BERNICE

[nagtaud iti sao a kaipapananna ti “mangparmek”].

Anak a babai ni Herodes Agripa I iti asawana a ni Cypros; nayanak idi agarup 28 K.P.; kabsat da Mariamne III, Drusila, ken Herodes Agripa II. (Kitaenyo ti HERODES Num. 4.) Ni Bernice ken ni Agripa a kabsatna sinarungkaranda ni Gobernador Festo idiay Cesarea idi 58 K.P., a sadiay inawis ida ni Festo, ket ‘immayda buyogen ti naranga unay a pabuya ket simrekda iti siled a pagdengngegan agraman dagiti komandante ti militar kasta met dagiti natan-ok a lallaki iti siudad.’ Idin naiyeg ti balud a ni Pablo ken napalubosan a mangidatag iti nabileg ken nalaing a depensana iti sanguanan amin dagitoy a dignitario.​—Ara 25:13, 23; 26:1-30.

Iti nakaub-ubing nga edadna, nayasawa ken Marcus, anak ni Alejandro Lysimachus. Kalpasan ti ipapatay ni Marcus, nakiasawa iti ulitegna a ni Herodes, ari ti Chalcis. Babaen ken Herodes isu naaddaan iti dua nga annak a lallaki sakbay a natay ni Herodes idi 48 K.P. Kalpasanna, nakikabbalay iti kabsatna a lalaki agingga a nagsaknap dagiti damag a dayta ket insesto a relasion. Idi agangay, nakiasawa ken Polemo nga ari ti Cilicia kalpasan nga immanamong nga agpakomberte iti Judaismo. Nupay kasta, di nagbayag simmina kenkuana ni Bernice ket nakikabbalay manen ken Agripa a kabsatna. Bayat idi daytoy a tiempo nga isu simmarungkar idiay Cesarea a kaduana ni Agripa.

Idi 65 K.P. inrisgo ni Bernice ti biagna tapno ikanawana dagiti Judio maibusor ken Florus, a manggutgutugot iti panagibukbok iti dara ken mangparparnuay iti riribuk idiay Jerusalem. Idi agangay, isu ken ti kabsatna, kas iti adu a sabsabali pay nga indibidual, nagsapatada a suportaranda ti Romano nga emperador a ni Vespasian. Ni Tito nga anak ti emperador intugotna pay ketdi ni Bernice idiay Roma tapno agbalin nga asawana, nupay bakbaket ngem isu iti sangapulo a tawen. Nupay kasta, ginuped ni Tito dayta a relasion agsipud ta nagprotesta dagiti Romano nga umili gapu iti posibilidad a maaddaanda iti Judio a reyna.