Agdayaw Dagiti Kristiano Buyogen ti Espiritu ken Kinapudno
“Ti Dios maysa nga Espiritu, ket dagidiay agdaydayaw kenkuana masapul nga agdayawda a buyogen ti espiritu ken kinapudno.”—JUAN 4:24.
1. Ania a panagdayaw ti makaay-ayo iti Dios?
NI Jesu-Kristo, ti bugbugtong nga Anak ni Jehova, imbatadna no ania ti panagdayaw a makaay-ayo iti nailangitan nga Amana. Idi nangted iti makaliwliwa a panangsaksi iti maysa a Samaritana iti bubon iti asideg ti siudad ti Sicar, kinuna ni Jesus: “Agdaydayawkayo iti saanyo nga am-ammo; agdaydayawkami iti am-ammomi, agsipud ta ti pannakaisalakan mamunganay kadagiti Judio. Nupay kasta, um-umayen ti oras, ket itan dayta, a dagiti pudno a managdaydayaw agdayawdanto iti Ama buyogen ti espiritu ken kinapudno, ta, pudno unay, ti Ama sapsapulenna dagiti kasta nga agdayaw kenkuana. Ti Dios maysa nga Espiritu, ket dagidiay agdaydayaw kenkuana masapul nga agdayawda a buyogen ti espiritu ken kinapudno.” (Juan 4:22-24) Ania ti ipamatmatna kadatayo dagita a sasao?
2. Nakaibatayan ti panagdayaw dagiti Samaritano?
2 Addaan dagiti Samaritano kadagiti di umiso a narelihiosuan a panangmatmat. Dagiti laeng umuna a lima a libro ti Nasantuan a Kasuratan ti bigbigenda a naipaltiing—ken iti laeng bukodda a patarus, a naawagan iti Samaritano a Pentateuko. Dagiti Samaritano dida am-ammo a talaga ti Dios, idinto ta naitalek kadagiti Judio ti pannakaammo iti Kasuratan. (Roma 3:1, 2) Mabalin a magun-od dagiti matalek a Judio ken ti sabsabali ti anamong ni Jehova. Ngem ania ti kalikaguman daytoy kadakuada?
3. Ania ti makalikaguman tapno maidayaw ti Dios “buyogen ti espiritu ken kinapudno”?
3 Tapno maay-ayo ni Jehova, ania ti nasken nga aramiden idi dagiti Judio, Samaritano, ken dadduma a tattao? Nasken a dayawenda ti Dios “buyogen ti espiritu ken kinapudno.” Kasta met ti nasken nga aramidentayo. Nupay ti panagserbi iti Dios ket nasken a narayray, wenno naregta, ken tigtignayen ti puso a napno iti ayat ken pammati, ti panagdayaw iti Dios buyogen ti espiritu ket nangnangruna a kalikagumanna nga adda koma kadatayo ti nasantuan nga espirituna ken situtulok nga agpaidalantayo iti dayta. Babaen ti panagadal ken panangyaplikar iti Sao ti Dios, maitunostayo iti espiritu ti Dios ti espiritutayo, wenno panagpampanunottayo. (1 Corinto 2:8-12) Tapno makaay-ayo ti panagdayawtayo ken ni Jehova, nasken a maipaay met dayta buyogen ti kinapudno. Nasken a maitunos dayta iti ipalgak ti Sao ti Dios, ti Biblia, maipapan kenkuana ken kadagiti panggepna.
Mabirokan ti Kinapudno
4. Ania ti panangmatmat ti dadduma iti kinapudno?
4 Dadduma nga estudiante iti pilosopia ti nangparnuay iti kapanunotan a saan a magun-od ti sangatauan ti naan-anay a kinapudno. Kinapudnona, insurat ni Alf Ahlberg, maysa nga autor a taga Sweden: “Adu a pilosopikal a saludsod ti imposible nga espesipiko a masungbatan.” Nupay kuna ti dadduma a relatibo laeng ti kinapudno, kasta kadi a talaga? Saan, sigun ken Jesu-Kristo.
5. Apay nga immay ni Jesus ditoy lubong?
5 Darepdepentay a buybuyaentayo ti sumaganad nga eksena: Dayta ket idi rugrugi ti tawen 33 K.P., a sitatakder ni Jesus iti saklang ti Romano a Gobernador a ni Poncio Pilato. Kinuna ni Jesus ken ni Pilato: “Maigapu itoy nga immayak iti lubong, tapno saksiak ti kinapudno.” Insaludsod ni Pilato: “Ania ti kinapudno?” Ngem dinan inuray ti kayat pay nga ibaga ni Jesus.—Juan 18:36-38.
6. (a) Kasano a nadepinar ti “kinapudno”? (b) Ania ti imbilin ni Jesus kadagiti pasurotna?
6 Ti “kinapudno” ket nadepinar kas “pudno a bambanag, pasamak, ken impormasion.” (Webster’s Ninth New Collegiate Dictionary) Kaskasdi, ti kadi kadawyan a kinapudno ti inkasaba ni Jesus? Saan. Adda espesipiko a kinapudno a pampanunotenna. Imbilinna kadagiti pasurotna nga ipakaammoda dayta a kinapudno, ta kinunana kadakuada: “Mangaramidkayo iti ad-adalan kadagiti tattao iti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu, nga isuroyo kadakuada a tungpalenda ti amin a bambanag nga imbilinko kadakayo.” (Mateo 28:19, 20) Sakbay “ti panungpalan ti sistema ti bambanag,” ipakaammo dagiti pudno a pasurot ni Jesus “ti kinapudno ti naimbag a damag” iti intero a daga. (Mateo 24:3; Galacia 2:14) Maaramid daytoy kas kaitungpalan ti sasao ni Jesus: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.” (Mateo 24:14) Napateg ngarud a mailasintayo dagidiay mangisursuro iti kinapudno iti amin a nasion babaen ti panangikasaba iti naimbag a damag ti Pagarian.
No Kasano a Maadaltayo ti Kinapudno
7. Kasanoyo a paneknekan a ni Jehova ti Gubuayan ti kinapudno?
7 Ni Jehova ti Gubuayan ti naespirituan a kinapudno. Kinaagpaysuanna, ni salmista a David inawaganna ni Jehova kas “Dios ti kinapudno.” (Salmo 31:5; 43:3) Binigbig ni Jesus a pudno ti sao ni Amana, ken kinunana pay: “Adda a naisurat kadagiti Mammadto, ‘Ket sursuruanto amin ida ni Jehova.’ Tunggal maysa a dimngeg iti Ama ken nakasursuro umay kaniak.” (Juan 6:45; 17:17; Isaias 54:13) Nalawag ngarud a dagidiay agsapsapul iti kinapudno nasken nga agpaisuroda ken ni Jehova, ti Naindaklan nga Instruktor. (Isaias 30:20, 21) Dagidiay agbirbirok iti kinapudno masapul a gun-odenda ti “mismo a pannakaammo iti Dios.” (Proverbio 2:5) Ken nadumaduma ti pamay-an a siaayat nga insuro wenno inyallatiw ni Jehova ti kinapudno.
8. Kadagiti ania a wagas nga insuro wenno impakaammo ti Dios ti kinapudno?
8 Kas pagarigan, ti Dios intedna ti Linteg kadagiti Israelita babaen dagiti anghel. (Galacia 3:19) Iti tagtagainep, inkarina dagiti bendision kada patriarka nga Abraham ken Jacob. (Genesis 15:12-16; 28:10-19) Nagsao pay ti Dios manipud langit, kas idi nabautisaran ni Jesus ket kastoy ti makapagagar a sasao a nangngeg ditoy daga: “Daytoy ti Anakko, ti dungdungnguen, nga inanamongak.” (Mateo 3:17) Agyamantayo met ta impakaammo ti Dios ti kinapudno babaen ti panangpaltiingna kadagiti mannurat iti Biblia. (2 Timoteo 3:16, 17) No adalentayo ngarud ti Sao ti Dios, maaddaantayo iti ‘pammati iti kinapudno.’—2 Tesalonica 2:13.
Ti Kinapudno ken ti Anak ti Dios
9. Kasano nga inusar ti Dios ti Anakna a mangipalgak iti kinapudno?
9 Ni Jesu-Kristo, ti Anak ti Dios, ti kangrunaan nga inusar ni Jehova a mangipalgak iti kinapudno iti sangatauan. (Hebreo 1:1-3) Kinapudnona, naisangsangayan ti panangipakaammo ni Jesus iti kinapudno. (Juan 7:46) Uray idi nagsublin idiay langit, impalgakna ti kinapudno a naggapu iti Amana. Kas pagarigan, inawat ni apostol Juan “ti palgaak ni Jesu-Kristo, nga inted kenkuana ti Dios, tapno ipakitana kadagiti adipenna ti bambanag a masapul a maaramid iti mabiit.”—Apocalipsis 1:1-3.
10, 11. (a) Ania ti nakainaigan ti kinapudno a sinaksian ni Jesus? (b) Kasano a pinagbalin ni Jesus a napaypayso ti kinapudno?
10 Imbaga ni Jesus ken ni Poncio Pilato nga Isu ket immay ditoy daga tapno saksianna ti kinapudno. Kabayatan ti ministeriona, impalgak ni Jesus a nainaig dayta a kinapudno iti pannakaalangon ti kinasoberano ni Jehova babaen ti Pagarian ti Dios iti sidong ni Kristo kas Ari. Ngem saan laeng a nangasaba ken nangisuro ni Jesus tapno masaksianna ti kinapudno. Inaramid ni Jesus a napaypayso ti kinapudno babaen ti panangtungpalna iti dayta. Maitunos iti dayta, insurat ni apostol Pablo: “Awan koma ti tao a mangukom kadakayo iti pannangan ken iyiinum wenno maipapan iti piesta wenno panangngilin iti baro a bulan wenno iti sabbath; ta dagidiay a banag ket anniniwan ti bambanag nga umay, ngem ti pudpudno kukua ni Kristo.”—Colosas 2:16, 17.
11 Ti maysa a pamay-an a nagbalin a napaypayso ti kinapudno isu ti naipadto a pannakayanak ni Jesus idiay Betlehem. (Mikias 5:2; Lucas 2:4-11) Nagbalin met a napaypayso ti kinapudno idi natungpal ti padto ni Daniel maipapan iti panagparang ti Mesias iti ngudo ti 69 a ‘lawas ti tawtawen.’ Napasamak dayta idi indatag ni Jesus ti bagina iti Dios idi nagpabautisar ken napulotan iti nasantuan nga espiritu, eksakto iti naituding a tiempo, idi 29 K.P. (Daniel 9:25; Lucas 3:1, 21, 22) Ad-adda met a pimmayso ti kinapudno babaen ti makaisuro a ministerio ni Jesus kas manangiwaragawag iti Pagarian. (Isaias 9:1, 2, 6, 7; 61:1, 2; Mateo 4:13-17; Lucas 4:18-21) Pimmudno pay dayta idi natay ken napagungar ni Jesus.—Salmo 16:8-11; Isaias 53:5, 8, 11, 12; Mateo 20:28; Juan 1:29; Aramid 2:25-31.
12. Apay a naikuna ni Jesus, ‘Siak ti kinapudno’?
12 Yantangay nakasentro ken ni Jesu-Kristo ti kinapudno, naikunana: “Siak ti dalan ken ti kinapudno ken ti biag. Awan ti umay iti Ama malaksid no baeten kaniak.” (Juan 14:6) Mawayawayaan dagiti tattao iti naespirituan no agtalinaedda “iti dasig ti kinapudno” babaen ti panangbigbigda iti akem ni Jesus iti panggep ti Dios. (Juan 8:32-36; 18:37) Masagrap dagiti marakarnero a tattao ti biag nga agnanayon gapu ta inawatda ti kinapudno ken sinurotda ni Kristo buyogen ti pammati.—Juan 10:24-28.
13. Iti ania a tallo a benneg a sukimatentayo ti Nainkasuratan a kinapudno?
13 Ti pudno a Nakristianuan a pammati ket buklen ti amin a kinapudno nga impakaammo ni Jesus ken dagiti napaltiingan nga adalanna. Gapuna, dagidiay “agtulnog iti pammati” ket ‘agtultuloy a magna iti kinapudno.’ (Aramid 6:7; 3 Juan 3, 4) Siasinoda ngarud ita ti magmagna iti kinapudno? Siasino ti talaga a mangisursuro iti kinapudno kadagiti amin a nasion? Tapno masungbatan dagita a saludsod, usigentayo dagiti nagkauna a Kristiano ken sukimatentayo ti Nainkasuratan a kinapudno mainaig kadagiti (1) patpatien, (2) wagas ti panagdayaw, ken (3) personal a kababalin.
Ti Kinapudno ken Dagiti Patpatien
14, 15. Ania ti makunayo maipapan iti panangmatmat dagiti nagkauna a Kristiano ken dagiti Saksi ni Jehova maipapan iti Kasuratan?
14 Dakkel ti panagraem dagiti nagkauna a Kristiano iti naisurat a Sao ni Jehova. (Juan 17:17) Isu dayta ti pagalagadanda no mainaig kadagiti patpatien ken kaugalianda. Kinuna ni Clemente ti Alexandria idi maikadua ken maikatlo a siglo: “Dagidiay mangsuksukay kadagiti agkakaimbag a galad ket awan sarday a birbirokenda ti kinapudno, agingga a makasapulda iti Nainkasuratan a pammaneknek kadagiti patpatienda.”
15 Kas kadagiti nagkauna a Kristiano, dakkel ti panagraem dagiti Saksi ni Jehova iti Biblia. Patienda nga “amin a Kasuratan impaltiing ti Dios ken makagunggona iti panangisuro.” (2 Timoteo 3:16) Gapuna, usigentayo ti sumagmamano a patpatien dagiti nagkauna a Kristiano a naadal dagiti agdama nga agserserbi ken ni Jehova gapu ta us-usarenda ti Biblia kas ti kangrunaan a libroda.
Ti Kinapudno Maipapan iti Kararua
16. Ania ti kinapudno maipapan iti kararua?
16 Gapu ta patienda ti kuna ti Kasuratan, insuro dagiti nagkauna a Kristiano ti kinapudno maipapan iti kararua. Ammoda a “ti tao nagbalin a kararua a sibibiag” idi pinarsua ti Dios. (Genesis 2:7) Maysa pay, binigbigda a matay ti natauan a kararua. (Ezequiel 18:4; Santiago 5:20) Ammoda met nga ‘awan a pulos ti panunot dagiti natay.’—Eclesiastes 9:5, 10.
17. Kasanoyo nga ilawlawag ti namnama dagiti natay?
17 Ngem dagiti nagkauna nga adalan ni Jesus natalged ti namnamada a mapagungar, wenno mapagbiag manen, dagiti natay nga adda iti lagip ti Dios. Silalawag nga inyebkas ni Pablo dayta a pammati, idi kinunana: “Adda inanamak iti Dios . . . nga addanto panagungar agpadpada dagiti nalinteg ken dagiti nakillo.” (Aramid 24:15) Uray idi agangay, insurat ti agkunkuna a Kristiano a ni Minucius Felix: “Asino koma ti maag wenno nakuneng tapno kunaenna a dayta a tao, a binukel ti Dios, ket di mabalin a pabaruen ti nangaramid kenkuana?” Kas kadagiti nagkauna a Kristiano, patien dagiti Saksi ni Jehova ti Nainkasuratan a kinapudno maipapan iti natauan a kararua, ipapatay, ken panagungar. Usigentayo ita ti kinasiasino ti Dios ken ni Kristo.
Ti Kinapudno ken ti Trinidad
18, 19. Apay a makuna a ti Trinidad ket saan a Nainkasuratan a sursuro?
18 Dagiti nagkauna a Kristiano ket dida minatmatan ti Dios, ni Kristo, ken ti nasantuan nga espiritu kas maysa a Trinidad. Kuna ti The Encyclopædia Britannica: “Saan a nagparang ti sao a Trinidad wenno uray naiparipirip man la koma daytoy a doktrina iti Baro a Tulag, ken saan met a sinupiat ni Jesus ken dagiti pasurotna ti Shema [maysa a Hebreo a kararag] iti Daan a Tulag: ‘Denggem, O Israel: Ti Apo a Diostayo ket maymaysa nga Apo’ (Deut. 6:4).” Saan a nagdayaw dagiti Kristiano iti tinallo a dios dagiti Romano wenno aniaman a didiosen. Bigbigenda ti kinuna ni Jesus a ni Jehova laeng ti pagdayawan. (Mateo 4:10) Maysa pay, patienda ti sasao ni Kristo: “Ti Ama dakdakkel ngem siak.” (Juan 14:28) Kasta met laeng ti panangmatmat dagiti Saksi ni Jehova ita.
19 Nalawag ti pannakaawat dagiti nagkauna a pasurot ni Jesus no ania ti nagdumaan ti Dios, ni Kristo, ken ti nasantuan nga espiritu. Kinapudnona, bautisaranda dagiti adalan (1) iti nagan ti Ama, (2) iti nagan ti Anak, ken (3) iti nagan ti nasantuan nga espiritu, saan nga iti nagan ti Trinidad. Kasta met laeng ti Nainkasuratan a kinapudno nga isursuro dagiti Saksi ni Jehova ket iti kasta, mapagdumada ti Dios, ti Anakna, ken ti nasantuan nga espiritu.—Mateo 28:19.
Ti Kinapudno ken ti Bautismo
20. Ania a pannakaammo ti kasapulan dagiti kandidato ti bautismo?
20 Impaannong ni Jesus kadagiti pasurotna a mangaramidda kadagiti adalan babaen ti panangisuroda iti kinapudno kadagiti tattao. Tapno makualipikar a mabautisaran, masapul a maaddaanda iti pannakaammo iti Kasuratan. Kas pagarigan, nasken a bigbigenda ti saad ken autoridad ti Ama ken ti Anakna, ni Jesu-Kristo. (Juan 3:16) Masapul met a maawatan dagiti kandidato ti bautismo a saan a persona ti nasantuan nga espiritu no di ket dayta ti aktibo a puersa ti Dios.—Genesis 1:2, footnote iti New World Translation of the Holy Scriptures—With References.
21, 22. Apay a makunam a ti bautismo ket agpaay laeng kadagiti manamati?
21 Ti laeng binautisaran dagiti nagkauna a Kristiano ket dagidiay nasursuruan ken nagbabawi a tattao a naan-anay a nangidedikar iti bagida iti Dios tapno aramidenda ti pagayatanna. Dagiti Judio ken proselita a naguurnong idiay Jerusalem idi Pentecostes 33 K.P. ket addaanen iti pannakaammo iti Hebreo a Kasuratan. Apaman a nangngegda a nagsao ni apostol Pedro maipapan ken ni Jesus a Mesias, agarup 3,000 ti “naimpusuan a nangabrasa iti saona” ken “nabautisaran.”—Aramid 2:41; 3:19–4:4; 10:34-38.
22 Ti Nakristianuan a bautismo ket agpaay kadagiti manamati. Inawat dagiti taga Samaria ti kinapudno, ket “idi namatida ken Felipe, a nangidekdeklara iti naimbag a damag ti pagarian ti Dios ken iti nagan ni Jesu-Kristo, nagpabautisarda, agpadpada dagiti lallaki ken babbai.” (Aramid 8:12) Kas maysa a napasnek a proselita nga addaan iti pannakaammo maipapan ken Jehova, inawat nga umuna ti Etiope a eunuko ti imbaga ni Felipe maipapan iti pannakatungpal ti padto mainaig iti Mesias ket kalpasanna nagpabautisar. (Aramid 8:34-36) Idi agangay, kinuna ni Pedro kada Cornelio ken iti dadduma a Gentil nga “anamongan [ti Dios] ti tao nga agbuteng kenkuana ken agaramid iti kinalinteg” ken mapakawan dagiti basol ti asinoman a mamati ken ni Jesu-Kristo. (Aramid 10:35, 43; 11:18) Maitunos amin dagitoy iti bilin ni Jesus a ‘mangaramid iti ad-adalan, nga isuro kadakuada a tungpalenda amin a bambanag nga imbilinna.’ (Mateo 28:19, 20; Aramid 1:8) Dayta met la ti al-alagaden dagiti Saksi ni Jehova, a bautisaranda laeng dagidiay addaan iti pannakaammo iti Kasuratan ken nagdedikar iti Dios.
23, 24. Ania ti umiso a wagas ti Nakristianuan a bautismo?
23 Ti naan-anay a pannakaitaneb iti danum isu ti umiso a wagas ti bautismo para kadagidiay manamati. Kalpasan a nabautisaran ni Jesus idiay Karayan Jordan, isu ket ‘simmang-at manipud iti danum.’ (Marcos 1:10) Ti Etiope a eunuko ket nabautisaran iti “maysa a danum.” ‘Bimmabada ken ni Felipe iti danum’ ket kalpasanna, ‘simmang-atda manipud iti’ dayta. (Aramid 8:36-40) Ti Nainkasuratan a pannakainaig ti bautismo iti simboliko a pannakaitanem ket mangipamatmat met iti naan-anay a pannakaitaneb iti danum.—Roma 6:4-6; Colosas 2:12.
24 Kuna ti The Oxford Companion to the Bible: “Ti pannakadeskribir ti espesipiko a bautismo iti Baro a Tulag ipamatmatna a ti tao a mabautisaran ket naitaneb iti danum.” Sigun iti libro a Pranses a Larousse du XXe Siècle (Paris, 1928), “nabautisaran dagiti nagkauna a Kristiano babaen ti pannakaitaneb iti sadinoman nga adda danum.” Ken kuna ti libro nga After Jesus—The Triumph of Christianity: “Iti kasimplean laeng a wagasna, kalikaguman [ti bautismo] nga iyebkas ti kandidato ti pammatina, sa sarunuen ti naan-anay a pannakaitaneb iti danum iti nagan ni Jesus.”
25. Ania ti mausig iti sumaganad nga artikulo?
25 Dagita a nadakamat a punto maipapan kadagiti naibatay-Biblia a patpatien ken kaugalian dagiti nagkauna a Kristiano ket sumagmamano laeng a pagarigan. Mabalin a madakamat pay ti dadduma a pagpadaan dagiti patpatienda ken dagiti patpatien dagiti Saksi ni Jehova. Iti sumaganad nga artikulo, usigentayo ti kanayonan a pamay-an a mailasin dagidiay mangisursuro iti kinapudno kadagiti tattao.
Ania ti Sungbatyo?
• Ania a kita ti panagdayaw ti kalikaguman ti Dios?
• Kasano a pimmayso ti kinapudno babaen ken ni Jesu-Kristo?
• Ania ti kinapudno maipapan iti kararua ken ipapatay?
• Kasano a maar-aramid ti Nakristianuan a bautismo, ken ania ti makalikaguman kadagiti kandidato ti bautismo?
[Ladawan iti panid 16]
Kinuna ni Jesus ken ni Pilato:‘Immayak tapno saksiak ti kinapudno’
[Ladawan iti panid 17]
Mailawlawagyo kadi no apay a kinuna ni Jesus: ‘Siak ti kinapudno’?
[Ladawan iti panid 18]
Ania ti kinapudno maipapan iti Nakristianuan a bautismo?