Napategkayo iti Imatang ti Dios!
“Inayatka iti agnanayon a panagayat. Dayta ti gapuna nga inyasidegka babaen ti naayat a kinamanangaasi.”—JEREMIAS 31:3.
1. Kasano a naiduma ti kababalin ni Jesus kadagiti kadawyan a tattao idi kaaldawanna iti kababalin dagiti Fariseo?
MAKITADA dayta kadagiti matana. Naiduma daytoy a lalaki, ni Jesus, kadagiti relihiuso a panguloda; isu ket manangisakit. Naasian kadagitoy a tattao agsipud ta “nalalatan ken naiwarawarada a kasla karkarnero nga awanan pastor.” (Mateo 9:36) Rumbeng koma nga agbalin dagiti relihiuso a panguloda a naayat a papastor a mangibagi iti naayat, naasi a Dios. Ngem saan, ta minatmatanda dagiti kadawyan a tattao kas manangriribuk laeng—ken nailunod!a (Juan 7:47-49; idiligyo ti Ezequiel 34:4.) Nalawag, maisupadi unay ti kasta a nagdakes, di nainkasuratan a kababalin iti panangmatmat ni Jehova kadagiti tattaona. Kinunana iti ilina nga Israel: “Inayatka iti agnanayon a panagayat.”—Jeremias 31:3.
2. Kasano a pinadas dagiti tallo a kakadua ni Job nga ipapati kenkuana nga awan pategna iti imatang ti Dios?
2 Nupay kasta, saan a dagiti Fariseo ti immuna a nangpadas a mangipapati kadagiti napateg a karnero ni Jehova nga awan serserbida. Usigenyo ti kasasaad ni Job. Nalinteg ken awan pakapilawanna iti imatang ni Jehova, ngem imparipirip dagiti tallo a “manangliwliwa” a ni Job ket maysa nga imoral, nadangkes nga apostata a matay nga awan ti mabati a pakalaglagipan kenkuana. Impettengda a di pagan-ano ti Dios ti aniaman a kinalinteg iti biang ni Job, tangay di talken ti Dios uray dagiti mismo nga anghelna ken narugit ti langit iti imatangna!—Job 1:8; 4:18; 15:15, 16; 18:17-19; 22:3.
3. Ania dagiti pamay-an nga us-usaren ni Satanas ita a mangipapati kadagiti tattao nga awan serserbida ken awan mangipatpateg kadakuada?
3 Itatta, us-usaren pay laeng ni Satanas daytoy a ‘kinasikap’ a pangallukoy kadagiti tattao nga awan mangipatpateg kadakuada ken awan serserbida. (Efeso 6:11, footnote) Pudno, masansan nga allilawenna dagiti tattao babaen ti panangpatangsit ken panangpasindayagna kadakuada. (2 Corinto 11:3) Ngem pagaayatna met a dadaelen ti panagraem iti bagi dagiti nakapuy. Pudno unay daytoy nangruna kadagitoy napeggad a “maudi nga al-aldaw.” Adu itatta ti dimmakkel kadagiti pamilia nga “awanan nainkasigudan a panagayat”; adut’ inaldaw a makilanglangen kadagidiay nauyong, managimbubukod, ken nasubeg. (2 Timoteo 3:1-5) Ti adu a tawen a pannakairurumen, pannakaidumduma gapu iti pulí, pannakagurgura, wenno pannakaabuso mabalin nga impapatina kadagiti kasta a tattao nga awan serserbida ken awan mangipatpateg kadakuada. Insurat ti maysa a lalaki: “Awan mariknak nga ayat iti asinoman wenno manipud iti asinoman. Narigatko a patien a maseknan ti Dios kaniak.”
4, 5. (a) Apay a maisupadi iti Kasuratan ti kapanunotan nga awan serserbi ti tao? (b) Aniat’ maysa a napeggad a pagbanagan ti panamati nga awan mamaay amin a panagreggettayo?
4 Ti kapanunotan nga awan serserbi ti tao ket saan a maitunos iti kangrunaan a kinapudno iti Sao ti Dios, ti sursuro maipapan iti subbot. (Juan 3:16) No nagdakkel a gatad ti imbayad ti Dios—ti napateg a biag ti mismo nga Anakna—tapno maikkantayo iti gundaway nga agbiag nga agnanayon, sigurado nga ay-ayatennatayo; sigurado a napategtayo iti imatangna!
5 Maysa pay, anian a makaupay a panunoten a saantay a makaay-ayo iti Dios, nga awan mamaay ti amin a panagreggettayo! (Idiligyo ti Proverbio 24:10.) Iti kastoy a negatibo a panangmatmat, uray ti napasnek a pammaregta, a nairanta a tumulong kadatayo a mangparang-ay iti panagserbitayo iti Dios inggat’ mabalin, mabalin nga ipagarup ti dadduma a maysa ketdi daytoy a panangkondenar. Mabalin a kasla yallangoganna ti panangipapantayo a di umdas ti aniaman nga aramidentayo.
6. Aniat’ kasayaatan a pangsaranget iti nakaro a negatibo a panangmatmat iti bagbagitayo?
6 No addaankay iti kakasta a negatibo a rikna, dikay maupay. Adu kadatayo ti agduyos a mangbabalaw iti bagbagitayo no dadduma nga awan gapgapuna. Ken laglagipenyo, nairanta ti Sao ti Dios a ‘mangpalinteg iti bambanag’ ken ‘mangduprak kadagiti natibker ti pannakasarikedkedna a bambanag.’ (2 Timoteo 3:16; 2 Corinto 10:4) Insurat ni apostol Juan: “Babaen itoy maammuantayto a nagtaudtayo iti kinapudno, ket pagtalgedentayto dagiti pusotayo iti sanguananna maipapan iti aniaman a pangkondenaran kadatayo dagiti pusotayo, agsipud ta ti Dios dakdakkel ngem kadagiti pusotayo ket ammona ti isuamin a bambanag.” (1 Juan 3:19, 20) Intay usigen ngarud ti tallo a pamay-an a panangisuro ti Biblia kadatayo a napategtayo ken Jehova.
Patpatgennakay ni Jehova
7. Kasano nga insuro ni Jesus kadagiti amin a Kristiano ti pategda iti imatang ti Dios?
7 Umuna, direkta nga isursuro ti Biblia a napateg ti tunggal maysa kadatayo iti imatang ti Dios. Kinuna ni Jesus: “Saan kadi a ti lima a billit-tuleng mailako iti dua a sinsilio a bassit ti pategna? Kaskasdi awan uray maysa kadakuada ti malipatan iti sanguanan ti Dios. Ngem uray dagiti buok ti ul-uloyo nabilangda aminen. Dikay agbuteng; napatpategkayo ngem kadagiti adu a billit-tuleng.” (Lucas 12:6, 7) Kadagidi nga aldaw, ti billit-tuleng ti kalakaan kadagiti billit a mailako kas taraon, ngem saan a malipatan ti Namarsua ti uray maysa laeng kadakuada. No kasta, naipasdek ti pakaibatayan ti nagdakkelan a paggidiatan: No maipanggep kadagiti tattao—nga adayo a napatpateg—ammo ti Dios amin a detalye. Arigna nabilang ti tunggal maysa kadagiti buok ti ulotayo!
8. Apay a realistiko a panunoten a kabaelan ni Jehova a bilangen dagiti buok ti ulotayo?
8 Nabilang dagiti buoktayo? No ipagarupyo a di realistiko daytoy a paset ti pangngarig ni Jesus, usigenyo: Malagip a naan-anay ti Dios dagiti matalek nga adipenna ta kabaelanna a pagungaren ida—a parsuaen manen ida a mayannurot iti amin a detalye, a pakairamanan ti narikut a genetic code-da ken amin a lagip ken kapadasan iti unos ti panagbiagda. No idildilig, mano met la ti panangbilang kadagiti buoktayo (nga ag-100,000 ti agtubo iti gagangay nga ulo)!—Lucas 20:37, 38.
Aniat’ Kitkitaen ni Jehova Kadatayo?
9. (a) Ania ti sumagmamano a kababalin a napateg ken Jehova? (b) Apay a maikunayo a napateg kenkuana dagita a kababalin?
9 Maikadua, isursuro ti Biblia no aniat’ ipatpateg ni Jehova kadatayo. Iti simple a pannao, kaay-ayona dagiti nasayaat a kababalin ken panagreggettayo. Kinuna ni Ari David ken Solomon nga anakna: “Ni Jehova sukimatenna dagiti amin a puso, ken maawatanna ti tunggal pagduyosan ti pampanunot.” (1 Cronicas 28:9) Bayat a suksukimaten ti Dios ti binilbilion a natauan a puso iti daytoy naranggas, napnuan-gura a lubong, anian a ragsakna no makasarak iti maysa a puso a mangipatpateg iti kappia, kinapudno, ken kinalinteg! (Idiligyo ti Juan 1:47; 1 Pedro 3:4.) Aniat’ mapasamak no makasarak ti Dios iti maysa a puso nga agliplippias iti ayat kenkuana, a mayat a makasursuro maipapan kenkuana ken mangiburay iti kasta a pannakaammo kadagiti sabsabali? Iti Malakias 3:16, kunaen ni Jehova kadatayo nga isut’ dumdumngeg kadagidiay mangisarsarita kadagiti sabsabali iti maipapan kenkuana ken addaan pay ketdi iti “maysa a libro a pakalaglagipan” agpaay “kadagidiay [amin nga] agbuteng ken Jehova ken kadagidiay mangpampanunot iti naganna.” Napateg kenkuana dagiti kasta a kababalin!
10, 11. (a) Kasano a mabalin nga iwaksi ti dadduma ti pammaneknek nga ilalaen ni Jehova dagiti naimbag a kababalinda? (b) Kasano nga ipakita ti ulidan ni Abias nga ilalaen ni Jehova ti aniaman a naimbag a kababalin?
10 Nupay kasta, mabalin a sarangten ti manangbabalaw a puso ti kasta a pammaneknek ti pategtayo iti imatang ti Dios. Mabalin a kanayon a yarasaasna, ‘Ngem nakaad-adu ti ad-adda a mapagulidanan kadagitoy a kababalin ngem siak. Anian a pannakaupay ni Jehova no idilignak kadakuada!’ Ni Jehova saan a mangidildilig, wenno maysa a nainget a manangipaannurot kadagiti pagalagadan. (Galacia 6:4) Mabasana a naimbag dagiti puso, ken ilalaenna ti aniaman a nasayaat a kababalin.
11 Kas pagarigan, idi inkeddeng ni Jehova nga ikisap ti intero nga apostata a dinastia ni Ari Jeroboam, a maibelleng a kasla “rugit,” imbilinna a maysanto laeng kadagiti annak ti ari, ni Abias, ti maipaayan ti nasayaat a pannakaitabon. Apay? “Adda naimbag a banag a maiturong ken Jehova, ti Dios ti Israel, a nasarakan kenkuana.” (1 Ar-ari 14:10, 13) Kayat kadi a sawen daytoy a maysa ni Abias a matalek a managdaydayaw ni Jehova? Saan, tangay natay a kas iti nadangkes a sangakabbalayanna. (Deuteronomio 24:16) Kaskasdi, impateg ni Jehova ti “naimbag a banag” a nakitana iti puso ni Abias ken nagtignay a mayannurot iti dayta. Kuna ti Matthew Henry’s Commentary on the Whole Bible: “No adda man maysa a naimbag a banag, masarakanto dayta: Ti Dios a mangbirbirok iti dayta, makitana dayta, uray no bassit laeng, ket maay-ayo iti dayta.” Ket diyo liplipatan a no makasarak ti Dios iti uray bassit laeng a naimbag a kababalinyo, mapadakkelna dayta no la ket ta ikagumaanyo ti agserbi a simamatalek kenkuana.
12, 13. (a) Kasano nga ipakita ti Salmo 139:3 nga ilalaen ni Jehova dagiti panagreggettayo? (b) Iti ania a kaipapanan a maikuna a yakayaken ni Jehova dagiti aramidtayo?
12 Ipatpateg ni Jehova ti panagreggettayo iti umasping a pamay-an. Iti Salmo 139:1-3, mabasatayo: “O Jehova, inusignak, ket ammonak. Ammom ti itutugawko ken itatakderko. Maawatam ti panunotko manipud iti adayo. Rinukodmo ti panagdaliasatko ken ti panagiddak a siuunnat, ket pagaammom unay dagiti amin a dalanko.” Isu nga ammo ni Jehova ti amin nga ar-aramidentayo. Ngem saanna laeng a basta ammo dagitoy. Iti Hebreo, ti sasao a “pagaammom unay dagiti amin a dalanko” mabalin a kaipapananna met, “ipatpategmo dagiti amin a dalanko” wenno “kailalaam dagiti amin a dalanko.” (Idiligyo ti Mateo 6:19, 20.) Ngem kasano a kailalan ni Jehova dagiti amin a dalantayo idinto ta imperpektotayo unay ken managbasol?
13 Makapainteres, sigun iti sumagmamano nga eskolar, idi insurat ni David a “rinukod” ni Jehova ti panagdaliasatna ken panaginanana, ti literal a kaipapananna iti Hebreo ket “yakayaken” wenno “taepan.” Kinuna ti maysa a reperensia: “Ti kayatna a sawen . . . taepan, ket dagiti laeng bagas ti ibati—tapno maurnong amin a napateg. Isu a ti kayatna a sawen ditoy, isut’ yinakayak ti Dios, no ar-arigen. . . . Intar-apna amin a taep, wenno amin a saan a napateg, ket ti laeng pudno ken napateg ti imbatina.” Ti manangbabalaw a puso mabalin a yakayakenna dagiti aramidtayo iti maisupadi a pamay-an, a siuulpit a babalawennatayo gapu kadagiti napalabas a biddut ken ibilangna dagiti gapuanantayo nga awan mamaayna. Ngem pakawanen ni Jehova dagiti basoltayo no sipapasnek nga agbabawi ken ikagumaantay a din uliten dagiti kamalitayo. (Salmo 103:10-14; Aramid 3:19) Yakayaken ken lagipenna dagiti naimbag nga aramidtayo. Kinapudnona, laglagipenna ida iti agnanayon no la ket agtalinaedtay a matalek kenkuana. Ibilangna a kinakillo ti pananglipat kadagitoy, ket [ti Dios] saan a nakillo!—Hebreo 6:10.
14. Aniat’ mangipakita a napateg ken Jehova ti aramidtayo iti Nakristianuan a ministerio?
14 Ania ti sumagmamano kadagiti naimbag nga aramid a napateg iti Dios? Aniaman a banag nga aramidentayo kas panangtulad iti Anakna, ni Jesu-Kristo. (1 Pedro 2:21) No kasta, awan duadua a ti maysa a napateg unay a trabaho isu ti panangisaknap iti naimbag a damag ti Pagarian ti Dios. Iti Roma 10:15, mabasatayo: “Anian a nagimnas ti saksaka dagidiay mangideklara ti naimbag a damag dagiti naimbag a bambanag!” Nupay mabalin a kadawyanna a ditay panunoten a “nagimnas” dagiti nanumo a sakatayo, umarngi ti sao nga inaramat ni Pablo ditoy iti daydiay naaramat iti Griego a Septuagint version a mangiladawan kada Rebecca, Raquel, ken Jose—a nalatakda amin a tallo gapu iti kinaimnasda. (Genesis 26:7; 29:17; 39:6) Isu a ti panagagawatayo iti panagserbi iti Diostayo a ni Jehova ket nakaim-imnas ken napateg iti imatangna.—Mateo 24:14; 28:19, 20.
15, 16. Apay a napateg ken Jehova ti panagibturtayo, ket kasano a naipaganetget daytoy a kinapudno iti sasao ni Ari David iti Salmo 56:8?
15 Ti maysa pay a galad a napateg iti Dios isu ti panagibturtayo. (Mateo 24:13) Laglagipenyo, kayat ni Satanas a paglikudanyo ni Jehova. Tunggal aldaw a panagtalinaedyo a nasungdo ken Jehova ket maysa manen nga aldaw a nakatulongkayo a mangsungbat kadagiti panangumsi ni Satanas. (Proverbio 27:11) No dadduma saan a nalaka ti agibtur. Dagiti parikut iti salun-at, pinansial a pakarigatan, emosional a pakariribukan, ken dadduma pay a lapped mabalin a pagbalinenda a pakasuotan ti tunggal aldaw nga aglabas. Nangnangruna a napateg ken Jehova ti panangibtur iti kakasta a pakasuotan. Dayta ti gapuna nga indawat ni Ari David ken Jehova nga idulinna dagiti luana iti piguratibo a “botelia a lalat,” a sitatalek nga insaludsodna, “Saan kadi nga addada iti librom?” (Salmo 56:8) Wen, ilalaen ken laglagipen ni Jehova dagiti amin a lua ken rigat nga ib-ibturantayo iti panagtalinaedtayo a nasungdo kenkuana. Napateg met dagitoy iti imatangna.
16 Gapu kadagiti nasaysayaat a kababalin ken panagreggettayo, anian a nakabatbatad nga adu ti masarakan ni Jehova a maipategna iti tunggal maysa kadatayo! Uray pay kasanot’ panangtrato kadatayo ti lubong ni Satanas, ibilangnatay ni Jehova a napateg ken paset “ti makaay-ayo a bambanag dagiti amin a nasion.”—Haggeo 2:7.
No Aniat’ Inaramid ni Jehova a Mangipakita iti Ayatna
17. Apay a rumbeng a kumbinsirennatay ti daton a subbot ni Kristo nga ay-ayaten ni Jehova ken ni Jesus ti tunggal maysa kadatayo?
17 Maikatlo, adun ti naaramidan ni Jehova a mangipaneknek iti ayatna kadatayo. Awan duadua, ti daton a subbot ni Kristo ti kabibilgan a sungbat iti sinasatanas a kinaulbod nga awan serserbitayo wenno awan mangipatpateg kadatayo. Pulos a ditay koma liplipatan a ti nakas-ang nga ipapatay a sinagaba ni Jesus iti kayo a pagtutuokan ken ti nakarkaro a saem nga inibturan ni Jehova iti pannakaimatangna iti ipapatay ti dungdungnguenna nga Anak paneknekanna ti ayatda kadatayo. Mainayon pay, personal nga agaplikar kadatayo dayta nga ayat. Kastat’ panangmatmat ni apostol Pablo, ta insuratna: ‘Ti Anak ti Dios . . . inayatnak ken inyawatna ti bagina maipaay kaniak.’—Galacia 2:20.
18. Iti ania a pamay-an a yasidegnatay ni Jehova ken Kristo?
18 Pinaneknekan ni Jehova ti ayatna kadatayo babaen ti panangtulongna iti tunggal maysa kadatayo a mangaprobetsar kadagiti gunggona ti sakripisio ni Kristo. Kinuna ni Jesus iti Juan 6:44: “Awan ti tao a makaumay kaniak malaksid no ti Ama, a nangibaon kaniak, ti mangiyasideg kenkuana.” Babaen ti trabaho a panangasaba, a dumanon iti tunggal maysa kadatayo, ken babaen ti nasantuan nga espirituna, nga us-usaren ni Jehova a tumulong kadatayo a mangtarus ken mangyaplikar kadagiti naespirituan a kinapudno iti baet dagiti limitasion ken pagkurkurangantayo, personal a yasidegnatay ni Jehova iti Anakna ken iti namnama a biag nga agnanayon. Isut’ gapuna a maikuna ni Jehova iti tunggal maysa kadatayo ti kas iti kinunana iti Israel: “Inayatka iti agnanayon a panagayat. Dayta ti gapuna nga inyasidegka babaen ti naayat a kinamanangaasi.”—Jeremias 31:3.
19. Apay a rumbeng a kumbinsirennatay ti pribilehio a panagkararag iti personal nga ayat ni Jehova kadatayo?
19 Nupay kasta, mabalin a mariknatay ti ayat ni Jehova iti kasingedan a pamay-an babaen ti pribilehio a panagkararag. Aw-awisenna ti tunggal maysa kadatayo nga ‘agkararag [kenkuana] a di agressat.’ (1 Tesalonica 5:17) Ipangagnatayo! Naawagan pay ketdi iti ‘Dumngeg iti kararag.’ (Salmo 65:2) Saanna nga inted daytoy a saad iti siasinoman, uray pay iti mismo nga Anakna. Panunotenyo laengen: Idagdagadag ti Namarsua iti uniberso nga umadanitay kenkuana iti kararag, a buyogen ti wayawaya ti panagsao. Ti ar-ararawyo mabalin a tignayenna pay ketdi ni Jehova a mangaramid iti nalabit dina koma aramiden.—Hebreo 4:16; Santiago 5:16; kitaenyo ti Isaias 38:1-16.
20. Apay a saan a pagpambar ti ayat ti Dios kadatayo iti panagbalintay a natangsit wenno napasindayag?
20 Awan ti natimbeng a Kristiano a mangaramat iti kasta a pammaneknek ti ayat ken panangipateg ti Dios kas pambar tapno matmatanna ti bagina a napatpateg ngem iti maiparbeng. Insurat ni Pablo: “Babaen ti di kaikarian a kinamanangaasi a naited kaniak ibagak iti tunggal maysa kadakayo dita a dina panunoten nga ad-adda ti bagina ngem iti rebbengna a panangpanunot; no di ket agpanunot a kas addaan iti nasimbeng a panagpampanunot, tunggal maysa kas imbunong ti Dios kenkuana a rukod ti pammati.” (Roma 12:3) Isu a bayat nga agdaddadangtayo iti bara ti ayat ti nailangitan nga Amatayo, nasimbengtay koma iti panunot ken laglagipentayo a ti naayat a kinamanangaasi ni Jehova ket di kaikarian.—Idiligyo ti Lucas 17:10.
21. Ania a sinasatanas a kinaulbod ti nasken nga agtultuloy a sarangtentayo, ket ania a nadiosan a kinapudno ti nasken a panunotentay a kanayon?
21 Ikagumaan koma ti tunggal maysa kadatayo a sarangten dagiti amin a kapanunotan nga itantandudo ni Satanas iti daytoy agbugbugsot a daan a lubong. Iraman dayta ti panangilaksid iti kapanunotan nga awan serserbitayo wenno awan mangipatpateg kadatayo. No sinursuruannakay ti biag iti daytoy a sistema a mangmatmat iti bagiyo kas maysa a nagdakkel a bangen a di maduprak ti naindaklan nga ayat ti Dios, wenno dagiti naimbag nga aramidyo a nanumo unay ta di mapaliiw dagiti awan maliwayanna a matana, wenno dagiti basolyo a dakkel unay ta di maabbongan ti ipapatay ti napateg nga Anakna, kinaulbod ti naisuro kadakayo. Laksidenyo dagita a kinaulbod buyogen ti panangbusor a pakaikarianda! Laglagipentay koma a kanayon ti naipaltiing a sasao ni apostol Pablo iti Roma 8:38, 39: “Kumbinsidoak nga uray ti ipapatay wenno ti biag wenno dagiti anghel wenno dagiti gobierno wenno dagiti bambanag nga addan wenno dagiti bambanag nga umayto wenno dagiti pannakabalin wenno ti kangato wenno ti kauneg wenno ti aniaman a sabali pay a parsua didatayto kabaelan nga isina manipud iti ayat ti Dios nga adda ken Kristo Jesus nga Apotayo.”
[Footnote]
a Kinapudnona, inumsida dagiti napanglaw babaen ti panangawagda kadakuada iti “ʽam-ha·ʼaʹrets,” wenno “tattao ti daga.” Sigun iti maysa nga eskolar, insuro dagiti Fariseo a di rumbeng nga italek kadagitoy dagiti napateg a banag, wenno agpiar iti pammaneknekda, wenno sangailien ida, wenno agbalin a sangailida, wenno uray gumatang kadakuada. Kinuna dagiti relihiuso a pangulo a ti pannakiasawa ti maysa nga anak a babai iti maysa kadagitoy a tattao arignat’ panangbaybay-a kenkuana a naparautan ken awanan gaway iti atap nga animal.
Aniat’ Makunayo?
◻ Apay a padpadasen ni Satanas nga ipapati nga awan serserbitayo ken awan mangipatpateg kadatayo?
◻ Kasano nga insuro ni Jesus nga ipatpateg ni Jehova ti tunggal maysa kadatayo?
◻ Kasanotay nga ammo nga ilalaen ni Jehova dagiti naimbag a kababalintayo?
◻ Kasanotay a masigurado nga ipatpateg ni Jehova ti panagreggettayo?
◻ Kasano a pinaneknekan ni Jehova ti ayatna iti tunggal maysa kadatayo?
[Ladawan iti panid 13]
Sikikita ken silalagip ni Jehova kadagiti amin a mangpampanunot iti naganna