BEDDENG

Ti Hebreo a sao a gevulʹ kaipapananna ti “beddeng.” Mabalin a kaipapananna met ti teritoria wenno daga nga adda iti uneg ti maysa a ketegan wenno beddeng. Gapuna, kunaen ti Josue 13:23: “Ket ti beddeng [Heb., gevulʹ] ti annak ni Ruben isu idi ti Jordan; ket daytoy kas maysa a teritoria [u·ghevulʹ] isu idi ti tawid.”

Bedbeddeng nga Impasdek ni Jehova. Sakbay ti sangalubongan a Layus, ti Dios pinaruarna ti umuna a natauan a pagassawaan manipud minuyongan ti Eden, a makagapu a kinasapulan nga agnaedda iti ruar dayta (Ge 3:23, 24), pinagtalawna ni Cain iti mismo a “daga” nga ‘um-umkisan’ idi ti dara ni Abel (Ge 4:10, 11), ket idi agangay nangisaad iti pagpatinggaan a “sangagasut ket duapulo a tawen” (Ge 6:3) nga iti dayta ti populasion sakbay ti Layus makapagtultuloy nga agnaed iti rabaw ti daga sakbay ti pannakadadael ti kaaduan kadakuada. (Ge 6:13) Imbilinna a dagiti nakalasat iti Layus ‘punnuenda ti daga,’ ket idi naadda ti pananggandat a mangtiped iti nasaknap a panagwaras iti daga, ti Dios kineltayna ti kasta a tignay ket inobligarna ti tattao a mangitungpal iti dayta a bilin.​—Ge 9:1, 19; 11:1-9.

Sinigsiglo kalpasanna, ti Dios inkarina ken Abraham ken iti bin-ina ti maysa a daga nga addaan kadagiti naipiho a beddeng. (Ge 15:18-21; Ex 23:31) Impalubos ti Dios a dagiti agin-indeg a Canaanita agtultuloyda nga agnaed iti dayta a Naikari a Daga iti naipadto a kanayonan a periodo nga “uppat a gasut a tawen” sakbay nga ipatungpalna ti bilin a pannakaparuar inton ti “biddut dagiti Amoreo” dumtengen iti pannakaan-anayna. (Ge 15:13-16) Iti sabali a bangir, imbilin met ni Jehova a Dios a saan a pakibiangan dagiti Israelita ti bedbeddeng dagiti nasion ti Edom, Moab, ken Ammon, isuda a nagtaud kadagiti kabagian dagiti inapo dagiti Israelita idi un-unana. (De 2:4, 5, 18, 19) Ti sasao ti kanta ni Moises iti Deuteronomio 32:8 maitarusan iti lawag dagitoy a kinapudno. Kunaen dayta a teksto: “Idi a ti Kangatuan inikkanna dagiti nasion iti tawid, idi pinagsisinana ti annak ni Adan, impasdekna ti beddeng ti il-ili sigun iti bilang ti annak ti Israel.”

Idi agangay, maibatay iti soberano a kalintegan ni Jehova a mangikeddeng kadagiti kasta a beddeng, inkanawa ni Ukom Jefte ti kalintegan ti Israel iti inted-Dios a dagana. (Uk 11:12-15, 23-27) Nupay kasta, gapu iti pannakapaay ti Israel a mangannurot a sipapasnek iti bilbilin ti Dios, impalubos ni Jehova a ti sumagmamano kadagiti kabusor nga il-ili agtalinaedda iti uneg dagiti ketegan ti Israel (Nu 33:55; Uk 2:20-23), ket idi laeng panagturay ni Ari David, agarup uppat a siglo manipud iseserrek ti nasion iti Canaan, a ti Israel nagun-odna ti panangituray iti intero a teritoria iti las-ud dagiti naikari a beddeng.​—2Sm 8:1-15.

Idi kamaudiananna, maitunos iti immun-una a mangballaag a pammakdaarna, impalubos ni Jehova a ti pagano a nasnasion sakupenda dagiti beddeng ti Naikari a Daga ken iturongda ti Israel iti pannakaidestiero, kas pannusa iti apostata nga ili. (De 28:36, 37, 49-53; Jer 25:8-11) Babaen kadagiti mammadtona a da Isaias, Jeremias, Ezequiel, ken Daniel, ti Dios impadtona ti itatanor ken pannakatnag dagiti pannakabalin ti lubong mangrugi iti Babilonia nga agpatpatuloy ken ti panagsasaganad ti panagparangda. (Isa 13:1–14:4; 44:28–45:5; Jer 25:12-29; Eze 21:18-27; Da kap 2, 7, 8, ken Da 11:1–12:4) Nupay pinanuynoyanna ti kaadda dagiti napolitikaan a nasion ken ti panangiturayda iti daga iti ‘naituding a panawen,’ impadto met ni Jehova ti naan-anay a pannakadadaelda ken ti pannakapunas dagiti beddeng ti napolitikaan a pagturayanda, a daytoy ket ipatungpal ti Pagarian ti Mesias.​—Da 2:44; idiligyo ti Apo 11:17, 18; 19:11-16.

“Dagiti Naipasdek a Pagpatinggaan” ti Pagnaedan Dagiti Tattao. Imbaga ni Pablo kadagiti taga Atenas nga agdengdengngeg kenkuana a ti Dios “inkeddengna dagiti naituding a tiempo ken dagiti naipasdek a pagpatinggaan [Gr., ho·ro·the·siʹas, iti literal, “panangipasdek kadagiti pagpatinggaan”] ti pagnaedan dagiti tattao.” (Ara 17:26) Nayebkas ti umasping a kapanunotan iti Salmo 74:17 mainaig iti Namarsua: “Sika ti nangipasdek kadagiti amin a beddeng ti daga; ti kalgaw ken kalam-ekna​—sika binukelmo ida.” Ti Kangatuan ti makinggapuanan iti kaadda dagiti nainkasigudan a beddeng a kas kadagiti karayan, danaw, baybay, ken bantay, a mangikeddeng no sadino ti pagyanan ti tattao.​—Idiligyo ti Jer 5:22.

Bedbeddeng Dagiti Tribu ti Israel. (MAPA, Tomo 1, p. 744) Idi tiempo ti panangparmek ti Israel iti Naikari a Daga, dagiti tribu da Ruben, Gad, ken ti kagudua a tribu ni Manases naipaayanda iti kalintegan nga umawat iti tawidda a daga “manipud igid ti Jordan nga agpaleleggakan ti init.” (Nu 32:1-5, 19, 33-42; 34:14, 15; Jos 13:8-13, 15-32) Kalpasan ti innem a tawen a pannakigubat iti panangparukma kadagiti Canaanita, dimteng ti tiempo a pannakaikeddeng ti bedbeddeng dagiti tribu iti laud ti Jordan maipaay iti siam a sabsabali pay a tribu ken iti nabatbati a kagudua a tribu ni Manases. Ni Jehova dinutokanna ni Josue, ni Eleazar a padi, ken ti maysa a panguluen manipud iti tunggal tribu tapno agserbida kas komite a mangiwanwan iti pannakaibunong ti daga. (Nu 34:13-29; Jos 14:1) Ti pamay-an a nasurot ket maitunos iti immun-una a bilin ti Dios ken Moises: “Mayannurot iti dakkel a bilang rebbeng nga iyad-adum ti tawid ti maysa, ket mayannurot iti kinabassit rebbeng nga ibasbassitmo ti tawid ti maysa. Rebbeng a maited ti tawid ti tunggal maysa a mairukod kadagidiay naipasalista kenkuana. Rebbeng a mabingaybingay ti daga babaen laeng iti binnunot.”​—Nu 26:52-56; 33:53, 54.

Gapuna agparang a ti pannakaibunong ti daga kadagiti tribu natarawidwidan babaen iti dua a pangibatayan: ti resulta ti binnunot, ken ti kadakkel ti tribu. Ti binnunot mabalin nga impasdekna laeng ti pattapatta nga ayan ti daga a tawid nga agpaay iti tunggal tribu, ngarud ipatuldona ti tawid iti maysa benneg wenno iti sabali pay a paset ti daga, kas iti agturong iti amianan wenno abagatan, daya wenno laud, iti tanap iti igid ti baybay, wenno iti kabambantayan a rehion. Nagtaud ken Jehova ti pangngeddeng manipud iti binnunot ket ngarud agserbi dayta a manglapped iti panagiinnimon wenno panagririri dagiti tribu. (Pr 16:33) Babaen itoy a pamay-an, ti Dios idalanna met ti bambanag tapno ti pakaisaadan ti tunggal tribu tumunos iti naipaltiing a padto ni patriarka Jacob idi matmatayen, kas nailanad iti Genesis 49:1-33.

Kalpasan a naikeddengen ti geograpiko nga ayan ti maysa a tribu babaen ti panagbibinnunot, nasken ngarud a maikeddeng ti kalawa ti teritoriana sigun iti maikadua a pangibatayan: ti kadakkel ti tribu. “Masapul a pagbibingayanyo ti daga a kas sanikua babaen ti binnunot sigun iti pampamiliayo. Rebbeng nga iyad-aduyo ti tawid daydiay aduan umili, ket rebbeng nga ibasbassityo ti tawid daydiay narasay. No sadino ti rummuaranto ti pannaka-bunot maipaay kenkuana, sadiay ti agbalinto a kukuana.” (Nu 33:54) Agtalinaed ti pangngeddeng ti binnunot no maipapan iti pamunganayan a geograpiko nga ayan, ngem mabalin a maaramid ti panangbalbaliw no maipapan iti kadakkel ti tawid. Gapuna, idi naammuan a dakkel unay ti teritoria ti Juda, nakissayan ti kalawa ti dagana babaen ti panangituding iti sumagmamano a paset dayta iti tribu ni Simeon.​—Jos 19:9.

Ti pannakayad-adu wenno pannakapabassit ti tawid agparang a saan a naibatay laeng iti kalawa ti daga, ta ti tribu ni Dan, nupay maikadua a kaaduan iti populasion, immawat iti maysa kadagiti basbassit a bingay no maipapan kadagiti aktual a rukod. Mabalin a naikabilangan ti dadduma pay a pangibatayan, kas iti bilang dagiti siudad, kita ti daga, ken kalidad dayta.​—Idiligyo ti Jos 17:14-18.

No marisut idin dagiti ad-adda nga apag-isu a beddeng ti bembenneg dagiti tribu, ngarud mabalinen nga ituding ti sansanikua ti tunggal pamilia, ket agparang a naaramid daytoy, saan a babaen iti binnunot, no di ket babaen iti panangiwanwan ti nadutokan a komite, a buklen da Eleazar, Josue, ken dagiti panguluen. (Jos 17:3, 4) Gapuna, kunaen ti Deuteronomio 19:14 a “no dagiti inapo naipasdekdanton dagiti beddeng iti tawidmo” saan koma a mayalis dagita.​—Kitaenyo ti MUHON.

Ti salaysay maipapan iti pannakabingbingay ti teritoria iti laud ti Jordan ipakitana nga, umuna, naikeddeng dagiti pannaka-bunot maipaay iti Juda (Jos 15:1-63), Jose (Efraim) (Jos 16:1-10), ken iti kagudua a tribu ni Manases nga agnanaed iti laud ti Jordan (Jos 17:1-13), a naibinsabinsa dagiti beddengda ken dagiti siudadda. Kalpasan daytoy, agparang a naisardeng ti pannakabingbingay ti daga, yantangay naipakita a ti pakarso ti Israel immakar manipud Gilgal a nagturong idiay Silo. (Jos 14:6; 18:1) Saan a naibaga ti kapaut ti tiempo a sinaklaw daytoy, ngem idi agangay tininggar ni Josue ti nabatbati a pito a tribu gapu iti manangitantan a kababalinda no maipapan iti panagnaed iti nabatbati pay a paset ti daga. (Jos 18:2, 3) Nadumaduma a pannakailawlawag ti naidatag no maipapan iti makagapu iti daytoy a kababalin iti biang dagiti pito a tribu, a ti sumagmamano a komentarista ikalinteganda a ti mabalin a makagapu a saan a narikna dagitoy a tribu ti kinaganat a mangtagikua iti nabatbati pay a paset ti teritoria isu ti kinaruay ti samsam a nagun-od bayat ti panagparmek ken ti relatibo a kinawayawaya iti aniaman a giddato a pangta nga iraraut dagiti Canaanita. Mabalin a ti maysa pay a makagapu iti daytoy a kinaginad isu ti panagsarimadeng a mangtaming iti parikut a panangsaranget iti napigsa nga isasarked ti kabusor iti babassit a disso sadiay. (Jos 13:1-7) Kasta met, ti pannakaammoda iti daytoy a paset ti Naikari a Daga mabalin nga ad-adda a limitado ngem iti pannakaammoda kadagidiay benneg a naitudingen.

Tapno mapapardas ti pannakataming daytoy a banag, nangibaon ni Josue iti pannakabagi a bunggoy a buklen ti 21 a lallaki, 3 manipud iti tunggal maysa kadagiti 7 a tribu, tapno ‘mapaenda ti daga iti pito a binglay,’ ket kalpasan a dagiti lallaki “minapada dayta iti siniudansiudad,” nangaramid ni Josue iti binnunot maipaay kadakuada tapno magun-od ti pangngeddeng ni Jehova. (Jos 18:4-10) Naibinsabinsa iti Josue 18:11–19:49 ti naituding nga indibidual a tawid.

Ti papadi a tribu ni Levi ket saan a naikkan iti piho a rehion kas bingay dayta no di ket naipaayan iti 48 a naiwaras a siudad ken pagpaaraban a masarakan iti uneg dagiti beddeng ti dadduma pay a tribu.​—Jos 13:14, 33; 21:1-42.

Dadduma Pay a Beddeng. Babaen iti Linteg ti tulag, ti Dios ‘inlasinna ti Israel’ kas pinilina nga ili iti 1,545 a tawen (Le 20:26), ngem babaen iti sakripisio nga ipapatay ti Anakna dinadaelna ti piguratibo a “pader nga adda iti nagbaetan” a namaglasin kadagiti Gentil a tattao ken dagiti Judio, a winaswasna ti Linteg dagiti bilin. Iti Efeso 2:12-16, imparipirip ni Pablo ti bangen, wenno pader (soreg), iti disso ti templo. Iti sidong ti dusa nga ipapatay, naparitan dagiti Gentil iti labes dayta a beddeng, a ti kasta a pader inaramat ti apostol kas maikanatad nga ilustrasion iti panaglasin a pinataud ti Linteg ti tulag.

Iti sidong ti baro a tulag nga imbabaet ni Kristo Jesus, maysa nga adayo nga ad-adda a makapasiddaaw ngem iti aniaman a geograpiko a beddeng ti naaramid, ti naespirituan a pagbeddengan a mangisina iti naespirituan a nasion ti kongregasion Kristiano manipud iti dadduma pay iti lubong ti sangatauan. (Jn 17:6, 14-19; 1Pe 2:9-11) Nabayagen nga impadto ni Jehova a bangonenna ti Sion babaen iti napapateg a saniata ket dagiti amin a beddeng dayta aramidenna manipud “makaparagsak a batbato,” ket inadaw ni Jesus daytoy a padto, a ti sumaganad a bersikulo inyaplikarna kadagidiay agbalin nga adalanna. (Isa 54:12, 13; Jn 6:45; idiligyo ti Apo 21:9-11, 18-21.) Mamatmatan kas di maadak dagitoy a naespirituan a beddeng, ta mamakdaar ti Dios a dagidiay mangbasakbasak kadagita aglak-amdanto iti pannakadadael.​—Pagdiligenyo ti Isa 54:14, 15; 60:18 ken 1Co 3:16, 17.

Maisupadi unay, dagidiay mangbukel iti dayta a naespirituan a nasion makalikaguman nga agtalinaedda iti uneg dagiti beddengna, a bigbigenda dagiti naipasdek a moral a pagpatinggaan (1Co 5:9-13; 6:9, 10; 1Te 4:3-6) ken dagiti naespirituan a beddeng a mangilasin kadakuada manipud ulbod a panagdaydayaw ken kadagiti nailubongan a sistema (2Co 6:14-18; San 4:4; Apo 18:4), kasta met dagiti alagaden a mangtartarawidwid kadagiti umiso a relasion iti nagbaetan dagiti Kristiano ken dagiti “nangatngato nga autoridad” dagiti agdama a gobierno (Ro 13:1, 5; 1Pe 2:13-16; Ara 4:19, 20; 5:29), iti nagbaetan dagiti agassawa (1Co 7:39; 1Pe 3:1, 7), ken iti adu a sabsabali pay nga aspeto ti biag.

Ipakita met ni Pablo nga adda dagiti beddeng a mangsaksaklaw iti teritoria a naituding maipaay iti trabaho a panagministerio.​—2Co 10:13-16.