PANAWEN, PAMPANAWEN

Ti panawen ket maysa a periodo a panangaramid iti maysa a kita ti trabaho mainaig iti panagtalon wenno periodo ti maysa a kita ti paniempo; maysa a tiempo a mayanatup wenno naituding a panangaramid iti maysa a banag.

Mapataud ti siklo ti pampanawen dagiti paniempo gapu ta nakalikig ti axis ti daga iti pagrikusanna bayat ti pananglikmutna iti init. Dagiti nailangitan a banag ti mangtantanda iti panaglabas ti tiempo, isu nga agserserbida kas pagilasinan iti pampanawen. (Ge 1:14) Kunaen ti Genesis 8:22 a ti pampanawen ti daga “saanto a pulos agsarday.” No kasano a nainaig ti bulbulan ti Judio ken Gregorian a kalendario iti pipiesta, paniempo, ken pampanawen ti panagtalon, kitaenyo ti KALENDARIO.

Nainaig unay iti pampanawen ti panagtalon dagiti tinawen a “panawen ti piesta” nga isu ti tiempo a panangrambakda kadagiti piesta nga impasdek ti Mosaiko a Linteg. (1Cr 23:31; 2Cr 31:3) Gapuna, idi binalakadan ni Pablo ti sumagmamano a Judio a Kristiano a ‘siaannad a mangngilngilin iti al-aldaw ken bulbulan ken pampanawen,’ tuktukoyenna dagiti panawen ti piesta a paset ti Linteg, saan laeng a ti paniempo wenno ti pampanawen ti panagtalon.​—Ga 4:10.

Ngarud ti “panawen” mabalin a tumukoy iti maysa a naikeddeng wenno naituding a tiempo wenno iti maysa a periodo nga addaan kadagiti naisangsangayan nga aspeto. (Ara 3:19, Rbi8 ftn; Ro 8:18; Ga 6:9) Idi agangay nagbalin a nalawag unayen kadagiti Kristiano no ania ti saklawen ti makapasalun-at a sursuro ken umiso a kababalin. Gapuna, “panawen” dayta ti panagbalin a siririing. (Ro 13:11-14) Dagiti “tiempo wenno pampanawen,” wenno periodo a pannakaaramid ti pagayatan ni Jehova mainaig iti sumagmamano a banag, ket pudno a pakaseknan dagiti managdaydayawna (Ara 1:7), a nakatarus kadagita bayat a maipalpalgakda.​—1Te 5:1.

No maipapan iti panagnaed dagiti nasion ditoy daga, “inkeddeng [ti Dios] dagiti naituding a tiempo” (Ara 17:26; “impasdekna dagiti panawen ti pakasaritaanda,” NE) babaen ti panangikeddengna no kaano a mapasamak dagiti panagbalbaliw, kas koma iti tiempo nga intuding ti Dios a pannakaparut dagiti Canaanita nga agnanaed iti Naikari a Daga.​—Ge 15:13-21; Jer 25:8-11; Da 2:21; 7:12; kitaenyo ti NAITUDING A PAMPANAWEN DAGITI NASION.