Ania ti Isursuro ti Biblia Maipapan iti Panagsao Kadagiti Pagsasao?
Sungbat ti Biblia
Ti ‘panagsao kadagiti pagsasao’ ket tumukoy iti milagro a napasamak iti sumagmamano a nagkauna a Kristiano a namagbalin kadakuada nga agsao iti maysa a lengguahe a saanda pay a naadal. (Aramid 10:46) Ti agsasao ket nalaka a naawatan ti asinoman a makaammo iti lengguahe. (Aramid 2:4-8) Ti panagsao kadagiti pagsasao ket maysa kadagiti sagut ti nasantuan nga espiritu nga inted ti Dios iti sumagmamano a Kristiano idi umuna a siglo.—Hebreo 2:4; 1 Corinto 12:4, 30.
Sadino ken kaano a nangrugi ti panagsao kadagiti pagsasao?
Nangrugi daytoy a milagro idiay Jerusalem iti agsapa ti Piesta dagiti Judio idi Pentecostes 33 C. E. Naguummong idi ti agarup 120 nga adalan ni Jesus idi “napnoda amin iti nasantuan nga espiritu ket nangrugida nga agsao iti nagduduma a pagsasao.” (Aramid 1:15; 2:1-4) Naguummong ti maysa a dakkel a bunggoy ti tattao “manipud iti tunggal nasion nga adda iti baba ti langit” ken “tunggal maysa nangngegna ida nga agsasao iti bukodna a pagsasao.”—Aramid 2:5, 6.
Ania ti panggep ti panagsao kadagiti pagsasao?
Tapno maipakita a tultulongan ti Dios dagiti Kristiano. Idi un-unana, nangted ti Dios kadagiti pagilasinan babaen ti milagro tapno mapaneknekanna a tultulonganna dagiti matalek a tattao a kas ken Moises. (Exodo 4:1-9, 29-31; Numeros 17:10) Kasta met laeng ti panagsao kadagiti pagsasao. Ipakita dayta a tultulongan idi ti Dios dagiti kabuangbuangay a kongregasion Kristiano. Insurat ni apostol Pablo: “Dagiti pagsasao agpaayda a pagilasinan, saan a kadagiti manamati, no di ket kadagiti di manamati.”—1 Corinto 14:22.
Tapno naan-anay a makapangasaba dagiti Kristiano. Imbaga dagiti nakangngeg kadagiti pasurot ni Jesus iti aldaw ti Pentecostes: “Mangmangngegtayo ida nga agsasao kadagiti pagsasaotayo maipapan iti natan-ok a bambanag ti Dios.” (Aramid 2:11) Gapuna, ti maysa pay a panggep dayta a milagro ket tapno “mangipaay iti naan-anay a pangsaksi” dagiti Kristiano ken tapno ‘mangaramidda iti ad-adalan kadagiti tattao iti amin a nasion,’ kas iti imbilin kadakuada ni Jesus. (Aramid 10:42; Mateo 28:19) Agarup 3,000 a nakakita iti dayta a milagro ken nakangngeg iti panangsaksi ti nagbalin nga adalan iti dayta nga aldaw.—Aramid 2:41.
Nagtultuloy kadi agingga ita ti panagsao kadagiti pagsasao?
Saan. Dagiti sagut ti nasantuan nga espiritu, a pakairamanan ti panagsao kadagiti pagsasao, ket temporario laeng a probision. Impakpakauna ti Biblia: “No adda sagsagut ti panagipadto, mapukawdanto; uray no adda dagiti pagsasao, agsardengdanto.”—1 Corinto 13:8.
Kaano a nagpatingga ti panagsao kadagiti pagsasao?
Dagiti sagut ti nasantuan nga espiritu ket naipasa iti dadduma a Kristiano iti sanguanan dagiti apostol, kadawyanna a babaen ti panangipatayda iti imada kadagiti kapammatianda. (Aramid 8:18; 10:44-46) Agparang a dagidiay nakaawat kadagiti sagut ti espiritu manipud kadagiti apostol saanda nga impasa dagita iti dadduma. (Aramid 8:5-7, 14-17) Kas panangyilustrar, ti maysa nga opisial ti gobierno ket mabalin a mangted iti lisensia iti maysa a tao, ngem saan a naikkan dayta a tao iti legal nga autoridad a mangted iti lisensia iti sabali. Agparang a nagpatingga ti panagsao kadagiti pagsasao idi natay dagiti apostol ken dagidiay nakaawat a mismo iti dayta a sagut kadakuada.
Dagiti ngay panagsao kadagiti pagsasao ita?
Nalawag a ti sagut babaen ti milagro a panagsao kadagiti pagsasao ket nagpatingga idi dandanin agpatingga ti umuna a siglo C.E. Awan ita ti mabalin a mangibaga nga isu ket agsasao kadagiti pagsasao babaen ti pannakabalin ti Dios.a
Ania ti pakabigbigan dagiti pudno a Kristiano?
Kinuna ni Jesus a ti managsakripisio nga ayat ti pakabigbigan dagiti adalanna. (Juan 13:34, 35) Kasta met, insuro ni apostol Pablo nga ayat ti permanente a pakabigbigan dagiti pudpudno a Kristiano. (1 Corinto 13:1, 8) Imbagana a mangpataud ti espiritu ti Dios kadagiti Kristiano kadagiti kualidad a natukoy kas “ti bunga ti espiritu,” a ti umuna a kualidad ket ayat.—Galacia 5:22, 23.
a Kitaem ti artikulo a “Namilagruan a Panagsao iti Nagduduma a Lenguahe—Nagtaud Kadi iti Dios?”