddaanto iti makapnek a trabaho a pakagunggonaanda ken dagiti ipatpategda.—Isaias 65:22, 23.
Kanayonanna, dagidiay agbiag nga agnanayon itultuloydanto ti agsursuro iti baro a bambanag maipapan iti Namarsua kadakuada ken iti nagduduma a parsuana. Inaramidna ti tao nga addaan iti tarigagay nga agbiag nga agnanayon ken mangam-ammo kenkuana uray no ‘saanda a pulos masarakan ti aramid nga inaramid ti pudno a Dios manipud pangrugian agingga iti pagnguduan.’ (Eclesiastes 3:10, 11) Gapuna, kanayonto nga adda makapainteres a banag nga adalen ken aramiden dagidiay agbiag nga agnanayon.
a Mangituktukon dagiti Saksi ni Jehova iti libre a programa a panagadal iti Biblia. Para iti ad-adu pay nga impormasion, buyaem ti video a Kasano ti Panagadal iti Biblia?
b Kitaem ti artikulo a “Kasano a Mangisalakan ni Jesus?”