“Itultuloyyo a Patgen ti Kakasta a Tattao”

“Bigbigenyo ngarud dagiti kakasta.”​—1 CORINTO 16:18.

1. Ania a kita dagiti tattao ti nangnangruna nga impatpateg ni apostol Pablo, ket aniat’ insuratna maipapan iti maysa kadagita a Kristiano?

DAGITI kakasta a tattao a nangnangruna nga impateg ni apostol Pablo ket isu dagidiay situtulok a mangusar ti pigsada nga awan panangikedkedna a maipaay ken Jehova ken kadagiti kakabsatda. Iti maysa kadagita a katrabahuan, nagsurat ni Pablo: “Gapuna awatenyo iti biang ti Apo a mapakuyogan ti amin a ragsak; ket itultuloyyo a patgen ti kakasta a tattao, ta gapu iti panagserbi iti Apo, iti ngangngani ipapatay nga impeggadna ti biagna.”​—Filipos 2:29, 30.

2. Iti siasino ti nakautangantayo ti naisangsangayan a konsiderasion, ken apay?

² Itatta, kadagiti nasurok a 55,000 a kongregasion dagiti Saksi ni Jehova, nagadu dagiti nasasayaat a Kristiano a lallaki a rebbengna nga apresiaren wenno patgentayo gapu iti kinagagetda iti tengnga dagiti kakabsattayo. Iti panangipakitana a rebbengna a patgentayo ti kakasta a tattao, kuna ni Pablo: “Ket dawatenmi kadakayo, kakabsat, a bigbigenyo dagiti agbannog iti tengngayo ken mamangulo kadakayo iti Apo ken mamalbalakad kadakayo; ket patgenyo koma unay ida babaen ti ayat a maipanggep iti aramidda. Agtalinaedkayo a sitatalna.”​—1 Tesalonica 5:12, 13.

3. (a) Aniat’ makatulong kadatayo nga agbalin a natalna iti maysa ken maysa? (b) Kadagiti ania a bambanag ti rebbeng a pangipakitaan dagiti panglakayen ti ulidan?

³ Ti maiyanatup a panangipateg kadagiti amin a kakabsattayo a lallaki ken babbai, ken nangnangruna kadagiti nagagaget a panglakayen, ket awan duadua nagpateg a banag iti sitatalna a panagbiag iti uneg dagiti kongregasiontayo. Iti daytoy, kas kadagiti amin a paset ti Nakristianuan a panagbiag, rebbeng a dagiti panglakayen ti agbalin nga “ulidan iti arban.” (1 Pedro 5:2, 3) Nupay kasta, agpapan pay dagiti panglakayen ti maiyanatup a manginanama a patgen dagiti kakabsat gaput’ kinagagetda, rebbeng a mangipakitada met ti ulidan iti panangipakita ti rumbeng a konsiderasion iti maysa ken maysa.

“Agpipinnadayaw iti Maysa ken Maysa”

4, 5. (a) Ania ti mangipakpakita nga inapresiar ni apostol Pablo dagiti nagagaget a panglakayen? (b) Aniat’ insuratna kadagita a Kristiano idiay Roma, ken apay a dagiti sasaona agaplikarda nangnangruna kadagiti panglakayen?

⁴ Nangted ti nasayaat nga ulidan ni apostol Pablo iti daytoy a banag. Kas nakitatayo iti napalabas nga artikulo, minatmatanna dagiti naimbag a bambanag kadagiti kakabsatna a lallaki ken babbai. Ket saanna laeng a pinaregta dagiti Kristiano nga agayat ken pagraeman dagiti nagagaget a panglakayen no di ket impakitana met a mismo ti maiparbeng a panangipateg kadakuada. Nalawag nga impatpategna dagita a kita ti tattao.​—Idiligyo ti Filipos 2:19-25, 29; Colosas 4:12, 13; Tito 1:4, 5.

⁵ Iti suratna kadagiti Kristiano idiay Roma, insurat ni Pablo: “No maipapan iti ayat nga inkakabsatan agdidinnungngokayo. No maipapan iti panagpipinnadayaw ipangpangrunayo ti sabali. Saan koma a mapukaw ti regtayo. Nasgedkayo iti espiritu. Agserbikayo ken Jehova.” (Roma 12:10, 11) Pudno, dagitoy a sasao ti agaplikar a nangnangruna kadagiti panglakayen a Kristiano. Isuda, kadagiti isuamin a Kristiano, ti rebbeng a mangidaulo iti panagpipinnadayaw iti maysa ken maysa.

6. (a) Aniat’ rebbeng liklikan dagiti panglakayen nga aramiden, ken apay? (b) Kasano a maitan-ok dagiti panglakayen ti panagtalek ti kongregasionda iti intero a bagi dagiti panglakayen?

⁶ Dagiti panglakayen ti rebbeng a nangnangruna a naannad a di agar-aramid kadagiti makaumsi a komkomento maipapan kadagiti padada a manangaywan. Awan uray maysa a panglakayen nga addaan kadagiti isuamin a Nakristianuan a kualidad iti kangatuan a rukodna, ta imperpektoda amin. Dadduma makalab-awda kadagiti dadduma a kualidad, ngem nakapkapuyda met kadagiti dadduma. No dagiti panglakayen addaanda kadagiti maiyanatup a nainkabsatan nga ayat ken dungngo iti maysa ken maysa, saanda nga ik-ikkan importansia unay ti pagkapuyan ti maysa ken maysa. Iti pannakipatpatangda kadagiti kakabsat, itudoda ketdi dagiti napipigsa a punto dagiti padada a panglakayen. Babaen ngarud iti kasta a panangidaulo ti panangipakita ti panagpipinnadayaw iti maysa ken maysa, patantan-okenda ti panagtalek ti kongregasion iti intero a bagi ti panglakayen.

Panagtrabaho a Sangsangkamaysa kas Maysa a Bagi

7. Aniat’ makatulong kadagiti panglakayen a makapagtrabaho a sangsangkamaysa, ken kasanoda a maipakita daytoy?

⁷ Kalpasan ti panagsaona maipapan “kadagiti sagut ti lallaki” nga inaramid ni Kristo iti kongregasionna ditoy daga maipaay iti panggep a pannakapaan-anay wenno panangbalbaliw kadagiti kakabsat ken maipaay iti ministerial nga ar-aramid, ni apostol Pablo ti nagsurat: “Rumang-aytayo koma kadagiti isuamin ken Kristo, isu nga ulo.” (Efeso 4:7-15) Ti panangbigbig ken Kristo kas ti aktibo nga Ulo ti kongregasion, ken dagiti panglakayen agpasakupda koma iti makannawan nga ima ti pannakabalinna, ket mamagkaykaysa a banag iti uneg ti tunggal bagi dagiti panglakayen. (Efeso 1:22; Colosas 1:18; Apocalipsis 1:16, 20; 2:1) Sapulendanto ti panangiwanwanna babaen ti nasantuan nga espiritu, dagiti prinsipio ti Biblia, ken ti panangiwanwanwan nga ipapaay ti Bagi a Manarawidwid “ti matalek ken naannad nga adipen.”​—Mateo 24:45-47; Aramid 15:2, 28; 16:4, 5.

8. Aniat’ rebbeng a laglagipen koma amin a panglakayen, ken kasanoda a maipakita ti panagpipinnadayawda?

⁸ Mabigbig dagiti panglakayen a ni Kristo, babaen iti nasantuan nga espiritu, maiturongna ti isip ti asinoman a panglakayen iti bagi dagiti panglakayen a mangted iti prinsipio ti Biblia nga isut’ kasapulan a bumagay iti aniaman a situasion wenno mangaramid iti aniaman a napateg a desision. (Aramid 15:6-15) Awan asinoman a panglakayen a mangbukbukod ti nasantuan nga espiritu iti uneg ti bagi. Dagiti panglakayen ti makaipakita ti dayaw iti maysa ken maysa babaen ti panagimdeng a siaannad iti asinoman nga adda iti bilangda a mangipalagip iti tema nga adda a mapagsasaritaan iti maysa a prinsipio ti Biblia wenno instruksion a naggapu iti Bagi a Manarawidwid.

9. (a) Ania dagiti naespirituan a kualidad a makatulong iti manangaywan a maliklikan ti panagbalinna a manangdominar kadagiti padana a panglakayen? (b) kasano a maipakita ti panglakayen nga isu ti “rasonable,” ken kasano a ti umuna-siglo a bagi a manarawidwid nangipakita ti ulidan iti daytoy a banag?

⁹ Ti Nakristianuan a kinanumo, kinaemma, ken kinapakumbaba ti manglapped iti asinoman a panglakayen a mangpadpadas a mangdominar kadagiti kakabsatna ken ipapilit ti opinionna. (Proverbio 11:2; Colosas 3:12) Mabalin a ti maysa a manangaywan a Kristiano ket addaan nakapigpigsa ken napasnek a panangmatmat iti maysa a banag. Ngem no makitana a dagiti padana a panglakayen ti addaan kadagiti Nainkasuratan ken nateokratikuan a rason a maiduma kenkuana, isu koma ti ‘agbalin a nanumo’ ken ipakitana nga isu ti “rasonable” babaen ti itutulokna iti panangmatmat ti kaaduan.a (Lucas 9:48; 1 Timoteo 3:3) Surotenna ti nagsayaat nga ulidan nga impakita ti umuna-siglo a bagi a manarawidwid, a, kalpasan ti Nainkasuratan a diskusionda, ken iti sidong ti panangiwanwan ni Kristo babaen iti nasantuan nga espiritu, isuda ti “nagmaymaysa.”​—Aramid 15:25.

10. (a) Aniat’ mangpaneknek a ti panangdutok iti bagi dagiti panglakayen iti kada kongregasion ket maysa nga urnos a naibatay iti Biblia? (b) Kasanot’ panangilawlawag ti libro nga Organisado a Mangitungpal ti Ministeriotayo dagiti bentaha daytoy nga urnos?

¹⁰ Ti pannakadutok ti maysa a bagi ti panglakayen iti tunggal kongregasion a mangidaulo ket naibatay iti ulidan nga impakita ti immuna a kongregasion Kristiano. (Filipos 1:1; 1 Timoteo 4:14; Tito 1:5; idiligyo ti footnote ti sao a “papanglakayen” idiay Tito 1:5 idiay The Jerusalem Bible.) No gupgopen ti kinasirib daytoy nga urnos, ti libro nga Organisado a Mangitungpal ti Ministeriotayo (panid 37) ti nagkuna: “Dadduma kadagiti panglakayen mabalin a naisangsangayanda iti maysa a kualidad ngem iti sabali, ket mabalin met a dadduma iti bagi ti nalalaing kadagidiay a kualidad a mabalin a pagkapuyan met ti maysa. Ngarud ti epektona, iti kaaduan a panagsao, ti intero a bagi maaddanto iti bunggoyda amin dagiti nasasayaat a kualidad a nasken iti panangaramidda iti umiso a panangaywan iti kongregasion ti Dios.”

Panagririnnaem Kadagiti Bagi ti Panglakayen

11, 12. (a) Apay nga ad-adu ti maaramidan ti bagi dagiti panglakayen ngem iti panagtignay nga agmaymaysa dagiti miembrona? (b) Kasano a nakilangen ni Kristo Jesus ken ni apostol Pablo kadagiti bagi ti panglakayen a kasta, ket ania a balakad ti naited?

¹¹ Gapuna, ti bagi dagiti panglakayen ket maysa a Nainkasuratan a bagi a ti intero irepresentarna ti ad-adda pay ngem ti dagup dagiti paspasetna. No agtataripnongda ken agkararag a maipaay iti panangiwanwan ni Jehova babaen ken Kristo ken ti nasantuan nga espiritu, makaaramidda kadagiti desision a saanda koma a nagnagtengan no isuda koma ti nagkikinnonsultar a sinaggaysa. No agtataripnong a sangsangkamaysa dagiti panglakayen, ti nadumaduma a kualidadda ti agtignay ket mangpataud ti bunga a mangisarming ti panangiwanwanwan ni Kristo kadagiti bambanag.​—Idiligyo ti Mateo 18:19, 20.

¹² A ni Kristo nakilangen a kasta kadagiti bagi ti panglakayen idi ket ipamatmat dagiti mensahe nga impatulodna “kadagiti pito a bituen,” wenno “dagiti anghel kadagiti pito a kongregasion”idiay Asia Menor. (Apocalipsis 1:11, 20) Ti umuna kadagidiay a mensahe ket naipatulod iti kongregasion idiay Efeso babaen iti ‘anghelna,’ wenno bagi dagiti napulotan a manangaywan. Agangay 40 a tawen sakbayna, pinaayaban ni apostol Pablo ti bagi dagiti panglakayen ti Efeso idiay Mileto a maipaay iti espesial a miting nga isut’ kaduada. Impalagipna kadakuada nga aywananda ti bagbagida ken ipastoranda ti kongregasion.​—Aramid 20:17, 28.

13. Apay a dagiti panglakayen rebbeng nga aywananda ti espiritu nga ipakpakitada iti uneg ti lokal a bagi dagiti panglakayenda ken iti sangsangkamaysa a relasionda kadagiti dadduma a bagi dagiti panglakayen?

¹³ Ti bagi dagiti panglakayen rebbeng a nangnangruna nga aywananda ti panangsalimetmetda ti nasayaat, positibo nga espiritu iti nagbabaetanda ken iti uneg ti kongregasionda. (Aramid 20:30) No kasano a ti maysa a Kristiano ti mangiparparangarang iti maysa a kita ti espiritu, kasta met ti bagi dagiti panglakayen ken dagiti intero a kongregasion makapatanorda ti partikular nga espiritu. (Filipos 4:23; 2 Timoteo 4:22; Filemon 25) Mapaspasamak no maminsan a dagiti panglakayen a pagraraemanda ti maysa ken maysa iti mismo a kongregasionda ti mangipakpakita ti kinakurang ti pannakitunos iti sabali a bagi dagiti panglakayen. Kadagiti siudad a sadiay sumagmamano a kongregasion ti aggigimong iti isu met laeng a Kingdom Hall, no maminsan tumaud ti di panagtutunos iti nagbabaetan ti bagi dagiti panglakayen maipapan iti iskediol ti panaggigimong, dagiti pagbeddengan ti teritoria, panagbangon ti Kingdom Hall, ken dadduma pay. Dagiti isu met laeng a prinsipio ti kinanumo, kinaemma, kinapakumbaba, ken kinarasonable a mangituray kadagiti panglakayen iti tunggal bagi ti mangituray koma ti relasion iti nagbaetan dagiti bagi ti panglakayen. Nangbalakad ni apostol Pablo: “Maaramidda koma dagiti isuamin a banag tapno makapalaing.”​—1 Corinto 14:26.

Umno a Panagraem kadagiti Agdaldaliasat a Manangaywan

14. Ania pay a dadduma a kategoria dagiti panglakayen ti maikari a patpatgen, ken apay?

¹⁴ Ti sabali pay a naibatay iti Biblia nga urnos nga agan-andar iti kongregasion dagiti Saksi ni Jehova isu ti pannakasarsarungkarda a regular babaen kadagiti agakar-akar a panglakayen, a maaw-awagan dagiti manangaywan iti sirkito wenno distrito. (Aramid 15:36; 16:4, 5) Dagitoy, nangnangruna unay, isuda “dagiti panglakayen a mangidadaulo a naimbag.” Saan a nababbaba ngem kadagiti dadduma a panglakayen, rebbeng a “maibilangda koma a maikari iti dakkel a dayaw, nangruna dagiti agtrabaho iti sao ken pannursuro.”​—1 Timoteo 5:17.

15. Ania a balakad ti inted ni apostol Juan maipapan kadagiti agdaldaliasat a manag-ebanghelio?

¹⁵ Iti maikatlo a suratna, ni apostol Juan binabalawna ni Diotrefes agsipud ta “dina pay awaten dagiti kakabsat a sidadayaw.” (3 Juan Bersikulo 10) Dagitoy a kakabsat isuda dagiti agdaldaliasat a Kristiano a rimmuarda “gapu iti [nagan ni Jehova].” (3 Juan Bersikulo 7) Mabalin nga isudat’ naibaon kas manag-ebanghelio a mangikaskasaba ti naimbag a damag ken mangpabileg kadagiti kongregasion kadagiti il-ili a sinarsarungkaranda. Imbilin ni Juan a dagitoy nagagaget nga agakar-akar a manangaskasaba ti rebbeng a ‘maibaon iti dalanda a maikari iti Dios.’ (3 Juan Bersikulo 6) Innayon pay ti apostol: “Datayo, ngarud, obligadotayo a mangpasangbay kadagiti kakasta, tapno datayo koma ti katulongan ti kinapudno.” (3 Juan Bersikulo 8) Isudat’ masapul a maawat nga addaan panagraem.

16. Kasano nga amin a Kristiano itatta mabalinda a suroten ti ulidan ni Gayo iti “matalek a trabaho” kas inaramidna para kadagiti umuna-siglo a manag-ebanghelio, ken apay nga umiso daytoy?

¹⁶ Umasping met itatta, dagiti agdaldaliasat a manangaywan nga ibabaon ti Bagi a Manarawidwid a mangikaskasaba ti naimbag a damag ken tumulong kadagiti kongregasion ti rebbeng a mapagdagus a siaayat ken siraraem. Dagitoy a kakabsat ken ti assawada (no kasadoda, kas ti kaaduan kadakuada) ti situtulok a nangisuko ti panagnaedda iti napamaysa a pagtaengan. Isudat’ agdaldaliasat iti nagduduma a lugar, a masansan agpampannurayda iti kinamanagpadagus dagiti kakabsat a maipaay iti taraon ken katre a pagiddaanda. Ken Gayo, a siaayat a nangpasangbay kadagiti agdaldaliasat a manag-ebanghelio idi umuna a siglo K.P., nagsurat ni Juan: “Ay-ayatek, sika aramidem a matalek ti amin nga aramidem kadagiti kakabsat, uray pay ganggannaetda.” (3 Juan 5) Kasta met laeng itatta, dagidiay agdaldaliasat ‘gapu iti nagan ni Jehova’ ti maikari a maipateg ken maipakitaan ti ayat ken panagraem.

17. Kasanot’ rebbeng a panangipakita dagiti panglakayen ti kongregasion ti umiso a panagraemda kadagiti sumarsarungkar a pannakabagi ti Bagi a Manarawidwid?

¹⁷ Dagiti panglakayen, nangnangruna, ti rebbeng a mangipakita ti umiso a panagraem kadagitoy sumarsarungkar a pannakabagi ti Bagi a Manarawidwid. Naibaonda kadagiti kongregasion gapu kadagiti naespirituan a kualidadda ken kapadasandan, nga ad-adu ngem iti adu kadagiti lokal a panglakayen. Dadduma kadagitoy agdaldaliasat a manangaywan ti mabalin nga ub-ubingda iti tawen ngem kadagiti dadduma a panglakayen iti kongregasion a sarsarungkaranda. Ngem saan a maawat a rason dayta a dida pangipaayan ti umiso a panagraem. Mabalin a mariknada a masapul a timplaen ti panaggarasugas dagiti lokal a panglakayen iti panangirekomendar iti maysa a kabsat a lalaki nga agbalin kas ministerial nga adipen wenno panglakayen, a laglagipenda ti pakdaar ni Pablo ken ni Timoteo. (1 Timoteo 5:22) Nupay ikkan met ti bumisbisita a manangaywan ti konsiderasion kadagiti argumento dagiti lokal a panglakayen, dagiti panglakayen ti situtulok met koma nga agimdeng kenkuana ken magunggonaan met koma manipud iti nalawan a kapadasanna. Wen, masapul nga “itultuloy a patgen dagiti kakasta a tattao.”​—Filipos 2:29.

“Bigbigenyo Ngarud dagiti Kakasta”

18, 19. (a) Kasanot’ panangiyebkas ni Pablo ti panangapresiarna kadagiti katrabahuanna? (b) Ania a pangarigan ti mangipakpakita a ni Pablo saan a nagimula ti sakit ti nakem kontra kadagiti kakabsatna?

¹⁸ Iti umuna a suratna kadagiti taga Corinto, nagsurat ni Pablo: “Dawatek kadakayo, kakabsat: Ammoyo a dagiti sangakabbalayan ni Estefanas isuda ti immun-una a bungbunga ti Acaya ket indatonda ti bagida iti panagserbi kadagiti sasanto. A paiturayankayo kadakuada ken iti tunggal maysa a tumulong ken agbannog. Ket agragsakak gapu iti iyaay ni Estefanas ken ni Fortunato ken ni Acaico, ta ti nagkuranganyo pinunuanda. Ta rinagragsakda ti nakemko ken ti nakemyo. Bigbigenyo ngarud dagiti kasta a tattao.”​—1 Corinto 16:15-18.

¹⁹ Anian a nagsayaat, managparabur a kababalin ti adda ken Pablo kadagiti kakabsatna, a dadduma kadakuada ti saan a nasaknap ti nakaammuanda. Ngem inayat ni Pablo ida agsipud ta ‘tumultulong’ ken ‘agbambannogda’ iti panagreggetda a makapagserbi kadagiti sasanto. Nangted met ni Pablo ti natakneng nga ulidan iti pananglipaten iti napalabas. Nupay ni Juan Marcos ti nangpaay kenkuana bayat ti umuna a panagdaliasatda kas misioneros, iti kamaudiananna ni Pablo ti sibabara a nangirekomendar kenkuana iti kongregasion idiay Colosas. (Aramid 13:13; 15:37, 38; Colosas 4:10) Idi naibalud idiay Roma, inkalikagum ni Pablo ti kaadda koma ni Marcos, ta, kas kinunana, “[ni Marcos] matulongannak iti panagaywan.” (2 Timoteo 4:11) Awan dita ti awan kaes-eskanna a panagimulmula ti sakit ti nakem!

20. Kasano a dagiti Kristiano nga en heneral, ken dagiti panglakayen a partikular, ipakitada a patpatgenda dagiti matalek a manangaywan ken “itultuloyda a patpatgen dagiti kakasta a tattao”?

²⁰ Itatta iti tengnga ti ili ti Dios, nagadu dagiti napeklan a manangaywan a, kas ken Estefanas, ket pagserserbianda dagiti kakabsatda. Sigurado, addaanda ti kabukbukodan a bidbiddut ken pagkapuyan. Nupay kasta, ‘tumultulongda’ “iti matalek ken naannad nga adipen” ken ti Bagi a Manarawidwid, ken ‘agbambannogda’ iti trabaho a panangasaba ken panangtulong kadagiti kakabsatda. Rebbengna nga ‘itulnogtay ti bagbagitayo kadagiti kakasta a tattao,’ a patpatgen ida gapu kadagiti kualidadda, a di sapsapulen dagiti pagkurkuranganda. Rebbeng a dagiti panglakayen ti mangidaulo iti panangipakita ti maiparbeng a panangipateg ken panagraem kadagiti padada a panglakayen. Dagiti panglakayen masapul nga agtutunosda iti maysa ken maysa iti espiritu ti ayat ken panagkaykaysa. Amin bigbigenda koma ti pateg dagita a matalek a kakabsat ken “itultuloy a patgen dagiti kakasta a tattao.”​—Filipos 2:29.

[Dagiti Footnote]

Dagiti Punto a Marepaso

◻ Ania a kita ti tattao ti nangnangruna nga impatpateg ni Pablo, ken asino dagiti maikari ti espesial a konsiderasiontayo itatta?

◻ Kasanot’ rebbeng a panangipakita dagiti panglakayen ti panagpipinnadayawda?

◻ Apay a ti bagi dagiti panglakayen dakdakkel magapuananda ngem kadagiti miembroda nga agtigtignay nga agmaymaysa?

◻ Kadagiti ania a bambanag a ti maysa a bagi dagiti panglakayen maipakitada a padpadayawanda ti sabali a bagi dagiti panglakayen?

◻ Ania a kategoria dagiti manangaywan ti maikari a patpatgen unay, ken kasano a maipakita daytoy nga umiso a panagraem?

[Ladawan iti panid 15]

Rebbeng a dagiti panglakayen mangipakitada ti panangipateg iti maysa ken maysa

[Ladawan iti panid 18]

Ipakita ti ayat ken panagraem kadagiti agdaldaliasat a manangaywan