Iporsegiyo ti Makipagani!

“Dagidiay agimulmula iti bin-i buyogen iti lulua agapitdanto buyogen a mismo ti narag-o nga ikkis.”​—SALMO 126:5.

1. Apay nga ‘ipakaasi iti Apo ti panagani a mangibaon kadagiti trabahador’ ita?

KALPASAN ti maikatlo a rikos ti panangasaba ni Jesu-Kristo idiay Galilea, kinunana kadagiti adalanna: “Dakkel ti anien, ngem bassit dagiti trabahador.” (Mateo 9:37) Kasta met laeng ti kasasaad idi idiay Judea. (Lucas 10:2) Yantangay pudno dayta agarup 2,000 a tawenen ti napalabas, komusta met ngay ti kasasaad ita? Bueno, iti napalabas a tawen serbisio, nasurok nga 6,000,000 a Saksi ni Jehova ti nagporsegi iti piguratibo a panagani iti tengnga ti nasurok nga 6,000,000,000 a tattao iti intero a lubong, nga adu kadagitoy ti ‘nalalatan ken naiwarawara a kasla karkarnero nga awanan pastor.’ Nupay sinigsiglon ti naglabas, agaplikar pay laeng ita ti indagadag ni Jesus nga ‘ipakaasi iti Apo ti panagani a mangibaon kadagiti trabahador iti panaganina.”​—Mateo 9:36, 38.

2. Apay a buybuyaendatayo dagiti tattao?

² Ni Jehova a Dios, ti Apo ti panagani, pinatganna ti kiddaw a mangibaon iti ad-adu pay a trabahador. Anian a nagragsak ti makiraman iti panagani nga iturturong ti Dios! Nupay manmanotayo no idilig kadagiti nasion, buybuyaendatayo ti lubong gapu iti naregta a panangikasabatayo iti Pagarian ken panagaramid kadagiti adalan. Iti adu a pagilian, masansan a dakamatendatayo iti media. Kadagiti drama iti telebision, adda dagiti eksena a no adda ag-doorbell, kunada a dagiti Saksi ni Jehova dagita. Wen, agdindinamag ti piguratibo a pannakipaganitayo kas Kristiano iti maika-21 a siglo.

3. (a) Apay nga ammotayo a napuntiria ti trabaho a panangikasaba iti Pagarian idi umuna siglo? (b) Apay a maikunatayo a supsuportaran dagiti anghel ti ministeriotayo?

³ Pinuntiria met ti lubong ti panangikasaba iti Pagarian idi umuna a siglo ken indadanesda dagidiay nangiwaragawag iti naimbag a damag. Isu nga insurat ni apostol Pablo: “Pagarupek a ti Dios inkabilnakami nga apostol a maudi a maipabuya kas lallaki a naituding iti ipapatay, agsipud ta [dakami nga apostol] nagbalinkami a bubuyaen iti teatro iti lubong, ken kadagiti anghel, ken kadagiti tattao.” (1 Corinto 4:9) Umarngi iti dayta, datayo ti kitkitaen ti lubong gapu iti porsegido a panangiwaragawagtayo iti Pagarian iti laksid ti panangidadanes. Napateg daytoy kadagiti anghel. Kuna ni apostol Juan iti Apocalipsis 14:6: “Nakakitaak iti sabali pay nga anghel nga agtaytayab iti nagtangatangan, ket addaan iti agnanayon a naimbag a damag nga ideklarana kas naragsak a damag kadagidiay agnanaed iti daga, ken iti tunggal nasion ken tribu ken pagsasao ken ili.” Wen, supsuportaran dagiti anghel ti ministeriotayo​—ti pannakipaganitayo!​—Hebreo 1:13, 14.

‘Puntiria ti Pananggura’

4, 5. (a) Ania ti impakdaar ni Jesus kadagiti adalanna? (b) Apay a dagiti agdama nga adipen ti Dios ket “puntiria ti pananggura”?

⁴ Idi naibaon nga agani dagiti apostol ni Jesus, impangagda ti bilinna nga ‘agannadda a kas kadagiti serpiente ket kaskasdi a nasingpet a kas kadagiti kalapati.’ Kinuna pay ni Jesus: “Agaluadkayo kadagiti tattao; ta iyawatdakayto kadagiti lokal a pangukoman, ket saplitendakayto kadagiti sinagogada. Ay ket, maisaklangkayto iti sanguanan dagiti gobernador ken ar-ari maigapu kaniak, maipaay a pangsaksi kadakuada ken kadagiti nasion. . . . Ket puntiriakayto ti pananggura dagiti amin a tattao maigapu iti naganko; ngem ti nakapagibtur agingga iti panungpalan isunto ti maisalakan.”​—Mateo 10:16-22.

⁵ Datayo ti ‘puntiria ti pananggura’ ita gapu ta “ti intero a lubong adda iti pannakabalin daydiay nadangkes,” ni Satanas a Diablo, ti kangrunaan a kabusor ti Dios ken ti ilina. (1 Juan 5:19) Nupay madlaw dagiti bumusbusor ti naespirituan a kinarang-aytayo, dida ipagapu dayta ken Jehova. Makitada dagiti naragsak, nakaisem a rupatayo bayat a sirarag-o a makipaspasettayo iti trabaho a panagani. Masmasdaawda iti panagkaykaysatayo! Kinapudnona, no mapanda iti sabali a lugar, mabalin a mapilitanda a mangbigbig iti dayta no makitada nga isu met laeng a trabaho ti ar-aramiden dagiti Saksi ni Jehova iti dayta a lugar ken ti ar-aramiden dagiti Saksi iti lugarda. Siempre, ammotayo nga iti naituding a tiempo, maipadayagto ni Jehova uray kadagiti bumusbusor kadatayo. Ni Jehova ti mangsarsaranay ken gubuayan ti panagkaykaysatayo.​—Ezequiel 38:10-12, 23.

6. Ania a pammatalged ti adda kadatayo bayat a makipaspasettayo iti panagani, ngem ania a saludsod ti tumaud?

⁶ Ti Apo ti panagani intedna ken Jesu-Kristo nga Anakna ti “isuamin nga autoridad . . . idiay langit ken ditoy daga.” (Mateo 28:18) Dinutokan ngarud ni Jehova ti Anakna a mangidaulo iti panagani babaen dagiti anghel sadi langit ken dagiti napulotan a “matalek ken masirib nga adipen” ditoy daga. (Mateo 24:45-47; Apocalipsis 14:6, 7) Ngem kasanotay a madaeran ti ibubusor ken mataginayon ti rag-o bayat nga ikagkagumaantayo ti makipagani?

7. Ania a kababalin ti nasken a taginayonentayo no busoren wenno idadanesdatayo?

⁷ No maipasangotay iti ibubusor wenno direkta pay ketdi a pannakaidadanes, agpatulongtayo iti Dios tapno mataginayontayo ti kababalin a kas ken Pablo. Insuratna: “No marabrabngiskami, mangbendisionkami; no maidaddadaneskami, agibturkami; no mapadpadakeskami, agpakaasikami.” (1 Corinto 4:12, 13) No dadduma, lumag-an ti rikna dagiti bumusbusor kadatayo no kastoy ti kababalintayo, buyogen ti natanang a panangasabatayo.

8. Ania a pammatalged ti magun-odyo kadagiti sasao ni Jesus iti Mateo 10:28?

⁸ Uray ti ipapatay dina pabaawen ti regtatayo a makipagani. Ditay mabuteng a mangiwaragawag a sibabatad iti mensahe ti Pagarian agingga’t mabalin. Makapabileg met kadatayo dagiti makaliwliwa a sasao ni Jesus: “Dikay agbuteng kadagidiay mangpapatay iti bagi ngem saanda a kabaelan a papatayen ti kararua; no di ket agbutengkayo iti daydiay makabalin a mangdadael agpadpada iti kararua ken bagi idiay Gehenna.” (Mateo 10:28) Ammotayo a ti nailangitan nga Amatayo ti Gubuayan ti biag. Gunggonaanna dagidiay agtalinaed a nasungdo kenkuana ken simamatalek nga agporsegi a makipagani.

Ti Makaispal-Biag a Mensahe

9. Ania ti reaksion ti dadduma iti mensahe ni Ezequiel, ken kasano a mapaspasamak ti kasta iti kaaldawantayo?

⁹ Idi situtured nga inwaragawag ni propeta Ezequiel ti mensahe ni Jehova “kadagiti rebelioso a nasion”​—dagiti pagarian ti Israel ken Juda​—nagustuan ti dadduma ti impakaammona. (Ezequiel 2:3) Kinuna ni Jehova: “Adtoy! kadakuada kaslaka iti kanta dagiti naderrep nga ayat, kas iti maysa nga addaan napintas a timek ken nalaing nga agtokar iti pagtokar nga adda kuerdasna.” (Ezequiel 33:32) Nupay nagustuanda dagiti impakaammo ni Ezequiel, dida nagtignay maitunos iti dayta. Ania met ti kasasaad ita? Nupay situtured nga iwarwaragawag dagiti napulotan ken dagiti kakaduada ti mensahe ni Jehova, adda dagidiay mayat a dumngeg maipapan kadagiti bendision nga itden ti Pagarian ngem dida met agtignay tapno agbalinda koma nga adalan ken makiraman iti trabaho a panagani.

10, 11. Iti umuna a kagudua ti maika-20 siglo, kasano a naipablaak ti makaispal-biag a mensahetayo, ket ania ti nagresultaanna?

¹⁰ Iti sabali a bangir, adu ti nangipangag iti trabaho a panagani ket nakiramanda iti panangiwaragawag kadagiti mensahe ti Dios. Iti serye dagiti Nakristianuan a kombension manipud 1922 agingga iti 1928, kas pagarigan, nagkallangugan dagiti mensahe a pangukom iti dakes a sistema dagiti bambanag ni Satanas. Naibrodkas iti radio dagidi a pammabalaw a naiparang kadagidi nga asamblea. Kalpasanna, inwaras ti ili ti Dios ti minilion a nayimprenta a kopia daytoy a mensahe.

¹¹ Idi arinunos ti dekada 1930, nairugi ti sabali pay a kita ti panangasaba​—dagiti mangimpormar a parada. Idi damo, nangyukkor dagiti adipen ni Jehova iti plakard a mangipakaammo kadagiti maipalawag iti publiko. Idi agangay, nagusarda kadagiti plakard a nakailanadan dagiti sasao a kastoy: “Ti relihion ket maysa a silo ken panaggamsaw” ken “Agserbikayo iti Dios ken ni Kristo nga Ari.” Idi nagmartsada kadagiti lansangan, naalada ti atension dagiti tattao. ‘Nagbalin dagiti Saksi ni Jehova a natured ken sentro ti atension gapu iti daytoy,’ inkomento ti maysa kabsat a lalaki a regular a nakiraman iti daytoy a trabaho kadagiti aduan tattao a lansangan idiay London, England.

12. Malaksid kadagiti pangukom a mensahe ti Dios, ania ti naitampok iti ministeriotayo, ket siasino ita dagiti sangsangkamaysa a mangikaskasaba iti naimbag a damag?

¹² Bayat nga idekdeklaratayo ti pangukom a mensahe ti Dios, intampoktayo met dagiti positibo nga aspeto ti mensahe ti Pagarian. Ti natured a panangasabatayo iti imatang ti lubong tulongannatayo a mangbirok kadagiti maikari a tattao. (Mateo 10:11) Kadagiti naudi a nagbalin a kameng ti klase napulotan, kaaduan kadakuada ti nangipangag iti nabatad nga awis iti pannakipagani idi dekada 1920 ken 1930. Sa iti maysa a kombension idi 1935, naipakaammo ti nagsayaat a damag maipapan iti nadayag a masanguanan para iti “dakkel a bunggoy” dagiti “sabsabali a karnero” iti maysa a paraiso a daga. (Apocalipsis 7:9; Juan 10:16) Impangagda ti pangukom a mensahe ti Dios ket nakidanggayda kadagiti napulotan iti panangikasaba iti makaispal-biag a naimbag a damag.

13, 14. (a) Ania ti liwliwa nga itden ti Salmo 126:5, 6? (b) Ania ti mapasamak no itultuloytayo ti agmula ken agsibug?

¹³ Para kadagiti imbaon ti Dios nga agani, nangnangruna kadagidiay agpaspasar iti pannakaidadanes, pudno a makaliwliwa kadakuada ti sasao iti Salmo 126:5, 6: “Dagidiay agimulmula iti bin-i buyogen iti lulua agapitdanto buyogen a mismo ti narag-o nga ikkis. Daydiay mapan a di bumurong, nga agsangsangit a mismo, a siaawit iti sangasupot a bin-i, di bumurong a sumrekto a buyogen ti narag-o nga ikkis, a siaawit kadagiti binettekna.” Ti dinakamat ti salmista a panagmula ken panagani iladawanna ti panagayat ken panangbendision ni Jehova kadagiti natda a nawayawayaan manipud iti nagkauna a Babilonia. Maragsakanda unay ta naruk-atanda, ngem nalabit agsangsangitda idi bunubonanda ti daga a nabaybay-an bayat ti 70 a tawen a pannakakayawda. Nupay kasta, nagani ken nakarikna iti pannakapnek dagidiay nagtultuloy a nagmula ken nakiraman iti trabaho a panagbangon.

¹⁴ Mabalin a makasangittayo no maipasangotay iti pakasuotan ken makapasartayo a mismo wenno dagiti kapammatiantayo iti rigat maigapu iti kinalinteg. (1 Pedro 3:14) Iti trabahotayo a panagani, mabalin a marigatantayo no damo agsipud ta nalabit awan pay ti maipakitatayo a bunga ti ministeriotayo. Ngem no itultuloytayo ti agmula ken agsibug, ti Dios padakkelennanto dagiti bambanag, a masansan a nalablabes ngem iti ninamnamatayo. (1 Corinto 3:6) Pinaneknekan daytoy dagiti resulta ti panangiwarastayo kadagiti Biblia ken dagiti Nainkasuratan a publikasion.

15. Mangted iti pagarigan a mangipakita a makatulong dagiti Nakristianuan a publikasion iti trabaho a panagani?

¹⁵ Usigenyo ti kapadasan ti lalaki nga agnagan Jim. Nasarakanna kadagiti sanikua ti pimmusay nga inana ti maysa a kopia ti libro a Life​—How Did It Get Here? By Evolution or by Creation?a Sigagagar a binasana dayta. Idi nakasaritana ti maysa a Saksi a nangasaba kenkuana iti lansangan, immanamong ni Jim a masarungkaran, ket nangrugi a nayadalan iti Biblia. Napartak ti naespirituan nga irarang-ay ni Jim, indedikarna ti biagna ken Jehova, ket nabautisaran. Inranudna kadagiti miembro ti pamiliana dagiti naadalna. Nagbanaganna, nagbalin a Saksi ni Jehova ti manang ken manongna, ket idi agangay tinagiragsak ni Jim ti pribilehio kas amin-tiempo a boluntario iti Bethel idiay London.

Maidaddadanes Ngem Naragsak

16. (a) Apay a naballigi ti trabaho a panagani? (b) Ania ti impakdaar ni Jesus no maipapan iti epekto ti naimbag a damag, ngem kasaritatayo dagiti tattao buyogen ti ania a kababalin?

¹⁶ Apay a kasta kaballigi ti trabaho a panagani? Agsipud ta dagiti napulotan ken dagiti kakaduada impangagda ti bilin ni Jesus: “Ti ibagak kadakayo iti sipnget, sawenyo iti lawag; ket ti mangngegyo a nayarasaas, ikasabayo manipud kadagiti tuktok ti balbalay.” (Mateo 10:27) Ngem ditay maliklikan dagiti pakarigatan, kas imballaag ni Jesus: “Kanayonanna, ti kabsat iyawatnanto ti kabsat iti ipapatay, ket ti ama iyawatna ti anakna, ket tumakderto ti annak a bumusor kadagiti nagannak ket papapataydanto ida.” Kinunana pay: “Dikay pagarupen nga immayak mangikabil ti talna iti daga; immayak a mangikabil, saan a ti talna, no di ket ti maysa a kampilan.” (Mateo 10:21, 34) Saan a panggep ni Jesus a pagsisinaen dagiti pamilia. Ngem agbanag iti kasta no dadduma gapu iti naimbag a damag. Kasta met laeng ti kasasaad dagiti adipen ti Dios ita. No sarungkarantayo dagiti pamilia, awan ti panggeptayo a pagsisinaen ti pamilia. Kayattay nga ipangagda amin ti naimbag a damag. Dayta ti makagapu a naayat ken mannakikappia ti pamay-antayo a makisarita iti amin a kameng ti maysa a pamilia tapno agbalin a makaay-ayo ti mensahetayo kadagidiay “siuumiso nga agannayas iti agnanayon a biag.”​—Aramid 13:48.

17. Kasano a nailasin dagidiay mangitantandudo iti kinasoberano ti Dios, ket ania ti maysa a pagarigan iti daytoy?

¹⁷ Gapu iti mensahe ti Pagarian, nailasin dagidiay mangitantandudo iti kinasoberano ni Jehova. Kas pagarigan, kitaenyo no kasano a nagpaiduma dagiti kapammatiantayo idi panawen ti National Socialism idiay Alemania gapu ta ‘binayadanda ken Cesar ti bambanag ni Cesar, ngem iti Dios ti bambanag ti Dios.’ (Lucas 20:25) Saan a kas kadagiti panguluen ti relihion ken kadagiti agkunkuna a Kristiano a paset ti Kakristianuan, nagtalinaed a natibker dagiti adipen ni Jehova ket dida sinalungasing dagiti pagalagadan ti Biblia. (Isaias 2:4; Mateo 4:10; Juan 17:16) Kastoy ti napaliiw ni Propesor Christine King, autor ti libro a The Nazi State and the New Religions: “Kadagiti laeng Saksi a di nagballigi ti gobierno [ti Nazi], agsipud ta uray rinibu ti pinapatayda, nagtultuloy ti trabaho dagiti Saksi, ket idi Mayo 1945 agan-andar pay laeng ti organisasion dagiti Saksi ni Jehova, idinto ta napukawen ti National Socialism.”

18. Ania a kababalin ti iparparangarang ti ili ni Jehova iti laksid ti pannakaidadanes?

¹⁸ Naisangsangayan la ketdi ti kababalin nga iparparangarang ti ili ni Jehova no maipasangoda iti pannakaidadanes. Nalabit apresiaren dagiti sekular a turay ti pammatitayo, ken masdaawda no apay a ditay mangimulmula iti sakit ti nakem. Kas pagarigan, dagiti Saksi a nakalasat iti Holocaust masansan nga iyebkasda ti rag-o ken pannakapnek no lagipenda ti napalabasda. Ammoda nga inted kadakuada ni Jehova ti “pannakabalin a nalablabes ngem ti gagangay.” (2 Corinto 4:7) Dagiti napulotan nga adda iti tengngatayo sigurado a ti ‘nagnaganda nailanaden iti langlangit.’ (Lucas 10:20) Natalged ti namnamada gapu iti panagibturda, ket kasta met laeng ti kasasaad dagiti matalek nga agan-ani nga addaan iti naindagaan a namnama.​—Roma 5:4, 5.

Itultuloyyo ti Makipagani

19. Aniada nga epektibo a metodo ti naaramat iti Nakristianuan a ministerio?

¹⁹ Ditay ammo no kasano pay kabayag nga ipalubos ni Jehova ti piguratibo a trabahotayo a panagani. Kabayatanna, nasken a laglagipentayo nga adda espesipiko a metodo dagiti agan-ani no agtrabaho. Umarngi iti dayta, sigurado nga epektibo no surotentayo dagiti nasuboken a wagas ti panangasaba. Kinuna ni Pablo kadagiti padana a Kristiano: “Dawatek kadakayo, . . . agbalinkayo a tumutulad kaniak.” (1 Corinto 4:16) Idi nakasarita ni Pablo dagiti lallakay iti Efeso idiay Miletus, impalagipna a dina insardeng nga insuro ida “iti publiko ken iti binalaybalay.” (Aramid 20:20, 21) Ni Timoteo, a kadua ni Pablo, nasursurona dagiti metodo ti apostol isu a nabaelanna nga insuro dagitoy kadagiti taga Corinto. (1 Corinto 4:17) Binendisionan ti Dios dagiti metodo ti panangisuro ni Pablo, iti kasta bendisionanna met ti panagporsegitayo a mangikasaba iti naimbag a damag iti binalaybalay, panagsarungkar, panangyadal iti Biblia, ken sadinoman a pakasarakan kadagiti tattao.​—Aramid 17:17.

20. Kasano nga impasimudaag ni Jesus a dumteng ti maysa a nawadwad a naespirituan a panagani, ket kasano a pimmudno daytoy kadagiti kallabes a tawen?

²⁰ Kalpasan a kinasabaanna ti maysa a Samaritana iti asideg ti Sicar idi 30 K.P., nadakamat ni Jesus ti maipapan iti naespirituan a panagani. Kinunana kadagiti adalanna: “Itannawagyo dagiti matayo ket matmatanyo dagiti talon, ta purawdan a maipaay iti pannakaani. Itan ti managani umaw-awaten kadagiti tangdan ken agur-urnongen iti bunga a maipaay iti agnanayon a biag, iti kasta ti managmula ken ti managani makapagrag-oda nga agpadpada.” (Juan 4:34-36) Nalabit nakitan ni Jesus ti resulta ti pannakisaritana iti Samaritana agsipud ta adun ti namati kenkuana gapu iti testimonia ti babai. (Juan 4:39) Kadagiti kallabes a tawen, addada pagilian a nangikkat kadagiti panangipawil kadagiti Saksi ni Jehova wenno legal a bigbigendan dagiti Saksi. Iti kasta, naluktan dagiti baro a tay-ak a paganian. Kas resultana, madaman ti nawadwad a naespirituan a panagapit. Kinapudnona iti intero a lubong, matagtagiragsak ti nabaknang a bendision bayat a sirarag-o nga itultuloytayo ti makiraman iti naespirituan a panagani.

21. Apay nga adda rasontayo nga itultuloy ti naragsak a panaganitayo?

²¹ No tiempo ti apit, awan ti panawen a sayangen dagiti trabahador. Masapul nga agapurada. Iti kaaldawantayo, rumbeng nga igaedtayo ti agtrabaho buyogen ti kinaganat gapu ta agbibiagtayon “iti tiempo ti panungpalan.” (Daniel 12:4) Wen, maipasangotayo kadagiti pakasuotan, ngem mapaspasamak itan ti kadakkelan a panagani dagiti agdaydayaw ken Jehova. Tiempo ngarud ita ti panagrag-o. (Isaias 9:3) Kas naragsak a trabahador, agporsegitayo ngarud koma a makipagani!

[Footnote]

Ania ti Sungbatyo?

• Kasano a ti Apo iti panagani sinungbatanna ti kiddaw a mangibaon iti kanayonan a trabahador?

• Nupay datayo ti ‘puntiria ti ibubusor,’ ania a kababalin ti taginayonentayo?

• Apay a naragsaktayo iti laksid ti pannakaidadanestayo?

• Apay a nasken nga agporsegitayo a makipagani buyogen ti kinaganat?

[Dagiti Ladawan iti panid 16, 17]

Supsuportaran dagiti anghel dagidiay makiramraman iti naespirituan a panagani

[Ladawan iti panid 18]

Adu a tattao ti napakaammuan iti mensahe ti Pagarian gapu kadagiti mangimpormar a parada

[Ladawan iti panid 18]

Agmula ken agsibugtayo, ngem ti Dios ti mangpadakkel