Dagiti Naayat a Papastor, Managtalek a Karkarnero
IDI panawen ti Biblia ti kinasinged ti pastor ken ti karnerona ti agdindinamagen. Masansan ti pastor ket mabalin nga isu ti makinkukua kadagiti karnero wenno kameng iti pamilia ti makinkukua. Iti agsapa isut’ mapan iti arban ket awagannanto ti arbanna manipud kadagiti sumagmamano nga arban a naikulong sadiay. Ammona dagiti karnerona; ammoda met ti timekna. Saanna nga ab-abugen ida—iturongna ida, sumurotda kenkuana. Kadagiti nalasbang a pagipastoran ken nadalus a dandanum iwanwanna ida. No dakes ti panniempona iti rabii, mabalin nga isublina ida iti pagtaraknan wenno iyaponna ida iti maysa a rukib. No nasayaat ti tiempona, busbosenna dagiti rabii a kaduana ida iti baba dagiti bitbituen—kas met laeng iti otonio idi tawen 2 K.K.P. idi a dagiti papastor “agyanda iti away nga agay-aywan nga agpuyat iti rabii iti animalda.”—Lucas 2:8.
No maysa kadagiti karnero ti maisina, ti pastor sapulenna dayta inggana a masarakanna. (Lucas 15:4) Dagiti 99 saanto a makapennek kenkuana agingga a di maisubli daydiay napukaw.
Ti relasion ti pastor idiay Daya iti arbanna ti emosional unay, kas paneknekan ti maysa kadakuada: “Ti pannakapukaw ti maysa a karnero ti mangyeg ladingit iti kararua. No ti maysa kadakuada ket agsakit wenno mailako, makasangitak agsipud ta mapukpukawko ti maysa a gayyem nga inay-ayatko unay ken agayat met unay kaniak. Iti babaen ti nakalawlawag ken umap-apuy a langlangit dagiti Dagdaga ti Biblia, adda sadiay a dumakdakkel, a kas ti panagdakkelko, itoy nagbaetan ti pastor ken ti arbanna ti maysa a panagtipon a nakasingsinged ken nakalalailo. Agmaymaysa iti pannakaiputputongda, nga awan asinoman a tao nga asideg, kadagiti oras ti kinatalna wenno peggad, adda a marikrikna ti maysa a pastor ken dagiti karnerona ti maysa nga agpapada a panagbiag.”
Ti matalek a pastor ket maysa nga awanan-buteng a mannalaknib. Labananna dagiti mannanakaw nga umay mangagaw. Rautenna dagiti atap nga an-animal nga umay mangsamsam. Kas ken ni David a bumbumaro a pastor, isut’ saan a bumiddut a mangipallatibong iti bato iti maysa a buok a kaadayu. (1 Samuel 17:34-36, 49; kitaenyo met ti Oc-ocom 20:16.) No maysa kadagiti karnero ti masida, sapulen ti pastor ti pannakaisubli ti sumagmamano a tultulang wenno lalat tapno maikuentana ti napukaw nga animal. Daytoy ti nangnangruna no ti pastor ket maysa a patangtangdanan—no awanan ti kasta a pammaneknek mabalin nga isut’ masuspetsa iti panagtakaw iti dayta.—Exodo 22:12-15; idiligyo iti Amos 3:12.
Dagiti karnero ket agtalekda kadagiti papastorda. Adu kadakuada ti maik-ikkan kadagiti makailadawan a nagnagan—guduat’ lapayagna, nalukmeg-ipusna, nangisit-rupana, kampuraw. No awagan ti pastor ti nagnaganda, sumungbatda. Maysa a managsirarak kayatna a paneknekan daytoy idi limmabas iti maysa nga arban dagiti karnero. Insalaysayna ti sumaganad: “Kalpasanna imbagak kenkuana [iti pastor] nga awaganna ti maysa kadagiti karnerona. Inawaganna dayta, ket insigida a pinanawanna ti pagaraban ken dagiti kakaduana, ket nagtaray kadagiti im-ima ti pastor, nga adda pagilasinan nga isut’ maragragsakan, ken buyogen ti insigida a panagtulnog a diak pulos napalpaliiw sakbayna kadagiti dadduma nga an-animal. Pudpudno met iti daytoy a pagilian, ‘ti maysa a ganggannaet saandanto a suroten, no di ket agtalawda manipud kenkuana.’”
Pinatalgedan ni Jesus dayta idi impabigbigna ti bagina kas ti Naimbag a Pastor dagiti kimmarnero a paspasurotna: “Dagiti karnero denggenda ti timekna, ket ayabanna dagiti karnerona kadagiti nagnaganda ket iruarna ida [iti pagtaraknan]. Ket inton nairuarnan amin ida, magna iti sanguananna, ket dagiti karnero sumurotda, ta mailasinda ti timekna. Ngem ti dida am-ammo saandanto a suroten, no di ket itarayandanto, ta dida am-ammo ti timekna. Siak ti naimbag a pastor, ket ammok dagiti kukuak ket dagiti kukuak ammodak, a kas ti Ama am-ammonak kasta met siak am-ammok ti Ama; ket itedko ti kararuak [ti biagko] maipuon kadagiti karnerok.”—Juan 10:3-5, 14, 15.
Saan laeng a ni Kristo Jesus no di ket uray met ni Jehova a Dios ti matuktukoy kas maysa a pastor. “Ni Jehova ti Pastorko,” kuna ti salmista. Kas maysa a pastor Isu agraman ni Jesus mangipakpakitada ti naayat a pannakaseknan kadagiti “karkarnero iti pagpaarabanna.” Maipapan kenkuana adda a naisurat: “Pagarabennanto ti arbanna a kasla maysa nga agpaspastor. Urnongennanto dagiti kordero iti takkiagna; ken awitenna ida iti barukongna. Ket idalannanto a nainayad dagiti adda urbonda.”—Salmo 23:1; 100:3; Isaias 40:11.
Ngem no kadagiti ulbod a papastor a dakes ti panangtratona iti arbanna, kuna ni Jehova: “Luk-atakto dagiti karnerok iti ngiwatda, tapno saanda koma nga agserbi a taraon kadakuada.”—Ezequiel 34:10.
Gapu iti kababalin ken pannursuro dagiti papastor dagiti relihion itatta, kasanot’ pannakairukodda iti mata ni Jehova? Ti sumaganad nga artikulo ti mangusig iti daytoy.