LEKSION 53
Mangparagsak Koma ken Jehova Dagiti Ar-aramidem No Agrelrelakska
Ni Jehova ket “naragsak a Dios.” (1 Timoteo 1:11) Kayatna nga agbalintayo a naragsak ken ma-enjoy-tayo ti agbiag. Maragsakan no aginanatayo nga agtrabaho tapno agrelaks. Iti daytoy a leksion, kitaenta no kasanotayo a ma-enjoy ti panagrelaks wenno panaglinglingaytayo a maparagsaktayo latta ni Jehova.
1. Ania ti masapul a panunotentayo no agpilpilitayo iti paglinglingayan?
Ania ti kayatmo nga aramiden no agrelrelakska? Adda dagiti mayat nga agyan laeng iti balayda—agbasa iti libro, agdengngeg iti musika, agbuya iti pelikula, wenno aginternet. Adda met dagiti kaykayatda ti makikadua kadagiti gagayyemda—ag-hiking, ag-swimming, wenno agay-ayam iti isports. Aniaman ti kayattayo nga aramiden, masapul a siguraduentayo a ti aramidentayo no agrelakstayo ket “makaay-ayo iti Apo.” (Efeso 5:10) Napateg a maawatantayo dayta ta adu a paglinglingayan ita ti adda laokna a kinaranggas, seksual nga immoralidad, wenno espiritismo, a kagura ni Jehova. (Basaen ti Salmo 11:5.) Ania ti makatulong kadatayo nga agpili iti nasayaat a paglinglingayan?
No dagiti mangay-ayat ken Jehova ti pakigayyemantayo, nasayaat ti impluensiada kadatayo ken iti panagpilitayo iti paglinglingayan. Kas iti naammuantan iti napalabas a leksion, “ti makikadkadua iti masirib agbalinto a masirib.” Ngem no kanayontayo a makikadua kadagiti tattao a saan a mangay-ayat kadagiti estandarte ti Dios, ‘dakesto ti pagtungpalantayo.’—Proverbio 13:20.
2. Apay nga importante a kontrolentayo ti oras nga us-usarentayo nga aglinglingay?
Uray no nasayaat ti paglinglingayantayo, saan koma a sobra ti us-usarentayo nga oras para iti dayta. Ngamin, baka awanen ti orastayo para kadagiti mas importante a bambanag. Parparegtaennatayo ti Biblia nga ‘usarentayo ti tiempotayo iti kasayaatan a pamay-an.’—Basaen ti Efeso 5:15, 16.
AMMUEM TI AD-ADU PAY
Ammuem no kasano ti agpili iti nasayaat a paglinglingayan.
3. Liklikam dagiti dakes a paglinglingayan
Apay a masapul a pilientayo a naimbag dagiti paglinglingayantayo? I-play ti VIDEO, sa pagsaritaan dagiti sumaruno a saludsod.
Ania ti pagpadaan ti dadduma a paglinglingayan ita iti panaglalaban dagiti gladiator a paglinglingayan idi dagiti taga-Roma?
Iti video, ania ti nasursuro ni Danny maipapan iti paglinglingayan?
Basaen ti Roma 12:9, sa pagsaritaan daytoy a saludsod:
Kasano a makatulong daytoy a teksto tapno makapilika iti nasayaat a paglinglingayan?
Ania dagiti kagura ni Jehova? Basaen ti Proverbio 6:16, 17 ken Galacia 5:19-21. Kalpasan a mabasa ti tunggal teksto, pagsaritaan daytoy a saludsod:
Ania kadagiti banag a nadakamat kadagitoy a bersikulo ti adda kadagiti paglinglingayan ita?
No kasano ti agpili iti nasayaat a paglinglingayan
Isaludsodmo iti bagim:
Ania? Adda kadi laokna a banag a kagura ni Jehova?
Kaano? Ibusenna kadi ti orasko para kadagiti mas importante a banag?
Asino? Agbalinak kadi a nadekket wenno kanayonko kadi a makadua dagiti tattao a saan a mangay-ayat ken Jehova?
Nataltalgedka no adaywam dagiti posible a peligro. Masapul ngarud nga adaywantayo ti aniaman a paglinglingayan a posible a pagdaksantayo
4. Usarem a naimbag ti orasmo
I-play ti VIDEO, sa pagsaritaan ti sumaruno a saludsod.
Uray no saan a dakes ti buybuyaen ti kabsat iti video, ania ti epekto kenkuana ti adu nga oras nga us-usarenna nga aglinglingay?
Basaen ti Filipos 1:10, sa pagsaritaan daytoy a saludsod:
Kasano a makatulong daytoy a teksto tapno ammotayo no kasano kaadu nga oras ti usarentayo nga aglinglingay?
5. Piliem ti nasayaat a paglinglingayan
Uray no adda dagiti paglinglingayan a kagura ni Jehova, adu latta dagiti ma-enjoy-tayo nga aramiden a saanna a kagura. Basaen ti Eclesiastes 8:15 ken Filipos 4:8, sa pagsaritaan daytoy a saludsod:
Ania a nasayaat a paglinglingayan ti magusgustuam?
Ma-enjoy-mo dagiti nasayaat a paglinglingayan
KUNA TI DADDUMA: “Saan met a dakes ti agbuya wenno agay-ayam iti adda kinaranggas, immoralidad, wenno espiritismona, basta saanmo nga ar-aramiden.”
Ania ti ibagam?
SUMARIO
Kayat ni Jehova a pilientayo ti nasayaat a paglinglingayan ken ma-enjoy-tayo dayta.
Rebiu
Ania dagiti paglinglingayan a masapul a liklikan dagiti Kristiano?
Apay a masapul a panunotentayo no kasano kaadu nga oras ti us-usarentayo nga aglinglingay?
Apay a kayatmo dagiti paglinglingayan a mangparagsak ken Jehova?
AGDISKOBREKA PAY
Ammuem no asino ti makinresponsabilidad nga agpili iti paglinglingayantayo.
Kitaem no kasanoka a makaaramid iti umiso a desision no maipapan iti paglinglingayan.
“Makagunggona Kadi ti Paglinglingayam?” (Ti Pagwanawanan, Oktubre 15, 2011)
Iti artikulo a “Naisardengko Metten ti Panangidumduma,” kitaem no apay a binalbaliwan ti maysa a lalaki dagiti pilpilienna a paglinglingayan.
“Ti Biblia Balbaliwanna ti Biag” (Ti Pagwanawanan, Pebrero 1, 2010)
Kitaem no kasano a nakaaramid ti maysa nga ina iti umiso a desision maipapan iti paglinglingayan nga adda koneksionna iti espiritismo.
Liklikam Dagiti Paglinglingayan nga Adda Koneksionna iti Espiritismo (2:02)