Ipategyo ti Pudpudno a Biag

KASTOY la ngatan ti biag? Babaen ti panangiparegtana a ‘petpetantay a sititibker ti pudpudno a biag,’ ipasimudaag ti Biblia a saan a kastoy lattan ti biag. (1 Timoteo 6:17-19) No ti agdama a biagtayo ket saan nga isu ti pudpudno a biag, ania ngay ngarud?

Ipakita ti konteksto ti nadakamat a kasuratan a dayta ket isu ti “agnanayon a biag” a rumbeng a petpetan a sititibker ti managbuteng-Dios a tao. (1 Timoteo 6:12) Para iti kaaduan, kaipapanan daytoy ti biag nga agnanayon ditoy daga. Addaan idi ni Adan, ti immuna a tao, iti gundaway nga agbiag nga agnanayon iti paraiso a daga. (Genesis 1:26, 27) Sa la matay no mangan manipud iti “kayo ti pannakaammo iti naimbag ken iti dakes.” (Genesis 2:17) Ngem gapu ta nagsukir da Adan ken ni Eva nga asawana iti pannanganda iti bunga dayta a kayo, sinentensiaan ida ti Dios iti ipapatay. ‘Iti aldaw a pannanganda iti dayta,’ natayda iti imatang ti Dios ket nangrugi nga agturongda iti pisikal nga ipapatay. Ti biagda ket saanen a kas iti tinagiragsakda idi damo.

Ti Dalan nga Agturong iti “Pudpudno a Biag”

Tapno agbalin a posible “ti pudpudno a biag,” nangaramid ni Jehova a Dios iti maysa nga urnos tapno maispal ti sangatauan. Tapno maawatantayo daytoy nga urnos, darepdepentay ti maysa a bassit a pabrika. Addaan depekto amin a makina nga adda iti dayta ket marigatan dagiti makinista agsipud ta saan a sinurot dagiti immun-una a trabahador kadagiti napalabas a tawen ti libro ti makinista a nakaigapuan ti pannakadadael dagiti amin a makina. Ti laeng maaramidan dagiti agdama a makinista isu ti panangaramatda kadagiti makina nga adda kadakuada iti kasayaatan a pamay-an. Kayat ti akinkukua iti pabrika a tarimnen dagiti makina tapno matulonganna dagiti trabahadorna, ket nangilasin iti pundo a kasapulan para iti dayta a panggep.

Saan nga impateg ti immuna a ‘makinista,’ ni Adan, ti biag a naited kenkuana. Gapuna, inyallatiwna kadagiti putotna ti imperpekto a biag, kas iti addaan depekto a makina. (Roma 5:12) Kas kadagiti naud-udi a makinista iti pabrika, a saanda a kabaelan nga ipamuspusan ti kasasaad, saan a kabaelan dagiti kaputotan ni Adan a ragpaten ti pudpudno a biag maipaay iti bagbagida. (Salmo 49:7) Tapno marisut daytoy kasla di maipamuspusan a kasasaad, imbaon ni Jehova ti bugbugtong nga Anakna ditoy daga tapno subbotenna ti biag nga agnanayon maipaay iti sangatauan. (Lucas 1:35; 1 Pedro 1:18, 19) Babaen ti panangidatonna iti biagna ken patay maigapu iti sangatauan, impaay ti bugbugtong nga Anak ti Dios, ni Jesu-Kristo, ti pundo​—ti biag a katupag daydi napukaw ni Adan. (Mateo 20:28; 1 Pedro 2:22) Babaen daytoy napateg a daton, addaan itan ni Jehova iti pangibatayan a mangipaay iti pudpudno a biag.

Para iti natulnog a sangatauan, ti daton a subbot ni Jesus kaipapanannanto ti biag nga agnanayon iti paraiso a daga. (Salmo 37:29) Daytoy ti namnama dagiti amin a makalasat “iti gubat ti naindaklan nga aldaw ti Dios a Mannakabalin-amin,” a maaw-awagan iti Har–Magedon. (Apocalipsis 16:14-16) Daytanto ti mangikkat iti amin a kinadakes ditoy daga. (Salmo 37:9-11) Dagidiay adda iti lagip ti Dios a matay sakbay dayta a tiempo mapagungardanto iti Paraiso a naisubli iti daga ket addanto gundawayda a mangtagiragsak iti pudpudno a biag nga agur-uray kadagiti amin nga agtulnog iti Dios.​—Juan 5:28, 29.

Nasken nga Ipategtay ti Agdama a Biagtayo

Di kayat a sawen daytoy a mabalintay a siuumiso a tagibassiten ti kinasagrado ti agdama a biagtayo. Mangbusbos aya ti akinkukua iti pabrika iti panawen ken kuarta a mangtarimaan iti maysa a makina para iti maysa a trabahador a di mangaywan iti dayta? Imbes ketdi, saan kadi nga italek ti among ti natarimaan a makina iti maysa a tao a nakaan-annad ti panangaywanna iti daan a makina?

Ti biag ket maysa a napateg a sagut a naggapu ken Jehova. Kas ti naparabur a gubuayan dayta a sagut, kayatna nga ipategtay dayta. (Salmo 36:9; Santiago 1:17) Maipapan iti pannakaseknan ni Jehova kadagiti tattao ditoy daga, kinuna ni Jesus: “Uray dagiti buok ti ul-uloyo nabilangda aminen.” (Lucas 12:7) Imbilin ni Jehova kadagiti Israelita a dida mamapatay, a pakairamanan la ketdi ti di panangpapatay iti bukod a bagi. (Exodo 20:13) Tulongannatay daytoy a mangiwaksi iti panagpakamatay kas maysa a pagpilian.

Iti pannakaammoda iti naayat a pannakaseknan ni Jehova iti pagimbagantayo, yaplikar dagiti managbuteng-Dios a tattao dagiti prinsipio ti Biblia kadagiti kadawyan nga aramid kadagitoy nga aldaw. Kas pagarigan, gapu ta makalikaguman a ‘dalusan [dagiti pudno a Kristiano] ti bagbagida iti tunggal pakatulawan iti lasag ken iti espiritu, nga an-anayenda ti kinasanto iti panagbuteng iti Dios,’ idianda ti tabako ken dagiti makaadikto a droga a mangbalbaliw iti panunot.​—2 Corinto 7:1.

Maanninaw pay ti pannakaseknan ti Dios iti biag ti tao iti balakadna a salimetmetan “ti natalna a puso” ken liklikan ti imoral a kababalin. (Proverbio 14:30; Galacia 5:19-21) Babaen ti panangsurot kadagitoy a nangato a pagalagadan, masalaknibantayo kadagiti bambanag a kas iti makadangran a panagpungtot ken saksakit a mayakar babaen ti sekso.

Nalawag met a makita ti pannakaseknan ni Jehova iti biag dagiti tattaona iti balakadna a liklikan ti nalabes a pampannangan ken nalabes a panagin-inum. (Deuteronomio 21:18-21; Proverbio 23:20, 21) Naballaagan dagiti Kristiano a dagiti naagum a tattao ken mammartek saandanto a tawiden ti Pagarian ti Dios, kayatna a sawen, pulos a saandanto a mapasaran ti pudpudno a biag. (1 Corinto 6:9, 10; 1 Pedro 4:3) Babaen ti panangiparegtana iti kinatimbeng, isursuronatayo ni Jehova maipaay iti pagimbagantayo.​—Isaias 48:17.

No surotentayo dagiti pagalagadan ti Dios, ipakpakitatayo nga ipatpategtay ti agdama a biagtayo. Siempre, napatpateg ti pudpudno a biag. Yantangay agnanayon dayta, ad-adda ti panangipateg dagiti pudno a Kristiano iti dayta ngem iti agdama a biagda. Idi insakripisio ni Jesu-Kristo ti biagna, sitatallugod nga inaramidna ti pagayatan ni Jehova. Napatpateg nga amang kenkuana ti panagtulnog iti Amana ngem ti biagna ditoy daga. Gapu iti inaramid ni Jesus, isut’ napagungar ket immawat iti imortal a biag idiay langit. (Roma 6:9) Ti ipapatayna kaipapananna met ti biag nga agnanayon agpaay iti natulnog a sangatauan a mangwatwat iti pammati iti datonna a pangsubbot.​—Hebreo 5:8, 9; 12:2.

Napateg a Linteg Maipapan iti Dara

Kaawatan a yanninaw dagiti pasurot ni Jesus ti panagpampanunotna. Tarigagayanda nga ay-aywen ti Dios iti amin a banag, kas iti inaramid ni Kristo. Daytoy ti makagapu no apay a saanda nga agpayalison iti dara, a sigun kadagiti dadduma a doktor ket makaispal iti biag. Kitaentayo no kasano nga ipakpakita ti maysa a tao nga ipatpategna ti pudpudno a biag babaen ti panagkedkedna a mayalisonan iti dara.

Kas ken Jesu-Kristo, tarigagayan dagiti pudno a Kristiano ti agtalinaed a sibibiag iti imatang ti Dios, ket kalikaguman dayta ti naan-anay a panagtulnog Kenkuana. Imbilin ti Sao ti Dios kadagiti pasurot ni Kristo: “Itultuloyyo ti umadayo kadagiti bambanag a naisakripisio kadagiti didiosen ken iti dara ken kadagiti bambanag a nabekkel ken iti pannakiabig.” (Aramid 15:28, 29) Apay a nairaman daytoy a linteg maipapan iti dara kadagiti bilin a maipaannurot kadagiti Kristiano?

Impaannurot ti Linteg a naited kadagiti Israelita ti yaadayo iti dara. (Levitico 17:13, 14) Awan dagiti Kristiano iti sidong ti Linteg Mosaiko. Ngem ammoda a ti bilin maipapan iti di pannangan iti dara ket immun-una ngem ti Linteg; immun-una a naited dayta ken ni Noe kalpasan ti Layus. (Genesis 9:3, 4; Colosas 2:13, 14) Naipaannurot daytoy a bilin kadagiti amin a kaputotan ni Noe, a nagtaudan ti amin a nasion ti daga. (Genesis 10:32) Mainayon pay, tulongannatay ti Linteg Mosaiko a makakita iti makagapu no apay nga impaganetget ti Dios ti kinasagrado ti dara. Kalpasan ti panangiparitna kadagiti Israelita a mangan iti aniaman a kita ti dara, kinuna ti Dios: “Ti biag ti lasag adda iti dara, ket itedko dayta kadakayo iti rabaw ti altar a maaramid a pakaabbongan a maipaay kadagiti kararuayo, agsipud ta ti dara isu ti makaaramid iti pakaabbongan gapu ta adda kenkuana ti biag.” (Levitico 17:11) Imbilin ti Dios a mausar laeng ti dara a kas daton iti altar. Ti lintegna maipapan iti kinasagrado ti dara ipakitana ti kinaturayna iti amin a biag ditoy daga. (Ezequiel 18:4; Apocalipsis 4:11) No matmatantayo ti biagtayo a maitunos iti panangmatmat ni Jehova, mabigbigtayo a saantay a kukua dayta no di ket intalek laeng ti Dios kadatayo.

Kas iti makinista iti ilustrasiontayo nga addaan sungsungbatan iti makina, naitalek kadatayo ti agdama a biagtayo. Aniat’ aramidenyo no kasapulan a matarimaan ti makinayo ket insingasing ti maysa a mekaniko a dagiti parte nga imparit ti libro ti makinista ti usarenyo a pangtarimaan iti dayta? Dikay ngata agkonsulta kadagiti dadduma a mekaniko tapno kitaen no matarimaan ti makina a maitunos iti instruksion ti libro? Napatpateg ken narikrikut nga amang ti biag ti tao ngem ti maysa a makina. Iti naipaltiing a Saona, ti libro a naglaon kadagiti instruksion no kasano a makapagtalinaed dagiti tattao a sibibiag, iparit ti Nangaramid kadatayo ti panangusar iti dara tapno mataginayon ti biag. (Deuteronomio 32:46, 47; Filipos 2:16) Saan kadi a nainkalintegan a suroten dagiti pagannurotan dayta a libro?

Kinapudnona, dagiti Kristiano a pasiente nga agkiddaw iti pannakaagas ti sakitda a di mausar ti dara saanda a pagkedkedan ti amin a panangagas. Agkidkiddawda laeng iti panangagas a mangipakpakita iti panangipateg iti biagda​—agpadpada iti agdama ken iti masanguanan. Mapaneknekan dagiti doktor nga addaan tured a mangraem iti takder dagiti Kristiano dagiti pagsayaatan ti panangagas kadakuada a maitunos iti kiddawda. “Ti pannakilangenko kadagiti Saksi ni Jehova inturongnak kadagiti baro a prinsipio,” kuna ti maysa a siruhano nga agus-usar idi iti adu a dara. Ita, ikagkagumaanna nga agasan uray dagiti saan a Saksi a di agusar iti dara.

Panangipateg iti Pudpudno a Biag

Ania dagiti baro a prinsipio a nasarakan daytoy a siruhano babaen ti panangagasna kadagiti Saksi ni Jehova? Mabigbigna itan a saan laeng a ti paset ti bagi a nakaptan iti sakit ti ramanen ti panangagas iti maysa a pasiente no di ket ti intero a kinataona. Saan kadi a rumbeng a mapalubosan ti maysa a pasiente nga agkiddaw iti kasayaatan a pannakaaywan ti pisikal, espiritual, ken emosional a pagimbaganna?

Para ken ni 15-años a Kumiko, ti panangyalison ti dara a pangagas iti makapapatay a leukemia-na ket isu ti kadadaksan a pagpilian. Ti panangpaatiddog iti biagna iti kastoy a pamay-an iti sumagmamano a lawas, bulan, wenno tawen pay ketdi dina matupagan ti mapukawna iti agnanayon. Gapu ta indedikarna ti agdama a biagna ken ni Jehova a Dios kas maysa kadagiti Saksina, rinaemna ti kinasagrado ti biag ken dara. Nupay siiinget a binusor ni tatang ken dagiti dadduma a kakabagianna ti takderna, nagtalinaed a natibker ni Kumiko. Iti naminsan, sinaludsod ti doktorna: “No pakawanen ti Diosyo dagiti biddut, dinakanto aya pakawanen no agpayalisonka iti dara?” Saan a nakikompromiso ni Kumiko ket iti kasta paglikudanna ti pammatina a naibatay iti Biblia. ‘Tinaginayonna ti nairut a panangpetpet iti sao ti biag,’ sinalimetmetanna ti takderna. (Filipos 2:16) Kas kinuna ti di manamati nga apongna a baket, “saan a paglikudan ni Kumiko ti pammatina.” Iti saan a nabayag, nagbalbaliw ti kababalin ti tatang ken ti apongna a baket, kasta met dagiti doktor a nangasikaso kenkuana.

Adu a puso ti natignay gapu iti natibker a pammati ni Kumiko ken ni Jehova a Dios, a makabael a mangpagungar kenkuana manipud kadagiti natay. Idi sibibiag pay, impakpakaasina ken ni tatangna: “Uray no matayak, mapagungarakto idiay Paraiso. Ngem no madadaelkayo inton Har–Magedon, dikayto makita. Isu a pangngaasiyo ta agadalkayo iti Biblia.” Sangkakuna laeng ni tatangna: “Ala wen, no umimbagka.” Ngem idi natay ni Kumiko gapu iti di maagasan a sakitna, inkabil ni tatangna iti uneg ti lungon ti maysa a papel a nasuratan iti: “Agkitatanto idiay Paraiso, Kumiko.” Kalpasan ti pumpon, kinunana kadagidiay nakipamumpon: “Inkarik ken ni Kumiko nga agkitakaminto idiay Paraiso. Nupay diak pay laeng patien gapu ta saan pay nga umdas ti naadalko, determinadoak a mangusig iti dayta. Pangngaasiyo ta tulongandak.” Rinugian met dagiti dadduma pay a kameng ti pamiliana ti nagadal iti Biblia.

Adda pudpudno a panangipateg ni Kumiko iti biag ken kayatna ti agbiag. Inapresiarna ti panangipakat dagiti doktorna iti amin a kabaelanda a mangispal iti agdama a biagna. Nupay kasta, babaen ti panangannurotna kadagiti bilin a nailanad iti libro ti Namarsua, pinaneknekanna nga ipatpategna ti pudpudno a biag. Para iti riniwriw, dayta ket biag nga agnanayon iti paraiso a daga. Maysakayto kadi kadakuada?