Panangtaginayon iti Panagtutunos​—Dagiti Panglakayen ken Ministerial nga Adipen

DI NAGBAYAG kalpasan ti Pentecostes 33 K.P., rimsua ti bigla a panagkasapulan iti kabuangbuangay a kongregasion Kristiano. Nayurnos ti pannakaaywan dagiti agkasapulan a balo a babbai. Ngem iti saan a nabayag “timmaud ti maysa a panagtanabutob iti biang dagiti Judio a Griego ti pagsasaoda maibusor kadagiti Judio a Hebreo ti pagsasaoda, agsipud ta maliwliwayan idi dagiti baloda iti inaldaw a panagiwaras.”​—Aramid 6:1.

Nakadanon dagitoy a reklamo kadagiti apostol. “Gapuna dagiti sangapulo ket dua inayabanda ti umariwekwek kadagiti adalan ket kinunada: ‘Saan a makaay-ayo kadakami a baybay-an ti sao ti Dios tapno agiwaraskami ti taraon kadagiti lamisaan. Gapuna, kakabsat, sumapulkayo maipaay iti bagbagiyo kadagiti pito a napaneknekan a lallaki manipud iti nagtetengngaanyo, a napno iti espiritu ken sirib, tapno dutokantayo ida itoy a nasken nga aramid.’”​—Aramid 6:2, 3.

Ipakita daytoy ti maysa a napateg a prinsipio ti organisasion iti uneg ti kongregasion Kristiano. Mausar dagiti sumagmamano a responsable a lallaki a mangasikaso kadagiti gagangay a banag, idinto ta dagiti nadagdagsen a naespirituan a pakaseknan ti asikasuen dagiti dadduma. Addaan daytoy iti padron. Iti nagkauna nga Israel, nadutokan ni Aaron ken dagiti annakna nga agserbi kas papadi a mangidatag kadagiti daton iti Dios. Nupay kasta, imbilin ni Jehova a tulongan ida dagiti Levita babaen ti ‘panangaywan kadagiti amin nga alikamen ti tolda ti gimong.’ (Numeros 3:5-10) Kasta met, dagiti manangaywan ita ket tultulongan dagiti ministerial nga adipen.

Ti Akem Dagiti Panglakayen ken Ministerial nga Adipen

Naibalabala iti Kasuratan dagiti nangato a kualipikasion dagiti [agbalin a] panglakayen ken ministerial nga adipen. (1 Timoteo 3:1-10, 12, 13; Tito 1:6-9) Saanda nga agririnningbaw no di ket agtrabahoda a maipaay iti maymaysa a kalat​—panangpabileg iti kongregasion. (Idiligyo ti Efeso 4:11-13.) Nupay kasta, adda sumagmamano a nagdumaan ti trabaho nga ar-aramidenda iti kongregasion. Idiay 1 Pedro 5:2, naibilin kadagiti manangaywan: “Ipastoranyo ti arban ti Dios nga adda iti aywanyo, di mapilpilit, no di ket situtulok; saan met nga iti panagayat iti nakusit a gunggona, no di ket sigagagar.” Manungsungbatda iti Dios iti panangannongda iti daytoy sagrado a pagrebbengan.​—Hebreo 13:17.

Komusta met ngay dagiti ministerial nga adipen? Saan nga ipaannurot ti Kasuratan a rebbeng nga agbalinda a kas kalaing dagiti panglakayen a mangisuro. Naiduma bassit ti pagrebbenganda iti pagrebbengan dagiti panglakayen. Idi umuna a siglo K.P., awan duadua nga adu dagiti material, gagangay, ken kadawyan a banag a masapul nga asikasuen, a nalabit pakairamanan ti pananggatang iti material a pangisakaran kadagiti Kasuratan wenno panagsakar pay ketdi a mismo.

Itatta, agtultuloy nga ar-aramiden dagiti ministerial nga adipen dagiti nagduduma a napateg a trabaho iti uneg ti kongregasion, kas ti panangasikaso kadagiti kuenta ken teritoria ti kongregasion, panangiwaras kadagiti magasin ken libro, ken panangmantener iti Kingdom Hall. Dagiti makabael a ministerial nga adipen ket mabalin a mausar pay ketdi iti panangisuro, no dadduma iti panangikondukta iti Panagadal ti Libro ti Kongregasion, panangiparang kadagiti paset iti Gimong ti Serbisio, ken panangipaay kadagiti palawag publiko.

No agtrabaho a sangsangkatunos dagiti panglakayen ken ministerial nga adipen, maasikaso iti natimbeng a pamay-an dagiti kasapulan ti kongregasion​—agpadpada iti naespirituan ken organisasional. Iti kasta, agbalin a naragsak, natibker, ken nabunga iti naespirituan dagiti kameng ti kongregasion. Laglagipenyo ti insurat ni Pablo kadagiti napulotan idiay Efeso: “Gapu iti natunos a pannakasangal ken pannakaaramid nga agtitinnulong babaen ti tunggal nagsuopan a mangipaay iti kasapulan, maitunos iti panagtignay ti tunggal sinaggaysa a kameng iti maitutop a rukod, agaramid a maipaay iti idadakkel ti bagi a maipaay iti pannakapabilegna a mismo iti ayat.”​—Efeso 4:16.

Masapul a pagreggetan dagiti panglakayen ken ministerial nga adipen a patanoren ti umasping a panagtutunos, kayatna a sawen, panagkikinnaawatan, panagdadanggay, panagtitinnulong, ken panagkaykaysa. Nupay kasta, saan nga automatiko a mapasamak ti kasta a panagtutunos. Masapul a sukayen ken siaannad a masaluadan.

No Aniat’ Maaramidan Dagiti Panglakayen

Ti maysa a napateg nga addang isu ti panangbigbig a ti relasion ti maysa a panglakayen iti maysa a ministerial nga adipen ket saan a kas iti relasion ti maysa nga apo iti adipenna wenno ti maysa nga among iti empleadona. No adda pudpudno a panagtutunos, matmatan dagiti panglakayen ti ministerial nga ad-adipen kas kapadada a ministro ti Dios. (Idiligyo ti 1 Corinto 3:6-9.) “Iti panangipakita ti pammadayaw iti maysa ken maysa mangidaulokayo,” kuna ti Roma 12:10. Gapuna, liklikan dagiti panglakayen ti panangtrato kadagiti ministerial nga adipen iti pampamay-an nga agparang a makaipababa iti dayaw wenno mangipakita iti kaawan panagraem. Iparegtada, imbes a dadaelen, ti makaay-ayo a panagregget. Ti nadayaw a pannakilangen kadagiti ministerial nga adipen patanorenna dagiti kasayaatan a kababalinda ken makatulong kadakuada a mangtagiragsak iti trabahoda iti kongregasion.

Laglagipen met koma dagiti panglakayen a ti pagrebbenganda a mangipastor iti arban ti Dios nga adda iti aywanda ramanenna dagiti kakabsat nga agserserbi kas ministerial nga adipen. Pudno, dagiti kasta a responsable a lallaki mainanama a nataenganda a Kristiano. Nupay kasta, kas kadagiti dadduma iti arban, kasapulanda sagpaminsan ti personal nga atension. Rebbeng nga interesado unay dagiti panglakayen iti irarang-ayda iti naespirituan.

Kas pagarigan, idi naam-ammo ni apostol Pablo ni agtutubo a Timoteo, natukodna a dagus ti kabaelan ni Timoteo ket “inyebkas[na] ti tarigagay a makikuyog kenkuana daytoy a lalaki.” (Aramid 16:3) Kinadkadua ni Timoteo ni Pablo a nagdaliasat, nga immawat iti nagpateg a panagsanay kas banagna. Kalpasan ti sumagmamano a tawen nagsurat ni Pablo kadagiti Kristiano idiay Corinto: “Ibaonko ni Timoteo kadakayo, yantangay isu ti dungdunguek ken matalek nga anak iti Apo; ket ipalagipnanto kadakayo dagiti pamay-ak mainaig ken Kristo Jesus”!​—1 Corinto 4:17.

Dakayo a panglakayen, rinugianyo kadin nga usaren ti naan-anay a kabaelan dagiti ministerial nga adipen iti kongregasionyo? Tultulonganyo kadi ida a rumang-ay babaen ti personal a panangsanayyo kadakuada nga agpalawag iti publiko ken agsukisok iti Biblia? Inaw-awisyo kadin dagiti kualipikado a kumuyog kadakayo kadagiti panangipastor nga isasarungkar? Makipagtartrabahokay kadi kadakuada iti tay-ak ti ministerio? Iti pangngarig ni Jesus maipapan kadagiti talento, kinuna ti apo kadagiti matalek nga adipenna: “Nasayaat unay, naimbag ken matalek nga adipen!” (Mateo 25:23) Sibubuslon kadi a padpadayawan ken komkomendaranyo dagiti ministerial nga adipen a sinunumo a mangar-aramid kadagiti pagrebbenganda iti nasayaat a pamay-an? (Idiligyo ti Proverbio 3:27.) No saan, mariknada kadi a saan a maapresiar ti trabahoda?

Nagpateg met ti komunikasion iti panagtrabaho a sangsangkatunos. (Idiligyo ti Proverbio 15:22.) Di rumbeng a maited wenno maikkat dagiti annongen iti di nainkalintegan wenno palpalawpaw a pamay-an. Rumbeng a sikakararag a pagsasaritaan dagiti panglakayen no kasano a mausar iti kongregasion iti kasayaatan a pamay-an dagiti abilidad ti maysa a kabsat. (Idiligyo ti Mateo 25:15.) No matudingan ti maysa a kabsat, nasken a mailawlawag a naimbag kenkuana no ania ti rebbengna nga aramiden. “Adinoman ti awanan ti nainsiriban a panangidalan,” mamakdaar ti Proverbio 11:14, “ti umili matuang.”

Saan nga umdas ti basta panangibaga iti maysa a kabsat a sublatenna nga aywanan ti departamento ti kuenta, magasin, wenno literatura manipud iti sabali nga adipen. No dadduma tawiden ti maysa a kadutdutok nga adipen ti nawadwad a di umiso wenno saan a kompleto a rekord. Anian a makapaupay! “Isuamin a bambanag maaramid koma a sitatakneng ken addaan urnos,” kuna ti 1 Corinto 14:40. Rumbeng a pagreggetan dagiti panglakayen a sanayen dagiti kakabsat a lallaki, nga iruamda ida kadagiti pamay-an ti panangaramid kadagiti bambanag iti kongregasion ken ipakitada a mismo ti ulidan iti panangsurot kadagiti kasta a pamay-an. Kas pagarigan, nasken a mangaramid dagiti panglakayen iti urnos iti panang-audit iti kuenta ti kongregasion iti kada tallo a bulan. Ti panangliway iti kasta a napateg nga urnos mabalin a mangiturong kadagiti parikut ken pakapsutenna ti panagraem dagiti ministerial nga adipen kadagiti organisasional nga instruksion.

Ngem kasanon no kasla naliway ti maysa a kabsat iti panangtaming iti trabahona? Imbes nga ikkaten nga insigida iti annongenna, rumbeng a makisarita dagiti panglakayen kenkuana. Nalabit a ti parikut ket kinakurang ti pannakasanay. No marigatan latta ti kabsat a mangtaming iti trabahona, nalabit nasaysayaat ti maaramidanna iti sabali a trabaho.

Maitandudo met dagiti panglakayen ti tunos babaen ti panangiparangarang iti kinapakumbaba. Paregtaen ti Filipos 2:3 dagiti Kristiano “nga awan ti aniaman nga aramidenyo gapu iti kinamannakirupir wenno gapu iti panangipasindayaw iti bagi, no di ket buyogen ti kinapakumbaba iti isip nga ibilangyo a dagiti dadduma nangatngatoda ngem dakayo.” Gapuna, rumbeng a makikooperar ti maysa a panglakayen no isut’ iturong ti maysa nga attendant nga agtugaw iti naituding a pagtugawan iti paggigimongan, a saanna nga ikalintegan a gapu ta isu ket maysa a panglakayen, di kasapulan nga agtulnog. Nalabit sursuroten laeng ti attendant ti singasing nga agtugaw iti sabasabali a benneg ti paggigimongan, nupay nasken a laglagipenna nga awan ti pagannurotan a masapul a kasta ti aramiden ti amin.a Ti maysa a panglakayen dina laksiden dagiti pangngeddeng maipapan kadagiti banag a naipaannong iti maysa a ministerial nga adipen.

Dagiti Ministerial nga Adipen Agtrabahoda a Maipaay iti Tunos

“Dagiti ministerial nga adipen rebbeng a seriosoda met,” kinuna ni apostol Pablo. (1 Timoteo 3:8) Ti panangmatmatda kadagiti pagrebbenganda a siseserioso​—kas paset ti sagrado a panagserbida​—dakkel ti maaramidanna a manglapped iti itatanor dagiti parikut. No maysaka a ministerial nga adipen, sigaganaygay kadi nga ar-aramidem ti pagrebbengam? (Roma 12:7, 8) Ikagkagumaam kadi ti agbalin a nasigo iti panangtaming iti pagrebbengam? Mapagtalkan ken mapangnamnamaanka kadi? Madadaanka kadi nga umawat kadagiti annongen? Iti maysa a daga idiay Africa, tallo a nagduduma nga annongen ti tamtamingen ti maysa a ministerial nga adipen iti kongregasion. Ti kababalinna? “Ay ket, kasapulan laeng ti kinagaget,” kunana, “ket saannaka a patayen ti kinagaget.” Pudno la unay, naragsak dagidiay mangipaay iti bagbagida.​—Aramid 20:35.

Dakkel met ti maaramidanyo a mangitandudo iti tunos babaen ti pannakikooperar a naan-anay kadagiti panglakayen. “Agtulnogkayo koma kadagidiay mangidadaulo kadakayo ket agpasakopkayo,” kuna ti Hebreo 13:17, “ta agtultuloy a bambantayanda dagiti kararuayo a kasla isudanto dagidiay mangaramid iti pannakikuenta; tapno aramidenda daytoy a buyogen ti panagrag-o ket saan a buyogen ti panagsennaay, ta daytoy makadangranto kadakayo.” Pudno, imperpekto a lallaki dagiti panglakayen, ken mabalin a nalaka ti mangdillaw kadakuada. Kaskasdi, ti kinamanangbabalaw dadaelenna ti panagtalek. Dadaelenna ti rag-oyo ken adda dakes nga epektona kadagiti dadduma iti kongregasion. Isut’ gapuna nga impaay ni apostol Pedro daytoy a balakad: “Dakayo nga ub-ubing a lallaki, agpasakopkayo kadagiti lallakay. Ngem dakayo amin bariksanyo ti bagbagiyo iti kinapakumbaba iti panagpampanunot maipaay iti maysa ken maysa . . . Ipakumbabayo ti bagbagiyo, ngarud, iti babaen ti mannakabalin nga ima ti Dios, tapno itan-oknakayo iti naikeddeng a tiempo.”​—1 Pedro 5:5, 6.

Mayanatup la unay ti kasta a balakad nangruna no mariknayo a maliwliwayandakayo nga ikkan kadagiti pribilehio iti serbisio. Nalabit “ragragpaten[yo] ti akem a manangaywan,” ngem saankay pay a nadutokan. (1 Timoteo 3:1) Ti kinapakumbaba matulongannakayo nga agtultuloy nga ‘aguray.’ (Un-unnoy 3:24) Imbes a gumura kadagiti panglakayen​—a sigurado a mangdadael iti nasayaat a relasionyo​—damagenyo kadakuada no adda dagiti benneg a mabalinyo a parang-ayen. Ti napaypayso a kinatulokyo a mangawat ken mangyaplikar iti balakad awan duadua nga ipakitana a rumangrang-aykay iti naespirituan.

Ti nadiosan a kinapakumbaba ken kinanumo matulonganna ti maysa a ministerial nga adipen nga agtalinaed a natimbeng no adda dagiti naisangsangayan nga abilidadna wenno no de adal ken adda mabalinna. Anian a makasulisog kenkuana ti panangpadas a mangringbaw kadagiti panglakayen wenno mangipasindayag kadagiti abilidadna! Ipalagip kadatayo ti Proverbio 11:2 a ti “sirib adda kadagiti nanumo.” Sipapanunot ti nanumo a kabsat kadagiti limitasionna. Situtulok nga agtrabaho a siuulimek iti sulsuli ken mangusar kadagiti abilidadna a tumulong kadagiti panglakayen. Ti kinanumo mabalin a makatulong met kenkuana a mangbigbig a nupay adut’ ammona iti nailubongan a pamay-an, mabalin nga agkurang pay laeng kadagiti napateg a benneg ti naespirituan a sirib ken pannakaawat​—dagiti galad a mabalin a paglaingan dagiti panglakayen.​—1 Corinto 1:26–2:13; Filipos 1:9.

Nalawag, napateg ti akem dagiti panglakayen ken ministerial nga adipen. Adu ti maaramidanda a mangpabileg a sangsangkamaysa kadagiti amin a kameng ti kongregasion. Ngem tapno maaramidda dayta, masapul nga agtrabahoda a sangsangkatunos, “buyogen ti naan-anay a kinapakumbaba iti panagpampanunot ken kinaalumamay, agraman ti mabayag a panagitured, nga anusanyo ti maysa ken maysa iti ayat, a sipapasnek nga ikagumaanyo a tungpalen ti panagmaymaysa ti espiritu iti mamagkaykaysa a singgalut ti talna.”​—Efeso 4:2, 3.

[Footnote]

[Dagiti Ladawan iti panid 27]

Matmatan dagiti panglakayen ti ministerial nga ad-adipen, saan a kas nababbaba, no di ket kas kapadada a ministro ti Dios