Panagdaklis Kadagiti Tao iti Sangalubongan a Dandanum

“No, ita, ikaskasabak ti naimbag a damag, awan aniaman a panagpasindayagko, ta naipabaklay kaniak daytoy a pannakasapul. Ay-ayak pay ngarud no diak iwaragawag ti naimbag a damag!”​—1 CORINTO 9:16.

1, 2. (a) Asino ti agpayso a nakapudnon iti karit a naipalnaad idiay 1 Corinto 9:16, ken apay a kasta ti sungbatyo? (b) Ania a responsabilidad ti inawaten dagiti Saksi ni Jehova?

ASINO iti daytoy maika-20 a siglo ti pudno a nakapudnon iti karit nga insango dagiti sasao ni apostol Pablo iti ngato? Asino dagiti minilion a rimmuaren iti lubong tapno agdaklis kadagiti lallaki ken babbai a “sipapanunot kadagiti naespirituan a kasapulanda”? (Mateo 5:3) Asino dagiti nagpeggaden iti pannakaibalud ken ipapatay, ken asino dagidiay nagsagaban iti kakasta kadagiti adu a dagdaga, gapu iti panangtungpalda iti bilin ni Kristo idiay Mateo 24:14?

² Sumungbat ti rekord: Dagiti Saksi ni Jehova. Idi napan a tawen laeng nasurok nga uppat a milion a Saksi ti napan iti binalaybalay a ‘mangiwarwaragawag iti naimbag a damag’ kadagiti 211 a pagilian ken teritoria ken iti nasurok a 200 a pagsasao. Dagitoy ket saan a grupo laeng dagiti napili a nasanay a misionero. Saan, amin a Saksi ni Jehova mariknada ti responsabilidad a mangasaba ken mangisuro manipud binalaybalay ken iti tunggal maitutop a gundaway. Apay a mariknada dayta a pannakasapul a panangiranud kadagiti patpatienda kadagiti sabsabali? Agsipud ta mabigbigda a ti pannakaammo mangiyeg responsabilidad.​—Ezequiel 33:8, 9; Roma 10:14, 15; 1 Corinto 9:16, 17.

Panagdaklis kadagiti Tao, Maysa a Sangalubongan a Karit

3. Masapul a kasano kasaknap ti trabaho a panagdaklis?

³ Daytoy a naindaklan a trabaho a panagdaklis ket saan a nakedngan, no iyar-arig, iti sumagmamano a karayan wenno danaw wenno iti maymaysa a taaw. Saan, kas imbilin ni Jesus, masapul a maitungpal daytoy “iti amin a nasion.” (Marcos 13:10) Sakbay iyuulina ken Amana, kuna ni Jesus kadagiti adalanna: “Inkayo ngarud ket agaramidkayo kadagiti ad-adalan kadagiti tattao iti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu, nga isursuroyo ida a salimetmetanda amin dagiti bambanag nga imbilinko kadakayo. Ket, adtoy! Addaakto kadakayo kadagiti amin nga aldaw agingga iti panungpalan ti sistema dagiti banag.”​—Mateo 28:19, 20.

4. (a) Aniat’ namagsiddaaw la ketdi kadagiti nagkauna a Judio a pasurot ni Jesus? (b) Kasanot’ panangmatmat dagiti Saksi ni Jehova iti kasaknap ti trabahoda a panangasaba?

⁴ Kadagiti Judio a pasurot ni Jesus, nakaskasdaaw la ketdi dayta a komision. Kinunkunana kadagiti Judio nga adalanna a kasapulanda itan ti mapan kadagiti “di nadalus” a Gentil kadagiti amin a nasion ket isuroda ida. Kinasapulanna ti adu a panangilinteg kadakuada tapno maipaunegda ti dagsen ken agtignayda iti dayta nga annongen. (Aramid 10:9-35) Ngem awan idi ti pangliklikan; kuna kadakuada ni Jesus iti maysa a pangngarig a “ti tay-ak isu ti lubong.” Ngarud, dagiti Saksi ni Jehova ita matmatanda ti intero a lubong kas lugar a pagdaklisanda. Awan ti “20-kilometro a pagbeddengan” wenno “masakopan a dandanum” a mangtiped iti komisionda manipud iti Dios. No dadduma kasapulan ti panagannad sadiay awan ti narelihiusuan a wayawaya. Nupay kasta, agdaklisda buyogen rikna ti kinaganat. Apay a kasta? Gapu ta dagiti pasamak ti lubong ken ti pannakatungpal ti padto ti Biblia ipabigbigda nga addatayon iti maudi a paset ti sangalubongan a trabaho a panagdaklis.​—Mateo 13:38; Lucas 21:28-33.

Irarang-ay iti Sangalubongan a Trabaho a Panagdaklis

5. Aniada a kita dagiti tao ti mangipangpangag iti sangalubongan a trabaho a panagdaklis?

⁵ Kaaduan kadagiti napulotan nga agtawid iti Pagarian ket “nadaklisda” manipud kadagiti nasion sakbay ti 1935, gapuna a ti naan-anay a bilangda ket nakumpleton. Ngarud, nangnangruna manipud 1935, dagiti Saksi ni Jehova birbirukendan dagidiay napakumbaba a tattao a mabalin a madeskribir kas “dagiti naemma” a “mangtawid iti daga.” (Salmo 37:11, 29) Dagitoy isu dagiti tattao nga “agsasaibbek ken agsangsangit gapu kadagiti amin a makarimon a bambanag a maar-aramid.” Mangar-aramiddat’ tignay iti dasig ti Pagarian ti Dios sakbay a ti “dakkel a rigat” saplitenna ti tiritir ken narugit a sistema ti bambanag ni Satanas ken dagiti managdayawna ket naitudingda agturong “iti dumardarang nga urno” ti maudi a pannakadadael.​—Ezequiel 9:4; Mateo 13:47-50; 24:21.

6, 7. (a) Aniada nga addang ti naaramid idi 1943 maipanggep iti trabaho a panangasaba? (b) Aniadan dagiti resulta?

⁶ Naballigi kadi met laeng ti sangalubongan a panagdaklis? Bay-antayo nga agsao dagiti kinapudno para kadakuada. Idi 1943, sumsumged pay laeng ti Gubat Sangalubongan II, kaskasdi dagiti matalek a napulotan a kakabsat idiay sangalubongan a hedkuarter dagiti Saksi ni Jehova idiay Brooklyn, Nueva York, naipakpakauna a nakitadan a maysa a dakkel nga aramid ti sangalubongan a panagdaklis ti kasapulan a maibanag. Gapuna, aniada nga addang ti naaramid?a​—Apocalipsis 12:16, 17.

⁷ Idi 1943 ti Watchtower Society nangipasdek iti maysa nga eskuelaan dagiti misionero a maaw-awagan Gilead (Hebreo, “Buntuon ti Pammaneknek”; Genesis 31:47, 48) a nangrugi a nangsanay iti sangagasut a misionero iti tunggal innem a bulan tapno maipatulodda kas simboliko a dumadaklis iti intero a daga. Idi, adda laeng 126,329 a Saksi a siaaktibo nga agdakdaklis kadagiti tao iti 54 a dagdaga. Iti las-ud ti sangapulo a tawen dagidiay a numero ti ngimmato idi agangay iti 519,982 a Saksi iti 143 a dagdaga! Sigurado, ti Eskuelaan ti Gilead nangpataud kadagiti nasiglat a dumadaklis a lallaki ken babbai, a situtulok a mapan kadagiti ganggannaet a kultura ken mangiruam kadagiti bagbagida kadagiti baro a danum a pagdaklisan. Kas resultana, rinibo a nasingpet-panagpuspusona a tattao ti nangipangag. Dagidiay a misionero, ken dagiti lokal a Saksi a nakipagtrabahuanda, ti nangibalabala iti pangisaadan maipapan iti nakaskasdaaw nga irarang-ay a maar-aramid itan.

8, 9. (a) Aniada nga ulidan ti mabalin a maadaw maipapan iti naidumduma a misionero a trabaho? (b) Kasano a nakakitan dagiti misionero iti naisangsangayan nga irarang-ay kadagiti tay-akda? (Kitaenyo met ti 1992 Yearbook of Jehovah’s Witnesses)

⁸ Adu a matalek a beterano manipud kadagidiay immuna a klase ti Gilead ti agserserbi pay laeng kadagiti ganggannaet a nakaitudinganda, uray no nasurok a 70 wenno uray 80 payen ti tawenda. Maysa nga ulidan a mangibagi iti adu kadagitoy isu daydiay ulidan da 82-tawenna nga Eric Britten ken ni baketna, ni Christina, a nagturpos manipud maika-15 a klase ti Gilead idi 1950 ken agserserbida pay laeng idiay Brazil. Idi napanda tapno agserbi idiay Brazil, adda idi nakurang a 3,000 a Saksi iti dayta a pagilian. Ita addan nasurok a 300,000! Sigurado, ti ‘bassit nagbalinen a maysa a nabileg a nasion’ idiay Brazil agsipud ta nabungan ti trabaho a panagdaklis.​—Isaias 60:22.

⁹ Ken aniat’ maikunatayo maipapan kadagiti misionero idiay Africa? Kaaduanna ti nairuamen iti naiduma unay a kultura ken nasursurodan nga ayaten dagiti umili ti Africa. Kasta da kakabsat a John ken Eric Cooke ken dagiti assawada, da Kathleen ken Myrtle, iti agdama agserserbida idiay Makin-abagatan nga Africa. Da John ken Eric nagturposda manipud maikawalo a klase idi 1947. Dagiti nasion a nagserbianen dagitoy a dua a kakabsat isu ti Angola, Zimbabwe, Mozambique, ken Makin-abagatan nga Africa. Dadduma a misionero ti natay idiay Africa gapu iti sakit, ken dagiti sabsabali gapu iti gubat ken pannakaidadanes, kas ken Alan Battey ken Arthur Lawson, a natay kabayatan ti kallabes a guerra sibil idiay Liberia. Kaskasdi, dagiti dandanum ti Africa ket nakabungbungada. Adda itan nasurok nga 400,000 a Saksi a naiwaras iti dayta a dakkel a kontinente.

Amin Addaan Paset

10. Apay ken iti ania a pamay-an a mangar-aramid dagiti payunir iti makumendaran a trabaho?

¹⁰ Nupay kasta, rebbeng a mabigbig a nupay dagiti ganggannaet a misionero adda bilangdan a rinibo, dagiti lokal nga agibumbunannag ken dagiti payunirb nagbalindan a minilion. Ar-aramidenda ti kadakkelan a paset ti trabaho a panangasaba iti intero a daga. Idi 1991 adda promedio a nasurok a 550,000 a payunir ken agdaldaliasat a ministro. Anian a nakaskasdaaw a bilang dayta no panunotentayo amin dagitoy matalek a Saksi a mangar-aramid ti naisangsangayan a panagregget a makipaset iti naindaklan a trabaho a panagdaklis, nga agprompromedio manipud 60 aginggat’ 140 nga oras ti panangasaba iti tunggal bulan. Adut’ mangaramid iti daytoy iti dakkel a personal a panagsakripisio ken gastosda. Ngem apay? Agsipud ta ay-ayatenda ni Jehova a Diosda iti amin a puso, panunot, kararua, ken pigsada, ken ay-ayatenda dagiti kaarrubada kas kadagiti bagida.​—Mateo 22:37-39.

11. Aniat’ adda a sigurado a pammaneknek nga agan-andar ti espiritu ni Jehova iti ilina?

¹¹ Aniat’ maikunatayo maipapan iti nasurok a tallo ket kagudua a milion a sabsabali a Saksi nga awan iti amin-tiempo a serbisio ngem uray kasta it-itedda ti 100 porsiento iti serbisio ni Jehova, sigun kadagiti kasasaadda? Dadduma ket assawa a babbai, innada pay a mangay-aywan kadagiti babassit nga ubbing, a nupay kasta ipapaayda ti naruay a napateg a tiempoda iti sangalubongan a trabaho a panagdaklis. Adu ti assawa a lallaki wenno amma nga addaan amin-tiempo a sekular a trabaho; kaskasdi, isaparda kadagiti ngudo ti lawas ken iti rabii ti mangisuro iti kinapudno kadagiti ganggannaet. Sa adda dita ti dakkel nga umariwekwek dagiti di naasawaan a lallaki ken babbai ken dagiti ubbing a makipaspaset iti panangasaba ken mangidagadag iti kinapudno babaen iti konduktada. Ania pay a sabali a narelihiusuan a grupo ti addaan nasurok nga uppat a milion a di matangtangdanan a boluntario a mangikaskasaba iti tunggal bulan iti naimbag a damag ti turay ti Pagarian ti Dios? Sigurado paneknekan daytoy ti panagtignay ti espiritu ni Jehova!​—Salmo 68:11; Aramid 2:16-18; idiligyo ti Zacarias 4:6.

Bambanag a Tumulong iti Iyaadu

12. Apay ken kasano kaadu dagiti tao a mangipangpangag iti kinapudno?

¹² Daytoy nasaknap a panangasaba a trabaho ket mangipapaay kadagiti karkarna a resulta iti tunggal tawen. Idi 1991 nasurok a 300,000 a kabbaro a Saksi ti nabautisaran babaen naan-anay a pannakaitaneb iti danum. Katupag dayta ti nasurok a 3,000 a kongregasion a tunggal maysa addaan 100 a Saksi! Kasano a naaramidan amin daytoy? Laglagipentayo ti kuna ni Jesus: “Awan ti tao a makabalin nga umay kaniak no saan a guyugoyen ni Ama a nangibaon kaniak . . . Adda nga insurat dagiti Mammadto, ‘Ket maisurodanto amin ken Jehova.’ Tunggal maysa a nakangngeg manipud iti Ama ket nakasursuro umay kaniak.” Ngarud, saan a babaen iti natauan a panagregget laeng a mangipangag ti maysa a tao iti sangalubongan a panagdaklis. Tukoden ni Jehova ti kasasaad ti puso ken iyasidegna kenkuana dagidiay maikari.​—Juan 6:44, 45; Mateo 10:11-13; Aramid 13:48.

13, 14. Ania a nasayaat a kababalin ti imparangarangen ti adu a Saksi?

¹³ Nupay kasta, dagiti dumadaklis kadagiti tao isu dagiti ahente nga us-usaren ni Jehova a mangiyasideg kenkuana kadagiti tattao. Ngarud, ti kababalinda kadagiti tattao ken iti teritoria a pagdakdaklisanda ket napateg. Anian a makaparegta a makita a ti dakkel a paset daytoy ti nangipapuson kadagiti sasao ni Pablo kadagiti taga Galacia: “Ditay ngarud agsardeng nga agaramid ti naimbag, ta inton tiempona agapittayonto no ditay mabannog.”​—Galacia 6:9.

¹⁴ Adu a matalek a Saksi ti mangaskasaban iti adu a dekada, bayat a siinget a sipsiputanda dagiti pasamak ti lubong. Nakitadan ti irarang-ay ken pannakarba ti Nazismo, Fascismo, ken sabsabali pay a totalitariano a sistema. Dadduma ti nakaimatangen kadagiti adu a gubat a napasamak manipud 1914. Nakitadan dagiti papangulo dagiti nasnasion a nangikabil iti panagtalekda iti Liga de Naciones ken kalpasanna iti Naciones Unidas. Nakitadan ti pannakaiparit ken idi agangay pannakaaramid a legal ti trabaho ni Jehova iti adu a daga. Iti amin dagitoy, saan a simmardeng dagiti Saksi ni Jehova iti panagaramid ti naimbag, agraman panagserbi kas dumadaklis kadagiti tao. Anian a naidumduma a rekord ti kinatarnaw!​—Mateo 24:13.

15. (a) Ania a tulong ti naadda kadatayon iti pannakibagay kadagiti kasapulan ti sangalubongan a teritoriatayo? (b) Kasano a timmulong dagiti publikasion iti nakaitudinganyo?

¹⁵ Addada pay sabsabali a banag a timmulong iti daytoy sangalubongan nga idadakkel. Maysa isu ti mannakibagay a kababalin dagiti dumadaklis kadagiti tao kadagiti kasapulan ti teritoria. Gapu iti iyaakar dagiti tattao a nagduduma ti kultura, relihion, ken pagsasaoda, pinalawan dagiti Saksi ni Jehova ti pannaawatda kadagitoy nagduduma a panangmatmat. Ken timmulongen a naimbag ti sangalubongan a kongregasion babaen panangisaganana kadagiti Biblia ken literatura ti Biblia iti nasurok a 200 a pagsasao. Ti New World Translation of the Holy Scriptures, iti pakabuklan wenno pasetna, ket adda itan iti 13 a pagsasao, agraman Czech ken Slovak. Ti broshur a Tagiragsakenyo ti Biag nga Agnanayon Ditoy Daga! ket magun-odan itan iti 198 a pagsasao, manipud Albaniano agingga iti Zulu, a naiyimprentan iti 72 milion a kopia. Ti libro a Ti Katan-okan a Tao a Nagbiag Pay Laeng ket naipatarusen iti 69 a pagsasao. Ti Panangbiruk ti Sangatauan iti Dios, a naipatarus iti 30 a pagsasao, mangted pannakaawat iti nagtaudan ken patpatien dagiti kangrunaan a relihiuso a sistema ti lubong ken agbalbalin a maysa a naisangsangayan a katulongan iti sangalubongan a panagdaklis.

16. Kasano a nangipangagen dagiti dadduma kadagiti kasapulan iti sabsabali a daga?

¹⁶ Ania pay ti nangpasaknap iti sangalubongan a trabaho a panagdaklis? Rinibo ti situtuloken a nangipangag iti ‘awag dagiti taga Macedonia.’ No kasano a situtulok ni Pablo nga immakar manipud Asia Menor agturong idiay Macedonia sadi Europa, iti iyaawag ti Dios, adu a Saksi ti immakaren kadagiti daga ken teritoria a sadiay adda dakdakkel a pagkasapulan kadagiti manangikasaba ti Pagarian, kasta met kadagiti panglakayen ken ministerial nga adipen. Nagbalindan a kas literal a dumadaklis nga idi nariknada a nagagaran ti pannakadaklis dagiti pagkalapanda napanda kadagiti dandanum a sadiay basbassit dagiti dumadaklis ken naruay dagiti ikan.​—Aramid 16:9-12; Lucas 5:4-10.

17. Aniada a nasayaat nga ulidan ti addda kadatayo maipapan kadagidiay nangipangag iti ‘awag dagiti taga Macedonia’?

¹⁷ Dagiti kallabes a klase ti eskuelaan dagiti misionero ti Gilead inramannan dagiti estudiante manipud nagduduma a pagilian ti Europa a nakasursuron iti Ingles ken intukonda dagiti bagbagida agpaay iti serbisio kadagiti sabsabali a daga ken kultura. Umarngi met, baeten iti Ministerial Training School, adu a di naasawaan a kakabsat a lallaki ti naikkan iti dua a bulan a pannakaasaas ket kalpasanna naibaonda kadagiti sabali a nasion tapno pabilgenda dagiti kongregasion ken sirkito. Dagiti sabsabali pay a naisangsangayan a pagdaklisan isu dagiti teritoria a mangluklukat itan idiay Makindaya nga Europa ken dagiti dati a republika ti Union Soviet.​—Idiligyo ti Roma 15:20, 21.

18. (a) Apay a dagiti payunir kaaduanna nga epektiboda a ministro? (b) Kasanoda a matulongan dagiti sabsabali idiay kongregasion?

¹⁸ Mainayon pay a katulongan iti sangalubongan a trabaho a panagdaklis isu ti Pioneer Service School a tabtabunuan dagiti regular payunir. Baeten iti dua a lawas a napamaysa a pannakasalaysay ti publikasion a Panaglawag kas Silsilaw iti Lubong, a naisagana para laeng kadagiti payunir, maparang-ayda ti abilidadda iti ministerio bayat nga usigenda dagiti tema kas iti “Panangsurot ti Dalan ti Ayat,” “Surotenyo ni Jesus kas Ulidan,” ken “Panangparang-ay iti Arte ti Panangisuro.” Anian a panagyaman dagiti amin a kongregasion a maaddaan kadagitoy a grupo dagiti kualipikado a dumadaklis iti panagbalaybalay a makasanay kadagiti adu iti daytoy naindaklan a trabaho a panagdaklis!​—Mateo 5:14-16; Filipos 2:15; 2 Timoteo 2:1, 2.

Mabalintayo Kadi ti Rumang-ay?

19. Kas ken apostol Pablo, kasanotayo a rumang-ay iti ministeriotayo?

¹⁹ Kas ken Pablo, kayattayo ti maaddaan positibo, kumitkita iti panagabante a kababalin. (Filipos 3:13, 14) Isut’ nakitunos iti amin a kita ti tao ken kasasaad. Ammona no kasano ti sumapul iti pagtunosan ken no kasano ti agrason maibatay kadagiti lokal a kababalin ken kultura. Makairugitayo kadagiti panangiyadal ti Biblia babaen panagbalin a nasiput kadagiti reaksion ti maysa a bumalay iti mensahe ti Pagarian ken kalpasanna panangitunos iti presentasiontayo kadagiti kasapulan dayta a tao. Buyogen nakaad-adu a katulongan ti panangiyadal ti Biblia nga adda kadatayo, maitukontayo daydiay tumutop iti panangmatmat ti indibidual. Ti kinamannakibagay ken kinaalibtaktayo ket napateg met iti nabunga a panagdaklis.​—Aramid 17:1-4, 22-28, 34; 1 Corinto 9:19-23.

20. (a) Apay a nakapatpateg unay itan ti trabahotayo a panagdaklis? (b) Ania ti indibidual a responsabilidadtayo itan?

²⁰ Apay a daytoy a naidumduma a sangalubongan a trabaho a panagdaklis ket nakapatpateg ita? Agsipud ta manipud kadagiti padto ti Biblia a naisilnag kadagiti pasamak a naaramiden ken maar-aramid, nalawag a ti sistema ti lubong ni Satanas ket agturongen iti makadidigra a pagtungpalanna. Gapuna, aniat’ rebbengtayo, a Saksi ni Jehova, nga aramiden? Dagiti tallo nga adalen nga artikulo iti daytoy a magasin intampokdan ti responsabilidadtayo nga agbalin a nagaget ken naregta iti aramidtayo a panagdaklis iti bingaytayo kadagiti sangalubongan a danum. Addaantayo iti solido a pammasiguro manipud Biblia a dinto lipaten ni Jehova ti nasigo nga aramidtayo a panagdaklis. Kuna ni Pablo: “Saan a nakillo ti Dios tapno lipatenna ti aramidyo ken ti ayat nga impakitayo iti naganna, gapu iti panagpaadipenyo kadagiti sasanto ken panagtultuloyyo a panagpaadipen. Ngem tarigagayanmi a tunggal maysa kadakayo ipakitana ti isu met laeng a kinagaget tapno maaddaan naan-anay a pammasiguro iti namnama agingga iti panungpalan.”​—Hebreo 6:10-12.

[Dagiti Footnote]

Malagipmo Kadi?

◻ Apay a matmatan dagiti Saksi ni Jehova ti intero a lubong kas lugar ti aramidda a panagdaklis?

◻ Ania a bendision ti nagbalinanen ti eskuelaan dagiti misionero ti Gilead iti trabaho a panagdaklis?

◻ Ania dagiti sumagmamano a banag a timmulong iti balligi dagiti Saksi ni Jehova?

◻ Kasanotayo a maparang-ay kas indibidual iti Nakristianuan a ministeriotayo?

[Tsart iti panid] 24]

DAGITI RESULTA TI INTERNASIONAL A PANAGDAKLIS

Tawen Dagdaga Dagiti Saksi

1939 61 71,509

1943 54 126,329

1953 143 519,982

1973 208 1,758,429

1983 205 2,652,323

1991 211 4,278,820

[Ladawan iti panid 25]

Ti trabaho a panangsaksi ket maar-aramid pay laeng kadagiti dumadaklis a taga Galilea