Inaramidda ti Pagayatan ni Jehova

Nangasaba ni Pedro idi Pentecostes

MAYSA a natalinaay nga agsapa ti primavera idi tawen 33 K.P. Anian a nagragsak nga aglawlaw! Umarimbangaw a bunggoy dagiti Judio ken proselita ti nagdudupudop kadagiti lansangan ti Jerusalem. Naggapuda kadagiti lugar a kas ti Elam, Mesopotamia, Cappadocia, Egipto, ken Roma. Anian a makaparagsak ti pannakakita kadakuada iti katutubo a kawesda ken pannakangngeg iti nadumaduma a pagsasaoda! Dadduma ti nagdaliasat iti agarup dua ribu a kilometro tapno tumabuno iti daytoy naisangsangayan nga okasion. Ania daytoy? Ti Pentecostes​—maysa a naragsak a piesta dagiti Judio a mangtanda iti panagngudo ti panagapit iti sebada.​—Levitico 23:15-21.

Nagpangato ti asuk manipud kadagiti daton iti altar ti templo, ket kinanta dagiti Levita ti Hallel (Salmo 113 agingga iti 118). Sakbay la unay ti alas 9:00 t.b., adda makapakigtot a napasamak. Manipud langit, naadda ti “maysa nga ungor a kaasping ti maysa a dumardaruros a napigsa a puyupoy.” Pinunnona ti intero a balay a sadiay naguummong ti ag-120 nga adalan ni Jesu-Kristo. Kuna ti salaysay iti Kasuratan: “Dagiti dildila a kasla iti apuy nagparangda kadakuada ket naibunongda, ket maysa ti nagdisso iti tunggal maysa kadakuada, ket napnoda amin iti nasantuan nga espiritu ket rinugianda ti agsao iti nagduduma a pagsasao, kas iti impalubos kadakuada ti espiritu a sawenda.”​—Aramid 2:1-4.

Tunggal Maysa Nangngegna ti Pagsasaona

Di nagbayag, adu nga adalan ti nagdardaras a rimmuar iti balay. Nakaskasdaaw, makapagsaoda iti nadumaduma a pagsasao ti bunggoy! Iladawanyo ti pannakakellaat idi a ti bisita manipud Persia ken ti katutubo ti Egipto nangngegda dagiti taga-Galilea nga agsasao iti pagsasaoda. Nabatad, nasdaaw unay ti bunggoy. “Ania ti ipasimudaag daytoy a banag?” insaludsodda. Rinugian ti dadduma a rinabrabak dagiti adalan, a kunkunada: “Napnoda iti nasam-it nga arak.”​—Aramid 2:12, 13.

Simmaganad nagtakder ni apostol Pedro ket nakisarita iti bunggoy. Inlawlawagna a daytoy namilagruan a sagut iti dildila ket kaitungpalan ti kari ti Dios babaen ken mammadto Joel: “Iparukpokkonto ti paset ti espirituk iti tunggal kita ti lasag.” (Aramid 2:14-21; Joel 2:28-32) Wen, kaiparparukpok laeng ti Dios ti nasantuan nga espirituna kadagiti adalan ni Jesus. Daytoy ket nalawag a pammaneknek a napagungaren ni Jesus manipud kadagiti natay ket adda itan idiay langit iti makannawan nga ima ti Dios. “Gapuna,” kinuna ni Pedro, “ti intero a balay ti Israel ammuenna koma nga awan duadua a ti Dios pinagbalinna nga agpadpada nga Apo ken Kristo, daytoy Jesus nga inlansayo.”​—Aramid 2:22-36.

Kasanot’ panagtignay dagiti managdengngeg? “Nasugat dagiti pusoda,” kuna ti salaysay, “ket kinunada ken Pedro ken iti dadduma kadagiti apostol: ‘Lallaki, kakabsat, ania ti aramidenmi?’” Insungbat ni Pedro: “Agbabawikayo, ket ti tunggal maysa kadakayo mabautisaran koma.” Agarup 3,000 ti nangaramid iti dayta! Manipud idi, “intultuloyda nga impamaysa ti bagbagida iti sursuro dagiti apostol.”​—Aramid 2:37-42.

Babaen ti panangidaulona iti daytoy naisangsangayan nga okasion, inaramat ni Pedro ti umuna kadagiti “tulbek ti pagarian ti langlangit” nga inkari ni Jesus nga itedna kenkuana. (Mateo 16:19) Dagitoy a tulbek linuktanda dagiti naisangsangayan a pribilehio iti nagduduma a grupo dagiti tattao. Daytoy umuna a tulbek nagbalin a posible para kadagiti Judio nga agbalin a napulotan iti espiritu a Kristiano. Di nagbayag, ti maikadua ken maikatlo a tulbek ti nanglukat iti umasping a gundaway kadagiti Samaritano ken kalpasanna kadagiti Gentil.​—Aramid 8:14-17; 10:44-48.

Dagiti Maadaltayo

Nupay nairaman daytoy bunggoy dagiti Judio ken proselita iti responsabilidad ti komunidad gapu iti ipapatay ti Anak ti Dios, siraraem a nagsarita ni Pedro kadakuada, nga inawaganna ida iti “kakabsat.” (Aramid 2:29) Ti kalatna ket tapno matignayna ida nga agbabawi, saan a tapno kondenarenna ida. Gapuna, positibo ti wagasna. Indatagna dagiti kinapudno sa sinuportaranna dagiti puntona babaen ti panagadaw iti Kasuratan.

Dagidiay mangikaskasaba iti naimbag a damag ita nasayaat a surotenda ti ulidan ni Pedro. Rumbeng nga ikagumaanda ti mangipasdek iti agpadpada a paginteresanda ken dagiti managdengngegda sa kalpasanna sitataktika a makirinnasonda kadakuada manipud iti Kasuratan. No maidatag ti kinapudno iti Biblia iti positibo a pamay-an, agtignay dagiti nasingpet-panagpuspusona a tattao.​—Aramid 13:48.

Naidumduma ti kinaregta ken kinatured ni Pedro idi aldaw ti Pentecostes no maidilig iti panangilibakna ken Jesus agarup pito a lawas sakbayna. Idi daydi a gundaway napasardeng ni Pedro gapu iti buteng iti tao. (Mateo 26:69-75) Ngem immararaw ni Jesus maigapu ken Pedro. (Lucas 22:31, 32) Di pagduaduaan, ti panagparang ni Jesus ken ni Pedro kalpasan ti panagungarna isut’ nangpabileg iti apostol. (1 Corinto 15:5) Kas resultana, saan a kimmapuy ti pammati ni Pedro. Iti apagbiit a tiempo, situtured a nangasaba. Gapuna, kalpasanna, nangasaba saan laeng nga idi Pentecostes no di pay ket agingga iti nabatbati a paset ti biagna.

Kasano no nagbasoltayo iti sumagmamano a pamay-an, kas ken Pedro? Ipakitatay ti panagbabawi, agkararag maipaay iti pammakawan, ken agtignay a gumun-od iti naespirituan a tulong. (Santiago 5:14-16) Iti kasta rumang-aytayo buyogen ti panagtalek a ti sagrado a panagserbitayo ket makaay-ayo iti manangngaasi a nailangitan nga Amatayo, ni Jehova.​—Exodo 34:6.