MISIA

Maysa a rehion iti makin-amianan a laud a paset ti Asia Menor. Agparang a nagbaliwbaliw dagiti beddeng ti Misia, ngem kadawyanna a ti beddengna manipud laud agingga iti amianan ket ti Baybay Aegeano, ti Hellespont (Dardanelles) ken ti Propontis (Baybay ti Marmara). Ti Bitinia ti adda iti daya ken ti Lidia iti abagatan. (Kitaenyo ti ASIA.) Bayat ti maikadua a panagbaniaga ni Pablo kas misionero (kaduana da Silas ken Timoteo), inkagumaanna ti mapan idiay Bitinia, ngem “saan a pinalubosan ida ti espiritu ni Jesus. Gapuna linabasanda ti Misia ket simmalogda nga agturong idiay Troas.” (Ara 15:40; 16:1-3, 7, 8) Ti sangladan ti Troas ket adda idiay Misia, ngarud limmasat ni Pablo ken ti kakaduana iti dayta a rehion, ngem saanda nga inraman ti Misia iti panagmisioneroda. Ti dadduma pay a siudad ti Misia isu ti Adrumeto (Ara 27:2), Assos (Ara 20:13, 14), ken Pergamo.​—Apo 1:11; kitaenyo ti TROAS.