Report Dagiti Manangiwaragawag ti Pagarian
Panangasaba iti Nariribuk a Panawen
IMPADTO ni apostol Pablo a “kadagiti maudi nga al-aldaw [dumteng] dagiti napeggad a tiempo a narigat a pakilangenan.” (2 Timoteo 3:1) Anian ti kinaumiso dagidiay a sasao! Nabayagen a napasaran dagiti umili ti El Salvador idiay Central America daytoy napait a kinapudno. Iti las-ud ti nasurok a maysa a dekada, napasamak ti guerra sibil iti dayta a pagilian a nangituggod iti panagrigat ken ipapatay ti rinibribu [a tattao]. Nagpatinggan ti gubat, ngem nagtalinaed ti panagrigat. Nakaro ti panagsaknap ti krimen kalpasan ti gubat. Kinuna ti komentarista iti maysa a telebision ti pagilian itay nabiit: “Ti kinaranggas ken panagtakaw arignat’ taraontayon iti inaldaw.”
Naapektaran met dagiti Saksi ni Jehova iti daytoy a dalluyon ti krimen. Adu a Kingdom Hall ti sinerrek dagiti mannanakaw ket tinakawda dagiti alikamen iti sound. Namin-adu a daras a rinaut dagiti nagtagiarmas a bunggoy ti agtutubo dagiti Kingdom Hall kabayatan dagiti Nakristianuan a panaggigimong, a nagtakawda kadagiti kuarta, relo, ken dadduma pay a sanikua dagidiay timmabuno. Bayat nga ar-aramidenda dagiti inaldaw a trabahoda, adun a Saksi ti pinapatay pay ketdi dagiti mannanakaw.
Iti laksid dagitoy a tubeng, nagtultuloy dagiti Saksi ni Jehova idiay El Salvador nga agtrabaho a sipipinget iti panangikasaba iti naimbag a damag. Ar-aramidenda daytoy kas panagtulnog iti Nainkasuratan a bilin: “Iti isuamin a nasnasion masapul a maikaskasaba nga umuna ti naimbag a damag.” (Marcos 13:10) Adu pay laeng [ti tattao] iti daytoy a pagilian a magagaran iti namnama ti Pagarian nga itden ti Biblia, ket ikagkagumaan dagiti Saksi a danonen ti tunggal maysa kadakuada. Napaneknekan a maysa nga epektibo a pamay-an iti panangasaba ti impormal a panangsaksi.
Bayat nga agpapaagas iti maysa nga ospital, inaramat ti maysa a Saksi ti tunggal gundaway tapno makisarita kadagiti dadduma a pasiente maipapan kadagiti kari ti Dios iti masanguanan, kas masarakan iti Biblia. Silaladingit nga insennaay ti maysa a masakit unay a pasiente: “Agngangabitakon ken patay!” Ngem ti naladingit a langa ti pasiente saan nga isut’ nangupay iti Saksi a mangiburay iti naimbag a damag ti Pagarian ti Dios. Imbes ketdi, imbasaanna a sipipigsa ti lalaki manipud iti libro a Mabalinyo ti Agbiag nga Agnanayon iti Paraiso a Daga, nga impablaak dagiti Saksi ni Jehova. Sumagmamano nga aldaw kalpasanna, rimmuar ti Saksi iti ospital, a sililiday a mangpampanunot a dandanin matay ti lalaki.
Uppat a tawen kalpasanna, kasapulan nga agpaagas ti Saksi iti sabali manen nga ospital. Bayat nga adda sadiay, immasideg kenkuana ti maysa a pasiente ket kinunana: “Malagipnak kadi?” Isu daydi lalaki a naam-ammona uppat a tawenen ti napalabas, ti lalaki nga agngangabit idin ken patay! Anian a makaparagsak a pannakaklaat idi inarakup ti lalaki ket kinunana kenkuana: “Ita, maysaak metten kadagiti Saksi ni Jehova!” Impateg ti lalaki ti namnama iti masanguanan nga itden ti Biblia, nakipagadal iti Biblia kadagiti Saksi ni Jehova, ken indedikarna ti biagna ken Jehova. Saan laeng a maysa a Saksi no di ket makiramraman iti amin-tiempo a ministerio kas maysa a regular pioneer iti agarup dua a tawenen.
Iti daytoy a kaso, dagiti bukel ti kinapudno a naitukit iti impormal a pamay-an dinanonna ti manangipangag a puso. Daytoy a pribilehio a tumulong kadagiti tattao nga umammo iti kinapudno ti mangtignay kadagiti pudno a Kristiano nga agtultuloy iti trabaho a panangasaba iti laksid dagitoy “napeggad a tiempo a narigat a pakilangenan.”