Ti Kinapudno Maipapan Kadagiti Anghel

Ti pannakiam-ammo iti maysa masansan a ramanenna ti panangammo iti pamilia dayta a tao. Umasping dayta iti panangam-ammo ken Jehova a Dios. Ad-adu pay ti nairaman ngem ti basta panangammo iti naganna. Nasken met nga ammuentayo ti maipapan iti “pamilia[na]” idiay langit. (Idiligyo ti Efeso 3:14, 15.) Ti Biblia awaganna dagiti anghel kas “annak a lallaki” ti Dios. (Job 1:6) Iti panangusig iti napateg nga akemda iti Biblia, rebbeng a kayattay a maammuan ti ad-adu pay maipapan kadakuada tapno matarusantayo ti lugarda iti panggep ti Dios.

TUMANTANOR ti baro a subkultura. Saan laeng nga umad-adu ti tattao nga agkunkuna a mamatida kadagiti anghel; umad-adu ti agkunkuna a naapektaranda ida iti nagduduma a pamay-an. Idi napagsaludsodan ti 500 nga Americano iti, “Nariknayo kadin a personal ti kaadda ti anghel iti biagyo?” gistay kakatlo ti simmungbat iti wen. Makapakellaat met ti kaadu dagiti agtutubo nga agkuna a mamatida kadagiti anghel​—a sigun iti maysa a surbey idiay Estados Unidos, 76 porsiento amin! Nabatad, interesado ti tattao kadagiti anghel. Ngem kasanot’ pannakairukod ti agdama a kapanunotan maipapan kadagiti anghel iti kinapudno ti Biblia?

Panangabbong iti Akem ni Satanas

No mapagsasaritaan dagiti anghel, ditay koma liplipatan dagiti nadangkes nga anghel, dagiti nailangitan a parsua a, sigun iti Biblia, immalsa iti Dios. Ti kangrunaan kadagitoy ket ni Satanas. Iparipirip ti nalatak a libro a naawagan iti Ask Your Angels a ni Satanas ket “maysa [laeng] nga aspeto ti Dios” a tumulong kadagiti tattao a mangpapigsa kadagiti “naespirituan a piskelda” babaen ti naynay a pannakasulisog. Iti laksid ti “naayat a panggep” ni Satanas, kuna ti autor, isut’ napagbiddutanda kas dakes iti sinigsiglon. Kinunada pay a ni Satanas ken ni Jesus, “nupay saanda a naan-anay nga agkakomplemento iti tunggal maysa, uray kaskasano ket agkadasigda, nga agkanayonda iti isu met laeng a persona.” Makapakellaat dagitoy a panangipapati, ngem aniat’ kuna ti Biblia?

Ibatad ti Biblia a ni Satanas ket saan a “maysa nga aspeto ti Dios” no di ket kabusor ti Dios. (Lucas 10:18, 19; Roma 16:20) Inlaksidna ti kinasoberano ni Jehova, ken ti panggepna kadagiti tattao ket saan a pulos a “naayat.” Sidadangkok nga idasdas-alna ti pungtotna kadagiti adipen ti Dios ditoy daga. Idardarumna ida iti sanguanan ti Dios iti aldaw ken rabii!a (Apocalipsis 12:10, 12, 15-17) Determinado ni Satanas iti panangpadakes kadakuada uray ania pay ti ibungana. Ti naulpit a panangidadanesna iti nalinteg a tao a ni Job imbutaktakna ti kinaawan pannakipagriknana iti panagsagsagaba ti tao.​—Job 1:13-19; 2:7, 8.

Adayo nga “agkadasigda,” nainget nga agkabusor da Satanas ken Jesus. Awan duadua a ni Satanas ti nangtignay ken Herodes a mangibilin iti nasaknap a panangpapatay kadagiti ubbing​—gapu iti panagreggetna a mangpapatay iti ubing a Jesus! (Mateo 2:16-18) Ket nagtultuloy ti nainget nga iraraut ni Satanas agingga iti ipapatay ni Jesus. (Lucas 4:1-13; Juan 13:27) No kasta, imbes nga “agkanayonda iti isu met laeng a persona,” da Jesus ken Satanas ket naan-anay nga agsupadi. Ipakita ti padto ti Biblia a di maliklikan ti panagbinnusorda. (Genesis 3:15) Maikanatad, ni napagungar a Jesus ti mangdadaelto ken ni Satanas iti naikeddeng a panawen ti Dios.​—Apocalipsis 1:18; 20:1, 10.

Karkararag iti Siasino?

Isingasing dagiti manangitandudo iti angel movement ti panagmennamenna ken dadduma pay a pamay-an tapno makasaritada dagiti anghel. “Maipangagto ti napasnek a kiddaw a makiuman iti asinoman a kameng ti nailangitan a pamilia,” kuna ti maysa a libro. “Agkiddawkayo ket maipangagkayto.” Dadduma kadagiti anghel nga isingasing ti libro a pakiumanan ket da Miguel, Gabriel, Uriel, ken Rafael.b

Nupay kasta, insuro ni Jesus dagiti adalanna nga agkararagda iti Dios, saan a kadagiti anghel. (Mateo 6:9, 10) Umasping iti dayta, insurat ni Pablo: “Iti amin a banag babaen ti kararag ken araraw agraman panagyaman maipakaammo koma dagiti dawdawatyo iti Dios.” (Filipos 4:6) No kasta, kadagiti kararagda, saan nga umadani dagiti Kristiano iti asinoman malaksid ken Jehova, ken aramidenda dayta iti nagan ni Jesu-Kristo.c​—Juan 14:6, 13, 14.

Awan Kadi ti Relihion Dagiti Anghel?

Sigun ken ni Eileen Elias Freeman, a mangidadaulo iti AngelWatch Network, “saliw-anan dagiti anghel ti tunggal relihion, tunggal pilosopia, tunggal kredo. Kinapudnona, awan relihion dagiti anghel kas iti ammotayo.”

Nupay kasta, ibatad ti Biblia nga adda relihion dagiti matalek nga anghel; daydayawenda ti pudno a Dios, ni Jehova, a dina kayat nga adda karibalna a sabsabali a dios. (Deuteronomio 5:6, 7; Apocalipsis 7:11) Gapuna, tinukoy ti kasta nga anghel ti bagina ken ni apostol Juan kas maysa ‘a pada nga adipen’ dagidiay nga agtultulnog kadagiti bilin ti Dios. (Apocalipsis 19:10) Awan a pulos ti pakabasaantay iti Biblia maipapan kadagiti matalek nga anghel a mangitantandudo iti aniaman a sabali a kita ti panagdaydayaw. Ipapaayanda ni Jehova iti naipamaysa a debosion.​—Exodo 20:4, 5.

“Ti Ama ti Kinaulbod”

Adu dagiti makuna a pannakilangen kadagiti anghel ti nainaig iti pannakikomunikar kadagiti natay. “Nariknak a nakasarak ni ulitegko iti pamay-an tapno makagteng kaniak ken ipakaammona nga isut’ naragsak kamaudiananna,” kuna ti maysa a babai nga agnagan Elise kalpasan a nakaawat iti imbilangna a signo. Malaglagip met ni Terri ti nasinged a gayyemna a natay. “Makalawas kalpasan ti pumpon,” kunana, “immay kaniak iti impapanko a maysa a tagtagainep. Kinunana kaniak a diak koma pagladingitan ti ipapanawna, gapu ta isut’ naragsak ken sitatalna.”

Ngem kuna ti Biblia a dagiti natay “dida ammo ti aniaman.” (Eclesiastes 9:5) Kunana pay a no matay ti tao, “iti dayta met la nga aldaw dagiti pampanunotna mapukawda.” (Salmo 146:4) Nupay kasta, ni Satanas “ti ama ti kinaulbod.” (Juan 8:44) Isut’ nangirugi iti kinaulbod a di matay ti natauan a kararua. (Idiligyo ti Ezequiel 18:4.) Patien daytoy ti adu a tattao itatta, a mayataday iti panggep ni Satanas, ta pukawenna ti kinapateg ti panamati iti panagungar​—maysa a pamunganayan a doktrina ti Kinakristiano. (Juan 5:28, 29) Gapuna, ti pannakiuman kadagiti natay wenno ti kasla panangawat kadagiti mensahe manipud kadakuada ket kaskasdi a sabali pay a parupa ti angel movement a saan nga anamongan ti Dios.

Iyaadani Kadagiti Anghel Wenno Kadagiti Sairo?

Adu kadagiti agdama nga angel movement ti nainaig iti okulto. Usigenyo ti kapadasan ni Marcia. “Manipud idi Setiembre aginggat’ Disiembre 1986,” kunana, “nangrugi a makaawatak kadagiti mensahe manipud iti ‘karkarna a lugar.’ Nakakitaak kadagiti aparision ken naaddaan kadagiti nakaskasdaaw a tagtagainep iti ‘napalabas a biag.’ Nakasaritak dagiti gagayyem a natayen ken naaddaanak iti adu a sabsabali pay a datdatlag a kapadasan a nakaammuak kadagiti banag maipapan kadagiti tattao a nabiit pay a naam-ammok. Naparaburanak met iti sagut ti automatiko a panagsurat ken nayallatiw a mensahe manipud kadagiti espiritu. Dadduma, a diak pay pulos naam-ammo iti naindagaan a panagbiagda, ti makaipatulod iti mensahe kadagiti sabsabali baeten kaniak.”

Ti panagaramat iti panagbuyon kas pamay-an a “makikomunikar” kadagiti anghel ket saan a karkarna. Sipapanayag nga iparparegta ti maysa a gubuayan kadagiti managbasana nga agaramatda kadagiti datdatlag a bato, baraha, I Ching coin, panangipalad, ken astrolohia. “Bay-anyo ti makin-uneg a pannakaammoyo a mangiturong kadakayo iti umiso nga orakulo,” insurat ti autor, “ken agtalekkayo a sabtennakayto sadiay ti maysa nga anghel.”

Nupay kasta, sigun iti Biblia, nga aniaman ti ‘sumabet kadakayo sadiay’ ket sigurado a saan a maysa kadagiti anghel ti Dios. Apay? Gapu ta ti panagbuyon ket direkta a maibusor iti Dios, ket saan a rumbeng a makiraman iti dayta dagiti pudno a managdaydayaw​—idiay langit ken ditoy daga. Ti panagbuyon ket maysa idi kadagiti kakaruan a basol idiay Israel! “Siasinoman a mangaramid kadagitoy isu ti makarimon ken Jehova,” kinuna ti Linteg.​—Deuteronomio 13:1-5; 18:10-12.

“Anghel ti Lawag”

Saantay koma a masdaaw a mapagparang ti Diablo ti panagbuyon kas makagunggona, nga angheliko pay ketdi. Kuna ti Biblia a “pagbalbalinen [ni Satanas] ti bagina a kasla anghel ti lawag.” (2 Corinto 11:14) Makaparnuay pay ketdi kadagiti partaan sana pagbalinen ida a pumudno, nga allilawenna dagiti makakitkita a ti signo ket naggapu iti Dios. (Idiligyo ti Mateo 7:21-23; 2 Tesalonica 2:9-12.) Ngem amin nga aramid ni Satanas​—nupay kasanot’ kasla kinasayaat wenno kinadakesda​—ti agpaay iti maysa kadagiti dua a panggep: tapno pagtallikudenna dagiti tattao ken Jehova wenno basta bulsekenna ti pampanunotda tapno ‘ti lawag ti nadayag a naimbag a damag maipapan ken Kristo saan koma nga agsilnag.’ (2 Corinto 4:3, 4) Daytoy naud-udi a pamay-an ti panangallilaw ket masansan nga isut’ kaepektibuan.

Usigenyo ti salaysay ti Biblia maipapan iti maysa nga adipen a babai idi umuna a siglo. Nagunggonaan iti adu dagiti amona gapu iti panagipadlesna. Adu nga aldaw a sinursurotna dagiti adalan, a kunkunana: “Dagitoy a lallaki ad-adipen ida ti Kangatuan a Dios, isuda a mangibumbunannag kadakayo ti dalan ti pannakaisalakan.” Pudno dagiti sinaona. Ngem, kunaen kadatayo ti salaysay nga isut’ linuganan, saan a ti anghel, no di ket ti “maysa a sairo iti panagpadles.” Idi agangay, “sinango [ni Pablo] ket kinunana iti espiritu: ‘Ibilinko kenka iti nagan ni Jesu-Kristo a rummuarka kenkuana.’ Ket rimmuar iti dayta met laeng nga oras.”​—Aramid 16:16-18.

Apay a pinaruar ni Pablo daytoy nga espiritu? Idinto ta no panunoten, nangipaay daytoy iti adu a kuarta kadagiti amo ti babai a nagunggan ti sairo. Buyogen iti datdatlag a pannakabalin, mabalin nga imbaga ti adipen a babai kadagiti mannalon no kaano ti rumbeng a panagmula, no kaano ti pannakiasawa dagiti babbalasang, ken no sadino ti pangsarakan dagiti minero iti balitok. Daytoy nga espiritu tinignayna pay ketdi ti babai nga agsao iti pudno, nga idaydayawna dagiti adalan iti imatang dagiti tao!

Nupay kasta, daytoy ket “maysa a sairo iti panagpadles.” Gapu ta sairo, awan karbenganna a mangiwaragawag iti maipapan ken Jehova ken iti probisionna agpaay iti pannakaisalakan. Ti makaay-ayo a panagsasaona, nalabit nayebkas tapno patalgedanna dagiti padto ti adipen a babai, inyadayona ti atension dagiti makaimatang manipud kadagiti pudno a pasurot ni Kristo. Buyogen iti naimbag a rason, binallaagan ni Pablo dagiti taga-Corinto: “Dikay mabalin ti makiraman iti ‘lamisaan ni Jehova’ ken iti lamisaan dagiti sairo.” (1 Corinto 10:21) Di pakasdaawan, dinadael dagiti Kristiano idi umuna a siglo amin dagiti libroda a nainaig iti panagbuyon.​—Aramid 19:19.

Maysa nga “Anghel a Tumaytayab iti Nagtangatangan”

Kas nakitatayon, adu ti ipalgak ti Biblia nga agdama nga angel movement kas sisisinged a nainaig iti Kabusor ti Dios, ni Satanas a Diablo. Kayat kadi a sawen daytoy a saan a nairaman dagiti nasantuan nga anghel kadagiti aramid ti tao? Maisupadi ketdi, mangar-aramidda ita iti naindaklan a trabaho ditoy daga. Ania dayta? Tapno masungbatan, masapul a kitaentayo ti libro ti Biblia nga Apocalipsis. Ad-adu a daras a nadakamat dagiti anghel iti daytoy a libro ngem iti aniaman a sabali pay a libro ti Biblia.

Iti Apocalipsis 14:6, 7, mabasatayo ti inlanad ni apostol Juan maipapan iti maysa a naimpadtuan a sirmata nga inawatna: “Nakitak ti sabali pay nga anghel a tumaytayab iti nagtangatangan, ket addaan iti agnanayon a naimbag a damag nga ideklarana kas naragsak a damag kadagidiay agnaed iti daga, ken iti tunggal nasion ken tribo ken pagsasao ken ili, a kunkunana iti natbag a timek: ‘Agbutengkayo iti Dios ket ipaayyo kenkuana ti dayag, agsipud ta ti oras ti panangukomna dimtengen, ket ngarud agdaydayawkayo iti Daydiay nangaramid iti langit ken iti daga ken baybay ken kadagiti ubbog ti dandanum.’”

Itampok daytoy a kasuratan ti kangrunaan a trabaho dagiti anghel itatta. Nairamanda iti nagpateg nga annongen​—ti panangipakaammo iti naimbag a damag ti Pagarian ti Dios. Iti daytoy a trabaho ti nangikarian ni Jesus kadagiti adalanna: “Addaak kadakayo iti isuamin nga al-aldaw agingga iti panungpalan ti sistema ti bambanag.” (Mateo 28:18-20) Kasano a ni Jesus ket adda kadagiti adalanna? Maysa a pamay-an isut’ panangipaayna kadakuada iti tulong dagiti anghel tapno mairingpas daytoy naindaklan unay a trabaho.

Mangbusbusbos dagiti Saksi ni Jehova iti nasurok a sangabilion nga oras iti tinawen a mangikaskasaba iti naimbag a damag ti Pagarian ti Dios. Bayat nga ar-aramidenda daytoy a trabaho, makitada ti pammaneknek iti panangiwanwan dagiti anghel. Iti ministerioda iti ruruangan, masansan a makasarakda kadagiti tattao a nabiit pay a mangikarkararag nga adda koma tumulong kadakuada a mangtarus kadagiti panggep ti Dios. Babaen ti panangiwanwan dagiti anghel, buyogen ti mismo a panagtignay dagiti Saksi, ginasut a ribu ti makagunggun-od iti pannakaammo ken Jehova iti kada tawen!

Ipangpangagyo kadi ti anghel nga agtaytayab iti nagtangatangan? No sumarungkar dagiti Saksi ni Jehova, apay a dikay makisarita iti naan-anay pay kadakuada iti daytoy a mensahe dagiti anghel?

[Footnotes]

[Kahon iti panid 8]

SIASINO DAGITI ANGHEL?

MAISUPADI iti pammati ti adu, dagiti anghel ket saan a simmina a kararua dagiti natay a tao. Nabatad a kunaen ti Biblia a dagiti natay “dida ammo ti aniaman.” (Eclesiastes 9:5) No kasta, sadino ti naggapuan dagiti anghel? Ipakita ti Biblia a pinarsua ida ti Dios sakbay ti pannakaparsua ti daga. (Job 38:4-7) Ti kadakkel ti nailangitan a pamilia ti Dios ket mabalin a ginasut a milion, nalabit binilion wenno ad-adu pay! Nakiraman dagiti dadduma nga anghel iti iyaalsa ni Satanas.​—Daniel 7:10; Apocalipsis 5:11; 12:7-9.

Yantangay ni Jehova ket Dios ti urnos, di pagsiddaawan nga organisado ti dakkel nga angheliko a pamiliana.​—1 Corinto 14:33.

• Ti kangrunaan nga anghel, agpadpada iti pannakabalin ken autoridad, ket ti arkanghel, ni Jesu-Kristo, a maawagan met iti Miguel. (1 Tesalonica 4:16; Judas 9) Adda iti sidong ti autoridadna dagiti serapin, kerubin, ken anghel.

• Dagiti serapin ket agserserbida iti trono ti Dios. Nabatad a ti annongenda ramanenna ti panangipakaammo iti kinasanto ti Dios ken panamagtalinaed iti ilina a nadalus.​—Isaias 6:1-3, 6, 7.

• Makita met dagiti kerubin iti ayan ni Jehova. Kas paraawit wenno mangbaybayabay iti trono ti Dios, itandudoda ti kinadayag ni Jehova.​—Salmo 80:1; 99:1; Ezequiel 10:1, 2.

• Dagiti anghel (kayatna a sawen “mensahero”) ket ahente ken babaonen ni Jehova. Ipatpatungpalda ti pagayatan ti Dios, panangisalakan man iti ili ti Dios wenno ti panangdadael kadagiti nadangkes.​—Genesis 19:1-26.

[Dagiti Ladawan iti panid 7]

Ipangpangagyo kadi ti anghel nga agtaytayab iti nagtangatangan?