No Ania ti Ibanag ti Iyaay ni Kristo

“MAKAPAALIGAGET A KINARANGGAS IDIAY SÃO PAULO.” Kasta ti panangdeskribir ti magasin a Veja iti uppat nga aldaw ti Mayo 2006, idi napasamak ti organisado a krimen a “namaglusdoy” iti kadakkelan ken kabaknangan a siudad ti Brazil. Natay ti agarup 150 a pannakabagi ti linteg, kriminal, ken sibilian bayat ti “nasurok a 100 nga oras a kinaranggas.”

Iti dandani amin a paset ti lubong, kinaranggas ti kangrunaan a madamdamag. Kasla saan a kabaelan dagiti agtuturay a tattao a lapdan dayta. Pumegpeggad ti lubong a pagbibiagantayo. Nalabit a maupaykayo gapu ta nagadu ti dakes a damag iti sadinoman. Ngem asidegen ti tiempo a panagbalbaliw.

Insuro ni Jesus kadagiti pasurotna nga ikararagda ti iyaay ti Pagarian ti Dios ken ti pannakaaramid ti pagayatan ti Dios, “kas sadi langit, kasta met iti daga.” (Mateo 6:9, 10) Daytoy a Pagarian ket maysa a gobierno a ni Kristo Jesus ti dinutokan ti Dios nga agturay kas Ari. Daytanto ti mangrisut iti amin a parikut ti sangatauan. Ngem tapno maibanag ti Pagarian ti Dios dagiti panagbalbaliw ditoy daga, masapul a maikkat ti turay ti tattao ket maisukat ti turay ni Kristo. Dayta ti masinunuo nga ibanag ti iyaay ni Kristo.

Natalna a Panagbalbaliw?

Sitatallugod ngata nga agpasakup dagiti nasion iti turay ni Kristo? Adda nasirmata ni apostol Juan a mangsungbat iti dayta. Insalaysay ni Juan: “Nakitak ti atap nga animal [ti napolitikaan a sistema ti lubong] ken ti ar-ari ti daga ken dagiti buyotda a naurnong a sangsangkamaysa tapno makigubatda iti daydiay [ni Jesus] sisasakay iti kabalio ken agraman ti buyotna.” (Apocalipsis 19:19) Iti dayta a gubat, ania ti mapasamak kadagiti ar-ari ti daga? Ti Ari a dinutokan ni Jehova “rumeken[na] ida babaen iti setro a landok, buraken[na] ida a kasla maysa a basehas ti agdamdamili,” kuna ti Biblia. (Salmo 2:9) Naan-anay a marumekto ti napolitikaan a sistema. Ti Pagarian ti Dios “rumekennanto ken pagpatinggaenna amin dagitoy a pagarian [ti tattao], ket dayta agtalinaedto agingga kadagiti tiempo a di nakedngan.”​—Daniel 2:44.

Ania met ngay ti mapasamak kadagiti tattao a bumusor iti Pagarian ti Dios? “Iti pannakaipanayag ni Apo Jesus manipud langit a kadua dagiti mannakabalin nga anghelna iti dumardarang nga apuy,” nailadawan ni Jesus kas daydiay ‘mangiyeg iti pammales kadagidiay saan a makaammo iti Dios ken kadagidiay saan nga agtulnog iti naimbag a damag.’ (2 Tesalonica 1:7, 8) “No maipapan kadagiti nadangkes,” kuna ti Proverbio 2:22, “magessatdanto iti mismo a daga; ket no maipapan kadagiti nagulib, maalat-atdanto iti dayta.”

No maipapan iti iyaay ni Kristo, kuna ti Biblia: “Adtoy! Isu um-umay a buyogen dagiti ulep, ket isu makitanto ti tunggal mata.” (Apocalipsis 1:7) Dagiti tattao saanda a literal a makita ni Kristo. Sipud panagsublina idiay langit, ni Jesus ket maysan nga espiritu a persona “nga agnanaed iti di maasitgan a lawag, nga awan maysa kadagiti tattao ti nakakita wenno mabalin a makakita kenkuana.”​—1 Timoteo 6:16.

Saan a masapul nga agparang ni Jesus kas tao tapno “makita” dagiti agindeg ditoy daga, no kasano a saan met idi a nasken nga agparang ni Jehova idi inyegna ti Sangapulo a Saplit kadagiti Egipcio idi kaaldawan ni Moises. Dagiti tattao iti daydi a tiempo dida nagduaduaan a ni Jehova ti nangyeg kadagidi a saplit, ket napilitanda a mangbigbig iti pannakabalinna. (Exodo 12:31) Iti umasping a pamay-an, inton agtignay ni Kristo kas Manangikisap a dinutokan ti Dios, mapilitan dagiti nadangkes a ‘mangkita,’ wenno mangamiris, a ni Jesus ti us-usaren ti Dios a mangukom kadakuada. Ammodanto dayta agsipud ta nasaksakbay a napakdaaran ti sangatauan. Kinapudnona, ni Jesus ket “makitanto ti tunggal mata, . . . ket amin dagiti tribu iti daga saplitendanto ti bagbagida iti ladingit gapu kenkuana.”​—Apocalipsis 1:7.

Kasapulan a matalipupos dagiti nadangkes ken maikkat ti nadangkes a turay tapno maisubli ditoy daga ti pudno a talna ken kinarang-ay. Dayta ti ibanag ni Kristo. Kalpasanna, naan-anay nga iwanwanna dagiti ar-aramid ditoy daga, a sarunuen dagiti dadakkel a panagbalbaliw.

Pannakaisubli a Mangyeg Kadagiti Pagimbagan

Ni apostol Pedro sinaritana ti maipapan iti “pannakaisubli ti amin a bambanag a sinao ti Dios babaen ti ngiwat dagiti nasantuan a mammadtona idi un-unana a tiempo.” (Aramid 3:21) Daytoy a pannakaisubli iramanna ti panagbalbaliw a maaramid ditoy daga bayat ti panagturay ni Kristo. Idi maikawalo a siglo K.K.P., maysa kadagiti propeta nga inusar ti Dios a mangipakaammo iti “pannakaisubli ti amin a bambanag” ditoy daga ket ni propeta Isaias. Impakpakaunana a maisublinto ti talna ditoy daga babaen ken Kristo, ti “Prinsipe ti Talna.” Mainaig iti turay ni Kristo, impadto ni Isaias: “Ti kinaruay ti naprinsipean a panagturay ken ti kappia awanto ti ngudona.” (Isaias 9:6, 7) Isuronto ni Jesus dagiti tattao tapno agbiagda a sitatalna. Dagidiay agnanaed ditoy daga “pudno a maragsakandanto iti napalalo iti kinaruay ti talna.”​—Salmo 37:11.

Iti panagturay ni Kristo, anianto ti mapasamak iti kinapanglaw ken panagbisin? Kinuna ni Isaias: “Ni Jehova ti buybuyot pudno unay nga iyaramidannanto dagiti amin nga ili, iti daytoy a bantay, iti maysa a bangkete dagiti nataba unay a putahe, maysa a bangkete ti arak a napagtalinaed kadagiti ared-ed, dagiti nataba unay a putahe a napno iti pata, iti arak a napagtalinaed kadagiti ared-ed, a nasagat.” (Isaias 25:6) Inkanta ti salmista: “Maaddanto ti naruay a bukbukel iti daga; iti tapaw dagiti bantay addanto ti panaglaplapusanan.” (Salmo 72:16) Kanayonanna, mainaig kadagiti agtaengto ditoy daga, mabasatayo: “Mangbangondanto iti balbalay ket agnaedda; ket pudno unay nga agmuladanto kadagiti kaubasan ket kanenda ti bungada. Saandanto a mangbangon ket sabali ti agnaed; saandanto nga agmula ket sabali ti mangan. Ta kas iti al-aldaw ti maysa a kayo kastanto ti al-aldaw ti ilik; ket ti aramid dagiti bukodda nga ima usarento a naan-anay dagidiay pinilik.”​—Isaias 65:21, 22.

Impakpakauna met ni Isaias ti panagpatingganto ti sakit ken ipapatay. Nagsao ti Dios babaen ken ni Isaias, a kunkunana: “Iti dayta a tiempo maluktanto ti matmata dagidiay bulsek, ket maluktanto ti mismo a laplapayag dagidiay tuleng. Iti dayta a tiempo kumalay-atto daydiay pilay a kas iti panagkalay-at ti kalakian nga ugsa, ket ti dila daydiay umel umkisto gapu iti ragsak.” (Isaias 35:5, 6) Sa “awanto ti agtataeng nga agkuna: ‘Masakitak.’” (Isaias 33:24) Ti Dios “pudno nga alimonennanto ni patay iti agnanayon, ket ti Soberano nga Apo Jehova sigurado a punasennanto ti lulua iti amin a rupa.”​—Isaias 25:8.

Anianto met ti mapasamak iti amin a natay nga adda “kadagiti pakalaglagipan a tanem”? (Juan 5:28, 29) Impadto ni Isaias: “Dagidiay minataymo agbiagdanto. . . . Bumangondanto.” (Isaias 26:19) Wen, mapagungarto dagidiay matmaturog ken patay!

“Ti Dios Isu ti Tronom iti Agnanayon”

Ti iyaay ni Kristo ket agbanag iti naan-anay a pannakapabaro ti planeta a Daga. Ti daga ket agbalin a nagpintas a paraiso, ken agkaykaysanto ti sangatauan nga agdayaw iti pudno a Dios. Masiguradotayo kadi nga agballigi ni Jesu-Kristo a mangikkat iti kinadakes ditoy daga ken mangyeg kadagiti nasayaat a kasasaad?

Utobem ti gubuayan ti pannakabalin ken autoridad ni Jesus. Kastoy ti kuna ti Biblia idi tinukoyna ti Anak: “Ti Dios isu ti tronom iti agnanayon ken awan inggana, ket ti setro ti pagariam isu ti setro ti kinapalungdo. Inayatmo ti kinalinteg, ket ginuram ti kinakillo.” (Hebreo 1:8, 9) Ni Jehova ti nagtaudan ti trono ni Jesus, kayatna a sawen, ti autoridadna. Ti Dios ti Namunganay ken Nangted iti dayta a trono. Awanto ngarud dagiti parikut a nagrigat para ken Jesus a risuten.

Kalpasan ti panagungarna, kinuna ni Jesus kadagiti adalanna: “Isuamin nga autoridad naiteden kaniak idiay langit ken ditoy daga.” (Mateo 28:18) “Dagiti anghel ken dagiti autoridad ken dagiti pannakabalin naipasakupda kenkuana,” kuna ti 1 Pedro 3:22. Awan ti pannakabalin wenno autoridad nga agballigi maibusor ken Jesus. Awan ti makalapped kenkuana a mangyeg iti manayon a pagimbagan iti sangatauan.

No Kasano a ti Iyaay ni Kristo Apektaranna Dagiti Tattao

Iti suratna kadagiti taga-Tesalonica, kinuna ni apostol Pablo: “Di agressat a laglagipenmi ti matalek nga aramidyo ken ti naayat a panagbannogyo ken ti panagibturyo gapu iti namnamayo ken Apotayo a Jesu-Kristo iti sanguanan ti Dios ken Amatayo.” (1 Tesalonica 1:3) Kinuna ni Pablo a ti panagibtur ken nabunga a panagbannog ket maigapu iti panangnamnama ken Jesu-Kristo. Dayta a panangnamnama iramanna ti pammati iti iyaay ni Kristo ken iti ibanagna a pannakaisubli. Ti kasta a namnama mapabileg, wenno matulonganna nga agibtur dagiti pudno a Kristiano, uray iti sidong dagiti nakarigrigat a kasasaad.

Usigenyo, kas pagarigan, ti kapadasan ni Carlos nga agnanaed idiay São Paulo, Brazil. Idi Agosto 2003, naammuanna nga adda kanserna. Sipud idin, nagsagaba iti ut-ot ken panagkapuy kas resulta ti walo a daras a pannakaoperana. Kaskasdi, intultuloyna ti nagbalin a gubuayan ti pammaregta. Kas pagarigan, bayat ti panagebangheliona iti kalsada iti sango ti maysa a dakkel nga ospital, naam-ammona ti maysa a padana a Saksi ni Jehova, a ti asawana ket maipaspasidong iti chemotherapy. Gapu ta ammona dagiti makadidigra nga epekto ti kanser, naparegta ken naliwliwa ni Carlos dagitoy nga agassawa. Kalpasan dayta, kinuna ti agassawa a ti pannakipatangda kenkuana ket maysa a gubuayan ti pammaregta. Napasaran ngarud ni Carlos ti kinapudno dagitoy a sasao ni Pablo: “[Ti Dios] a mangliwliwa kadakami iti amin a rigatmi, tapno mabalinanmi a liwliwaen dagidiay adda iti aniaman a kita ti rigat babaen ti liwliwa a pinangliwliwa kadakami ti Dios.”​—2 Corinto 1:4.

Ania ti mangpabpabileg ken ni Carlos tapno maitultuloyna ti mangparegta iti laksid ti sakitna? Ti panangnamnamana iti iyaay ni Kristo ken ti amin nga ibanag dayta ti mangtigtignay ken ni Carlos tapno agtultuloy nga “agaramid iti nasayaat.”​—Galacia 6:9.

Panunotenyo met ti kasasaad ni Samuel, a ti adingna a lalaki ket napapatay iti lugar a 50 metro laeng ti kaadayona manipud iti balay ni tatangda. Sangapulo a bala ti timmama ken ni adingna. Walo nga oras a nagtalinaed ti bangkay iti bangketa bayat ti panagimbestigar dagiti polis. Saan a malipatan ni Samuel ti napasamak iti dayta nga aldaw. Nupay kasta, nagtultuloy a nangnamnama a naan-anayto nga ikkaten ni Kristo ti amin a kinadakes ditoy daga ket kalpasanna mabendisionanto ti sangatauan babaen ti nalinteg a turay. Masansan a darepdepen ni Samuel nga ar-arakupenna ti napagungar nga adingna iti Paraiso a daga.​—Aramid 24:15.

Ania ti Masapul nga Aramidem?

Maliwliwaka iti kasta unay no agtalekka iti iyaay ni Kristo ken iti ibanag dayta. Sigurado nga iramutan ni Jesu-Kristo dagiti amin a parikut ti tao ken kinadakes a mangparparigat kadatayo.

Ania ngay ti masapul nga aramidem tapno masagrapmo dagiti bendision nga iburay ti turay ni Kristo iti sangatauan? Sipapasnek nga adalem ti Biblia a Sao ti Dios. Idi nagkararag ken Amana, kinuna ni Jesus: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) Aramidem a kalat a sukimaten dagiti isursuro ti Biblia. Dagiti Saksi ni Jehova iti lugarmo maragsakanda a tumulong kenka a mangaramid iti dayta. Sibabara nga awisendaka a makiuman kadakuada wenno agsuratka iti mangipabpablaak iti daytoy a magasin.

[Dagiti Ladawan iti panid 7]

Ti iyaay ni Kristo ket agbanag iti naan-anay a pannakapabaro ti daga

[Credit Line]

Naikabassit a ladawan, makinlikud laeng: Rhino and Lion Park, Gauteng, South Africa