No Ania ti Insuro ni Jesus Maipapan iti Dios

“Ti laeng Anak ti talaga a makaam-ammo iti Ama. Ngem tarigagayan ti Anak nga ibaga iti sabsabali ti maipapan iti Ama, tapno maam-ammoda met.”​—LUCAS 10:22, CONTEMPORARY ENGLISH VERSION.

SAKBAY a nagbalin a tao ti inauna nga Anak ti Dios, naunday a panawen a nagkadkaduada ken Amana. (Colosas 1:15) Gapuna, nagbalin a pamiliar ti Anak iti pampanunot, rikrikna, ken kadagiti wagas ni Amana. Idi a ti Anak immay ditoy daga kas ti tao a ni Jesus, sigagagar nga insurona ti kinapudno maipapan ken Amana. Adu ti masursurotayo maipapan iti Dios babaen ti panagimdengtayo iti Anakna.

Nagan ti Dios Nakapatpateg ken Jesus ti nagan ti Dios a Jehova. Daytoy a dungdungnguen nga Anak tinarigagayanna a dagiti tattao maam-ammo ken usarenda ti nagan ni Amana. Ti mismo a nagan ni Jesus kaipapananna a “Ni Jehova ti Pakaisalakanan.” Idi rabii sakbay ti ipapatayna, naibaga ni Jesus idi nagkararag ken Jehova: “Impakaammok kadakuada ti naganmo.” (Juan 17:26) Di pakasdaawan nga inusar ni Jesus ti nagan ti Dios ken impakaammona dayta iti sabsabali. Ngamin, kasano koma a dagiti dumdumngeg ken Jesus matarusanda ti maipapan ken Jehova no dida man la ammo ti naganna ken no ania ti kaipapanan dayta?a

Naindaklan nga ayat ti Dios Naminsan, inkararag ni Jesus iti Dios: “Ama, . . . inayatnak sakbay ti pannakabangon ti lubong.” (Juan 17:24) Tinagiragsak ni Jesus ti ayat ti Dios bayat ti kaaddana idiay langit, isu nga idi adda ditoy daga, inkagumaanna nga impalgak dagiti nagduduma nga aspeto dayta nga ayat.

Impakita ni Jesus a nalawa ti saklawen ti ayat ni Jehova. Kinuna ni Jesus: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.” (Juan 3:16) Saan a “ti daga” ti tuktukoyen ti Griego a sao a naipatarus a “lubong.” Kas nausar ditoy, dagiti tattao wenno ti intero a sangatauan ti talaga a tuktukoyen dayta a sao. Kasta unay ti panagayat ti Dios iti sangatauan isu nga impaayna ti patpatgenna unay nga Anak tapno mawayawayaan dagiti matalek a tattao manipud iti panangadipen ti basol ken ipapatay ket maaddaanda iti namnama a biag nga agnanayon. Ditay naan-anay a matukod ti kinatan-ok ti kasta nga ayat.​—Roma 8:38, 39.

Pinatalgedan ni Jesus ti kasiguraduan a kinapudno: Nasged ti panagayat ni Jehova iti tunggal indibidual nga agdaydayaw kenkuana. Insuro ni Jesus a ni Jehova ket kas iti pastor a mangibilbilang a naisangsangayan ken nakapatpateg ti tunggal maysa a karnerona. (Mateo 18:12-14) Kinuna ni Jesus nga awan ti uray maysa a billit-tuleng a matnag iti daga a saan nga ammo ni Jehova. Innayon ni Jesus: “Dagiti mismo a buok ti uloyo nabilangda amin.” (Mateo 10:29-31) No kabaelan ni Jehova nga ammuen no mapukpukaw ti maysa a billit-tuleng manipud iti partikular nga umok, saan kadi nga ad-adda pay nga ammona ken aywananna ti tunggal tao nga agdaydayaw kenkuana? No kabaelan ni Jehova a numeruan ken ipaayan atension ti tunggal buok iti ulotayo, adda kadi dina ammo a detalye maipapan iti biagtayo​—dagiti kasapulantayo, dagiti panagregget nga ar-aramidentayo, ken dagiti pakadanagantayo?

Nailangitan nga Ama Kas nadakamaten, ni Jesus ti bugbugtong nga Anak ti Dios. Di pakasdaawan a daytoy a dungdungnguen nga Anak kanayon nga awagan ken tukoyenna ni Jehova kas ti ‘Amana.’ Kinapudnona, iti damo a naisurat a sasao ni Jesus iti kaaddana idiay templo idi isu ket agtawen iti 12, tinukoyna ni Jehova kas “ni Amak.” (Lucas 2:49) Dandani 190 a daras nga agparang ti sao nga “Ama” kadagiti Ebanghelio. Iti nagduduma a gundaway, dinakamat ni Jesus ni Jehova kas “Amayo,” “Amami,” ken “ni Amak.” (Mateo 5:16; 6:9; 7:21) Babaen ti pasaray panangusar ni Jesus iti dayta nga awag, impakitana a kabaelan dagiti managbasol ken imperpekto a tattao ti maaddaan iti nabara ken nasinged a relasion ken Jehova.

Naasi ken sidadaan a mangpakawan Ammo ni Jesus a kasapulan dagiti imperpekto a tattao ti naruay nga asi ni Jehova. Iti pangngarigna maipapan iti barayuboy nga anak, inyarig ni Jesus ni Jehova iti naasi, manangpakawan nga ama a nangabrasa manen iti agbabbabawi nga anakna. (Lucas 15:11-32) Ipatalged ngarud dagiti sasao ni Jesus a kitkitaen ni Jehova no adda aniaman a nagbalbaliwan ti puso ti maysa a managbasol a pangibatayanna a mangipakita iti asi. Sigagagar ni Jehova a mangpakawan iti maysa nga agbabbabawi a managbasol. “Ibagak kadakayo,” inlawlawag ni Jesus, “a kasta met nga ad-addanto ti rag-o sadi langit gapu iti maysa a managbasol nga agbabawi ngem iti siam a pulo ket siam a nalinteg a saanda a kasapulan ti panagbabawi.” (Lucas 15:7) Siasino ti saan a magutugot nga umadani iti kasta a naasi a Dios?

Managdengngeg iti kararag Idiay langit sakbay ti iyaay ni Jesus ditoy daga, nasaksian a mismo ni Jesus a ni Jehova ket “Managdengngeg iti kararag” ken pakaragsakanna ti kararag dagiti matalek nga agdaydayaw kenkuana. (Salmo 65:2) Gapuna, bayat ti ministerio ni Jesus, insurona kadagiti dumdumngeg kenkuana no kasano ti agkararag ken no ania ti ikararagda. “Dikay ulit-uliten a sawen ti isu met laeng a bambanag,” imbalakadna. Indagadagna kadakuada nga ikararagda a “maaramid koma ti pagayatan [ti Dios], kas sadi langit, kasta met iti daga.” Mabalintay met nga ikararag a maipaayantayo koma iti inaldaw a taraon, mapakawan koma dagiti basoltayo, ken masarangettayo koma ti sulisog. (Mateo 6:5-13) Insuro ni Jesus a naamaan ti panangsungbat ni Jehova iti kararag dagiti adipenna, a sungbatanna dagiti napasnek ken nabuyogan pammati a kiddawda.​—Mateo 7:7-11.

Talaga nga inkagumaan ni Jesus nga insuro ti kinapudno maipapan ken Jehova ken no ania a kita a Dios ni Amana. Ngem adda pay sabali maipapan ken Jehova a sigagagar nga inranud ni Jesus​—ti pamay-an ni Jehova a mangibanag kadagiti sangalubongan a panagbalbaliw tapno matungpal ti panggepna para iti daga ken kadagiti tattao nga agnaed iti dayta. Kinapudnona, dayta nga aspeto ti mensahe ni Jesus ti tema ti panangasabana.

[Footnote]