Dikay Ikkan Lugar ti Diablo!

“Saan koma a lumnek ti init a sipupungtotkay pay laeng, ket dikay ikkan ti lugar ti Diablo.”​—EFESO 4:26, 27.

1. Kasanot’ panangiladawan ni Pedro iti Diablo, ngem ania a pammasiguro ti pannalaknib ti inted ti apostol?

MAYSA a narungsot nga atap nga animal ti agalla-alla. Isu ti addaan iti di mapmapnek a tarigagay a mangalun-on kadagiti Kristiano. Namakdaar ni Pedro: “Agparbengkayo, agsalukagkayo. Ti kabusoryo, ti Diablo, kasla leon a ngumerngernger, magmagna iti sibayyo nga agsapsapul ti alun-onenna. Isu sarangtenyo ngarud babaen iti nabileg a pammati . . . Iti kalpasan ti panagsagabayo iti bassit nga aldaw, ti Dios ti amin a di kaikarian a kinamanangngaasi . . . palaingennakayto, patibkerennakayto, papigsaennakayto.”​—1 Pedro 5:8-10.

2. (a) Ania dagiti kasasaad a mamagbalin kadatayo a nalaka a rauten ni Satanas? (b) Apay a daydiay maysa nga agbalin a biktima iti apostasia awan sabali a mapabasol no di ti bagina met laeng? (c) Ania a pagkapuyan ti nangilukat ti dalan a maipaay iti Diablo tapno ikabil idiay puso ni Judas Iscariote ti panangliput ken Jesus?

² Makasigurotayo a ti Diablo ken dagiti ahentena, agpadpada kadagiti demonio ken tattao sisasaganada a pamrayan ti aniaman a serioso a panagduadua, ti aniaman a grabe a pagkapuyan ti personalidad, ti aniaman a kinaliway iti biangtayo a mangsalimetmet a napigsa iti pammati. Ngem ipasiguro ti Sao ni Jehova kadatayo a ti Diablo dinatayto alun-onen no agtakdertayo a sititibker a maibusor kenkuana. (Santiago 4:7) Kas pangarigan, awan ti mabiktima iti apostasia gapu laeng ta daytat’ di maliklikan. Awan ti naisignos a mangtallikud ti pammati. Nairaman ditoy dagiti motibo ti puso. Pudno, kuna ni Juan a dadduma “rimmuarda kadatayo, ngem ditay ida kadua.” (1 Juan 2:19) Ngem daytoy ti napasamak agsipud ta mabalin a pinilida ti apostasia wenno simrekda iti organisasion ni Jehova nga addaan iti dakes a motibo idi damo. Ni Judas Iscariote ti addaan naimbag a puso idi inawagan ni Jesus kas maysa kadagiti 12 nga apostoles, ngem ginundawayan ti Diablo ti kinaagum a pagkapuyan ni Judas. Uray pay sakbay ti rabii a panangilibakna ken ni Jesus, inkabilen “ti Diablo nangipastreken iti puso ni Judas Iscariote, nga anak ni Simon, nga isu liputanna.”​—Juan 13:2.

3. Ania dagiti bambanag a makaimpluensia ti maysa a tao nga agbalin a biktima iti apostasia?

³ Ti maysa a tao agdakes agsipud ta palubosanna dagiti kabukbukodanna nga inaagum a panagrasrasonna, dagiti bukodna nga ambision ken tarigagay, dagiti pinilina a pakikuykuyogan ken dagiti aglawlawna, a mangmolde iti panagpampanunotna ken mangikeddeng iti direksion ti pagayatanna. Naminsan nasao ni Pablo ti sumagmamano kadagidiay ‘nalawagan iti naminsan, a naramananda ti sagut a nailangitan, ket kalpasanna simminada.’ (Hebreo 6:4-6) No ditay sisasalukag a kankanayon, ti Diablo babaen kadagiti sinisikap a propagandana allukoyenna ti pusotayo a nalaka nga umawat kadagiti apostata a panagpampanunot. Ngem kasano a ti Diablo, iti kinapudnona, pagbalinenna ti maysa a tao a biktima ti apostasia?

4. Aniat’ mapasamak no matnagtayo iti kinapait, sakit ti nakem, ken panagkitkita iti biddut?

⁴ Dagiti gagangay a kababalin a sipsiputan ni Satanas ket isu dagiti kinapait, sakit ti nakem, ken ti panangsipsiput kadagiti biddut. Nakapigpigsa dagita a rikrikna a gapu itoy awan unayen ti lugar a natda nga agpaay iti ayat ken panangapresiar. Nalabit addada di masolsolber a parikut nga isut’ mangrirriribuk, nga isut’ mamagpungtot iti maysa a tao ngem mamagrikna kenkuana a kasla nainkalintegan ti iyaadayona manipud kadagiti nasken a Nakristianuan a panaggigimong. Babaen iti panagtalinaedna a sipupungtot iti nakabaybayag a tiempo, isu ‘ik-ikkanna ti lugar ti Diablo.’ (Efeso 4:27) Ti indibidual a mariribukan makitkitana laeng dagiti natauan a pagkapuyan ti kabsatna, imbes a pakawanenna koma ti “mamimpitopulo ket pito a daras,” ngem saanna nga us-usaren dagiti pakasuotan a kasasaad kas gundaway a mangan-anay koma kadagiti Nakristianuan a kualidad. (Mateo 18:22) Iti daytoy a panagpampanunotna, no adda maysa nga umay ken mangibaga kenkuana a ti organisasion ni Jehova ket mangirurumen wenno napalalo a nainget wenno adut’ iparparitna, wenno ibagana nga adda di umiso kadagiti dadduma a napapateg a pannursurona, ti pimmait a puso ti Kristiano ti mabalin a nalaka nga umawat kadagitoy awan nakaibatbatayanna a sasaoda. Ngarud, anian a nagsayaat no, liklikan ti maysa a palubosan a dumakkel ti pungtotna ken sakit ti nakemna! Dikay koma palubosan a lumnek ti init a sipupungtotkay pay laeng. Imbes ketdi, bay-anyo a ti ayat ti addaan koma ti naan-anay a pakaiyebkasanna iti biagyo.

5. (a) Kasano a ti kinatangsit wenno ti panagsakit ti nakem gapu iti pannakatubngar agbalin a pakatnagan? (b) Ania ti paset ti kinapakumbaba iti panagtalinaed a natibker iti pammati?

⁵ Ania pay a dadduma a kasasaad ti puso ken isip ti sipsiputan ti Diablo? Bueno, adda dita ti kinatangsit, daydiay rikna ti panangipatpateg ti maysa iti bagina, daydiay di pannakagun-od ti maysa iti kinaprominente a pagarupenna a maadda koma kenkuana. Palab-og wenno silo amin ti Diablo dagitoy. (Roma 12:3) No mabalakadantayo wenno no kas pangarigan ta matubngarkayo pay ketdi gapu iti maysa a di umiso nga aramid wenno kababalin, daytoy met ti nagsayaat a gundaway ti Diablo a mangtignay kadakayo a mangsaludsod ti bagiyo no addakay met laeng iti umiso nga organisasion. Gapuna agpakumbabakay koma. Kontentokay koma nga agtignay a “nanumo.” Dikay palpalubosan ti kinatangsit wenno rikna ti kabukbukodan a panangipateg iti bagi met laeng nga isut’ manggunggon iti natibker a panagtaktakderyo iti pammati.​—Lucas 9:48; 1 Pedro 5:9.

6, 7. (a) Ania dagiti sumagmamano a panangiparangarang ti di pannakaan-anus a nasiglat a gundawayan ti Diablo? (b) No ti maysa agkurang ti kinasirib, aniat’ rebbeng a maaramidan?

⁶ Ti di pannakaan-anus ti maysa pay a matmatmatan ti Diablo. No maminsan mabalin a pagarupentayo a masapul a maaramid koma dagiti panagbalbaliw; kayattayo nga adda koma ti nadaras a panagtignay, ti insigida a sungsungbat. ‘Masapul a malawlawagan koma daytoy a parikut itan, ta no saan, agikkatakon. Masapul a maaddaanak ti sungbat iti daytoy a saludsod itan, ta no saan, diakon agtultuloy. Ti Armagedon ken ti baro a sistema ibagbagada nga “asidegen” iti adun a tawtawen. Naumaakon nga agur-uray.’ Makasigurokayo a ti Diablo ti sisasagana a mangimula kadagiti bin-i ti panagduadua ken iyaalsa iti tay-ak ti kasta a di pannakaan-anus. Kasapulan ti panagibtur ken pammati.​—Hebreo 10:36, 39.

⁷ Kuna ni Santiago: “Ket patauden koma ti kinaanus ti aramid a naan-anay, tapno maan-anaykayo iti isuamin, nga awan ket ti aniaman a pagkuranganyo. Ngem no ti siasinoman kadakayo agkurang iti kinasirib, agdawat koma iti Dios isu a mangted a sikakaasi kadagiti isuamin ket saan a mangpabain; ket maitedto kenkuana. Ngem agdawat koma a babaen ti pammati, nga awan koma ti panagduadua, ta ti managduadua umasping iti maysa a dalluyon ti baybay nga iduron ti angin ket agpallayog. Saan koma ngarud a panunoten daydiay a tao nga addanto aniaman nga awatenna ken ni Jehova; ta ti tao a nagkadua ti nakemna, saan nga agtalinaed kadagiti amin a daldalanna.” (Santiago 1:4-8) Dikay palpalubosan ti Diablo a pagbalinennakayo a kandidato iti apostasia agsipud ta napalalo ti panagbalinyo a di makaan-anus, a pagduaduaanyo dagiti karkari ti Dios! Aganuskay koma, nga agyamankayo. Urayenyo ni Jehova.​—Salmo 42:5.

8. Kasano a ti pagannayasan nga umalsa a maibusor iti kinaturay ti mangilukat iti dalan para iti Diablo nga allukoyen ti maysa a tao a laksiden amin dagiti Nainkasuratan a pakalapdan?

⁸ Ania pay ti us-usaren ti Diablo tapno mapagbaw-ingnatayo? Saan aya a kankanayon a padpadasenna ti mangkiwkiw iti iyaalsa, a pagbalinenna dagiti ad-adipen ni Jehova a manangbabalaw kadagidiay mangidadaulo? ‘Saan a makaaw-awat dagiti panglakayen. Kritikoda unay, adu unay ti kalkalikagumanda,’ mabalin a kunaen dagiti dadduma. Mabalin a dadduma kunaenda pay a ti Bagi a Manarawidwid dagiti Saksi ni Jehova wenno dagiti dadduma a responsable a kakabsat singsingaenda ti wayawaya ti konsiensia ken ti “kalintegan” ti maysa a mangipatarus kadagiti Kasuratan. Ngem laglagipenyo ti napakumbaba a sasao ni Jose: “Saan aya a dagiti panangipalawag addada iti biang ti Dios?” (Genesis 40:8) Ket di met aya impadto ni Jesus a kadagitoy maudi nga al-aldaw ti maysa nga organisasion dagiti napulotan, “ti matalek ken naannad nga adipen,” ti pakaitalkanto ti panangipaay iti naespirituan a taraon iti umiso a tiempo? (Mateo 24:45-47) Agannadkayo kadagidiay mangiyun-una kadagiti kabukbukodanda a naiduma a kapanunotan. Ken agannadkayo met kadagidiay mangiwalin kadagiti isuamin a pakalapdan wenno dagidiay mangikarkari iti wayawaya, a kunkunada a dagiti Saksi ni Jehova ket patagtagabuda laeng! Kuna ni Pedro maipapan kadagita nga ulbod a mannursuro: “Nga ikarianda ida iti panagwayawaya, idinto nga isuda met laeng tagabu ida ti kinarugit. Ta no siasino ti pakaabakan ti maysa a tao isu met ti mangtagabu kenkuana.”​—2 Pedro 2:1, 19.

9. Aniat’ masansan a kababalin dagidiay manangbabalaw kadagiti mangidadaulo?

⁹ Ania ti masansan a motibo dagidiay mangbabbabalaw iti Sosiedad wenno dagidiay mangidadaulo? Saan kadi a masansan a ti sumagmamano nga aplikasion ti Kasuratan ti mangap-apektar kadakuada a personal? Imbes a makitunosda koma kadagiti nasin-aw a doktrina ken panangiwanwan, kayatda nga agbalbaliw koma ti organisasion. Iyilustrartay dayta iti sumagmamano a pangarigan:

10. Kasano a ti panangipapilit iti aglablabes a panagkawkawes wenno estilo ti panagbubuok ti mabalin a ‘mangipalubos [iti maysa] a mangted lugar iti Diablo’?

¹⁰ Adda maysa a kabsat a mangipappapilit iti karkarna a panagbadbado wenno estilo ti panagbubuok. Patien dagiti panglakayen nga isut’ saan a nasayaat nga ulidan ket gapu itoy saanda nga ipapaay kenkuana ti dadduma kadagiti pribilehio, kas ti panagtakderna koma iti plataporma a mangisuro. Ngem sakiten ti nakemna dayta, a kunkunana a padpadasen dagiti dadduma nga ik-ikkaten ti Nakristianuan a wayawayana. Ngem aniat’ adda iti likudan ti kasta a panagrasrason? Saan kadi a masansan daytat’ kinatangsit, nga isut’ addaan iti espiritu ti panagwaywayas, wenno ti inuubingan a tarigagay panangsurot iti kabukbukodan a pamay-an? Nupay kasla nagbassitan daytoy a banag, ti tao a kasta ti panagrasrasonna ket “iluglugaranna ti Diablo.” Ngem ti ayat ken kinapakumbaba ti mamagtignay kadatayo nga agkawes ken mangestimar iti bagbagitayo iti naurnos, makaay-ayo a pamay-an. Tarigagayantay koma nga aramiden amin dagiti bambanag a maipaay a pakaparang-ayan ti naimbag a damag ket saan a ti panangay-ayotayo iti bagbagitayo.​—Roma 15:1, 2; 1 Corinto 10:23, 24.

11. Aniat’ mabalin nga adda iti likudan iti panagduadua iti bilin ni Jehova nga iyaadayo iti dara?

¹¹ Mangalatay pay ti sabali a pangarigan. Sagpaminsan mabalin nga adda mangmangngeganyo a pagduaduaanna no ti Nainkasuratan a panangiparit iti panagsida ti dara ket pudno nga agaplikar met laeng iti panangyalison iti dara. Ngem aniat’ adda iti likudan dayta a panagrasrason? Isu kadi dayta ti panagbuteng​—buteng a mabalin a mapukaw ti maysa ti agdama a biagna wenno biag ti inay-ayatna? Ti kadi namnama ti panagungar agkupkupasen kadakuada? Dagiti matalek a Kristiano saanda nga ikomkompromiso ti linteg ti Dios wenno agsapul kadagiti pamay-an a pananggampurda iti dayta. Ti iyaadayo iti dara a mangtaraon iti bagi ket nasken a kas met ti iyaadayotayo iti pannakikamalala ken ti panagrukbab iti ladawan, nga amin daytoy ti nakondenar iti isu met laeng a bilin dagiti apostol ken dagiti panglakayen idiay Jerusalem nga iwanwanwan ti espiritu.​—Aramid 15:19, 20, 28, 29.

12. Apay a ti biddut a kinasungdo dinatay koma pagsalungasingen iti Nainkasuratan a pagalagadan a liklikantayo ti aniaman a sosial a pannakilangenlangen kadagidiay nailaksid?

¹² Maysa pay a banag nga ibagbaga dagidiay manangbabalaw a ta ti organisasion ni Jehova ti estrikto unay maipapan iti panangguped iti pannakilanglangen a sosial kadagiti nailaksid a tattao. (2 Juan 10, 11) Ngem apay a dagita a manangbabalaw ket kasta ti panagrikriknada? Addaanda kadi ti nasinged unay a singgalut iti pamilia wenno biddut a kinasungdo iti maysa a gayyem a daytat’ iyun-unada ngem ti kinasungdoda ken Jehova ken kadagiti pagalagadan ken pagannurotanna? Ket, usigenyo pay met, a ti agtultuloy a sosial a pannakilanglangen iti maysa a tao a nailaksid, uray pay dagidiay nasinged a kabagyan, ti mabalin a mangiturong iti daydiay nakabasol a mangipato a ti aramidna ket saan unay a serioso, ket daytoy agturong iti ad-adda pay a pakadangranna. Nupay kasta, ti panangilibak iti kasta a pannakilanglangen ti mabalin a mamagtignay kenkuana nga iliwen manen dagiti banag a napukawna ken ti tarigagay a manggun-od koma manen iti dayta. Ti dalan ni Jehova isu ti kanayon a kasayaatan ket daytat’ agpaay iti mismo a pakasalaknibantayo.​—Proverbio 3:5.

13. Ania a kababalin ti rebbeng koma a maadda kadatayo maipapan iti publiko a panangaskasaba iti binalaybalay?

¹³ Kaskasdi adda pay mangikunkuna a di supsuportaran kano dagiti Kasuratan ti panangaskasaba iti binalaybalay. Ngem gapu kadi ta daytoy kagurana daytoy nasken unay a trabaho ket agsapsapul ti pambarna tapno makalisi? Ti ayat iti Dios ken ti kaarruba ti rebbeng a mangtignay kadatayo a makakita iti kinaganat daytoy makaispal-biag a trabaho. Ditoy manen, kasapulan ti panagandor. Saritaen a mismo ni apostol Pablo dagiti kabukbukodanna a panagibtur ‘iti naan-anay a panangaskasabana kadagiti Judio ken Griego’ bayat ti panangisursurona iti publiko ken kadagiti balbalay. (Aramid 20:18-21) Imbes nga agreklamo, di aya koma simamatalek a surotentayo ti nagsayaat nga ulidanna? Kitaenyo laengen dagiti rinibo a naur-urnongen iti “maymaysa nga arban” gapu iti panangbendision ni Jehova iti trabaho a panagbalaybalay! (Juan 10:16) Ditay koma met liplipatan dagiti nagsasayaat a gunggona a maaw-awattayo iti pannakasanay ken disiplina, iti panangpatibker ti pammatitayo, babaen ti ipapantayo kadagiti balbalay tapno madanon dagiti tattao babaen ti naimbag a damag.​—Idiligyo iti Aramid 5:42; 1 Timoteo 4:16.

14. Aniat’ makunayo a panagtignaytay koma no usaren dagiti manangbabalaw dagiti Saksi ni Jehova kas ulbod a mammadto?

¹⁴ Kamaudiananna, mabalin nga usigentayo dagiti naipablaaken ti Sosiedad kadagiti napalabas maipapan iti kronolohia. Dadduma kadagiti bumusbusor ti agkunkuna a dagiti Saksi ni Jehova ket ulbodda a mammadto. Dagitoy a kabkabusor kunada a naikedkeddengen dagiti petsa, ngem awan met mapaspasamak. Mabalintay maenen a maisaludsod ditoy, Aniat’ motibo dagitoy a manangbabalaw? Parparegtaenda aya nga agbalin a siririing ti ili ti Dios, wenno padpadasenda ketdi, nga ikalkalintegan ti bagbagida iti panagsublida iti panaglaladutda? (1 Tesalonica 5:4-9) Nangnangruna pay, aniat’ aramidenyo no mangngegyo ti kasta a panangbabalaw? No ti maysa a tao agsalsaludsod no agbibiagtayon kadagiti “maudi nga al-aldaw” daytoy a sistema, wenno nalabit ay-ay-ayamenna ti kapanunotan a ti Dios ti naasi unay a sigurado a dinanto papatayen dagiti adu a milion a tattao bayat ti “dakkel a rigat,” iti kasta insaganan daytoy nga indibidual ti pusona a dumngeg kadagiti kakasta a panangbabalaw.​—2 Timoteo 3:1; Mateo 24:21.

15. Imbes nga isuda dagiti ulbod a mammadto, aniat’ mangpaneknek a dagiti Saksi ni Jehova addaandat’ pammati iti Sao ti Dios ken kadagiti sigurado a karkarina?

¹⁵ Wen, masapul met ti panangrebisar ti ili ni Jehova kadagiti panangmatmatda iti sagpaminsan. Gapu iti kinagagartayo, nanginanamatayo iti kinasapa la unay ti baro a sistema ngem ti ibagbaga ti pagorasan ni Jehova. Ngem iparparangarangtay ti pammatitayo iti Sao ti Dios ken kadagiti sigurado a karkarina babaen ti panangiwarwaragawag ti mensahena kadagiti dadduma. Nupay kasta, ti pannakasapul ti panangrebisartay kadagiti pannakaawattayo no maminsan ket di mamagbalin kadatayo kas ulbod a mammadto wenno mangbalbaliw iti kinapudno nga agbibiagtayon “kadagiti maudi nga al-aldaw,” nga aglak-amto iti mabiiten iti “dakkel a rigat” ken iti pannakastreken iti naindagaan a Paraiso. Anian a kinamaag ti panangmatmat a dagiti pananginanama nga agkasapulan iti panagbalbaliw ket awaganna met ti panagduadua iti intero a bagi ti kinapudno! Naglawag ti pammaneknek a ni Jehova inusarna ken agtultuloy nga us-usarenna ti maymaysa nga organisasion nga idadauluan “ti matalek ken naannad nga adipen.” Gapuna, kastay la ken Pedro, a nagkuna: “Apo, asinonto ti papananmi? Sika addaanka kadagiti sao ti biag nga agnanayon.”​—Juan 6:68.

16, 17. (a) Kasano a ti panangiyaplikar iti sasao ni Jesus idiay Mateo 7:15-20 tumulong a mangilasin iti organisasion a bembendisionan ni Jehova? (b) Aniada dagiti sumagmamano kadagiti naimbag a bungbunga a mapatpataud iti biag dagiti pudno nga ad-adipen ni Jehova?

¹⁶ Ti laeng naespirituan a paraiso, iti tengnga dagiti Saksi ni Jehova, ti pakasarakantayo ti kuna ni Jesus a managsakripisio nga ayat a pakailasinan dagiti pudno nga ad-adalanna. (Juan 13:34, 35) Babaen kadagiti dakes a bungbungada, dagiti ulbod a mammadto naibutaktakda iti pudpudno a kasasaadda. Ngem impamatmat ni Jesus a dagiti naimbag a kayo mailasindanto met babaen kadagiti naimbag a bungbungada. (Mateo 7:15-20) Ket anian a nagsayaat ti bungbungatayo iti naespirituan a paraiso! Iti ngangngani amin a pagilian addada dagiti nakaskasdaaw nga irarang-ay. Itan addan nasurok a 3,000,000 a nararagsak nga iturturayan ti Pagarian ti Dios iti intero a globo a sibibiag a pammaneknek a ni Jehova ti addaan ti maysa nga ili ditoy daga.

¹⁷ Agsipud ta nasursuruanda babaen iti Dios, dagiti Saksi ni Jehova, talaga a patpataudenda dagiti bungbunga ti Kinakristiano iti panagbiagda. (Isaias 54:13) Ti laeng ili ni Jehova ti simmina a naan-anay manipud Binababilonia nga an-anito. Is-isuda laeng ti addaan organisasion a mangsursurot a naan-anay iti ibagbaga ti Sao ti Dios maipapan iti seksual nga imoralidad, aborsion, panagbarbartek, panagtakaw, panagdaydayaw iti ladawan, panangidumduma iti rasa, ken dadduma pay a nailubongan a tartarigagay ken ar-aramid. Ken is-isuda laeng ti agtultulnog iti bilin a mangikaskasaba iti naimbag a damag ti Pagarian ni Jehova. (Mateo 24:14) Ti mismo a Sao ti Dios ti mangitudtudo kadagiti Saksi ni Jehova kas ti kakaisuna nga organisado nga ili a bembendisionanna!

18. No maipasango kadagiti pannursuro dagiti apostata, aniat’ rebbeng a sasaaden dagiti ad-adipen ni Jehova?

¹⁸ Wen, kadagiti isuamin a matalek ken sisusungdo nga agib-ibtur iti Nakristianuan a dalan, makasigurotayo a ti kinapudno ni Jehova ti kaskasdi pay met laeng a nagpintas, makapnek​—nga ad-adda pay ngem idi umuna a nangngeganda dayta. Ngarud, ikeddengyo koma kadagiti puspusoyo a nikaanoman dikay kudkuditen ti sabidong nga ituktukon dagiti bumusbusor nga apostata. Ipangagyo ti nainsiriban ngem nainget a bilin ni Jehova a liklikanyo a naan-anay dagidiay mangallilaw kadakayo, mangyaw-awan kadakayo, nga ibaw-ingdakayo nga agturong kadagiti daldalan ni patay. No ayatentayo ni Jehova iti amin a pusotayo, kararuatayo ken isiptayo, ken ay-ayatentayo met dagiti kaarrubatayo kas ti bagitayo, daytat’ di mangted ti lugar a serken dagiti apostata a panagpampanunot. (Mateo 22:37-39) Ditayto “ikkan lugar ti Diablo” ket awanto ti tarigagaytayo a tumaliaw iti sabali. Saantayo a ‘paalis a sipapardas ti pampanunottayo’ babaen iti aniaman a palso a pannursuro.​—2 Tesalonica 2:1, 2.

19. Ania a kurso ti mangipasiguro nga ‘awan tao a mangpukaw kadatayo iti gunggona’ iti biag nga agnanayon?

¹⁹ Kanayontay koma nga apresiaren ti pribilehiotayo nga adda iti naespirituan a paraiso ni Jehova, a sadiay tagtagiragsakentayo dagiti nagadu a nabaknang a bendision. Ammotayo no siasino dagiti mangsalsalimetmet a simamatalek kadagiti sasao iti biag nga agnanayon. Agtalinaedtayo a nasinged iti pannakitimtimpuyog kadakuada, ta pagaammotayo a dagitoy dagiti pudpudno, nasungdo a kakabsattayo a lallaki ken babbai iti pammati. Sapay koma ta agtultuloytayo a maaddaan iti isu met laeng a ragsak ken pannakapnek nga adda kadatayo nanipud idi damo pay a naammuantayo ti kinapudno, nga addaan ti pammasiguro iti engrande a gunggona ti biag nga agnanayon idiay baro a sistema dagiti bambanag ni Jehova. Kas ti apagpag-isu a panangikuna ni Pablo: “Awan koma ti asinoman a mangipukaw ti gunggonayo”!​—Colosas 2:18.

Masungbatanyo Aya?

◻ Apay a pudno nga awan ti naisignos a mangtallikud iti pammati?

◻ Kasano a ti sakit ti nakem, kinatangsit, ken di pannakaan-anus iwayaanna ti lugar para iti Diablo idiay puso?

◻ Aniat’ masansan nga adda iti likudan ti panangbabalaw iti balakad nga ipapaay dagidiay mangidadaulo?

◻ Ania a bunga a patpatauden dagiti Saksi ni Jehova ti mangpampaneknek nga isuda ti maymaysa nga organisasion nga us-usaren ti Dios?

[Ladawan iti panid 16]

Babaen ti panangilaksid iti balakad, mabalin nga “ikkantayo ti lugar ti Diablo”

[Ladawan iti panid 17]

Ti kinatangsit ti mangiturong iti pannakatnag a mabalin a ditayton makaungar

[Ladawan iti panid 19]

Dagiti okupado ken naragsak nga ad-adipen ni Jehova ‘dida ilugaran ti Diablo’ wenno dagiti apostata a kapanunotan