Dagiti Saludsod Manipud Kadagiti Managbasa

◼ Apay nga inkari ni Jesus a dagidiay mamati kenkuana ‘saanto a matay a pulos,’ idinto a kinapudnona amin dagiti nagdengngeg kenkuana ket natnatayda met?​—Juan 11:25, 26.

Idi nagsao ni Jesus maipapan ti di ipapatay, wenno panagbiag nga agnanayon, nalawag a saanna a kayat a sawen a dagiti agdengdengngeg kenkuana idi ket didanto pulos maramanan ti natauan nga ipapatay. Ti pamunganayan a punto nga ar-aramiden ni Jesus a ta ti panamati kenkuana ti mangiturong iti biag nga agnanayon.

Iti naminsan, inawagan ni Jesus ti bagina “ti tinapay ti biag.” Kalpasanna innayonna: “Daytoy ti tinapay a bumaba manipud langit, tapno ti siasinoman a makapangan kenkuana saan koma a matay. Siak ti tinapay a sibibiag a bimmaba nanipud langit; no adda mangan itoy a tinapay agbiagto nga agnanayon.”​—Juan 6:48-51.

No matmatmatan laeng dagidiay a sasao, mabalin nga ipato ti tao nga ibagbaga ni Jesus kadagiti agdengdengngeg kenkuana a maliklikanda ti ipapatay. Ti konteksto, nupay kasta, saanna a suportaran ti kasta a konklusion. Kaibagbaga ni Jesus: “Ket daytoy ti pagayatan ti nangibaon kaniak, nga amin nga intedna kaniak awan koma ti pukawek no di ket pagungarek iti kamaudianan nga aldaw. . . . Tunggal maysa a makakita iti Anak ken mamati kenkuana adda koma biagna nga agnanayon, ket isu pagungarekto iti kamaudianan nga aldaw. . . . Awan ti tao a makabalin nga umay kaniak, no saan a guyuguyen ni Ama a nangibaon kaniak, ket isu pagungarekto iti kamaudianan nga aldaw.” (Juan 6:39-44) Ket kamaudiananna innayonna: “Ti mangan iti lasagko ken uminum iti darak adda biagna nga agnanayon, ket isu pagungarekto iti kamaudianan nga aldaw.” (Juan 6:54) Gapuna, ti kari ni Jesus a ‘panagbiag nga agnanayon’ ket saan a nainkalintegan a tarusan a kayatna a sawen a dagiti agdengdengngeg kenkuana ket didanto aglak-am ken patay.

Umas-asping dayta iti nalatak a kari ni Jesus ken ni Marta: “Siak ti panagungar ken ti biag. Ti mamati kaniak, uray no matay, agbiagto pay; ket siasinoman nga agbiag ken mamati kaniak saanto a matay a pulos.” (Juan 11:25, 26) Nalawag a di kayat a sawen ni Jesus a dagiti matalek nga apostolna, kas pangarigan, didanto pulos matay kas kadagiti dadduma a tattao. Iti las-ud ti makatawen, mapulotandanto ti nasantuan nga espiritu ket maikkandanto ti inanama a makipagturay kas ar-ari idiay langit. Tapno awatenda dayta a gunggona, masapul a matayda kas tattao. (Roma 8:14-23; 1 Corinto 15:36-50) Ket kitaenyo ti kinuna ni Jesus: “Ti mamati kaniak, uray no matay, agbiagto pay.”

Ti kari ni Jesus matungpalto kadagiti napeklan nga ad-adipen ti Dios a nagbibiag ken natnatayda sakbay ti tiempo a panangrugi a maiteden ti biag nga agnanayon. Dagita a matalek ket nakalineada a maipaay iti masanguanan a panagungar. Babaen ti panagtalinaedda a matalek kalpasan a mapagungarda, didanto aglak-amen “ti maikadua nga ipapatay,” ti agnanayon nga ipapatay.​—Apocalipsis 20:15; 21:8; Juan 8:51.

Ngem ti padto ti Biblia ipamatmatna nga addaantayo itatta ti naisangsangayan a gundaway. Itan ta agbibiagtayon iti panungpalan ti sistema dagiti bambanag, mabalin a makalasattayo iti dayta um-umayen a “dakkel a rigat” ket agtultuloytayo a sibibiag nga agturong idiay baro a lubong. Dagita nga addaan namnama ti biag nga agnanayon iti paraiso a daga ken salimetmetanda ti kinasungdoda iti Dios ket didanton aglak-amen a pulos ti natauan nga ipapatay. Iti pannakalasat “ti dakkel a rigat,” maiwanwandanton nga agturong “kadagiti ubbog ti danum ti biag.”​—Apocalipsis 7:9-17.

[Ladawan iti panid 31]

Dagiti sasao ni Jesus ken agladladingit a Marta mangipaay kadatayo iti namnama iti biag nga agnanayon