“Nasgedkayo Koma iti Espiritu”

“Dikay agpalpallailang iti aramidyo. Nasgedkayo koma iti espiritu. Agpaadipenkayo ken Jehova.”​—ROMA 12:11.

1. Apay a nagidaton dagiti Israelita kadagiti animal ken dadduma pay a kita ti sakripisio?

IPATPATEG ni Jehova ti naimpusuan a panagsakripisio dagiti adipenna kas ebkas ti panagayatda kenkuana ken ti panagpasakupda iti pagayatanna. Idi nagkauna a panawen, inawatna ti nagduduma nga animal ken dadduma pay a kita ti daton. Inaramid dagiti Israelita ti kasta a panagdaton maitunos iti Mosaiko a Linteg tapno mapakawan dagiti basolda ken mayebkasda ti panagyamanda. Iti kongregasion Kristiano, saan nga ikalikagum ni Jehova a mangaramidtayo kadagiti kasta a pormalistiko ken literal a panagdaton. Ngem iti kapitulo 12 iti suratna kadagiti Kristiano idiay Roma, impakita ni apostol Pablo a manamnama nga agidatontayo. Kitaentayo no kasano.

Sibibiag a Sakripisio

2. Kas Kristiano, ania a kita ti panagbiag ti surotentayo, ken ania ti ramanen dayta?

² Basaen ti Roma 12:1, 2. Iti rugrugi ti suratna, nalawag nga impakita ni Pablo a dagiti napulotan a Kristiano, Judio man wenno Gentil, ket maideklarada a nalinteg iti imatang ti Dios babaen iti pammati, saan nga iti ar-aramid ti linteg. (Roma 1:16; 3:20-24) Iti kapitulo 12, inlawlawag ni Pablo a masapul nga ipakita dagiti Kristiano ti panagyamanda babaen ti panagbiagda buyogen ti kinamanagsakripisio. Tapno maaramidtayo dayta, masapul a baliwantayo ti panagpampanunottayo. Gapu iti natawid a kinaimperpekto, naipasidongtayo iti “linteg ti basol ken ti ipapatay.” (Roma 8:2) Gapuna, masapul a ‘mapabarotayo iti puersa a mangtigtignay iti panunottayo’ babaen ti naan-anay a panangbalbaliw kadagiti pagannayasantayo. (Efe. 4:23) Ngem maaramidtayo laeng dayta babaen ti tulong ti Dios ken ti espirituna. Agkalikagum pay dayta iti panagreggettayo, nga usarentayo ti ‘pannakabalintayo nga agrason.’ Kayatna a sawen nga aramidentayo ti amin a kabaelantayo a di ‘agpasukog iti daytoy a sistema ti bambanag,’ agraman kadagiti nalulok a moral, paglinglingayan, ken panagpampanunotna.​—Efe. 2:1-3.

3. Apay a makiramantayo kadagiti Nakristianuan nga aktibidad?

³ Paregtaennatayo met ni Pablo a mangusar iti ‘pannakabalintayo nga agrason’ tapno matingitingtayo no ania “ti naimbag ken makaay-ayo ken naan-anay a pagayatan ti Dios.” Apay a basaentayo nga inaldaw ti Biblia, utobentayo ti nabasatayo, agkararagtayo, makigimongtayo, ken mangasabatayo? Gapu kadi ta idagdagadag dayta dagiti panglakayen? Pudno nga apresiarentayo ti naayat a pammalagipda. Ngem makiramramantayo kadagiti Nakristianuan nga aktibidad gapu ta tigtignayennatayo ti espiritu ti Dios a mangipakita iti naimpusuan a panagayattayo ken Jehova. Maysa pay, kombinsidotayo a mismo a pagayatan ti Dios nga itungpaltayo dagita nga aktibidad. (Zac. 4:6; Efe. 5:10) Mangyeg iti dakkel a rag-o ken pannakapnek no ammotayo a posible nga agbalintayo a makaay-ayo iti Dios no agbiagtayo kas pudno a Kristiano.

Nagduduma a Sagut

4, 5. Kasano ti rumbeng a panangusar dagiti panglakayen kadagiti naited kadakuada a sagut?

⁴ Basaen ti Roma 12:6-8, 11. Inlawlawag ni Pablo nga “addaantayo kadagiti sagut nga agduduma sigun iti di kaikarian a kinamanangngaasi a naited kadatayo.” Dadduma kadagiti sagut a dinakamat ni Pablo​—kas iti panamagbaga ken panangidaulo​—ket nangnangruna nga agaplikar kadagiti panglakayen, a nabalakadan a mangidaulo buyogen ti “napudno a kinapasnek.”

⁵ Sigun ken Pablo, masapul nga ipakita dagiti panglakayen ti kasta met la a kinapasnek no agserbida kas mannursuro ken no itungpalda ti “maysa a ministerio.” Ipasimudaag ti konteksto a ti tuktukoyen ni Pablo a “maysa a ministerio” ket ti panagserbi iti uneg ti kongregasion, ti “maysa a bagi.” (Roma 12:4, 5) Umasping dayta a ministerio iti nadakamat iti Aramid 6:4, a nagkunaan dagiti apostol: “Ipamaysami ti bagbagimi iti panagkararag ken iti ministerio ti sao.” Ania ti ramanen dayta a ministerio? Dagiti panglakayen usarenda dagiti naited kadakuada a sagut a mangpabileg kadagiti miembro ti kongregasion. Maipakitada nga ‘addada iti daytoy a ministerio’ no sipapasnek a mangipaayda iti Nainkasuratan a giya ken instruksion iti kongregasion babaen ti napasnek a panagadal, panagsukimat, panangisuro, ken panagipastorda. Nasken nga usarenda a naimbag dagiti naited kadakuada a sagut ken “siraragsak” a maaywananda ti arban.​—Roma 12:7, 8; 1 Ped. 5:1-3.

6. Kasano a mayaplikartayo ti balakad ti Roma 12:11, ti pannakatema a teksto daytoy nga artikulo?

⁶ Kinuna pay ni Pablo: “Dikay agpalpallailang iti aramidyo. Nasgedkayo koma iti espiritu. Agpaadipenkayo ken Jehova.” No madlawtayo a mangrugi a bumaaw ti regtatayo iti ministerio, masapul a pasayaatentayo ti kalidad ti panagadaltayo. Aramidentayo met a napaspasnek ken nasansansan ti panangikararagtayo iti espiritu ni Jehova tapno rumayray manen ti regtatayo. (Luc. 11:9, 13; Apoc. 2:4; 3:14, 15, 19) Ti nasantuan nga espiritu pinabilegna dagiti nagkauna a Kristiano a mangisarita iti “natan-ok a bambanag ti Dios.” (Ara. 2:4, 11) Umasping iti dayta, tignayennatayo met nga agbalin a naregta iti ministerio, a ‘nasged iti espiritu.’

Kinapakumbaba ken Kinaemma

7. Apay a rumbeng nga agserbitayo buyogen ti kinapakumbaba ken kinaemma?

⁷ Basaen ti Roma 12:3, 16. Dagiti sagut a nalabit nga ik-ikutantayo ket maigapu iti “di kaikarian a kinamanangngaasi” ni Jehova. Kuna ni Pablo: “Ti panagbalinmi a makaanayen a kualipikado agtaud iti Dios.” (2 Cor. 3:5) Gapuna, ditay koma itan-ok ti bagitayo. Sipapakumbaba koma a bigbigentayo a bendision ti Dios ti aniaman a nagapuanantayo iti ministerio, saan ket a gapu iti abilidadtayo. (1 Cor. 3:6, 7) Maitunos iti dayta, kuna ni Pablo: “Ibagak iti tunggal maysa kadakayo dita a saanna a panunoten nga ad-adda ti bagina ngem iti rebbengna a panangpanunot.” Napateg nga adda panagraemtayo iti bagitayo ken maaddaantayo iti rag-o ken pannakapnek bayat nga agserserbitayo. Nupay kasta, maliklikantayo ti agbalin a napangas no naemmatayo wenno bigbigentayo dagiti limitasiontayo. Kayattayo ti “maaddaan iti nasimbeng a panagpampanunot.”

8. Kasano a maliklikantayo ti ‘agmasirib iti bukodtayo a matmata’?

⁸ Kinamaag nga ipangastayo dagiti magapuanantayo. ‘Ti Dios ti nangpadakkel iti dayta.’ (1 Cor. 3:7) Kuna ni Pablo a ti tunggal kameng ti kongregasion ket inikkan ti Dios iti “rukod ti pammati.” Imbes a panunotentayo a natantan-oktayo ngem kadagiti sabsabali, masapul a bigbigentayo nga adda met magapgapuananda maitunos iti rukod ti pammati a naited kadakuada. Kinuna pay ni Pablo: “Panunotenyo ti sabsabali iti isu met laeng a pamay-an kas iti bagbagiyo.” Iti sabali a suratna, kunana pay nga ‘awan ti aniaman nga aramidentayo gapu iti rinnupir wenno gapu iti panangipasindayaw iti bagi, no di ket buyogen ti kinapakumbaba iti isip nga ibilangtayo a ti dadduma nangatngatoda ngem kadatayo.’ (Fil. 2:3) Kasapulan ti pudno a kinapakumbaba ken panagregget tapno masursurotayo a bigbigen a natantan-ok dagiti kakabsattayo ngem kadatayo iti dadduma a pamay-an. Ti kinapakumbaba lapdannatayo nga ‘agmasirib iti bukodtayo a matmata.’ Nupay dagiti espesial a pribilehio mangyegda iti atension kadagiti dadduma, amintayo ti maaddaan iti dakkel a rag-o no aramidentayo dagiti “nababa a bambanag,” dagiti nanumo nga annongen a masansan a di madmadlaw dagiti tattao.​—1 Ped. 5:5.

Nakristianuan a Panagkaykaysa

9. No maipapan kadagiti napulotan iti espiritu a Kristiano, apay nga inyarig ida ni Pablo kadagiti kameng ti bagi?

⁹ Basaen ti Roma 12:4, 5, 9, 10. Inyarig ni Pablo dagiti napulotan a Kristiano kadagiti kameng ti bagi nga agserserbi a sangsangkamaysa iti sidong ti Uloda, ni Kristo. (Col. 1:18) Impalagipna kadagiti napulotan iti espiritu a Kristiano a ti maysa a bagi ket addaan iti adu a kameng a nagduduma ti akemda ken ‘nupay aduda, maymaysada a bagi a naikaykaysa ken Kristo.’ Umasping iti dayta, indagadag ni Pablo kadagiti napulotan a Kristiano idiay Efeso: “Babaen ti ayat dumakkeltayo koma iti amin a bambanag kenkuana nga isu ti ulo, ni Kristo. Manipud kenkuana ti intero a bagi, gapu ta natunos ti pannakasangalna ken naaramid nga agtitinnulong babaen ti tunggal nagsuopan a mangipaay iti kasapulan, maitunos iti panagtignay ti tunggal sinaggaysa a kameng iti maitutop a rukod, agaramid a maipaay iti idadakkel ti bagi maipaay iti mismo a pannakapabilegna iti ayat.”​—Efe. 4:15, 16.

10. Ania nga autoridad ti masapul a bigbigen ti “sabsabali a karnero”?

¹⁰ Nupay ti “sabsabali a karnero” ket saan a kameng ti bagi ni Kristo, adu ti masursuroda iti daytoy nga ilustrasion. (Juan 10:16) Ni Pablo kinunana a ni Jehova ‘impasakupna met ti amin a bambanag iti baba dagiti saka ni Kristo, ket pinagbalinna nga ulo iti amin a bambanag iti kongregasion.’ (Efe. 1:22) Ita, ti sabsabali a karnero ket kameng ti “amin a bambanag” nga impasidong ni Jehova iti kinaulo ti Anakna. Karamanda met iti ‘sanikua’ nga intalek ni Kristo iti ‘matalek ken masirib nga adipenna.’ (Mat. 24:45-47) Ngarud, dagidiay addaan iti naindagaan a namnama masapul a bigbigenda ni Kristo kas Uloda ken agpasakupda iti matalek ken masirib nga adipen ken iti Bagi a Manarawidwid ken kadagiti lallaki a nadutokan a mangaywan iti kongregasion. (Heb. 13:7, 17) Makatulong daytoy iti Nakristianuan a panagkaykaysada.

11. Nakaibatayan ti panagkaykaysatayo, ken ania pay ti imbalakad ni Pablo?

¹¹ Naibatay dayta a panagkaykaysa iti ayat, ti “naan-anay a singgalut ti panagkaykaysa.” (Col. 3:14) Iti Roma kapitulo 12, impaganetget daytoy ni Pablo idi kinunana a ti panagayattayo ket nasken nga “awan koma ti panaginsisingpetna” ken masapul nga agbalintayo a ‘nalailo iti maysa ken maysa’ iti “nainkabsatan nga ayat.” Agresulta dayta iti panagririnnaem. Kuna ti apostol: “Iti panangipakita ti pammadayaw iti maysa ken maysa mangidaulokayo.” Siempre, agduma ti ayat ken ti panagbalin a napanuynoy. Masapul nga aramidentayo ti amin a kabaelantayo tapno agtalinaed a nadalus ti kongregasion. Idi nangbalakad ni Pablo maipapan iti ayat, innayonna: “Karurodyo ti dakes, kumpetkayo iti naimbag.”

Kinamanagpadagus

12. No maipapan iti kinamanagpadagus, ania ti masursurotayo kadagiti Kristiano iti nagkauna a Macedonia?

¹² Basaen ti Roma 12:13. Ti panagayat kadagiti kakabsattayo tignayennatayo a ‘mangiranud kadagiti kasapulan dagiti sasanto’ sigun iti kabaelantayo. Nupay nakurapaytayo, mabalintayo nga iranud ti adda kadatayo. Iti surat ni Pablo kadagiti Kristiano idiay Macedonia, kinunana: “Kabayatan ti dakkel a subok iti sidong ti pannakaparigatda ti kinaruay ti rag-oda ken ti nakaro a kinakurapayda pinaglaplapusananna ti kinabaknang ti kinamanagparaburda. Ta maitunos iti pudno a kabaelanda, wen, paneknekak, daytoy idi ket nalablabes ngem iti pudno a kabaelanda, bayat nga iti kabukbukodanda a nakem nagpakpakaasida kadakami buyogen ti kasta unay a panagdawdawat iti pribilehio a siaasi a panangted ken iti pannakiraman iti ministerio a naikeddeng kadagiti sasanto [idiay Judea].” (2 Cor. 8:2-4) Nupay napanglawda, nakaparparabur dagiti Kristiano idiay Macedonia. Ibilangda a pribilehio ti tumulong kadagiti agkasapulan a kakabsat idiay Judea.

13. Ania ti kayat a sawen dagiti sasao a “surotenyo ti dalan ti kinamanagpadagus”?

¹³ Ti sasao a “surotenyo ti dalan ti kinamanagpadagus” ket patarus ti Griego nga ebkas a mangipasimudaag iti sidadaan a panagtignay. Impatarus dayta ti The New Jerusalem Bible kas “panangbirok kadagiti gundaway a maipakita ti kinamanagpadagus.” No dadduma, maipakita ti kinamanagpadagus babaen ti panangawis iti maysa para iti pannangan, ken maapresiar dayta no nabuyogan iti ayat. Ngem no datayo ti mangyun-una, adu ti pamay-an a maipakitatayo ti kinamanagpadagus. No kas pagarigan ta saantay a kabaelan nga iyawis ti maysa a pannangan, maipakitatayo ti kinamanagpadagus babaen ti panangyawis iti simple a merienda.

14. (a) Ania dagiti sao a nangbukel iti Griego nga ebkas a naipatarus a “kinamanagpadagus”? (b) Iti ministerio, kasanotayo a maipakita ti pannakaseknantayo kadagiti ganggannaet?

¹⁴ Ti kinamanagpadagus ramanenna met ti panangmatmattayo kadagiti sabsabali. Ti Griego a sao a naipatarus a “kinamanagpadagus” ket buklen ti dua a sao a kaipapananna “ayat” ken “ganggannaet.” Ania ti panangmatmattayo kadagiti ganggannaet? Ti maysa a pamay-an a maipakita dagiti Kristiano ti kinamanagpadagusda ket ti panangikagumaanda nga agadal iti sabali a lenguahe tapno maikasabada ti naimbag a damag kadagiti ganggannaet nga adda iti teritoriada. Ngem adu kadatayo ti saan a makabael nga agsursuro iti sabali a lenguahe gapu iti kasasaad. Kaskasdi, amintayo ket makatulong kadagiti ganggannaet babaen ti panangusar iti bokleta a Good News for People of All Nations, a naglaon iti mensahe ti Biblia iti adu a lenguahe. Adda kadi nasayaat a nagapuananyo gapu iti panangusaryo iti dayta a bokleta iti ministerio?

Empatia

15. Kasano nga inyulidan ni Jesus ti balakad iti Roma 12:15?

¹⁵ Basaen ti Roma 12:15. Ti balakad ni Pablo iti daytoy a bersikulo ket magupgop iti kastoy: Mangipakitakayo iti empatia. Masapul a sursuruentayo ti makipagrikna ken ikabiltayo ti bagitayo iti sasaaden ti dadduma. No nasgedtayo iti espiritu, agminar iti langatayo ti pannakipagrag-o wenno pannakipagladingittayo. Idi siraragsak a nagsubli dagiti 70 nga adalan ni Kristo kalpasan ti panangasabada tapno ipadamagda dagiti nasayaat a nagapuananda, ni Jesus a mismo “naglaplapusanan ti rag-ona iti nasantuan nga espiritu.” (Luc. 10:17-21) Nakipagrag-o kadakuada. Iti sabali a bangir, ‘nakipagsangit ni Jesus kadagiti tattao nga agsangsangit’ idi natay ti gayyemna a ni Lazaro.​—Juan 11:32-35.

16. Kasanotayo a maipakita ti empatia ken siasino ti nangnangruna a mangipakita iti dayta?

¹⁶ Kayattayo a tuladen ti ulidan ni Jesus iti panangipakita iti empatia. No naragsak ti padatayo a Kristiano, makipagragsaktayo kenkuana. Ngem no naladingit dagiti kakabsattayo, makipagladingittayo koma kadakuada. Masansan a mabang-aran dagiti kapammatiantayo nga agladladingit no iwayaantayo ti umimdeng kadakuada buyogen ti simpatia. Ken no dadduma, kasta unay ti pannakatukay ti pusotayo nga uray la makasangittayo pay. (1 Ped. 1:22) Dagiti panglakayen ti nangnangruna a mangyaplikar iti balakad ni Pablo no maipapan iti panangipakita iti empatia.

17. Ania ti naadaltayo iti Roma kapitulo 12, ken ania ti mailawlawag iti sumaganad nga artikulo?

¹⁷ Dagiti nausigtayo a bersikulo iti Roma kapitulo 12 ket nangted kadagiti balakad nga agaplikar iti biagtayo kas Kristiano ken iti relasiontayo kadagiti kakabsat. Iti sumaganad nga artikulo, usigentayo dagiti dadduma pay a bersikulo dayta a kapitulo, a mangilawlawag no kasanotayo a rumbeng a matmatan ken kalangen dagiti tattao iti ruar ti kongregasion Kristiano, a pakairamanan dagiti bumusbusor ken manangidadanes.

Repaso

• Kasano a maipakitatayo a ‘nasgedtayo iti espiritu’?

• Apay a nasken nga agserbitayo iti Dios buyogen ti kinapakumbaba ken kinaemma?

• Kadagiti ania a pamay-an a maipakitatayo ti empatia ken asi kadagiti kapammatiantayo?

[Dagiti Ladawan iti panid 4]

Apay a makiramantayo kadagiti Nakristianuan nga aktibidad?

[Ladawan iti panid 6]

Kasano a ti tunggal maysa kadatayo ket makatulong kadagiti ganggannaet a makasursuro maipapan iti Pagarian?