Dagiti Saludsod Manipud Kadagiti Managbasa
◼ Iti kadaanan nga Israel ti panagrikos ti 49 a tawtawen ti sarunuen ti tawen ti Jubileo (maika-50 a tawen). Dayta kadi a Jubileo ti katupag ti periodo a sumaruno iti lawas ti panamarsua ti Dios a 49,000 a tawtawen?
Gapu ta ti numero 49 ket agparang iti agpadpada a kaso, agparang a kasla ti Jubileo iyanniniwanna ti tiempo a sumaruno iti panagpatingga iti lawas ti panamarsua a 49,000 a tawtawen. Ngem agpaay iti sangatauan nga en heneral nga umawat iti anamong ti Dios, di napasamak bayat ti Jubileo ti Israel ti ad-adda a katupag iti mapasamakto bayat ti Milenio, ti maudi a sangaribo a tawen ti kasta a lawas ti panamarsua, saan a ti sumaruno kalpasan dayta a lawas. Usigenyo ti pakaibatayan daytoy:
Umuna, sapulen ti Mosaiko a Linteg a tunggal maikapito a tawen ket agbalin a sabbath wenno panaginana iti daga; saan a mabalin ti agmula, agtalon, wenno agani. Kalpasan ti maikapito a tawen ti Panaginana (ti maika-49 a tawen), addanto umay a naisangsangayan a tawen ti Jubileo, ti maika-50 a tawen. Daytanto ti maysa a panaginana a kabayatan dayta aginananto manen ti daga. Ti napatpateg pay a ta ti wayawaya ti maiwaragawag. Dagiti Hebreo a nangilako iti bagbagida iti pannakaadipen mawayawayaanda manipud ut-utang ken panagserbida. Kasta met, dagiti tawid a daga maisubli kadagiti pamilia a napilitan laeng a nangilako iti dayta. Gapuna ti Jubileo ket maysa a tiempo ti pannakawayawaya ken pannakaisubli dagiti Israelitas.—Levitico 25:1-46.
Maikadua, ti panagadal iti kaitungpalan ti padto ti Biblia ken ti ayantayo iti agos ti tiempo ipamatmatna a sipipigsa a tunggal maysa kadagiti al-aldaw ti panamarsua (Genesis, kapitulo 1) ket 7,000 a tawtawen ti kaatiddog ti tunggal maysa. Kaawatan a ti panagturay ni Kristo a sangaribo a tawen ti mangyegto iti panagpatingga iti 7,000-tawen nga ‘aldaw ti panaginana’ ti Dios, ti maudi nga ‘aldaw’ iti lawas ti panamarsua. (Apocalipsis 20:6; Genesis 2:2, 3) Maibatay iti daytoy a panagrason, ti intero a lawas ti panamarsua ket 49,000 a tawtawen ti kaatiddogna.
No kitkitaen ti panagasping dagiti numero, dadduma inyarigda ti 49 a tawtawen iti kadaanan a panagrikos ti Jubileo iti dayta 49,000 a tawtawen iti lawas ti panamarsua. Iti kastoy a panagrason, impatoda a ti tawen ti Jubileo (maika-50) ti Israel rebbeng nga iladawanna, wenno iyanniniwanna, no ania ti umayto kalpasan ti panagpatingga ti lawas ti panamarsua.
Nupay kasta, laglagipenyo a ti Jubileo nangnangruna ket maysa a tawen ti panagwayawaya ken pannakaisubli nga agpaay kadagiti tattao. Ti lawas ti panamarsua ti mainaig nangnangruna iti planeta a Daga ken dagiti panagrang-ayna kalpasanna. Ngem no maipapan iti kaitungpalan ti panggep ti Dios a maipaay iti tao ditoy daga, ti globo a mismo ket saan a nailako iti kinaadipen ket ngarud saanna a kasapulan ti pannakawayawaya. Ti sangatauan ti makasapul iti dayta, ket dagiti tattao nagbiagdan, saan nga iti 49,000 a tawtawen no di ket iti agarup 6,000 laeng a tawtawen. Ipakpakita ti Biblia a di nagbayag kalpasan ti pannakaparsua da Adan ken Eva, immalsada a maibusor iti Dios, ngarud nakayawanda iti basol, kinaimperpekto ken ipapatay. Sigun iti Roma 8:20, 21, pinanggep ni Jehova a Dios a wayawayaan ti manamati a sangatauan manipud iti daytoy a pannakaadipen. Kas resultana, dagiti pudno a managdaydayaw ditoy daga “maluk-atandanto manipud pannakaadipen iti panagrupsa ket maaddaandanto ti nadayag a wayawaya dagiti annak ti Dios.”—Kitaenyo met ti Roma 6:23.
Nupay ti bassit a grupo a napili a naalanto idiay langit ket napakawanen dagiti basbasolda manipud Pentecostes 33 K.P. a nagtultuloy ken tagragiragsakendan ti Jubileo, ipakpakita ti Kasuratan a ti pannakawayawaya ti manamati a sangatauan maaramidto bayat ti Milenio a Panagturay ni Kristo. Daytat’ inton iyaplikarna iti sangatauan dagiti gunggona iti daton a subbotna. Inton panagpatingga ti Milenio, ti sangatauan naitag-ayton iti natauan a kinaperpekto, a naan-anayen a siwayawaya manipud iti natawid a basol ken ipapatay. Agsipud ta naiyegdan iti panungpalan ti maudi a kabusor (ni patay a naiyallatiw manipud ken ni Adan), iyawatton ni Kristo ti Pagarian nga isubli ken Amana inton panagpatingga ti 49,000-tawen a lawas ti panamarsua.—1 Corinto 15:24-26.
Gapuna, agpaay iti manamati iti sangatauan nga addaan iti naindagaan a namnama, ti pannakawayawaya ken pannakaisubli a mangtanda iti tawen ti Jubileo iti kadaanan nga Israel ti maaddaanto iti maibagbagay a katupagna bayat iti umay a Sabbath ti Milenio. Kalpasanna ti pannakawayawaya ken pannakaisubli ti mapasaranton. Daytanto iti sidong ti panagturay ni Kristo, “ta ti Anak ti tao isu ti Apo iti aldaw a panaginana.”—Mateo 12:8.