AUGUSTO, BUNGGOY NI

Idi naibaon ni apostol Pablo idiay Roma kas resulta ti panagapelarna ken Cesar, isu naikabil iti aywan ti maysa nga opisial ti buyot (senturion) iti “bunggoy ni Augusto” a managan Julio. (Ara 27:1) Naaramid idiay Cesarea ti pannakayallatiw ni Pablo ken ti dadduma pay a balud iti aywan ti opisial ti buyot.​—Ara 25:13; 26:30–27:1.

Saan a posible ti apag-isu a panangipatuldo no ania ti matuktukoy a “bunggoy ni Augusto” a naggapuan ni Julio. Yantangay ti sao nga “Augusto” ditoy ti pakaipatarusan ti Griego a sao a Se·ba·steʹ, ti sumagmamano inkagumaanda nga inaig daytoy a bunggoy iti Samaria, nga iti daydi a tiempo naawagan Sebaste, ket ngarud kunaenda a daytoy ket bunggoy dagiti soldado a naggapu kadagiti Samaritano a kabbaro a naala maipaay iti buyot. Dakamaten ni Josephus ti “maysa a tropa dagiti nakakabalio a pagaammo kas ‘Sebasteniano.’” (The Jewish War, II, 236 [xii, 5]) Nupay kasta, agparang nga awan ti nawadwad a pangibatayan iti kasta a pannakasangal daytoy a termino nga inaramat ti mannurat ti Aramid.

Ti sabali pay a panangmatmat ket ti bunggoy ni Augusto tumukoy iti frumentarii, maysa a naisangsangayan a grupo dagiti opisial ti imperio a nangbukel iti maysa a kita ti departamento dagiti agitultulod nga agak-akem kas mananginaig iti nagbaetan ti emperador ken dagiti puersa militar kadagiti probinsia; naikuna met a dagiti kameng dayta a bunggoy isuda ti nadutokan nga agitulod kadagiti balud. Uray kaskasano, daytoy a panangmatmat patalgedan ti patarus ti King James Version iti Aramid 28:16, a nangitipon iti maysa a mapagduaduaan a paset a mangibagbaga a “ti senturion inyawatna dagiti balud iti kapitan dagiti guardia.” Dagidiay mangitantandudo iti daytoy a panangmatmat ipapanda a daytoy a “kapitan dagiti guardia” isu ti panguluen ti frumentarii. Nupay kasta, daytoy a sasao saan nga agparang iti kaaduan a moderno a patarus daytoy a bersikulo.

Ti Revised Standard Version awaganna daytoy a bunggoy iti “Benneg ni Augusto,” kas iti panangawag ti adu a sabsabali pay a patarus. Ti Griego a sao nga speiʹra (bunggoy), no mausar mainaig iti militaria, gagangay nga intakderanna ti Romano a manipulus, maysa a benneg ti buyot a katupag ti dua a “senturia.” Nupay kasta, ti termino nausar met maipaay iti dakdakkel a bunggoy ti lallaki ket, kas pannakausarna iti Griego a Kasuratan, patien a mangirepresentar iti Romano a “cohort” (ti apagkasangapulo ti maysa a lehion, nga addaan iti agarup 400 agingga iti agarup 600 a lallaki). Mainayon kadagiti gagangay a lehion ti Roma a buklen dagiti makipagili iti Roma ken nabingbingay kadagiti cohort, adda met dagiti segunda-klase a tropa wenno auxilia, buklen dagiti benneg dagiti soldado a naala kadagiti iturayan ti Roma (saan a makipagili). Dagitoy ket agbukbukod a benneg dagiti magmagna a soldado ken kaaduanna a nagserbida kadagiti lindoras ti imperio. Nupay dagiti cohort iti las-ud dagiti gagangay a lehion ti Roma saanda a naipaayan iti naisalsalumina a nagnagan, masansan a nainaganan dagitoy a katulongan a benneg dagiti soldado. Adda dagiti nasarakan a kitikit a pakabasaan iti Cohors I Augusta (Lat.) ken Speiʹra Au·gouʹste (Gr.), nupay saanna a kayat a sawen a nainaig dagita iti bunggoy a maus-usig ditoy.