Ti Kakaisuna a Dalan nga Agturong iti Biag nga Agnanayon
“Siak ti dalan ken ti kinapudno ken ti biag.”—JUAN 14:6.
1, 2. Ania ti nangyarigan ni Jesus iti dalan nga agturong iti biag nga agnanayon, ket ania ti kaipapanan ti ilustrasionna?
ITI nalatak a Sermonna iti Bantay, inyarig ni Jesus ti dana nga agturong iti biag nga agnanayon iti dalan nga adda ruanganna a serkan ti tao. Imutektekanyo ta impaganetget ni Jesus a saan a nalaka ti sumrek iti daytoy a dalan nga agturong iti biag, a kunkunana: “Sumrekkayo iti akikid a ruangan; agsipud ta akaba ken nalawa ti dalan nga agturong iti pannakadadael, ket adu dagidiay sumrek iti dayta; idinto ta akikid ti ruangan ken nailet ti dalan nga agturong iti biag [nga agnanayon], ket bassit dagidiay makasarak iti dayta.”—Mateo 7:13,14.
2 Maawatanyo kadi ti kaipapanan daytoy nga ilustrasion? Saan kadi nga ipalgakna nga adda laeng maymaysa a dana, wenno dalan, nga agturong iti biag ket masapul nga agannadtayo a naimbag tapno saantay a maisiasi iti dayta a dalan nga agturong iti biag? Ania ngarud daytoy kakaisuna a dalan nga agturong iti biag nga agnanayon?
Ti Akem ni Jesu-Kristo
3, 4. (a) Kasano nga ipakita ti Biblia ti napateg nga akem ni Jesus iti pannakaisalakantayo? (b) Kaano ti damo a panangipalgak ti Dios a mabalin a magun-odan ti sangatauan ti biag nga agnanayon?
3 Nalawag nga adda napateg nga akem ni Jesus mainaig iti dayta a dalan, kas imbaga ti apostolna a ni Pedro: “Awan ti asinoman a sabali a pakaisalakanan, ta awan ti sabali a nagan iti baba ti langit [malaksid iti nagan ni Jesus] a naited kadagiti tattao a masapul a pakaisalakanantayo.” (Aramid 4:12) Kasta met, kinuna ni apostol Pablo: “Ti sagut nga ipaay ti Dios isu ti agnanayon a biag babaen ken Kristo Jesus nga Apotayo.” (Roma 6:23) Impalgak mismo ni Jesus nga isu ti kakaisuna a dalan nga agturong iti biag nga agnanayon, ta kinunana: “Siak ti dalan ken ti kinapudno ken ti biag.”—Juan 14:6.
4 Gapuna, nasken a bigbigentayo ti akem ni Jesus a mamagbalin a posible ti biag nga agnanayon. Usigentay ngarud a naimbag ti akemna. Ammoyo kadi no kaano, kalpasan a nagbasol ni Adan, ti panangibaga ni Jehova a Dios a mabalin a tagiragsaken ti sangatauan ti biag nga agnanayon? Dagdagus kalpasan a nagbasol ni Adan. Usigentay ita no kasano a damo a naipadto ti akem ni Jesu-Kristo a kas Manangisalakan iti sangatauan.
Ti Naikari a Bin-i
5. Kasanotay a maammuan no asino ti serpiente a nangsulbog ken Eva?
5 Impabigbig ni Jehova a Dios iti simboliko a sasao ti naikari a Manangisalakan. Inaramidna daytoy idi sinentensiaanna ti “serpiente” a nagsao ken ni Eva ken nangsulisog kenkuana nga agsukir iti Dios babaen ti pannanganna iti naiparit a bunga. (Genesis 3:1-5) Siempre, saan a literal nga uleg dayta a serpiente. Maysa daytoy a mannakabalin nga espiritu a parsua a nainaganan iti Biblia kas “ti kadaanan a serpiente, daydiay naawagan iti Diablo ken Satanas.” (Apocalipsis 12:9) Inusar ni Satanas daytoy nanumo nga animal kas pannakangiwatna a nangsulisog ken Eva. Iti kasta, idi sinentensiaanna ni Satanas, kinuna ti Dios kenkuana: “Siak pagginnuraenkayto iti babai, ken ti kaputotam [“bin-im,” NW] ken ti kaputotanna [“bin-ina,” NW]: daytoy [ti bin-i ti babai] sugatennanto ta ulom, ket sika sugatemto ti mukodna.”—Genesis 3:15.
6, 7. (a) Siasino ti babai a mangipasngay iti “bin-i”? (b) Asino ti naikari a Bin-i, ket ania ti aramidenna?
6 Siasino daytoy “babai” a kabinnusor wenno kaginnura ni Satanas? No kasano a naipabigbig “ti kadaanan a serpiente” iti Apocalipsis kapitulo 12, kasta met daytoy babai a kagura ni Satanas. Imutektekanyo iti Apo 12 bersikulo 1 ta nailadawan ti babai a kas “nakawesan iti init, ket ti bulan adda iti babaen dagiti sakana, ket iti ulona adda ti maysa a korona a sangapulo ket dua a bituen.” Daytoy a babai irepresentarna ti nailangitan nga organisasion ti Dios a buklen dagiti matalek nga anghel, ket ti “anak a lalaki” nga impasngayna irepresentarna ti Pagarian ti Dios, a ni Jesu-Kristo ti agturturay kas Ari.—Apocalipsis 12:1-5, The Jerusalem Bible.
7 Siasino ngarud ti “bin-i,” wenno kaputotan, ti babai a nadakamat iti Genesis 3:15, a mangsugat ken Satanas ‘iti ulo,’ a mangpapatay kenkuana? Isu daydiay imbaon ti Dios manipud langit a milagro nga impasngay ti maysa a birhen, wen, daydi tao a ni Jesus. (Mateo 1:18-23; Juan 6:38) Ipalgak ti kapitulo 12 ti Apocalipsis a kas napagungar a nailangitan nga Agturay, daytoy a Bin-i, ni Jesu-Kristo, ti mangidaulo a mangparmek ken ni Satanas ket ipasdekna, kas kuna ti Apocalipsis 12:10, “ti pagarian ti Diostayo ken ti kinaturay ni Kristona.”
8. (a) Ania a baro a banag ti impaay ti Dios mainaig iti orihinal a panggepna? (b) Siasino dagiti mangbukel iti baro a gobierno ti Dios?
8 No kasta, daytoy a Pagarian iti babaen ni Jesu-Kristo ket maysa a baro a banag nga impaay ti Dios mainaig iti orihinal a panggepna para kadagiti tattao, nga isu ti panagbiagda nga agnanayon ditoy daga. Kalpasan ti iyaalsa ni Satanas, nagtignay a dagus ni Jehova tapno mapukaw amin a dakes a resulta ti kinadakes babaen daytoy baro a gobierno ti Pagarian. Idi adda ni Jesus ditoy daga, impalgakna nga isu ket saan nga agmaymaysa iti daytoy a gobierno. (Lucas 22:28-30) Adda dagiti mapili iti sangatauan, ket dagitoy ti kakaduana nga agturay sadi langit, iti kasta isuda ti mangbukel iti segundario a paset ti bin-i ti babai. (Galacia 3:16,29) Iti Biblia, ti bilang dagitoy a makipagturay ken Jesus—a naalada amin manipud iti managbasol a sangatauan ditoy daga—ket 144,000.—Apocalipsis 14:1-3.
9. (a) Apay a nasken idi nga agparang ni Jesus ditoy daga kas tao? (b) Kasano a winaswas ni Jesus dagiti aramid ti Diablo?
9 Ngem sakbay a mangrugi nga agturay dayta a Pagarian, nasken nga agparang ditoy daga ti kangrunaan a paset ti bin-i, ni Jesu-Kristo. Apay? Agsipud ta isu ti dinutokan ni Jehova a Dios a ‘mangdadael [wenno, mangwaswas] kadagiti aramid ti Diablo.’ (1 Juan 3:8) Nairaman kadagiti aramid ni Satanas ti panangimpluensiana ken Adan nga agbasol, nga isu ti nakakondenaran amin a kaputotan ni Adan iti basol ken ipapatay. (Roma 5:12) Winaswas ni Jesus daytoy nga aramid ti Diablo babaen ti panangipaayna iti biagna a kas subbot. Iti kasta impaay ni Jesus ti pangibatayan iti pannakawayawaya ti sangatauan manipud pannakakondenar iti basol ken ipapatay ket linuktanna ti dalan nga agturong iti biag nga agnanayon.—Mateo 20:28; Roma 3:24; Efeso 1:7.
No Ania ti Maibanag ti Subbot
10. Kasano nga agpada da Jesus ken Adan?
10 Tangay nayallatiw ti biag ni Jesus manipud langit iti aanakan ti maysa a babai, isu ket naipasngay kas perpekto a tao, a di natulawan iti basol a naggapu ken Adan. Adda idi gundawayna nga agbiag nga agnanayon ditoy daga. Naparsua met ni Adan kas perpekto a tao nga addaan gundaway a mangtagiragsak iti biag nga agnanayon ditoy daga. Adda idi iti panunot ni apostol Pablo ti pagpadaan dagitoy dua a tao idi insuratna: “‘Ti umuna a tao a ni Adan nagbalin a sibibiag a kararua.’ Ti maudi nga Adan [ni Jesu-Kristo] nagbalin a mangted-biag nga espiritu. Ti immuna a tao nagtaud iti daga ken naaramid iti tapok; ti maikadua a tao naggapu idiay langit.”—1 Corinto 15:45,47.
11. (a) Ania ti epekto ti inaramid da Adan ken Jesus iti sangatauan? (b) Kasanotay koma a matmatan ti daton ni Jesus?
11 Ti pagpadaan dagitoy dua a tao—nga isuda laeng ti dua a perpekto a tao a nagbiag ditoy daga—ket naipaganetget iti kuna ti Biblia a ni Jesus ‘intedna ti bagina kas katupag a subbot nga agpaay iti isuamin.’ (1 Timoteo 2:6) Asino ti katupag ni Jesus? Ay ket, ni Adan idi perpekto pay laeng a tao! Ti basol daydi immuna nga Adan nagresulta iti pannakakondenar ti sangatauan ken patay. Ti daton “ti maudi nga Adan” ipaayna ti pakaibasaran ti pannakaispal manipud iti basol ken ipapatay, tapno mabalintay ti agbiag nga agnanayon. Anian a nagpateg ti daton ni Jesus! Kinuna ni apostol Pedro: “Saan a babaen kadagiti agrupsa a bambanag, iti pirak wenno balitok, a naispalkayo.” Imbes ketdi, inlawlawag ni Pedro: “Babaen iti napateg a dara, a kas iti dara ti maysa nga awan pakapilawanna ken di namulitan a kordero, ti mismo a dara ni Kristo.”—1 Pedro 1:18, 19.
12. Kasano ti panangdeskribir ti Biblia iti pannakawaswas ti panangkondenar ni patay?
12 Nagimnas ti panangdeskribir ti Biblia iti wagas a pannakawaswas ti pannakakondenar ti sangatauan ken patay, a kunkunana: “Babaen ti maysa a labsing [ni Adan] imbungana ti pannakakondenar iti amin a kita ti tattao, kasta met a babaen ti maysa nga aramid a panangpalinteg [ti kinatarnaw ni Jesus agingga ken patay] imbungana iti amin a kita ti tattao ti pannakaideklarada a nalinteg maipaay iti biag. Ta no kasano a babaen ti kinasukir ti maysa a tao [ni Adan] adu ti naibilang a managbasol, kasta met a babaen ti panagtulnog ti maysa a tao [ni Jesus] adu ti maibilangto a nalinteg.”—Roma 5:18, 19.
Nadayag a Namnama
13. Apay nga adu ti madi nga agbiag nga agnanayon?
13 Rumbeng a maragsakantayo unay iti daytoy a probision ti Dios! Saankay kadi a maayatan ta addan naipaay a Mangisalakan? Iti surbey nga insayangkat naminsan ti maysa a pagiwarnak iti maysa a dakkel a siudad ti America, makapakellaat ta 67.4 porsiento kadagiti napagsaludsodan ti simmungbat iti “Saan” iti saludsod a, “Kayatyo kadi ti agbiag nga agnanayon?” Apay a kunada a dida kayat ti agbiag nga agnanayon? Nabatad a gapu ta napakuyogan ti biag ditoy daga ita iti nagadu a problema. Kinuna ti maysa a babai: “Diak magustuan ti kapanunotan a 200 a tawen ti langak.”
14. Apay a nakaay-ayatto unay ti panagbiag nga agnanayon?
14 Ngem saan a sarsaritaen ti Biblia ti maipapan iti panagbiag nga agnanayon iti maysa a lubong nga agsagsagaba dagiti tattao iti sakit, panaglakay, ken dadduma pay a nasaem a kasasaad. Saan, ta kas agturay iti Pagarian ti Dios, pukawento ni Jesus amin dagita a problema a pinataud ni Satanas. Sigun iti Biblia, ti Pagarian ti Dios “burakennanto ken ibusennanto amin” dagiti mangirurumen a gobierno ditoy lubong. (Daniel 2:44) Iti dayta a tiempo, kas sungbat iti kararag nga insuro ni Jesus kadagiti pasurotna, ti “pagayatan” ti Dios “maaramidto ditoy daga a kas sadi langit.” (Mateo 6:9,10, Today’s English Version) Iti baro a lubong ti Dios, inton nadalusanen daytoy a daga iti amin a kinadakes, naan-anay a maiburayton dagiti pagimbagan nga itden ti subbot nga impaay ni Jesus. Wen, amin a maikari maaddaandanto iti perpekto a salun-at!
15, 16. Anianto dagiti kasasaad iti baro a lubong ti Dios?
15 Kadagiti tattao nga agbibiag iti baro a lubong ti Dios, matungpalto dagitoy a sasao ti Biblia: “Ti lasagna nasalsalibukagto ngem iti lasag ti maysa nga ubing; isu agsubli kadagiti al-aldaw ti kinaubingna.” (Job 33:25) Matungpalto met ti maysa pay a kari ti Biblia: “Maluktanton dagiti mata ti bulsek, ken dagiti lapayag ti tuleng maluktandanto. Iti kasta aglagtonto ti pilay a kas maysa nga ugsa, ken ti dila ti umel agkantanto.”—Isaias 35:5, 6.
16 Panunotenyo: Aniaman ti pisikal nga edadtayo iti dayta a tiempo, 80, 800, wenno uray nasursurok pay, kankanayonto a nasalibukag ti bagitayo. Kas inkari ti Biblia: “Ti agtaeng dinanto kunaen, Masakitak.” Iti dayta a tiempo, matungpalto met daytoy a kari: “[Ti Dios] punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Dagiti immuna a bambanag naglabasdan.”—Isaias 33:24; Apocalipsis 21:3, 4.
17. Ania ti mabalintay a namnamaen a maaramidan dagiti tattao iti baro a lubong ti Dios?
17 Iti dayta baro a lubong, mausartayton ti nakaskasdaaw nga utektayo sigun iti nangirantaan ti Namarsua kadatayo idi diniseniona dayta nga addaan di nakedngan a kapasidad nga agsursuro. Panunotenyo laengen dagiti nakaskasdaaw a banag a maaramidtayto! Nabaelanto pay uray dagiti imperpekto a tattao ti mangaramid manipud kadagiti elemento ti daga kadagiti amin a banag a makitatayo iti aglikmuttayo—dagiti cellular phone, mikropono, relo, pager, kompiuter, eroplano, wen, aginagankayo. Awan kadagita ti naaramid kadagiti material nga insangpetda manipud iti adayo a lugar iti uniberso. Tangay mabalintay ti agbiag nga agnanayon, dinto maungpot ti kabaelantayo nga aramiden iti sumungsungad a naindagaan a Paraiso!—Isaias 65:21-25.
18. Apay a saanto a pulos makauma ti biag iti baro a lubong ti Dios?
18 Ken saanto a makauma ti biag. Uray ita segseggaantayo ti sumaruno a pannangantayo, nupay pinullo ribu a daras a nangantayon. No perpektonton ti tao, ad-addanto a matagiragsaktayo dagiti agkakaimas a produkto ti Paraiso a daga. (Isaias 25:6) Ken sagrapentayto ti awan inggana a ragsak iti panangaywan kadagiti nagadu nga animal iti daga ken maayatantayto a mangbuya kadagiti nangayed nga ilelennek ti init, bambantay, karkarayan, ken gingginget. Wen, saanto a pulos makauma ti biag iti baro a lubong ti Dios!—Salmo 145:16.
Panangtungpal Kadagiti Kalikaguman ti Dios
19. Apay a nainkalintegan a patien nga adda dagiti makalikaguman iti pananggun-od iti biag a sagut ti Dios?
19 Namnamaenyo kadi nga awatenyonto ti naindaklan a sagut ti Dios a biag nga agnanayon iti Paraiso nga awan a pulos ti aramidenyo? Saan kadi a nainkalintegan nga adda kalikaguman ti Dios kadatayo? Pudno a kasta. Saan a basta ipalladaw ti Dios dayta a sagut kadatayo. Iyawatna dayta kadatayo, ngem masapul a gaw-aten ken alaentay dayta. Wen, kasapulan ti panagregget. Nalabit mayimtuodyo ti mismo a saludsod daydi nabaknang nga agkabannuag nga agturay a dinamagna ken Jesus: “Ania ti naimbag a masapul nga aramidek tapno magun-odak ti agnanayon a biag?” Wenno nalabit maisaludsodyo ti inyimtuod ti guardia ti pagbaludan a taga Filipos ken apostol Pablo: “Ania ti masapul nga aramidek tapno maisalakanak?”—Mateo 19:16; Aramid 16:30.
20. Ania ti maysa a napateg a makalikaguman iti pananggun-od iti biag nga agnanayon?
20 Iti rabii sakbay ti ipapatayna, dinakamat ni Jesus ti maysa a maipakalikagum kadatayo idi a kinunana iti kararagna iti nailangitan nga Amana: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) Saan kadi a nainkalintegan a makalikaguman ti pananggun-odtayo iti pannakaammo maipapan ken Jehova, a namagbalin a posible ti biag nga agnanayon, ken iti daydiay natay gapu kadatayo, ni Jesu-Kristo? Nupay kasta, saan la a basta pananggun-od iti kasta a pannakaammo ti makalikaguman.
21. Kasanotay a maipakita nga adda pammatitayo kas makalikaguman?
21 Kuna pay ti Biblia: “Ti mangalagad iti pammati iti Anak adda agnanayon a biagna.” Sa kunana pay: “Ti sumukir iti Anak dinanto makita ti biag, ngem ti pungtot ti Dios agtalinaed kenkuana.” (Juan 3:36) Maipakitayo ti pammatiyo iti Anak babaen ti panangbalbaliw iti kabibiagyo ket itunosyo dayta iti pagayatan ti Dios. Masapul a paglikudanyo ti aniaman a dakes a dana a nalabit sinursurotyo idi ket aramidenyo ti makaay-ayo iti Dios. Nasken nga aramidenyo ti imbilin ni apostol Pedro: “Agbabawikayo, ngarud, ket agbaw-ingkayo tapno mapunas dagiti basolyo, tapno dagiti panawen ti pannakabang-ar umayda manipud iti persona ni Jehova.”—Aramid 3:19.
22. Aniada ti ramanen ti panangsurot kadagiti addang ni Jesus?
22 Pulos a ditay koma liplipatan a babaen laeng ti panamatitayo ken Jesus a matagiragsaktayo ti biag nga agnanayon. (Juan 6:40; 14:6) Maipakitatayo ti pammatitayo ken Jesus no “suroten[tayo] a sisisinged dagiti addangna.” (1 Pedro 2:21) Ania ti ramanen ti panangaramid iti dayta? Bueno, iti kararagna iti Dios, kinuna ni Jesus: “Adtoy! Umayak . . . tapno aramidek ti pagayatam, O Dios.” (Hebreo 10:7) Napateg a tuladentayo ni Jesus babaen ti situtulok a panangaramid iti pagayatan ti Dios ken panangidedikar iti biagyo ken Jehova. Kalpasanna, nasken nga isimboloyo dayta a dedikasion babaen ti panagpabautisar iti danum; uray ni Jesus nagpabautisar met idi. (Lucas 3:21,22) Naan-anay a rasonable ti panangaramid kadagita nga addang. Kinuna ni apostol Pablo a “ti ayat nga adda ken Kristo pilitenna[tayo].” (2 Corinto 5:14, 15) Kasano? Bueno, ayat ti nangtignay ken Jesus a nangipaay iti biagna gapu kadatayo. Saan kadi a tignayennatay koma dayta a sumubad babaen ti panamati kenkuana? Wen, tignayennatay koma a mangsurot iti naayat nga ulidan nga impakitana babaen ti panangtulongna kadagiti sabsabali. Inusar ni Kristo ti biagna iti panangaramid iti pagayatan ti Dios; masapul a kasta met ti aramidentayo, a saantayon nga agbiag a maipaay iti bagbagitayo.
23. (a) Iti ania a masapul a mainayon dagidiay makagun-od iti biag? (b) Ania ti maiparebbeng kadagidiay adda iti kongregasion Kristiano?
23 Saan nga agpatingga latta ditan. Kuna ti Biblia nga idi nabautisaran dagiti 3,000 idi Pentecostes 33 K.P., “nainayon[da].” Nakainayonanda? “Intultuloyda nga impamaysa ti bagbagida iti sursuro dagiti apostol ken iti panagririnnanud,” kuna ni Lucas. (Aramid 2:41,42) Wen, nagtataripnongda tapno agadal iti Biblia ken makapaglalangenda ket iti kasta nainayonda, wenno nagbalinda a paset, ti kongregasion Kristiano. Regular a tumabtabuno idi dagiti nagkauna a Kristiano kadagiti gimong maipaay iti naespirituan a pannursuro. (Hebreo 10:25) Ar-aramiden met daytoy dagiti Saksi ni Jehova ita, ket kayatdakay a paregtaen a makitaripnong kadakuada.
24. Ania ti “pudpudno a biag,” ket kasano ken kaanonto a pumayso dayta?
24 Minilion ita ti mangsursurot iti nailet a dalan nga agturong iti biag. Kasapulan ti napaypayso a panagregget iti panagtalinaed iti daytoy nailet a dalan! (Mateo 7:13, 14) Impasimudaag ni Pablo daytoy idi a naimpusuan nga indawatna: “Makirupakka iti nasayaat a dangadang iti pammati, petpetam a sititibker ti agnanayon a biag a maipaay iti dayta naayabanka.” Nasken ti kastoy a pannakidangadang tapno “mapetpetan[tayo] a sititibker ti pudpudno a biag.” (1 Timoteo 6:12,19) Dayta a biag ket saan a ti agdama a biag a napno iti rigat, ut-ot ken panagsagaba nga inyeg ti basol ni Adan. Imbes ketdi, isu dayta ti biag iti baro a lubong ti Dios, a dumtengton iti saan a mabayag inton maipakat ti pateg ti daton a panubbot ni Kristo kadagiti amin a mangay-ayat ken Jehova a Dios ken iti Anakna kalpasan a maikkat ti agdama a sistema ti bambanag. Sapay koma ta pilientay amin ti biag—“ti pudpudno a biag”—agnanayon a biag iti nadayag a baro a lubong ti Dios.
Kasanoyo a Sungbatan?
◻ Siasino ti serpiente, ti babai, ken ti bin-i iti Genesis 3:15?
◻ Kasano a ni Jesus ket katupag ni Adan, ket ania ti pinagbalin a posible ti subbot?
◻ Ania ti mabalinyo a seggaan a mamagbalin iti baro a lubong ti Dios a makaay-ayo unay kadakayo?
◻ Ania ti maikalikagum nga aramidentayo tapno agbiagtayo iti baro a lubong ti Dios?
[Ladawan iti panid 10]
Kadagiti agtutubo ken nataengan, ni Jesus ti kakaisuna a dalan nga agturong iti biag nga awan inggana
[Ladawan iti panid 11]
Iti tiempo nga intuding ti Dios, umubing ken sumalibukagto dagiti lallakay