ADRUMETO

Maysa a sangladan a siudad iti Baybay Aegeano, a masarakan idiay Misia iti makin-amianan a laud a nagsulian ti Asia Menor, iti amianan ti Pergamo. Iti agdama a Turkia (Turkey), ti sigud a nagan ti nagkauna a siudad ket nataginayon iti ili ti Edremit (iti daya ti puerto).

Ti Adrumeto ket paset ti probinsia ti Asia nga iturturayan ti Roma ken nabatad a nagbalin idi a napateg a sentro ti komersio iti baybay agsipud ta nagsaad iti dalan ti Roma a lumasat iti Pergamo ken Efeso nga agturong iti abagatan ken iti Assos, Troas, ken iti Hellespont iti laud ken amianan. Mabalin a limmasat ni Pablo iti Adrumeto iti maikatlo a panagdaliasatna kas misionero. Nupay kasta, ti kakaisuna a direkta a pannakatukoy ti disso iti Biblia ket iti Aramid 27:2. Idiay Cesarea, ni Pablo, kas maysa a balud nga adda iti aywan ti Romano nga opisial a ni Julio, limmugan iti barko a naggapu idiay Adrumeto nga aglaylayag iti nadumaduma a lugar iti kosta ti Asia Menor. Ni Pablo ken ti kakaduana dimsaagda iti barko idiay Mira iti Licia, ket immallatiwda iti maysa a barangay ti bukbukel a naggapu idiay Alejandria nga aglaylayag nga agturong idiay Italia.​—Ara 27:3-6.