“Ania ti Rebbengko nga Aramiden Tapno Maisalakanak?”
“ANIA ti rebbengko nga aramiden tapno maisalakanak?” Daytoy ti naisaludsoden idi tawen 50 K.P. babaen iti maysa a manangaywan ti pagbaludan idiay Filipos, Macedonia. Naadda ti napigsa a ginggined, ket ti ruruangan ti pagbaludan nga ay-aywananna nalukatanda amin. Iti panangipatona a nakatalawen dagiti balud, ti agbambantay ti pagbaludan ngangnganinan a papatayen ti bagina. Ngem maysa kadagiti balud, nga isu ni apostol Pablo, nagikkis iti napigsa: “Dika ranggasan ta bagim, ta addakam amin ditoy!”—Aramid 16:25-30.
Ni Pablo ken ti padana a balud, a ni Silas, immayda idiay Filipos a mangikaskasaba ti mensahe ti pannakaisalakan, ket naibaludda gaput’ ulbod a pammabasol kontra kadakuada. Gaput’ yamanna a di nagtalaw dagidi balud, kayat a mangngegan ti agbambantay ti pagbaludan ti mensahe ni Pablo ken ni Silas. Aniat’ masapul nga aramidenna tapno tagiragsakenna ti pannakaisalakan nga inkaskasaba dagitoy dua a Kristiano a misionero?
Kaskasdi a kasapulan dagiti tattao itatta ti pannakaisalakan nga inkaskasaba da Pablo ken Silas. Ngem, makapaladingit ta, adut’ mangmatmatmat iti banag maipapan ti pannakaisalakan a buyogen ti panagil-ilem. Masimronanda gaput’ kinatangsit ken kinaagum ti adu kadagita a relihionista nga agkunkuna a mangisursuro kadakuada no kasanot’ pannakaisalakanda. Dadduma masairda manipud iti di nainkalintegan nga emosionalismo a mangiladladawan kadagiti nagadu nga ebanghelikal a relihion a mangipagpaganetget ti idea ti pannakaisalakan. Ti mannurat nga Ingles a ni Philip Howard ti nagkuna a dagita a makunkuna a manag-ebanghelio “pumpuntiriaenda dagiti emosion ken dagiti agpirpirma ti tseke nga im-ima imbes a ti is-isip dagiti agdengdengngeg kadakuada.”—Idiligyo ti 2 Pedro 2:2.
Kaskasdi dadduma makellaatda pay kadagiti panagbalbaliw a no maminsan mapaspasamak kadagiti tattao a patienda a napasarandan ti “pannakaisalakan.” Iti libroda nga Snapping, insalaysay da Flo Conway ken Jim Siegelman dagiti adu a narelihiusuan a kapadasan—agraman ti “pannakaisalakanda”—a nagbalin nga uson kadagiti napalabas a sumagmamano a dekada. Nagsuratda maipapan “ti nalidem a paset” dagita a kapkapadasan ket kunada a dagiti tattao ti “napitik” iti dagdagus a panagbalbaliw ti personalidad a napaay a nangted ti naikari a kaitungpalan ken pannakalawlawag ngem imbes ketdi namataud ti pannakaallilaw, naserraan nga is-isip, ken ti saan a pannakasango iti kinapudno. Innayon dagiti autor: “Mailadawanmi dayta nga aramid kas maysa a panangserra iti isip, ti saan-a-panagpampanunot.”
Saan a kastoy ti kaso idi napasaran dagiti Kristiano idi umuna a siglo ti pannakaisalakan. Ti agbambantay ti pagbaludan a taga Filipos saanna a ‘sinerraan ti isipna’ idi sinungbatan ni apostol Pablo ti saludsodna, “Ania ti rebbengko nga aramiden tapno maisalakanak?” Ket saan a nangaramid ni Pablo ken Silas ti ‘panangpuntiria kadagiti emosionna’ ken dimmawat iti dakkel a pinansial a tulong. Imbes ketdi, “insalaysayda ti sao ni Jehova kenkuana.” Babaen iti pannakirinnason iti tao, isut’ natulonganda a nakagteng iti nalawag a pannakaawat kadagiti sagana ti Dios maipaay ti pannakaisalakan.—Aramid 16:32.
“Mamatika ken Apo Jesus”
Linuktan dagidiay a Kristiano a misionero ti isip ti agbambantay ti pagbaludan iti maysa a pamunganayan a kinapudno maipapan iti pannakaisalakan. Dayta met laeng a kinapudno ti inlawlawag ni apostol Pablo idi umuna a naipasdek ti kongregasion Kristiano. Intudo ni Pedro ti kangrunaan nga akem ni Jesu-Kristo maipapan ti pannakaisalakan, nga isut’ inawaganna kas “ti Kangrunaan nga Ahente ti biag.” Kinuna met laeng dayta nga apostol: “Ket awan sabali a pakaisalakanan uray siasino, ta awan ti sabali a nagan iti babaen ti langit a naited kadagiti tattao a pakabalinantayo a maisalakan.” (Aramid 3:15; 4:12) Inturong ni Pablo ken Silas ti agbambantay ti pagbaludan a taga Filipos iti daytoy met laeng nga Ahente ti pannakaisalakan idi a kinunada: “Mamatika ken Apo Jesus ket maisalakankanto.”—Aramid 16:31.
Ngem, aniat’ kayat a sawen, ti panamati ken Apo Jesus? Apay nga awan sabalin a nagan no di laeng ti nagan ni Jesus a mabalin a pakaisalakanantayo? Inton agangay tunggal maysa aya magun-odannanto ti pannakaisalakan? Namati aya dagiti apostol iti idea nga “apaman a naisalakankan, naisalakanka nga agnanayonen”? Nasken a salsaludsod dagitoy ta, agpapan pay ti sasao ken ar-aramid ti adu kadagiti moderno a relihionista ket ipabpababada dayta a termino, kaskasdi a kasapulantayo ti pannakaisalakan. Amintayo kasapulantay ti makapnek, nainkalintegan a sungbat iti saludsod nga: “Ania ti rebbengko nga aramiden tapno maisalakanak?”