Asidegen ‘Dagiti Tiempo ti Pannakaisubli’!
Sakbay la unay a nagpalangit ni Jesus, inyimtuod kenkuana ti dadduma kadagiti matalek nga adalanna: “Apo, isublim kadi ti pagarian ti Israel iti daytoy a tiempo?” Imparipirip ti sungbat ni Jesus nga adda pay tiempo a lumabas sakbay nga umay ti Pagarian. Kabayatan dayta a tiempo, adda dakkel a trabahuen dagiti pasurotna. Saksianda ni Jesus “agpadpada idiay Jerusalem ken iti intero a Judea ken Samaria ken agingga iti kaadaywan a paset ti daga.”—Aramid 1:6-8.
SAAN a mairingpas dayta nga annongen iti sumagmamano laeng nga aldaw, lawas, wenno bulan. Nupay kasta, nangasaba a dagus dagiti adalan. Ngem saan a napukaw ti interesda maipapan iti pannakaisubli. Maipapan iti dayta, kastoy ti kinuna ni apostol Pedro iti dakkel a tallaong idiay Jerusalem: “Agbabawikayo . . . ket agbaw-ingkayo tapno mapunas dagiti basolyo, tapno dagiti panawen ti pannakabang-ar umayda manipud iti persona ni Jehova ken tapno ibaonna koma ti Kristo a naituding maipaay kadakayo, ni Jesus, nga iti kinapudnona, masapul nga ikutan a mismo ti langit agingga kadagiti tiempo ti pannakaisubli dagiti amin a bambanag a sinao ti Dios babaen ti ngiwat dagiti nasantuan a mammadtona idi un-unana a tiempo.”—Aramid 3:19-21.
Dagita a “tiempo ti pannakaisubli” ti mangiruangan ‘kadagiti panawen ti pannakabang-ar’ nga aggapu ken Jehova. Matungpal ti naipadto a pannakaisubli iti dua a wagas. Umuna, addanto ti makapabang-ar a naespirituan a pannakaisubli, a mapaspasamak itan. Maikadua, sarunuento dayta ti pannakaipasdek ti literal a paraiso ditoy daga.
Mangrugin ti Panawen ti Pannakaisubli
Kas impatuldo ni apostol Pedro iti umariwekwek a tattao idiay Jerusalem, ‘inikutan a mismo [ti langit] ni Jesus.’ Kasta ti kasasaad agingga idi 1914, idi innala ni Jesus ti naarian a pannakabalinna ket nagturay a kas Ari a dinutokan ti Dios. Iti daydi a tiempo, impadto ni Pedro nga ‘ibaon’ ni Jehova ti Anakna iti anag nga ipalubosna nga agakem ni Jesus kas ti kapatgan a persona mainaig kadagiti panggep ti Dios. Dineskribir ti Biblia dayta a pasamak iti simboliko a sasao: “Ket impasngay [ti nailangitan nga organisasion ti Dios] ti maysa nga anak, maysa a lalaki, [ti Pagarian ti Dios iti sidong ni Jesu-Kristo] a mangipastorto iti isuamin a nasion babaen ti maysa a sarukod a landok.”—Apocalipsis 12:5.
Ngem saan a kayat dagiti nasion ti agpasakup iti turay ni Kristo. Kinapudnona, binabalawda dagiti nasungdo nga iturayan ni Kristo ditoy daga, a pagaammo ita kas dagiti Saksi ni Jehova. Kas kadagiti apostol nga immun-una kadakuada, di nagtaktak dagiti Saksi a nangitungpal “iti trabaho a panangsaksi ken Jesus.” (Apocalipsis 12:17) Nabusbusor ti trabaho dagitoy napasnek a Kristiano iti nadumaduma a pagilian. Idi 1918, naisaklang dagiti responsable a kameng ti hedkuarter ti Watch Tower Society idiay Brooklyn, New York, gapu kadagiti ulbod a pammabasol ket di nainkalintegan a nasentensiaanda a maibalud iti naunday a panawen. Agparang idi a ti moderno-aldaw a trabaho a panangsaksi “agingga iti kaadaywan a paset ti daga” ket mapaay.—Apocalipsis 11:7-10.
Ngem idi 1919, nawayawayaan dagiti naibalud a kameng ti hedkuarter ken kalpasanna naabsueltoda kadagiti amin nga ulbod a pammabasol. Dagdagus nga intuloyda ti trabaho agpaay iti naespirituan a pannakaisubli. Sipud idin, tagtagiragsaken ti ili ni Jehova ti awan kapadana a naespirituan a kinarang-ay.
Naisayangkat ti maysa a nasaknap a kampania a mangisuro iti amin a tattao tapno tungpalenda dagiti imbilin ni Kristo nga aramiden dagiti pasurotna. (Mateo 28:20) Anian a makapabang-ar a makita ti panagbalbaliw ti dadduma a tattao a dati a nangiparangarang iti inaanimal a kababalin! Inuksobda ti daan a personalidad, a mangpatpataud kadagiti kababalin a kas iti “unget,” “nabassawang a panagsasao,” ken “naalas a sasao,” ket inkawesda ti baro a personalidad, “a babaen ti umiso a pannakaammo mapabpabaro maitunos iti ladawan ti [Dios a] namarsua iti dayta.” Iti naespirituan nga anag, matungtungpal uray itan dagiti sasao ni propeta Isaias: “Ti lobo [ti tao a dati a nangiparangarang kadagiti arig lobo a kababalin] makipagnaedto iti kordero [ti tao a naemma], ket ti leopardo makikaiddanto iti urbon a kalding; ket ti urbon ti baka ken ti urbon ti leon ken ti napalukmeg agkakaiddadanto.”—Colosas 3:8-10; Isaias 11:6, 9.
Asidegen ti Sabali pay a Pannakaisubli!
Malaksid iti pannakaisubli a nagresulta iti naespirituan a paraiso ita, napartak ti iyaadani ti tiempo inton agbalin a literal a paraiso ti planetatayo a daga. Maysa idi a paraiso ti bassit a deppaar ti daga idi inkabil ni Jehova iti minuyongan ti Eden dagiti kapuonantayo, da Adan ken Eva. (Genesis 1:29-31) Isu a maikunatayo a maisubli ti Paraiso. Ngem sakbay a mapasamak dayta, masapul a maikkat pay ditoy daga ti palso a relihion a mangibabain iti Dios. Ti napolitikaan nga elemento daytoy a lubong ti mangibanagto iti dayta. (Apocalipsis 17:15-18) Kalpasanna, madadaelto dagiti napolitikaan ken komersial nga elemento, agraman dagiti mangsupsuporta kadagita. Kamaudiananna, maipupokto ti maudi kadagiti kabusor ti Dios—ni Satanas a Diablo ken dagiti demoniona—iti uneg ti sangaribu a tawen—ti kapaut ti trabaho a panangisubli. Iti dayta a tiempo, “ti let-ang ken ti namaga a daga naragsakdanto; ket ti tay-ak a langalang agragrag-onto, ken agsabongto a kas iti rosa.” (Isaias 35:1) Awanto ti mangsinga iti intero a daga. (Isaias 14:7) Mapagungarto ditoy daga uray dagiti minilion a natay. Mapasaranto ti amin dagiti mangisubli a gunggona ti daton a pangsubbot. (Apocalipsis 20:12-15; 22:1, 2) Awanton ti bulsek, tuleng, wenno pilay ditoy daga. “Ti agtaeng dinanto kunaen, Masakitak.” (Isaias 33:24) Kalpasan la unay ti Sangaribu a Tawen a Panagturay ni Kristo, maluk-atanto iti apagbiit ni Satanas ken dagiti demoniona ket makitadanto no kasano a natungpal ti panggep ti Dios ditoy daga iti dayta a tiempo. Kamaudiananna, matalipuposdanto iti agnanayon.—Apocalipsis 20:1-3.
Inton malpas ti sangaribu a tawen a pannakaisubli ditoy daga, “amin nga adda angesna” idaydayawdanto ni Jehova ket aramidenda dayta iti agnanayon. (Salmo 150:6) Maysakayto kadi kadakuada? Mabalin.