Ti Aktibo a Kinapangulo ni Kristo Itatta
“Addaak kadakayo nga agnanayon agingga iti panungpalan ti sistema dagiti bambanag.”—Mateo 28:20.
1. Iti ania a pamay-an nga intalek ni Kristo ti “kukuana” kadagiti adalanna?
IDI ngangngani panawan ni Kristo dagiti adalanna ken agsubli idiay langit idi 33 K.P., “inyawatna kadakuada dagiti kukuana.” Rinaman daytoy ti panagbalinda a “dagiti embahador a kasukat ni Kristo” ken panangibaklay iti panangaskasaba a rinugiananna, nga idanon dayta agingga “iti ungto ti daga.” Sakbay a pinanawanna ida, binilinna ida a “pagbalinenyo nga ad-adalan dagiti amin a nasion.” Adda aya pammaneknektayo nga as-asikasuenna no kasanot’ panangitungtungpalda iti daytoy a bilin? Pudno nga addaantayo!—Mateo 25:14; 2 Corinto 5:20; Aramid 1:8; Mateo 28:19.
2. Aniat’ mangipakpakita a sisisinged a sursuroten ni Kristo ti ar-aramid dagiti kongregasion idi umuna a siglo?
2 Iti nasurok a 60 a tawen kalpasan ti iyuuli ni Kristo idiay langit, impakitana a sipsiputanna a naimbag ti ar-aramid dagiti kongregasion Kristiano ditoy daga. Iti paltiing a naited ken apostol Juan, maysa a kameng ti bagi a manarawidwid idi umuna a siglo, ni Jesu-Kristo ti nangipatulod kadagiti mensahe iti pito a kongregasion a masarakan idiay Asia Menor. Kadagiti lima kadakuada kinunana: “Siak ammok dagiti ar-aramidyo.” Ket impakitana a paggaammona unay ti mapaspasamak iti uneg dagiti dua, ti Smirna ken ti Pergamo. Isut’ nangted ti masinunuo a pammaregta ken balakad iti tunggal kongregasion. Awan duadua iti is-isipda no asino ti aktibo a Panguloda.—Apocalipsis 1:11; 2:1–3:22.
3. Iti siasino ti pudpudno a nakaiturungan dagiti pito a mensahe, ket aniat’ mangpaneknek iti daytoy?
3 Kinapudnona, dagidiay pito a mensahe ket saan a nakedngan iti saklawenda kadagiti pito a kongregasion ti Asia. Ti nagsayaat a balakad ken dagiti pakdaar a linaonda ti agaplikar kadagiti isuamin a kongregasion, manipud umuna a siglo agingga iti “aldaw ti Apo,” nga isu ti ayantayo itattan.a Dagiti mata ni Kristo, a naiyarigda kas “darang ti apoy,” ti agtultuloy nga agsipsiput iti adda a mapaspasamak iti uneg “amin dagiti kongregasion.”—Apocalipsis 1:10; 2:18, 23.
Ti Apo ken ti Adipenna
4. Kasano a ni Kristo “napan iti sabali a daga” ket kalpasanna nagsubli “idi nalabes ti adu nga aldawen”?
4 Kalpasan ti panangiyarigna ti bagina iti “maysa a tao, a mapan iti sabali a daga, [nga] inayabanna dagiti adipenna ket inyawatna kadakuada dagiti kukuana,” innayon ni Kristo: “Idi nalabes ti adu nga aldawen immay daydi apo dagiti adipen ket inayabanna ida a kinakuenta.” (Mateo 25:14, 19) Idi 33 K.P. ni Kristo “immuli sadi langit,” nga isut’ napagtugaw “iti makannawan ti Dios.” (1 Pedro 3:22) “Idi nalabes ti adu nga aldawen,” kalpasan ti pannakaitronona idi 1914, rinugian ni Kristo nga ‘agturay iti tengnga dagiti kabkabusorna’ babaen iti panangigarangugongna ken ni Satanas ken dagiti demoniona ditoy daga. (Salmo 110:1, 2; Apocalipsis 12:7-9) Kalpasanna inturongna ti atensionna kadagiti ad-adipenna. Ti oras dimtengen tapno isut’ makikuentaan kadakuada. Iti ad-adda pay ngem idi, isut’ aktibo a Panguloda.
5. Kaano a dimteng ti panawen a pannakikuentaan, ket kasano a nagunggonaan dagiti matalek?
5 Ti moderno a historia ti ili ti Dios ipakpakitana a daytoy a panawen ti pannakikuentaan immay idi 1918-19. Ti pangngarig dagiti talento iyilustrarna no kasano a makikuentaan ti Apo iti natda kadagiti napulotan nga ad-adipenna. Isuda iti makikuentaan a sinaggaysa iti pamay-an a panangusarda ti kukuana, “iti tunggal maysa kas iti kabaelanna,” wenno dagiti naespirituan a posibilidad. Dagidiay nabunga simrekda iti ragsak ti Apoda, a nagkuna kadakuada: “Napagtalkanka iti bassit, isaadkanto nga agaywan iti adu.”—Mateo 25:15, 20-23.
6. Aniat’ sangsangkamaysa a binukel dagita a matalek a napulotan a Kristiano, ket aniat’ intalek ti Apoda iti panangaywanda?
6 Dagita nga indibidual a napulotan a Kristiano nasarakanda a matalek nga embahador iti agturturay itan nga Ari, a situtulokda nga agar-aramid iti adalan nga agpaay iti Apoda. Sangsangkamaysa a nasarakanda kas ti “adipen” a nagkunaan ti Apoda: “Siasino ngarud ti adipen a mapagtalkan ken naannad nga inkabil ni apona nga agaywan iti sangakabbalayanna, tapno ikkanna ida ti taraon iti umiso a tiempo a pannakaipaayna? Naragsak daydiay nga adipen nga masarakanto ni apona inton umay a kasta ti aramidenna. Pudno kunak kadakayo, nga ikabilnanto nga agaywan kadagiti amin a gamengna.”—Mateo 24:45-47.
7. (a) Kasano nga immadu dagiti “kukua” ni Kristo nanipud 1914? (b) Aniat’ mangipakpakita a ni Kristo ti aktibo pay met laeng a Pangulo dagiti “sabsabali a karnero”?
7 Dagiti “kukua” ni Kristo ti nagbalin a nakaad-adun nanipud 1914. Isut’ nakawesanen iti “naarian a pannakabalin,” a ramanenna ti naparang-ay a kinaturay ken dagiti napadakkel a responsabilidad. (Lucas 19:11, 12) Immuna nga inurnongna dagiti natda “dagiti annak ti pagarian,” dagiti 144,000 a napulotan a Kristiano a “nasubbot manipud iti sangatauan” nga agbalin nga ar-ari ken papadi a kaduana idiay langit. (Mateo 13:38; Apocalipsis 14:1-4; 5:9, 10) Kalpasanna, ipamatmat ti historia nanipud 1935, isun ti mangur-urnong ti “dakkel a bunggoy” dagiti “sabsabali a karnero” a nagkunaanna: “Dagidiay masapul nga iyegko met.” (Apocalipsis 7:9, 10; Juan 10:16) Wen, isu Daydiay mangiyeg kadagitoy a “karnero,” ket isut’ agbalin nga aktibo a Panguloda. Makapainteres, ti Griego a teksto kaipapananna a literal, “Ket kadagidiay nasken [para] kaniak nga idauluan.” Kasanot’ aktibo a panangidadaulona amin kadagiti “karnerona” itatta?
Dagiti Manangaywan iti Kannawan ni Kristo
8, 9. (a) Ania a sirmata ti inawat ni Apostol Juan? (b) Aniat’ iladladawan dagiti pito a pagsilawan ken dagiti pito a bituen?
8 Ni apostol Juan a kameng ti bagi a manarawidwid ti immuna a kongregasion Kristiano, ti immawat ti sirmata a “nakakitaanna kadagiti pito a pagsilawan a nabalitokan, ket iti tengnga dagiti pito a pagsilawan nakitana ti maysa nga umasping ti maysa nga anak ti tao . . . Ket iti makannawan nga imana nagiggem kadagiti pito a bituen.” Ni Jesu-Kristo inlawlawagna ken ni Juan: “Ti palimed dagiti pito a bituen a nakitam iti makannawanko, ken dagiti pito a pagsilawan a nabalitokan: Dagiti pito a bituen isuda dagiti anghel kadagiti pito a kongregasion, ket dagiti pito a pagsilawan isuda dagiti pito a kongregasion.”—Apocalipsis 1:12-20.
9 Iti panagkomentona iti daytoy a panagadaw, ti libro a “Then Is Finished the Mystery of God” kunana: “Dagiti kadi kakasta nga ‘anghel’ ket dagidiay di makita? Saan. Inawat ni apostol Juan ti intero a Paltiing manipud ken Jesu-Kristo babaen iti maysa a nainlangitan nga anghel, ket agbalin a di nainkalintegan para kenkuana nga agsurat met laeng kadagiti anghel idiay langit, iti di makita a paset. Saanda a kasapulan dagiti mensahe a naisurat kadagiti pito a kongregasion idiay Asia. Ti kangrunaan a kaipapanan ti titulo nga ‘anghel’ ket ‘mensahero; agaw-awit ti mensahe.’ . . . Gapu ta dagitoy pito a simboliko a bituen ket makitkita ida iti makannawan ni Jesus, addada iti panangaywanna ken panangasikasona ken sidong ti panangiturongna, ti ‘makannawanna’ ti naiyaplikar a pannakabalin a mangiturong ken mangsalaknib kadakuada. . . . Ket idinto ta ti ‘pito a pagsilawan’ iti maiparparmata nga ‘aldaw ti Apo’ iladladawanna amin dagiti pudno a kongregasion Kristiano iti daytoy agdama, pudpudno nga ‘aldaw ti Apo’ nanipud 1914 K.P., gapuna dagiti ‘pito a bituen’ isimboloda amin dagiti naiyanak iti espiritu, napulotan a kas anghel a manangaywan kadagita a kongregasion itatta.”b—Panid 102-4.
10. Ania a napaadu a “sanikua” ti naitalek iti panangaywan ti adipen?
10 Dagitoy napulotan a manangaywan iti makannawan ni Kristo ket pasetda amin iti nagkaykaysa nga “adipen” a dinutokanna “iti amin a kukuana.” Gapu ta ti Apo ti adipen a mismo ket nakawesan met iti napalawa a responsabilidad nanipud 1914, “isuamin a kukuana” ramanenna ti ad-adu pay a bambanag para iti adipen ngem iti napalabas. Ti maysa, kas “dagiti embahador kas naisuno ken Kristo,” dagiti natda ket isudan dagiti embahador ti agturturayen nga Ari nga agturturay iti naipasdeken a Pagarian. (2 Corinto 5:20) Naikabilda a mangaywan kadagiti naespirituan a bambanag a kukua ti Apo ditoy daga. Masapul nga agserbida kas kaitungpalan dagiti padto nga agaplikar nanipud pannakaipasdek ti Pagarian. Ramanen daytoy ti panangikaskasaba iti “daytoy naimbag a damag ti Pagarian . . . iti isuamin a mapagnaedan a daga kas pammaneknek.” (Mateo 24:14) Iti ad-adda pay ngem idi, masapul nga agtultuloyda nga agaramid “kadagiti adalan kadagiti tattao iti isuamin a nasion,” iti kasta ur-urnongenda ti di mabilang a “dakkel a bunggoy.” (Mateo 28:19 20; Apocalipsis 7:9) Wen, dagitoy “makaay-ayo a bambanag iti isuamin a nasnasion ket paset ti immadu a “kukua” ni Kristo ditoy daga.—Haggeo 2:7.
11. (a) Ania ti kinasapulan dagitoy napaadu a “sanikua”? (b) Asino ti mangiturturong iti trabaho, ken kasano?
11 Amin daytoy kaipapananna ti ad-adu a trabaho nga agpaay iti nagkaykaysa nga “adipen,” ti dakdakkel a tay-ak a pagtrabahuan, a dumanon a literal ti “isuamin a mapagnaedan a daga.” Kasapulan met dayta dagiti daddadakkel a hedkuarters ken pasilidades ti sanga nga agpaay a pangaywanan iti trabaho ken iti panagiprenta ken panagiwaras ti literatura a maipaay ti panangasaba ken personal a panagadal. Kas met idi umuna a siglo, daytoy ket maar-aramid iti sidong ti aktibo a panangidadaulo ni Jesu-Kristo, nga isu ti piguratibo nga “adda iti tengnga dagiti pagsilawan,” wenno dagiti kongregasion. Iturturongna ida babaen kadagiti napulotan a manangaywan, nga isut’ simbolikal nga ig-iggamanna “iti makannawanna.” (Apocalipsis 1:13, 16) Kas idi umuna a panawen Kristiano, maysa a grupo dagitoy napulotan a manangaywan ti mangbukel ti makitkita a Bagi a Manarawidwid ti kongregasion ni Kristo ditoy daga. Ti “makannawanna” a naiyaplikar a pannakabalinna ti mangiturturong kadagitoy matalek a lallaki bayat nga ay-aywananda ti trabaho iti Pagarian.
Babaen iti Espiritu
12, 13. (a) Gapu iti dakkel nga irarang-ay, ania ti saludsod a rumsua? (b) Kasano nga us-usaren ni Kristo ti espiritu a mangpunno iti panagkasapulan kadagiti manangaywan dagiti ad-adalanna ditoy daga?
12 Gapu ta ita ti bilang dagiti “sabsabali a karnero” dimmanonen iti nasurok a tallo a milion, a naorganisa kadagiti agangay a 52,000 a kongregasion, kaawatan a kasapulan ti napulotan a natda ti tulong iti panangaywan dagiti naindagaan a sanikua ti Apo. Gapu ta kurangda ngem 9,000, agraman adu a kakabsat a babbai, a makiramraman kadagiti emblema ti Memorial, gapuna nga awan pay ti uray maysa a napulotan a manangaywan iti tunggal kongregasion. Kaipapanan kadi daytoy a ni Jesu-Kristo ket saan nga isu ti mangay-aywan kadagiti kongregasion nga idiay awan ti naiyanak ti espiritu nga “anghel,” wenno ‘bituen’?
13 Nikaanoman! Kas nakitatayon iti napalabas nga artikulo, idi umuna a siglo ni Kristo ti siaaktibo a mangiturturong ti kongregasionna babaen iti nasantuan nga espirituna. Itatta ar-aramatenna dagiti naiyanak ti espiritu a kamkameng ti Bagi a Manarawidwid a mangdutok kadagiti manangaywan a napili manipud kadagiti “sabsabali a karnero.” Masapul a dagitoy maragpatda met dagiti isu met laeng a pagannurotan kas kadagiti napulotan a panglakayen, a naibalabala kadagiti kasuratan kas idiay 1 Timoteo 3:1-7 ken Tito 1:5-9. Dagitoy Nainkasuratan a kualipikasion naisuratda iti sidong ti panangiturong ti nasantuan nga espiritu. Dagiti rekomendasion ken panangdutok maaramidda kalpasan iti panagkararag ken iti sidong ti panangiwanwan ti nasantuan nga espiritu. Kadagita a di napulotan a panglakayen agaplikar ti isu met laeng a pigsa ti balakad ni Pablo: “Kitaenyo ti bagiyo ken ti amin nga ipastoran a nangikabilan ti nasantuan nga espiritu kadakayo a kas manangaywan.”—Aramid 20:28.
14. (a) Kasano a matungtungpalen ti padto idiay Isaias 32:1, 2? (b) Kasano a masapul nga agpasakop amin a panglakayen iti “makannawan” ni Kristo?
14 Gapuna, kadagiti pinulpullo ribo a kongregasion, ti nalinteg nga agturturayen nga Ari Jesu-Kristo us-usarenna dagiti “sabsabali a karnero” kas “piprinsipe” a mangsalaknib kadagiti “karnerona” manipud kadagiti naespirituan nga angin, bagyo, ken tikag. (Isaias 32:1, 2) Kas ken David idi ugma, dagiti panglakayen, napulotanda man wenno “sabsabali a karnero,” agkararagda ken Jehova: “Ti espiritum naimbag; idalannak iti daga iti kinalinteg.” (Salmo 143:10) Ket dengdenggen ni Jehova ti kararagda. Babaen iti Anakna, itdenna kadakuada ti espirituna, ket us-usaren ni Jesus daytoy a pamay-an a siaaktibo a mangiturturong kadagiti adalanna ditoy daga. Siempre, amin dagiti panglakayen agpasakupda iti “makannawan” ni Kristo iti panangkontrol, panangiwanwan, ken panangiturong, nga isut’ watwatwatenna babaen iti espiritu ken kadagiti naiyanak iti espiritu a kamkameng ti Bagi a Manarawidwid.
Babaen kadagiti Anghel
15. Ania pay a sabali a pamay-an ti adda ken Kristo a mangiturong kadagiti adalanna ditoy daga a siaaktibo?
15 Nadakamat ti napalabas nga artikulo a dagiti anghel ket naaramatda idi umuna a siglo a mangiwanwan ken mangispal kadagiti immuna a Kristiano ken tinulonganda ida iti panangasabada. Lohikal kadi a panunoten a ti agturturayen nga Aritayo a Jesu-Kristo ti saanen a mangus-usar kadagiti anghel a siaaktibo a mangiturturong kadagiti adalanna itatta? Saan laeng a daytat’ di rasonable ngem daytat’ agbalin met a di nainkasuratan.
16, 17. Aniat’ adda a pammaneknektayo nga us-usaren ni Kristo dagiti anghel iti panagani “dagiti annak ti pagarian” ken iti panangurnong kadagiti “sabsabali a karnero”?
16 Sigun iti pangngarig ti trigo ken ti zizaña, ti panagani dumteng iti “panungpalan ti sistema dagiti bambanag,” a nangrugi idi 1914. Bayat ti panagani, “dagiti annak ti pagarian” mailasindanto manipud iti “annak ti dakes.” Asinonto ti aramaten ti Apo a mangaramid ti panagani? “Dagiti agani isu dagiti anghel.” Innayon ni Kristo: “Ti Anak ti tao ibaonnanto dagiti anghelna, ket kayaskasendanto ti pagarianna dagiti amin a pakaitibkolan ken dagiti agaramid ti kinadakes.” (Mateo 13:37-41) Ar-aramaten ni Kristo dagiti anghel a mangsalaknib kadagiti kakabsatna ditoy daga.
17 Ket dagiti met ngay “sabsabali a karnero”? Ar-aramaten met aya ni Kristo dagiti anghel a mangurnong kadakuada? Sigurado a kasta! Ti pangngarigna iti karnero ken dagiti kalding kunana: “Ngem inton ti Anak ti tao umayto agraman iti dayagna, ken amin dagiti anghel maikuyog kenkuana, isu ti panagtugawnanto iti trono ti gloriana. Ket iti sanguananna maurnongto dagiti isuamin a nasion, ket paglalasinennanto dagiti maysa ken maysa kadagiti tao, a kas iti pastor ilasinna dagiti karnero kadagiti kalding.” (Mateo 25:31, 32) Ar-aramaten ni Kristo dagiti anghelna iti daytoy trabaho a panamaglasinlasin. Kas ti maysa nga anghel inturongna ti addang ni Felipe nga agturong iti Etiope nga eunuko, adda met ti nawadwad a pammaneknek itatta nga ar-aramaten ni Kristo dagiti anghelna a mangiturong iti addang dagiti Saksina kadagiti tattao a kimmarnero. Adu a tattao ti mangpaneknek iti kinapudno nga agkarkararagda a maipaay ti tulong kasakbayan iti panangtuktok ti maysa a Saksi iti ridawda.—Aramid 8:26, 27.
Naan-anay a Panagtalek iti Panangiwanwan ni Kristo
18, 19. Maibatay iti napasamak idi umuna a siglo, ania iti pagkammatalkantayo?
18 Idi umuna a siglo, dagiti sirkumstansia ti saan a kanayon a posible iti panangusar ni Kristo iti bagi a manarawidwid idiay Jerusalem a mangsolbar iti espesipiko a problema. Idi naiputputong ni Pablo idiay umamianan nga Asia Menor ket kasapulan a maammuanna no ania a teritoria ti sumaganad a silulukat, nagtignay ni Kristo babaen iti espiritu. (Aramid 16:6-10) Itatta dagiti Saksi ni Jehova sitatalekda nga asinoman kadagiti kakabsatda nga agbalin a maiputputong a temporario manipud Bagi a Manarawidwid gapu iti pannakaidadanes ket kaskasdi nga addada pay laeng iti sidong ti aktibo a kinapangulo ni Kristo, babaen ti espiritu ken panangsuportar dagiti anghel.
19 Idi immuna a panawen Kristiano, mabalin a dadduma kadagiti pangngeddeng nga inaramid ti bagi a manarawidwid ti narigat a tarusan iti daydi a tiempo. Nalabit isu daytoy ti kaso idi naipasubli ni Pablo idiay Tarso wenno idi isut’ naibaon iti templo kalpasan ti maikatlo a panagdaliasatna kas misionero. (Aramid 9:30; 21:23-25) Kaskasdi, ni Kristo ti aktualmente nga adda pay met laeng iti likudan dagita a pangngeddeng. (Aramid 22:17-21; 23:11) Itatta mabalintay ti agkammatalek nga aniaman nga ipalubos ni Kristo a mapasamak iti tengnga dagiti ad-adalanna ditoy daga ket addaan ti natan-ok a panggepna kas met laeng idi umuna a siglo.
20. Iti ania ti pakakumbinsirantayo, ket ania ti determinasiontayo?
20 Gapuna, no mabasatayo iti Biblia a ni Kristo “isu ti ulo ti bagi, ti kongregasion,” kumbinsidotayo nga isut’ saan laeng a maysa a natituluan nga Ulo. (Colosas 1:18) Ammotayo, manipud kapadasan, nga isut’ pudpudno, nga aktibo nga Ulo. No mabasatayo iti libro dagiti Aramid ken makitatayo no kasano ti panangiturturong ni Kristo kadagiti bambanag kadagidi immuna a Kristiano, maikunatayo nga us-usarenna met laeng dagita a pamay-an itatta. Makitkitatayo ti pammaneknek ti panangus-usar ni Kristo iti nasantuan nga espiritu, dagiti anghel ken “ti matalek ken naannad nga adipen” ken iti Bagi a Manarawidwidna, a mangdutok kadagiti naespirituan a kualipikado a panglakayen. Sitatalek iti aktibo a panangiturturong ni Kristo kadagiti bambanag, determinadotayo nga agtultuloy a “sawentayo ti kinapudno” ken rumang-aytayo iti ayat “kadagiti isuamin ken Kristo, isu nga Ulo.”—Efeso 4:15.
[Dagiti Footnote]
a Maipaay iti naan-anay a panangilawlawag kadagitoy pito a mensahe ken ti aplikasionda, kitaenyo ti libro a “Then Is Finished the Mistery of God,” kapitulo 7 ingganat’ 14, nga impablaak ti Watchtower Bible and Tract Society of New York, Inc.
b Ti Hunio 15, 1972, a ruar ti Ti Pagwanawanan lawlawaganna pay daytoy a punto, a kunkunana: “Awan duadua, awan maymaysa nga indibidual a panglakayen, presbiterio, manangaywan wenno pastor, no di ket ti intero a bagi ‘dagiti panglakayen’ ti inawagan ti naipadayag nga Apo, Jesu-Kristo, ti ‘anghel’ nga insimbolo ti nainlangitan a bituen. . . . Ti ‘bagi dagiti panglakayen’ (wenno presbiterio) idiay Efeso ti agtignay kas maysa a bituen iti panangisilnag ti nainlangitan, naespirituan a lawag iti kongregasion a nangaramidan ti nasantuan nga espiritu kadakuada kas papastor.”
Dagiti Kangrunaan a Punto a Laglagipen
◻ Aniat’ adda a pammaneknektayo a sisisinged a sursuroten ni Kristo ti ar-aramid dagiti kongregasion idi umuna a siglo?
◻ Asino ti dinutokan ni Kristo kadagiti isuamin a “kukuana,” ket aniat’ ramanen dagitoy?
◻ Siasino ti isimsimbolo dagiti pito a bituen iti makannawan ni Kristo?
◻ Kasanot’ panangusar ni Kristo ti nasantuan nga espiritu, dagiti anghel, ken ti napulotan a Bagi a Manarawidwid iti panangiturturong ti kongregasionna itatta?
◻ Apay a maaddaantay naan-anay a panagtalek iti panangiturong ni Kristo kadagiti bambanag itatta?
[Kahon iti panid 20]
Dagiti umay a suot gapu iti gubat, rebolusion wenno ti panangidadanes ken opisial a panangiparit ti mabalin pagbalinenna nga imposible ti panangitungpalyo ti Nakristianuan a panagdayawyo iti naan-anay nga organisado a pamay-an. Mabalin a tumaud dagiti sirkumstansia nga imposible ti panangangayyo ti dadakkel a panaggigimong iti kongregasion. Mabalin a magsat bassit ti pannakiumanyo iti sanga nga opisina. Mabalin a masinga ti panagsarungkar met dagiti manangaywan ti sirkito. Mabalin a di agsangpet dagiti baro a publikasion. No mapasamak ti aniaman kadagitoy a bambanag kadakayo, ania ngay ti aramidenyo?
Ti sungbat ket: Iti sidong iti kakasta a sirkumstansia, aramidenyo ti aniaman a maaramidanyo, ken iti inggat’ kabaelanyo, iti nadalus a panagdaydayaw. Mabalin a posible ti personal a panagadal. Masansan a ti babassit a grupo dagiti kakabsat ti agtartaripnong a maipaay ti panagadal kadagiti pagtaengan. Dagiti publikasion a naad-adal idin ken ti Biblia a mismo ti mausar kas pakaibasaran ti panaggigimong. Dikay mabutbuteng wenno agdanag. Kaaduanna, iti di agbayag mabalin nga addanton maipasdek a maysa a porma ti pannakikomunikar kadagiti responsable a kakabsat. Sapulen met ti Bagi a Manarawidwid dagiti pamay-an a mabalin a panangammo iti kasasaad dagiti kakabsat.
Ngem uray no makitayo a naiputputongkayo manipud amin kadagiti kakabsatyo a Kristiano, laglagipenyo a saankayo a naiputputong manipud ken ni Jehova ken ni Jesu-Kristo nga Anakna.—Organisado a Mangitungpal ti Ministeriotayo, panid 168.
[Ladawan iti panid 17]
Ni Kristo ti simbolikal nga adda iti tengnga dagiti kongregasion, nga ig-iggamanna dagiti manangaywan iti makannawanna