No Kasano a Pinarang-ay ni Jehova ti Trabahona

KADAGITI nabiit pay a dekada naglak-am dagiti Saksi ni Jehova iti nakaskasdaaw a panagrang-ay. Iti laeng napalabas a sangapulo a tawen, simmaknapda manipud 42,600 a kongregasion agingga iti dagupnan a 60,192 kadagiti 212 a dagdaga. Gapu itoy, naisaludsod dagiti dadduma: Kasanot’ pannakasuportar ti trabaho dagiti Saksi? Maragsakan ti Watch Tower Society a mangsungbat iti daytoy ken kadagiti mainaig a salsaludsod iti daytoy nga artikulo.

Al-alagaden aya dagiti Saksi ni Jehova ti apagkapullo?

Saan. Iti kadaanan nga Israel, ti apagkapullo naibilin iti sidong ti Linteg Mosaiko tapno suportaran dagiti agtartrabaho iti templo ti Dios, dagiti Levita ken dagiti papadi. (Numeros 18:21, 24-29) Dagitoy ket awan dagada kas tribo malaksid kadagiti sumagmamano a siudad, gapuna kasapulanda daytoy espesial a pannakasuportar. Mainayon pay, dagiti matalek nga Israelita siwayawayada a mangted kadagiti boluntario a kontribusion para kadagiti espesial a proyekto, kas ti pannakabangon ti tabernakulo ken, iti kamaudiananna, ti templo.​—Exodo 25:1-8; 1 Cronicas 29:3-7.

Nupay kasta, idi natayen ni Jesus, kuna ti Biblia a “pinukawna . . . ti Linteg dagiti bilbilin agraman kadagiti al-alagaden.” (Efeso 2:15; Colosas 2:13, 14) Iti sabali a pannao, iti mata ti Dios ti Linteg saanen a maipaalagad agpadpada kadagiti Judio wenno Kristiano. Gapuna, agraman dagiti dadduma a ramramit ti Linteg, kas kadagiti regular a datdaton kadagiti templo, ti apagkapullo saanen a kasapulan kadagiti matalek.

Kadagiti Kristiano, ti panangted ket gutugoten ti ayat, saan a ti linteg. Inlawlawag ni apostol Pablo ti prinsipio idi inorganisarna ti koleksion a maipaay kadagiti napanglaw a Kristiano idiay Judea. Kunana: “Tunggal maysa itdenna koma ti pinanggepna iti pusona, saan nga iti dakes a nakem wenno mapilpilit, ta ti Dios ayatenna ti mangted a siaayat.” (2 Corinto 9:7) Daytoy Nainkasuratan a metodo ti boluntario a panangted ket al-alagaden dagiti Saksi ni Jehova.

Agtungpalkay aya kadagiti panangpataud-pundo a panagpakan, pagkolekta a sobre, panagdawdawat ti pundo, ken umas-asping pay a pamay-an a panangpataud ti kuarta?

Saan, di rebbeng a mapilit wenno mapasuksokan dagiti pudno a Kristiano iti panangted babaen kadagiti premio nga agbitbitin iti sanguananda. Dagiti narelihiusuan a grupo nga agtungpal kadagiti bingo, bazaars, paripa, karnabal, panagpaabang ti banko ti simbaan, wenno panangipasa ti plato a pagkolekta ipanayagda a saanda nga inikkan dagiti tattaoda ti naespirituan a taraon, ket gapu itoy ti espiritu ti Dios ti saan a mangtigtignay a sibubulos kadagiti parokianoda a tumulong babaen ti kuartada. Kasta met laeng ti maikuna kadagidiay agtungpal iti kadaananen nga ugali ti apagkapullo.​—Mateo 10:8.

Kasanoyo a suportaran dagiti proyekto kas ti panagipatakder kadagiti baro a Kingdom Hall ken sanga nga opisina, agraman ti panangpalawa ti sangalubongan a hedkuarters idiay Brooklyn ken idiay Patterson, Nueva York?

Ibuybuyat ni Jehova ti nasantuan nga espirituna kadagiti Saksina, a mamagbalin kadakuada “nga agaramid iti naimbag, a nabaknangda koma kadagiti naimbag nga aramid, a managparanudda, a nalakada a makipagrikna, nga agurnongda iti maipaay kadakuada ti maysa a nasayaat a pamunganayan a maisagana iti aldaw a mapasungad, tapno magun-odanda ti biag a pudno.” (1 Timoteo 6:18, 19) Daytoy nga espiritu tigtignayenna dagiti Saksi ni Jehova a mangsuportar ti trabaho ti Pagarian iti isuamin a pamay-an.

Idi 1989, kas pangarigan, 3,787,188 a Saksi kadagiti 212 a dagdaga ti nangbusbos ti 835,426,538 nga oras iti panangisursuro ti Sao ti Dios kadagiti dadduma. Ken nakaikonduktada ti 3,419,745 a regular a panangyadal ti Biblia kadagiti pagtaengan dagiti interesado a tattao. Aniaman a gastos a naaramid iti daytoy a trabaho ket imbaklay dagiti indibidual a mangar-aramid iti dayta. Ginunggonaan ni Jehova daytoy nga aramid ti ayat babaen iti panagrang-ay a 263,855 a kabbaro a nabautisaran a Saksi.

Ti umas-asping nga espiritu ti panangted tigtignayenna dagiti Saksi ken interesado a tattao a mangsuportar iti trabaho iti pinansial a pamay-an. Malaksid laeng iti panangtulongda a mangbayad ti regular a gastos ti lokal a kongregasionda, supsuportaranda ti aniaman a trabaho a panagbangon a nagbalin a nesesita, kas ti panangritubar wenno panangpadakkel ti Kingdom Hall wenno Assembly Hall da wenno ti panangibangon ti baro. Kada tawen, gaput’ napartak a panagdakkelda, dakkel a bilang dagiti Kingdom Halls ti naipatpatakder, a dadduma agnginada pay iti ginasgasut a ribo a doliar. Ti gastos kadagitoy ket ibakbaklay dagiti lokal a Saksi babaen iti boluntario a kontribusion ken bannogda.

Mainayon pay, kadagiti adu a dagdaga dagiti pasilidades a pagimprentaan ken opisina ti sanga agraman dagiti pasdek a pagtaenganda masapul a mapalawada​—wenno maibangon dagiti baro​—tapno mapagdagus ti napadakkel nga staff ken dagiti pasilidades a kalikaguman ti dumakdakkel nga organisasion. Daytoy met ti supsuportaran dagiti boluntario a donasion ken panagtrabaho, kas kadagiti proyekto ti panagpatakder ken panangritubar idiay Brooklyn ken idiay Patterson, Nueva York. Sadinoman a posible, dagiti lokal a Saksi ti manggasto iti panagbangon. Iti dadduma a kaso, iyur-urnos ti Watch Tower Society a dagiti sanga umawatdat’ tulong​—agpadpada iti kuarta ken babaen kadagiti nasigo a trabahador​—manipud dadduma a dagdaga. Gapuna, iti panangiwanwan ti Sosiedad, maar-aramid ti “panagpapada.”​—2 Corinto 8:14.

Apay a dikay agipasdek kadagiti ospital wenno klinika ken makiramraman ti trabaho a panangtulong ken dadduma pay a sosial a serbisio kas ar-aramiden dagiti adu a narelihiusuan a grupo?

Nasiglat dagiti Saksi ni Jehova a sumungbat kadagiti emerhensia a pagkasapulan kas bunga ti gubat wenno natural a didigra ingganat’ kabaelanda. Kinapudnona, masansan isudat’ maysa kadagiti umun-una idiay lugar a nakapasamakan ti didigra nga addaan iti taraon, kawkawes, ken kadagiti boluntario a tumulong iti panagibangon manen. Nupay kasta, saan nga agipatpatakder dagiti Saksi ni Jehova kadagiti ospital wenno klinika, kas ti saanda metten a panagpaandar kadagiti bombero a pagpatay ti apuy wenno puersa ti polisia, a dagita ket pagispal met ti biag.

Isudat’ dedikado a ministro ti ebanghelio, ket ti trabahoda isut’ panangikaskasaba ken panangisuro ti naimbag a damag ti Pagarian ti Dios iti amin a lubong kas pammaneknek sakbay nga umayton ti panungpalan. (Mateo 24:14) Kas kinuna ni Jesus, ti anien adu ket bassit dagiti agani. Dinto mapakawan ti panangliway iti kapapatgan a trabaho tapno mangala iti sabsabali pay a trabaho, agpapan pay madaydayawda.​—Mateo 9:37, 38.

Kas mapaspasamak, sumagmamano a Saksi ni Jehova ket doktor, narses, ken katulonganda kadagiti ospital. Ngem matmatmatanda daytoy a trabaho kas kanayonan iti kangrunaan a trabahoda, ti Nakristianuan a ministerio.

Adda aya asinoman kadagiti opisiales wenno miembro ti Watch Tower Society nga agsapsapul ti kuarta manipud iti nasaknap a trabahoda a panagimprenta?

Talaga nga awan! Babaen iti linteg, ti Sosiedad ket maysa a korporasion a di agganansia. Awan dagiti stockholders, wenno dividendo, awan pay sueldo. Tunggal ministro nga adda idiay hedkuarters, agraman ti presidente ken dagiti direktor ti Sosiedad, nangaladat’ legal a sapata ti kinapanglaw. Isut’ umawat ti taraon, paglinongan, ken nesesita a medikal a pannakaaywan, agraman bassit a panangipasubli ti kuarta agpaay kadagiti nagtaud-bulsada a paggastuan. No ti maysa a Saksi agdaliasat a maipaay kadagiti trabaho ti Sosiedad, ti gastos ti panagdaliasatna masansan a mabayadan.

Mainayon pay, awan iti uray sadino a lugar ditoy lubong nga agsingir dagiti ministromi gaput’ panangkasar, panangbautisar, wenno panamumpon. Ken awan met panagsingir wenno koleksion iti iseserrek kadagiti palawag publiko wenno kadagiti kumbension.

Yantangay saan a maipaspasa dagiti plato a pagkolekta, kasano ti panangawat dagiti lokal a kongregasion kadagiti kontribusion tapno masupusopan dagiti paggastuanda?

Dagiti kahon ti kontribusion addada kadagiti Kingdom Hall tapno makaipaay dagiti indibidual ti boluntario a donasion no kayatda. (2 Ar-ari 12:9) Amin a donasion, uray kasano kadakkel wenno kabassit, maapresiarda. (Marcos 12:42-44) Maminsan ti kada bulan, ti ministro a mangay-aywan iti kuenta ti kongregasion ibasana ti ababa a report iti kongregasion a mangibagbaga kadagiti dagup dagiti naawat a kontribusion, dagiti naggastuan, ken dagiti donasion ti kongregasion iti Watch Tower Society a pangsuportar iti sangalubongan a trabaho a panangasaba ken dadduma pay a proyekto.

No maawatan dagiti indibidual daytoy nga urnos, libreda a makipaset no kayatda, tunggal maysa “kas iti irarang-aynanto.” (1 Corinto 16:2) Isu daytoy ti ugali iti tunggal maysa kadagiti nasurok a 60,000 a kongregasion iti intero a lubong.

Idi Pentecostes dagiti immuna a Kristiano sangsangkamaysa ti panangtagikuada kadagiti bambanag. Ar-aramiden met aya dagiti Saksi ni Jehova daytoy?

Rimsua ti naganat a situasion kalpasan la unay ti Pentecostes idi 33 K.P. idi dagiti Judio manipud adayo a luglugar a kakumkumberte pay laeng iti Kinakristiano ket nagtalinaedda idiay Jerusalem tapno umawat ti ad-adu pay a naespirituan a pannakaawat. Kasapulanda ti temporario a pagtaengan ken ti pagtaraon; gapuna, nagaramid dagiti lokal a Kristiano ti boluntario a panaglako ti sanikuada ken ti kumon a panagririnnanud kadagiti naglakuanda tapno mausarda iti napawayway a panawen ti panagkakadua. (Aramid 2:1, 38-47; 4:32-37) Awan asinoman a napilitan a naglako wenno nagidonar. (Aramid 5:1-4) Daytoy a panangtagikuada amin a sangsangkamaysa kadagiti sanikua ket saan a komunismo, kas panangipato dagiti dadduma. Daytat’ temporario laeng nga urnos. Idi nagsublin dagiti Kristiano iti kabukbukodanda nga il-ili, daytat’ nagsardengen.

Isursuroyo aya a ti namaterialan a panangted ket maysa a pamay-an a pangabbong iti basol?

Adayo a kasta! Kuna ti Biblia: “Nga ammoyo a nasubbotkayo iti barengbareng a panagbiagyo nga impatawid kadakayo dagidi ammayo, saan a naaramat dagiti agrupsa a kas iti pirak ken balitok. No di ket gapu iti napateg a dara, daydi dara ni Kristo a kas dara ti maysa a kordero nga awan ti pagdaksanna ken tulawna.”​—1 Pedro 1:18, 19.

Dagiti Saksi ni Jehova mamatida iti daton a subbot ni Jesus a maipaay iti pannakaisalakan. Saanda a mangipapaay kadagiti boluntario a kontribusion a mangin-inanama a daytoy ti mangyeg ti pannakaisalakanda. Nupay kasta, ammoda a dagiti nawadwad a pundo ket kasapulan iti panangisaknap ti naimbag a damag iti nalinteg a baro a lubong ti Dios. (2 Pedro 3:13) Ken patienda a ti panangted ti kontribusion a maipaay iti panangiwaragawag ket maysa a pribilehio nga inted ni Jehova.

Idi mangipapaay ti dakkel a kontribusion iti templo ni Jehova nga isunto ti ibangon ni anakna a Salomon, nagkararag ni Ari David: “Kukuam, O Jehova, ti kinadakkel ken ti pannakabalin ken ti gloria ken ti balligi ken ti kinadayag; ta amin nga adda kadagiti langlangit ken iti daga kukuam. . . . Ngem, asinoak ken ania ti ilik, tapno kabaelanmi koma ti mangidaton iti sibubulos a nakem a kas iti daytoy a kita? Ta naggapu amin a bambanag kenka, ket iti kukuam ti itdenmi kenka.”​—1 Cronicas 29:11, 14.

Itatta, ti panagrikna ni David isu met ti panagrikna dagiti Saksi ni Jehova ken dagiti pay dadduma a tattao a nalinteg pagannayasanda. Maragsakanda a maaddaan ti pribilehio a makapagkontribusion a mangsuportar ti trabaho a panangidaydayaw ken Jehova, a bigbigbigen nga isuamin nga itdenda iti serbisiona ket naggapu met laeng kenkuana. Bendisionan ni Jehova daytoy nga espiritu, ket isu daytoy ti pamay-an a panangparang-ayna iti trabahona.

[Kahon iti panid 23]

NO KASANO TI ITUTULONG TI DADDUMA ITI TRABAHO TI PAGARIAN

◻ TI SAGSAGUT: Dagiti boluntario a donasion a kuarta mabalin a maipatulodda a direkta iti Watch Tower Bible and Tract Society of Pennsylvania, 25 Columbia Heights, Brooklyn, New York 11201, wenno iti lokal a sanga nga opisina ti Sosiedad. Dagiti sanikua a kas ti real estate, agraman alahas wenno dadduma pay a napateg a bambanag, mabalinda met a maidonar. Maysa nga ababa a surat a mangipakaammo a dayta ket nalawag a donasion ti rebbeng maipakuyog kadagitoy a kontribusion.

◻ URNOS TI DONASION NGA ADDAAN KONDISION: Mabalin met a maited ti kuarta iti Watch Tower Society kas maitalek, nga addaan probision nga inkaso adda personal a pagkasapulan, daytat’ maisubli iti nangitalek.

◻ INSURANCE: Mabalin a ti Watch Tower Society ti mainagan kas ti umawat iti life-insurance policy wenno ti plano ti panagretiro/pension. Rebbeng a mapakaammuan ti Sosiedad kadagiti kakasta nga urnos.

◻ TRUSTS: Dagiti savings accounts iti banko mabalinda a maitalek para ti Sosiedad. No maaramid daytoy, pangngaasiyo ta pakaammuanyo ti Sosiedad. Dagiti stocks, bonds, ken sanikua mabalinda met a maidonar iti urnos a mabenepisiaran ti nagdonar bayat ti panagbiagna. Daytoy a metodo ikkatennat’ gastos ken dagiti kinaawan paniguraduan iti kinapudno ti testamento, bayat a mangipasigurado a ti Sosiedad ti umawat ti sanikua inkaso ti ipapatay.

◻ TESTAMENTO: Ti sanikua wenno kuarta mabalin a maipatawidda iti Watch Tower Society babaen iti legal pannakaaramidna a testamento. Ti maysa a kopia rebbeng a maipatulod iti Sosiedad.

Maipaay ti ad-adu pay nga impormasion ken pakaammo maipapan kadagita a banag, agsuratkayo iti Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201, wenno iti lokal a sanga nga opisina ti Sosiedad.

[Ladawan iti panid 24]

Paset ti sentro ti edukasion iti Biblia dagiti Saksi ni Jehova a maibangbangon idiay Patterson, Nueva York

[Dagiti Ladawan iti panid 25]

Ni Jehova parparang-ayenna ti trabaho a panagbangon ti ilina a mangipapaay kadagiti boluntario a donasion