“Iwaragawagyo Daytoy iti Tengnga Dagiti Nasion”

1. Apay a mayarig iti ngernger ti leon ti panagsao ni Jehova iti mammadtona?

NAKANGNGEGKA kadin iti ngernger ti leon? Naikuna a napigpigsa ti ngerngerna ngem iti ungor ti jackhammer. Ania ti aramidem no iti naulimek a rabii makangngegka iti ngumerngernger a leon nga adda laeng iti asideg? Nalabit agtignayka a dagus. Ni Amos, a maysa kadagiti 12 a mammadto a nangisurat kadagiti libro nga us-usigentayo, inaramatna daytoy a pangyaspingan: “Adda leon a nagngernger! Siasinonto ti di agbuteng? Ti met laeng Soberano nga Apo Jehova nagsao! Siasinonto ti di agipadto?” (Amos 3:3-8) No nangngegmo a nagsao a mismo ni Jehova, agtignayka met kadi a kas ken Amos? Nagtignay a dagus ni Amos babaen ti panagipadtona maibusor iti nasion ti Israel a buklen ti sangapulo a tribu.

2. (a) Kasano a matuladmo ni Amos iti panangitungpal iti annongen nga agipadto? (b) Ania ti usigentayo iti daytoy a kapitulo?

² ‘Ngem saanak a mammadto!’ nalabit kunam. Mabalin nga iti panagriknam saanka a maikari agsipud ta saanka a nasanay kas mammadto. Ngem laglagipem ni Amos. Idi kinompronta ni Amazias, ti padi nga agdaydayaw iti sinan-urbon a baka, kinuna ni Amos: “Saanak a mammadto, wenno uray anak ti mammadto; no di ket maysaak a pumapastor ken agkedkeddel kadagiti higos ti kaykayo a sikomoro.” (Amos 7:14) Nupay nanumo ti nagtaudanna, situtulok nga intungpal ni Amos ti annongenna kas mammadto ni Jehova. Sika ngay? Mabigbigmo kadi nga addaanka iti annongen nga iti sumagmamano a pamay-an ket umasping iti annongen dagiti 12 a mammadto? Pagrebbengam nga ipakaammo ti mensahe ti Dios para iti kaaldawantayo. Malaksid iti dayta, nasken a mangisuro ken mangaramidka kadagiti adalan. Kasano ti panangmatmatmo iti dayta a serioso nga annongen? Ania ti mensahe nga iwaragawagmo kadagiti nasion? Kasano kaan-anay ti panangitungpalmo iti dayta nga annongen? Ania ti pangibatayan no naballigi met laeng ti trabahom? Usigentayo dagiti sungbat.

‘DAGITI URBON A TORO DAGITI BIBIGMO’

3. Kasano a nairamanka iti trabaho nga umasping iti trabaho dagiti mammadto a dagiti sinuratda ket ad-adalentayo?

³ Talaga kadi a nairamanka iti trabaho a kas iti trabaho dagiti mammadto? Mabalin a saanka a nakangngeg iti leon a nagngernger, kayatna a sawen, saan a direkta a pinaltiingannaka ni Jehova. Nupay kasta, nangngegmo iti Saona, ti Biblia, ti naganat a mensahe maipapan iti umad-adani nga aldaw ni Jehova. Kas nadakamat iti Kapitulo 1 daytoy a libro, saan a maymaysa ti kaipapanan dagiti sao a “mammadto” ken “naimpadtuan.” Nupay saanka a maysa a mammadto a kas kada Amos wenno dadduma pay a nagkauna a mammadto, mabalinmo latta ti agsao maipapan iti masanguanan. Kasano? Mabalinmo nga ipakaammo dagiti naimpadtuan a mensahe a naadalmo kadagiti binulong ti Nasantuan a Kasuratan, a pakairamanan dagiti libro nga insurat dagiti 12 a mammadto. Itan ti tiempo a panangaramid iti dayta.

4. Kasano a matungtungpal ita ti padto iti Joel 2:28-32?

⁴ Usigem dayta a banag iti sabali a punto de bista. Ni Jehova a Dios impakaammona ken ni Joel ti maipapan iti panawen nga amin a kita ti tattao agipadtoda, no ar-arigen: “Kalpasanna mapasamakto nga iparukpokko ti espirituk iti tunggal kita ti lasag, ket ti annakyo a lallaki ken ti annakyo a babbai sigurado nga agipadtodanto. No maipapan kadagiti lallakay kadakayo, agtagtagainepdanto kadagiti tagtagainep. No maipapan kadagiti agtutuboyo a lallaki, makakitadanto kadagiti sirmata.” (Joel 2:28-32) Iti aldaw ti Pentecostes idi 33 K.P., inyaplikar ni apostol Pedro dayta a padto iti pannakaiparukpok ti nasantuan nga espiritu kadagidiay naguummong iti makinngato a siled idiay Jerusalem ken iti panangikasabada kalpasanna “iti natan-ok a bambanag ti Dios.” (Aramid 1:12-14; 2:1-4, 11, 14-21) Usigem ita ti panawentayo. Matungtungpalen ti padto ni Joel manipud pay idi rugrugi ti maika-20 a siglo. Dagiti Kristiano a napulotan iti espiritu​—babbai ken lallaki, lallakay ken agtutubo​—inrugida ti ‘agipadto,’ kayatna a sawen, ipakpakaammoda ‘ti natan-ok a bambanag ti Dios,’ a pakairamanan ti naimbag a damag maipapan iti Pagarian, a naipasdeken idiay langit.

5. (a) Ania a pribilehio ti adda kadatayo amin? (b) Ania ti kaipapanan ti panangidaton ‘kadagiti urbon a toro dagiti bibigmo’ ken apay a maysa a pribilehio daytoy?

⁵ Nupay saanda a napulotan iti espiritu kas annak ti Dios, “maysa a dakkel a bunggoy” ti “sabsabali a karnero” ti agkunkuna kadagiti napulotan a pasurot ni Jesu-Kristo: “Kumuyogkaminto kadakayo, ta nangngegmi a ti Dios adda kadakayo.” (Apocalipsis 7:9; Juan 10:16; Zacarias 8:23) Biag nga agnanayon man idiay langit wenno ditoy daga ti namnamam, addaanka iti pribilehio a mangidaton ‘kadagiti urbon a toro dagiti bibigmo.’ (Oseas 14:2) Ania ti kaipapanan dagita a sasao iti padto ni Oseas? “Dagiti urbon a toro . . . ti kasayaatan nga animal a maidaton kas pagyaman,” kuna ti eskolar ti Biblia a ni C. F. Keil. Adda iti panunot ni apostol Pablo ti Oseas 14:2 idi insuratna: “Kankanayon koma nga idatontayo iti Dios ti sakripisio ti panagdaydayaw, kayatna a sawen, ti bunga dagiti bibig a mangaramid iti publiko a panangideklara iti naganna.” (Hebreo 13:15) Wen, ti sasao a ‘dagiti urbon a toro dagiti bibigtayo’ tuktukoyenna ti kasayaatan a maidaton dagiti bibigtayo, dagiti sasao a rummuar iti ngiwattayo a pakaidayawan ni Jehova.

6. Apay a nasken a sukimatentayo ti kalidad dagiti datontayo a pagdaydayaw?

⁶ Agidatdatonka ken ni Jehova kadagiti sakripisio ti panagdaydayaw no agkararagka a naimpusuan kenkuana, no idaydayawmo babaen kadagiti komentom kadagiti Nakristianuan a gimong, ken no sigagagar a kasabaam dagiti sabsabali. Ngem mabalin nga isaludsod ti tunggal maysa kadatayo, ‘No makiramramanak kadagita nga aktibidad, ania ti kalidad ti datonko?’ Manipud kadagiti naadalmon, awan duadua a dimo ayonan dagiti papadi idi kaaldawan ni Malakias nga awanan panagraem a nangidaton kadagiti adda depektona nga animal iti altar ti Dios. Babaen ken Malakias, impaganetget ni Jehova kadakuada ti nababa a kalidad dagiti datonda, ta impagarupda a saanda nga um-umsien ti lamisaan ni Jehova. (Malakias 1:8) Nasken ngarud a sukimatentayo ti kalidad dagiti datontayo tapno masiguradotayo a kasayaatan ken awan depekto dagitoy.

TI MENSAHE NGA IWARAGAWAGTAYO

7. Nasken ti kinatured iti panangiwaragawag iti ania nga aspeto ti nagkadua a mensahetayo?

⁷ Nasken ti kinatured iti panangidaton ‘kadagiti urbon a toro dagiti bibigtayo’ iti ministerio, saan kadi? Wen, ta dua ti aspeto ti mensahe nga ipakpakaammotayo kadagiti tattao, ket sigurado a saanda a magustuan ti maysa kadagita. Ni propeta Joel kinunana iti ili ti Dios: “Iwaragawagyo daytoy iti tengnga dagiti nasion, ‘Mangsantipikarkayo iti gubat! Gutugotenyo dagiti mannakabalin a lallaki! Umasidegda koma! Sumang-atda koma, amin dagiti lallaki ti gubat!’” (Joel 3:9) No maipapan iti kaitungpalanna iti kaaldawantayo, pudno a maysa dayta a karit kadagiti nasion! Maysa dayta a mensahe maipapan iti nalinteg a gubat ni Jehova maibusor kadagiti tattao nga awanan panagraem iti Dios. Binilin ni Jehova dagiti tattaona a “pitpitenda dagiti kampilanda a pagbalinen a subsob ti arado ken dagiti pikada a pagbalinen a pangarbas a getgetteng,” ngem kinunana kadagiti kabusor a nasion a ‘pitpitenda dagiti subsob ti aradoda a pagbalinen a kamkampilan ken dagiti pangarbas a gettengda a pagbalinen a gaygayang.’ (Mikias 4:3; Joel 3:10) Wen, masapul nga agsagana dagiti kabusor ti Dios a makigubat iti Namarsua iti uniberso. Saan a makaliwliwa dayta a mensahe nga iwarwaragawagtayo.

8. Apay a mayarig iti leon “dagidiay nabatbati ken Jacob”?

⁸ Iti mensahe ni propeta Mikias, mayarig iti leon dagidiay agidatdaton ‘kadagiti urbon a toro dagiti bibigda.’ Insuratna: “Dagidiay nabatbati ken Jacob agbalindanto kadagiti nasion . . . a kasla leon kadagiti animal ti bakir, kasla burboran a bumaro a leon kadagiti pangen ti karnero, nga, inton lumasat, sigurado nga agpadpada a mangipayatpayat ken mangrangrangkay; ket awan ti manangispal.” (Mikias 5:8) Apay a maitutop daytoy a pangyaspingan? Iti kaaldawantayo, dagiti adipen ti Dios, nga idadauluan dagiti napulotan a natda, masapul a naturedda a kas iti leon a mangpakdaar kadagiti nasion.a

9. (a) Kaano a nasken nga agbalinka a natured a kas iti leon? (b) Kasano a maaddaanka iti tured no busoren wenno iyaleng-alengdaka?

⁹ Naturedka kadi a kas iti leon no mangpakpakdaarka? Mabalin a kasapulam ti kasta a tured saan laeng a no maisaklangka kadagiti agtuturay no di pay ket no makisaritaka kadagiti kaeskuelaam wenno kadagiti katrabahuam wenno kadagiti di manamati a kakabagiam. (Mikias 7:5-7; Mateo 10:17-21) Kasano a makaurnongka iti tured no busoren wenno iyaleng-alengdaka? Imdengam no kasano a naitungpal ni Mikias ti narigat nga annongen a mangipakdaar iti pannakadadael ti Samaria ken Jerusalem: “Siak napnoak iti bileg, babaen ti espiritu ni Jehova, ken iti kinahustisia ken kinamannakabalin, tapno ibaga ken Jacob ti iyaalsana ken iti Israel ti basolna.” (Mikias 1:1, 6; 3:8) ‘Mapnoka met iti bileg’ agsipud ta mabalinmo met ti agkiddaw iti naruay nga espiritu ti Dios a mangpabileg kenka. (Zacarias 4:6) No agpannurayka iti Dios babaen ti kararag, kabaelam a sawen dagiti balikas a nalabit manggagatel kadagiti lapayag.​—2 Ar-ari 21:10-15.

10. Kasano a matuladtayo ni Sofonias iti panangiwaragawag iti mensahe maipapan iti “aldaw ni Jehova”?

¹⁰ Kayatmo ti agbalin a natured, ngem nasken met a naannad ti panangpakdaarmo kadagiti tattao. Uray no maipapan iti umad-adani nga “aldaw ni Jehova” ti mensahe nga iwarwaragawagtayo, nasken nga agbalintayo a “naalumamay [wenno, “nataktika”] kadagiti isuamin.” (2 Timoteo 2:24; footnote iti Reference Bible; Joel 2:1, 11; Sofonias 1:14) Uray iti daytoy a banag, adda maadaltayo kadagiti 12 a mammadto. Situtured nga impakaammoda dagiti pangukom a mensahe a naggapu ken ni Jehova, ngem inkabilanganda ti rikna dagidiay nangipangag. Kas pagarigan, agkakadagsen dagiti balikas nga insawang ni propeta Sofonias kadagiti natangken ti panagpuspusona a prinsipe (wenno, natan-ok a tattao) idi kaaldawanna, ngem saanna nga inraman a binabalaw ni matalek nga Ari Josias. (Sofonias 1:8) Iti panangiwaragawagtayo iti pammakdaar a mensahe, matulongantayo kadi dagiti tattao babaen ti panangibilangtayo kadakuada kas karnero, a saan ket a negatibo ti panangmatmattayo kadakuada?​—Mateo 25:32-34.

11. (a) Ania ti maikadua nga aspeto ti nagkadua a mensahe nga iwarwaragawagtayo? (b) No maipapan iti panangiwaragawag iti aldaw ni Jehova, kasano a matuladmo dagiti 12 a mammadto?

¹¹ Ania ti sabali pay nga aspeto ti mensahe nga iwarwaragawagtayo? Naitampok dayta nga aspeto iti Mikias kapitulo 5. “Dagidiay nabatbati ken Jacob agbalindanto a kasla linnaaw manipud ken Jehova iti tengnga ti adu nga ili, kasla naruay nga arbis iti rabaw ti mulmula, a saan a manginanama iti tao wenno aguray iti annak ti naindagaan a tao.” (Mikias 4:1; 5:7) Gapu iti naimbag a damag nga idandanonda ita kadagiti “adu nga ili,” dagiti “nabatbati” iti naespirituan a Jacob, wenno Israel, ken dagiti kakaduada kasda la makapabang-ar a “linnaaw manipud ken Jehova” ken “naruay nga arbis iti rabaw ti mulmula.” Adu ti maadaltayo kadagiti maudi a 12 a libro ti Hebreo a Kasuratan maipapan iti daytoy maikadua nga aspeto ti mensahetayo, ta saan laeng a pannakadadael no di pay ket pannakaisubli ti impakaammo dagidi a mammadto. Iti ministeriom, ipagpaganetgetmo kadi ti positibo nga aspeto ti mensahe maipapan iti aldaw ni Jehova?

KASANO TI PANANGIPAKAAMMOM ITI DAYTOY A MENSAHE?

12, 13. (a) Ania ti kaipapanan ti pannakailadawan dagiti adipen ti Dios kas pinangen nga insekto? (b) Ania ti makunam maipapan iti nabasam iti Joel 2:7, 8?

¹² No kasta, kasano ti panangipakaammom iti daytoy nagkadua a mensahe? Ni propeta Joel inyarigna ti trabaho ti ili ti Dios iti agdadarundon nga idadarup dagiti insekto, a pakairamanan dagiti dudon. (Joel 1:4) Ngem apay a maikunatayo a kadagiti amin a banag, mayarig dagiti adipen ni Jehova iti pinangen nga insekto? Gapu ta kas mabasatayo iti Joel 2:11, kinuna ti Dios a dagitoy nga insekto isuda ti “puersa militarna.” (Iti libro nga Apocalipsis, nailadawan met dagiti adipen ti Dios kas dudon. Kitaem ti Apocalipsis 9:3, 4.) Nayarig iti manglamut nga apuy ti trabaho dagiti insekto nga inladawan ni Joel, ket nagbalin a “maysa a let-ang a langalang” ti kasla “minuyongan ti Eden” a dinalapusda. (Joel 2:2, 3) Kasanom a maipakita a sipapanunotka iti kaipapanan ti padto ni Joel?

¹³ Panunotem no kasano kaan-anay ti idadarup dagitoy a babassit a parsua. Kastoy ti kuna ni Joel: “Agtarayda a kas kadagiti mannakabalin a lallaki. Kumalay-atda iti pader a kas kadagiti lallaki ti gubat. Ket mapanda tunggal maysa iti bukodna a daldalan, ket saanda a baliwan dagiti danada. Ket saanda nga agdidinnupir. Kas iti nabaneg a lalaki iti turongenna, agtultuloyda a mapan; ket no adda mapasag iti mismo a nagtetengngaan dagiti pika, ti dadduma saanda a sumina iti turongen.” (Joel 2:7, 8) Awan ti “pader” ti ibubusor a makalapped kadakuada ken iti didigra nga iyegda. “No adda mapasag iti mismo a nagtetengngaan dagiti pika,” kas iti napasamak kadagiti nasungdo a Kristiano a pinapatay dagiti naranggas a kabusor, ituloy dagiti dadduma ti trabaho, nga iringpasda ti mision nga inted kadakuada ni Jehova. Determinadoka kadi nga agtultuloy a mangiwaragawag iti aldaw ni Jehova agingga nga ikeddeng ti Dios a nairingpasen dayta? Mabalin nga ituloymo pay ketdi ti trabaho nga inrugi dagiti dadduma a matalek a Kristiano a naturogen ken patay.

14. Kasano a makatulongka iti naan-anay a pannakaibanag ti trabaho a panangasaba?

¹⁴ Maipapan iti kinanaan-anay ti kangrunaan a punto daytoy a padto. Kasano a makatulongka iti naan-anay a pannakaibanag ti trabaho a panangasaba a nailadawan iti padto ni Joel? Babaen ti panagbalaybalay ken panagsarungkar tapno suruam dagidiay nangipakita iti interes. Subliam met dagidiay awan iti pagtaenganda iti damo nga isasarungkarmo. Iti kasta ipakpakitam a maawatam ti kaipapanan daytoy a padto. Ket no kasabaam dagiti tattao iti lansangan, mabalin a masarakam dagidiay nalabit saanmo a madanon kadagiti pagtaenganda. Adtoy ti maysa pay a pamay-an: Mabalin a matulongam dagiti tattao iti lugaryo a taga sabali a pagilian.b Alertoka kadi kadagita a gundaway, a naan-anay a makiramramanka iti trabaho a panangasaba iti kaaldawantayo?

ANIA TI PANGIBATAYAN ITI BALLIGIM?

15. Ania ti reaksion dagiti umili iti mensahe dagiti 12 a mammadto?

¹⁵ Ania ti reaksion dagiti tattao iti mensahe maipapan iti nakabutbuteng nga aldaw ni Jehova? Di rumbeng a masdaawka no busoren wenno iyaleng-alengdaka. Napasaran dayta ti adu kadagiti mammadto ti Dios, a kaaduan kadakuada ti nangipakaammo iti agkakadagsen a pammakdaar a mensahe. (Jeremias 1:17-19; 7:27; 29:19) Nupay kasta, nasayaat ti resulta ti panangikagumaan ti dadduma kadagiti mammadto! Nabalinan ti lima kadakuada​—da Jonas, Mikias, Sofonias, Haggeo, ken Zacarias​—a tinignay ti puso ti dadduma kadagiti umili nga agbabawi kadagiti napalabas a basolda ken mangbalbaliw iti kabibiagda.

16. Ania ti resulta ti trabaho ni Mikias kas mammadto?

¹⁶ Mabalin a ti trabaho ni Sofonias kas mammadto ti nangtignay ken ni Ari Josias a mangisubli iti nasin-aw a panagdayaw. Situtured nga impakaammo ni Mikias ti pangukom a mensahe maibusor kadagiti panguluen ti Juda, ket nagtignay ni Ari Ezekias a mayannurot iti sasao ni Mikias. (Mikias 3:1-3) Makapainteres ta dagiti dadduma a panglakayen idi kaaldawan ni Jeremias tinukoyda ti inaramid ni Ezekias kas nasayaat nga ulidan idi kinunada a ti ari “nagbuteng ken Jehova ket pinaluknengna ti rupa ni Jehova.” (Jeremias 26:18, 19; 2 Ar-ari 18:1-4) Iti panangidaulo ni Ezekias, dagiti umili ti Juda ken dagiti natulok manipud iti makin-amianan a pagarian rinambakanda ti Paskua ken ti Piesta ti Awan Lebadurana a Tinapay, ket intuloyda a rinambakan ti piesta iti maysa pay a lawas. Ania ti resulta ti panagsublida iti pudno a panagdayaw? “Naadda ti dakkel a panagrag-o idiay Jerusalem.” (2 Cronicas 30:23-26) Inrugi nga inwaragawag ni Mikias ti mensahe ti Dios maibusor iti apostata a nasion nga inturayan ni Ari Acaz. Ngem nakita ti mammadto ti nasayaat a resulta ti trabahona idi nangipangag ni Ezekias nga anak ni Acaz.

17. Ania ti naibanag da Haggeo ken Zacarias?

¹⁷ Utobem met ti maipapan kada propeta Haggeo ken Zacarias. Nagserbida kas mammadto kadagiti nagsubli a Judio, a nagbalin nga aleng-aleng ken agimbubukod. (Haggeo 1:1, 2; Zacarias 1:1-3) Idi inrugi da Haggeo ken Zacarias ti agipadto, 16 a tawenen ti napalabas manipud idi naisaad ti pundasion ti templo. Dagiti umili ‘agtartarayda, tunggal maysa maigapu iti bukodna a balay’ idinto ta “rebbek” ti balay ni Jehova. Indagadag ni Haggeo kadagiti Judio: “‘Pumigsakayo, dakayo amin nga umili iti daga,’ kuna ni Jehova ti buybuyot, ‘ket agtrabahokayo.’” Ania ti napasamak? Ni Jehova ‘ginutugotna ti espiritu’ ni Gobernador Zorobabel, ni Josue a Nangato a Padi, ken dagiti “amin a nabatbati kadagiti umili.” Nagbanaganna, nairingpasda ti templo.​—Haggeo 1:9, 12, 14; 2:4.

18, 19. (a) Iti dadduma a pagilian, ania ti reaksion dagiti tattao a makangkangngeg iti mensahe maipapan iti aldaw ni Jehova? (b) Kasano a maitungpalmo ti rebbengem a mangiwaragawag iti pammakdaar a mensahe kadagiti amin a tattao?

¹⁸ Ti nasion a dati a dedikado ken ni Jehova ti nakaiturongan ti mensahe ti kaaduan kadagiti 12 a mammadto. Mabalin a mangaskasabatayo kadagiti tattao nga awan pay a pulos ti ammoda maipapan iti pudno a Dios, ngem adda latta maadaltayo iti resulta ti trabaho dagiti mammadto. Iti adu a teritoria, adda met ita dagiti mangipangpangag iti naganetget a mensahe maipapan iti aldaw ni Jehova. Makitkitatayo dagiti resulta kas kadagidiay impadto ni Zacarias: “Adu a nasion ti sigurado a maikapponto ken Jehova iti dayta nga aldaw, ket pudno nga agbalindanto nga ilik; ket agtaengakto iti tengngam.” (Zacarias 2:11) Iti agdama, literal nga adda dagiti tattao iti “adu a nasion” a mangipangpangag iti mensahe nga iwarwaragawag dagiti adipen ti Dios. (Apocalipsis 7:9) Impadto ni Zacarias: “Adu nga ili ken nabileg a nasnasion pudno nga umaydanto sapulen ni Jehova ti buybuyot idiay Jerusalem ken paluknengenda ti rupa ni Jehova.” Nailadawanda kas “sangapulo a lallaki manipud kadagiti amin a pagsasao ti nasnasion” a kumkumpet iti pingir ti kawes ti naespirituan nga Israelita, a kunkunada: “Kumuyogkaminto kadakayo, ta nangngegmi a ti Dios adda kadakayo.”​—Zacarias 8:20-23.

¹⁹ Imutektekam ti pannakadakamat ti “amin a pagsasao ti nasnasion.” Maipatpatarus ti Biblia ken dagiti literatura a naibatay iti Biblia iti adu a pagsasao. Mangsansanay dagiti Saksi ni Jehova kadagiti ministro a mangisuro kadagiti tattao iti “amin a pagsasao ti nasnasion.” (Mateo 28:19, 20; Aramid 1:8) Mabalin a nagadalka iti sabali a pagsasao tapno matulongam dagiti tattao iti lugaryo a kasta ti pagsasaoda. Ket adu dagiti nagsursuro iti maysa wenno dua a sabali a pagsasao ken immakar kadagiti pagilian a sadiay adu ti magagaran a dumngeg iti naimbag a damag. Ipalubos kadi ti kasasaadmo nga umakarka kadagiti kasta a nabunga a teritoria tapno ‘ipakaammom daytoy kadagiti nasion’? Usigem dayta buyogen ti kararag. No adda pamiliam, masansan koma a pagsasaritaanyo a sangapamiliaan no mabalinyo ti umakar. Iparegtam dayta a kalat kadagiti annakmo bayat a dumakdakkelda.

20. Mainaig kadagiti taga-Nineve, ania a kababalin ti impaganetget ni Jehova?

²⁰ Ni Jonas ti maysa pay a mammadto a nangpakdaar kadagiti tattao a nangipangag, nupay impagarupna a saanda nga ikankano ti mensahena. Dagiti umili ti Nineve, agraman ti ari a mismo, impangagda ti mensahe ni Jonas ken namatida ken ni Jehova. Insaludsod ti Dios a mismo: “Saanak kadi a rumbeng a maasian iti Nineve a dakkel a siudad, nga iti dayta adda nasurok a sangagasut ket duapulo a ribu a tattao a saan a pulos makaammo iti nagdumaan ti makannawanda ken ti makannigidda?” (Jonas 4:11) Amirisem dagita a sasao ket utobem no ania ti mangtigtignay kenka a mangipakaammo kadagiti sabsabali iti nakabutbuteng nga aldaw ni Jehova. Mariknam kadi ti utang a naimbag a nakem ken ni Jehova gapu iti panangisalakanna kenka babaen ti subbot? Mariknam kadi ti rebbengem kas dedikado nga adipen ni Jehova? (1 Corinto 9:16, 17) Nainkalintegan dagitoy a rason tapno ipakaammom ti maipapan iti aldaw ni Jehova. Ngem malaksid iti dayta, ‘maasianka’ kadi kadagiti tattao a pakpakaammuam maipapan iti aldaw ni Jehova? Pagragsakam ti makisarita kadagiti tattao maipapan iti dayta nga aldaw no nadiosan nga asi ti mangtigtignay kenka!

21. Ania ti maadalmo iti kababalin ni Amos nupay pinangtaan ni Amazias?

²¹ Bassit ti ammotayo maipapan iti reaksion dagiti tattao a nakangngeg iti mensahe da Joel, Abdias, Nahum, Habakuk, ken Malakias. Ammotayo ti inaramid ti maysa a tao a nakasarita ni Amos. Ni Amazias sidudursok a binusorna ni Amos, nga inakusaranna ti mammadto a nakikumplot maibusor iti ari ken pinadasna a paritan ni Amos a mangasaba idiay Bethel. (Amos 7:10-13) Saan a nagbuteng ni Amos iti kasta nga ibubusor. Iti kaaldawantayo, mabalin a padasen met dagiti klero nga impluensiaan dagiti dadduma nga agtuturay a mangidadanes kadagiti adipen ni Jehova wenno mangiparit pay ketdi iti makagunggona a trabahoda a panangasaba. Tuladem kadi ni Amos babaen ti situtured a panangiwaragawagmo iti naimbag a damag iti baet ti ibubusor?

22. Apay a maikunam a naballigi ti ministeriom iti teritoriayo?

²² Nupay nagduduma ti reaksion dagiti tattao a nakangngeg iti mensahe dagiti 12 a mammadto, intungpal dagitoy a mammadto ti annongenda. Saan a ti reaksion dagiti tattao iti nagkadua a mensahetayo ti napateg no di ket ti panangidatontayo ‘kadagiti urbon a toro dagiti bibigtayo’ ken Jehova, ti kasayaatan a ‘sakripisio ti panagdaydayawtayo.’ (Oseas 14:2; Hebreo 13:15) Ket ipabiangtayo iti Dios ti resulta dagiti bambanag. Isu ti mangguyugoy kadagidiay pudpudno a marakarnero a tattao. (Juan 6:44) Maysa pay, makapagballigika kas manangiwaragawag iti mensahe ti Dios aniaman a kababalin ti ipakita dagiti tattao. Mainanamam nga iti imatang dagidiay mangipangag iti naimbag a damag, naimnas “ti saksaka daydiay mangip-ipan iti naimbag a damag, daydiay mangipabpablaak iti talna.” Ngem kangrunaan iti amin, naimnas dagita kadagiti mata ni Jehova. (Nahum 1:15; Isaias 52:7) Yantangay nakaas-asidegen ti naindaklan nga aldaw ni Jehova, determinadoka koma nga agtultuloy a mangtungpal iti impadto ni Joel para iti panawentayo: “Iwaragawagyo daytoy iti tengnga dagiti nasion, ‘Mangsantipikarkayo iti gubat! Gutugotenyo dagiti mannakabalin a lallaki!’” Kaipapanan dayta ti gubat ti Dios maibusor kadagiti nasion.​—Joel 3:9.