Sigagagar nga Ipakaammoyo ti Naimbag a Damag
“Nasgedkayo koma iti espiritu. Agpaadipenkayo ken Jehova.”—ROMA 12:11.
1, 2. Ania a kababalin ti ikagumaan dagiti Kristiano a taginayonen kas manangaskasaba iti naimbag a damag?
MARAGSAKAN ti maysa nga agkabannuag a lalaki iti baro a trabahona. Iti umuna nga aldawna iti trabaho, di makaidna nga agur-uray kadagiti bilin ti amona. Segseggaanna ti damo a maipaaramid kenkuana ket ipasnekna ti agtrabaho. Magagaran a mangaramid iti amin a kabaelanna.
2 Umasping iti dayta, datayo a Kristiano mabalintay nga ibilang ti bagbagitayo kas agdadamo a trabahador. Yantangay mangnamnamatayo nga agbiag nga agnanayon, maikuna a karugrugitay pay laeng nga agtrabaho para ken Jehova. Sigurado nga adu ti panggep ti Namarsua nga ipatrabaho kadatayo tapno agnanayon nga adda aramidentayo. Ngem ti kaunaan nga annongen nga inawattayo isu ti panangipakaammo iti naimbag a damag ti Pagarianna. (1 Tesalonica 2:4) Kasano ti panangmatmattayo iti daytoy nga annongen a naggapu iti Dios? Kas iti agkabannuag a lalaki, kayattay nga itungpal dayta iti amin a kabaelantayo, buyogen ti regta, rag-o—wen, buyogen ti gagar!
3. Ania ti kasapulan tapno agballigitayo kas ministro ti naimbag a damag?
3 Pudno a maysa a karit ti panangtaginayon iti kasta a positibo a kababalin. Malaksid iti ministeriotayo, adu pay dagiti rebbengentayo. Nalabit makabannog ken makapasikor ti dadduma kadagita. Kaaduanna, kabaelantay nga asikasuen dagitoy a di mabaybay-an ti ministeriotayo. Kaskasdi, mabalin nga agtultuloy ti kastoy a panagsakripisio. (Marcos 8:34) Impaganetget ni Jesus a nasken nga umagawatayo a sipipinget tapno agballigitayo kas Kristiano.—Lucas 13:24.
4. Kasano a maapektaran dagiti inaldaw a pakaringgoran ti naespirituan a panangmatmattayo?
4 Yantangay nagadu dagiti pakakumikoman, nalaka laeng ti mautoyan wenno madagsenan no dadduma. Dagiti “pakaringgoran iti biag” mabalin a pabaawenda ti regta ken ti panangipategtayo kadagiti nateokratikuan nga aktibidad. (Lucas 21:34, 35; Marcos 4:18, 19) Gapu iti kinaimperpektotayo, mabalin a maawan ‘ti ayat nga adda kadatayo idi damo.’ (Apocalipsis 2:1-4) Nalabit agbalin a kasla rutina laengen ti dadduma nga aspeto ti panagserbitayo ken Jehova. Kasano a mangipaay ti Biblia iti pammaregta a kasapulantayo tapno mataginayon ti regtatayo iti ministerio?
Kasla “Sumsumged nga Apuy” iti Pusotayo
5, 6. Kasano ti panangmatmat ni apostol Pablo iti pribilehiona a mangasaba?
5 Nakapatpateg ti ministerio nga intalek ni Jehova kadatayo, ket ditay koma tagtagilag-anen daytoy. Imbilang ni apostol Pablo a naindaklan a pribilehio ti panangikasaba iti naimbag a damag, ket iti panagriknana, saan a maikari a pakaitalkan dayta a pribilehio. Kinunana: “Kaniak, a maysa a tao a nanumnumo ngem ti kanunumuan kadagiti amin a sasanto, naited daytoy di kaikarian a kinamanangaasi, tapno ideklarak kadagiti nasion ti naimbag a damag maipapan kadagiti di matukod a kinabaknang ti Kristo ken ipakita kadagiti tattao no kasano a matarawidwidan ti sagrado a palimed a manipud iti di nakedngan a napalabas naitalimeng iti Dios, a namarsua iti isuamin a bambanag.”—Efeso 3:8, 9.
6 Agpaay a pagulidanantayo ti positibo a panangmatmat ni Pablo iti ministeriona. Iti suratna kadagiti taga Roma, kinunana: “Adda kinagagar iti biangko a mangideklara iti naimbag a damag.” Dina imbain ti naimbag a damag. (Roma 1:15, 16) Umiso ti panangmatmatna ket aggagar a mangitungpal iti ministeriona.
7. Iti suratna kadagiti taga Roma, ania ti imballaag ni Pablo?
7 Nabigbig ni apostol Pablo a nasken a mataginayon ti regta, isut’ gapuna a binalakadanna dagiti Kristiano idiay Roma: “Dikay agpalpallailang iti aramidyo. Nasgedkayo koma iti espiritu. Agpaadipenkayo ken Jehova.” (Roma 12:11) Ti Griego a sao a naipatarus nga “agpallailang” kaipapananna ti panagbalin a “nabannayat, nasadut.” Nupay saantay met a talaga nga agpalpallailang iti ministeriotayo, amintayo ket masapul a siputantayo dagiti aniaman a damo pay laeng a pagilasinan ti naespirituan a kinabannayat ket balbaliwantayo ti kababalintayo no madlawtayo a mapaspasamak dagita kadatayo.—Proverbio 22:3.
8. (a) Ania ti nagbalin a kasla “sumsumged nga apuy” iti puso ni Jeremias, ken apay? (b) Ania ti maadaltayo iti kapadasan ni Jeremias?
8 Matulongannatay met ti espiritu ti Dios no maupaytayo. Kas pagarigan, adda tiempo a naupay ni propeta Jeremias, ket kayatnan nga isardeng ti trabahona kas propeta. Kinunana pay maipapan ken Jehova: “Ti naganna saankonto a dakawaten, diakto met agsaon iti naganna.” Pagilasinan kadi daytoy ti nakaro a naespirituan a pagkapuyan ni Jeremias? Saan. Kinapudnona, ti nabileg nga espiritualidad ni Jeremias, ayatna ken Jehova, ken regtana maipaay iti kinapudno ti nangpakired kenkuana nga agtultuloy nga agipadto. Kinunana: “Adda ngarud iti pusok [ti sao ni Jehova] kas sumsumged nga apuy a narikpan kadagiti tultulangko, ket mautoyanak nga agitured, ket saanak a makaibtur.” (Jeremias 20:9) Natural laeng a maupay sagpaminsan dagiti matalek nga adipen ti Dios. Ngem no agkararagda a dumawat iti tulong ni Jehova, mabasana ti pusoda ket sidadaan nga itedna kadakuada ti nasantuan nga espirituna no, kas ken Jeremias, adda ti saona iti pusoda.—Lucas 11:9-13; Aramid 15:8.
“Dikay Iddepen ti Apuy ti Espiritu”
9. Ania ti makalapped iti panagtignay ti nasantuan nga espiritu kadatayo?
9 Binagbagaan ni apostol Pablo dagiti taga Tesalonica: “Dikay iddepen ti apuy ti espiritu.” (1 Tesalonica 5:19) Wen, dagiti tignay ken kababalin a maikaniwas kadagiti nadiosan a prinsipio malapdanda ti panagtignay ti nasantuan nga espiritu kadatayo. (Efeso 4:30) Annongen dagiti Kristiano ita nga ikasaba ti naimbag a damag. Dakkel ti panagraemtayo iti daytoy a pribilehio. Di pakasdaawan nga umsien dagidiay di makaammo iti Dios ti trabahotayo a panangasaba. Ngem no igagara a baybay-an ti maysa a Kristiano ti ministeriona, mabalin a maiddep ti apuy ti espiritu ti Dios a mangtigtignay kenkuana.
10. (a) Kasanonatayo a maapektaran ti panangmatmattayo iti padatayo a tao? (b) Ania a natan-ok a panangmatmat iti ministeriotayo ti nayebkas iti 2 Corinto 2:17?
10 Dagiti dadduma a saan a paset ti kongregasion Kristiano mabalin nga ibilangda ti ministeriotayo kas panagiwaras laeng kadagiti literatura. Adda met dagiti nalabit mangipagarup a mamalaybalaytayo tapno laeng makaur-or iti donasion. No palubosantayo dagiti kasta a negatibo a kapanunotan a mangapektar iti panangmatmattayo, mabalin a kissayanna ti kinaepektibotayo iti ministerio. Imbes nga ipalubostayo nga apektarandatayo dagiti kasta a panagpampanunot, kanayon nga adda koma kadatayo ti panangmatmat ni Jehova ken ni Jesus iti ministeriotayo. Inyebkas ni apostol Pablo ti kasta a natan-ok a panangmatmat idi kinunana: “Saankami a managlako iti sao ti Dios a kas iti adu a tattao, no di ket gapu iti kinapasnek, wen, kas naibaon manipud iti Dios, iti imatang ti Dios, a kadua ni Kristo, agsasaokami.”—2 Corinto 2:17.
11. Ania ti nakatulong kadagiti nagkauna a Kristiano nga agtalinaed a naregta uray iti sidong ti pannakaidadanes, ket ania ti masursurotayo kadakuada?
11 Di nagbayag kalpasan ti ipapatay ni Jesus, naidadanes dagiti adalanna idiay Jerusalem. Naballaagan ken nabilinda nga isardengdan ti mangasaba. Kaskasdi, kuna ti Biblia a “napnoda iti nasantuan nga espiritu ket situtured a sasawenda idi ti sao ti Dios.” (Aramid 4:17, 21, 31) Ti sasao ni Pablo ken Timoteo sumagmamano a tawen kalpasanna ipakitana ti positibo a kababalin a rumbeng a taginayonen dagiti Kristiano. Kinuna ni Pablo: “Ti Dios inikkannatayo saan a ti maysa nga espiritu ti kinatakrut, no di ket ti pannakabalin ken ti ayat ken ti kinasimbeng ti panunot. Gapuna dika ibain ti pangsaksi maipapan iti Apotayo, wenno uray kaniak a maysa a balud maigapu kenkuana, no di ket makipasetka iti panagsagaba iti dakes maipaay iti naimbag a damag maitunos iti pannakabalin ti Dios.”—2 Timoteo 1:7, 8.
Ania ti Rebbengentayo iti Padatayo a Tao?
12. Ania ti kangrunaan a makagapu nga ikasabatayo ti naimbag a damag?
12 Tapno umiso ti panangmatmattayo iti ministeriotayo, masapul nga umiso ti motibotayo. Apay a mangasabatayo? Naipakita ti kangrunaan a makagapu iti sasao ti salmista: “Dagiti sasantom bendituendakanto [Jehova]. Sasawendanto ti dayag ti pagariam, ken sarsaritaendanto ti pannakabalinmo; tapno ipakaammoda kadagiti annak dagiti tattao dagiti nabileg nga ar-aramidna, ken ti dayag ti nadaeg a pagarianna.” (Salmo 145:10-12) Wen, mangasabatayo tapno maidaydayaw ni Jehova iti publiko ken masantipikar ti naganna iti intero a sangatauan. Uray no manmano ti dumngeg kadatayo, maidaydayaw ni Jehova no agtultuloy nga iwaragawagtayo ti mensahe ti pannakaisalakan.
13. Ania ti mangtignay kadatayo a mangisarsarita kadagiti dadduma iti maipapan iti namnama iti pannakaisalakan?
13 Mangasabatayo met gapu iti ayattayo kadagiti tattao ken tapno ditay sungsungbatan ti biagda. (Ezequiel 33:8; Marcos 6:34) Mainaig iti daytoy, kinuna ni Pablo maipapan kadagidiay adda iti ruar ti kongregasion Kristiano: “Nakautangak agpadpada kadagiti Griego ken kadagiti Barbaro, agpadpada kadagiti masirib ken kadagiti nakuneng.” (Roma 1:14) Narikna ni Pablo a rebbengna nga ipakaammo ti naimbag a damag kadagiti tattao, yantangay pagayatan ti Dios a “maisalakan koma dagiti amin a kita ti tattao.” (1 Timoteo 2:4) Mariknatay met ita ti kasta nga ayat ken obligasion iti padatayo a tao. Ti ayat ni Jehova iti sangatauan ti nangtignay kenkuana a mangibaon iti Anakna ditoy daga tapno matay gapu kadakuada. (Juan 3:16) Dakkel a sakripisio dayta. Tultuladentayo ti ayat ni Jehova no usarentayo ti panawen ken pigsatayo a mangipakaammo kadagiti sabsabali iti naimbag a damag maipapan iti pannakaisalakan a naibatay iti daton ni Jesus.
14. Kasano ti panangdeskribir ti Biblia iti lubong nga adda iti ruar ti kongregasion Kristiano?
14 Ibilang dagiti Saksi ni Jehova dagiti padada a tattao kas posible nga agbalinto a Kristiano a kakabsatda. Masapul a mangasabatayo a situtured, ngem ti kinaturedtayo ket saan a kinaagresibo. Kinapudnona, nagaramat ti Biblia kadagiti agkakadagsen a sao maipapan iti lubong. Negatibo ti panangaramat ni Pablo iti mismo a sao a “lubong” idi dinakamatna ti “sirib daytoy a lubong” ken “nailubongan a tartarigagay.” (1 Corinto 3:19; Tito 2:12) Impalagip met ni Pablo kadagiti Kristiano sadi Efeso nga idi magmagnada “maitunos iti sistema ti bambanag daytoy a lubong,” ‘natayda’ iti naespirituan. (Efeso 2:1-3) Maitunos dagiti kasta a balikas iti kinuna ni apostol Juan: “Ti intero a lubong adda iti pannakabalin daydiay nadangkes.”—1 Juan 5:19.
15. Maipapan kadagiti tattao a saan a paset ti kongregasion Kristiano, ania ti ditay koma ar-aramiden, ken apay?
15 Ngem laglagipenyo a ti lubong a naisina iti Dios, saan a dagiti indibidual, ti tuktukoyen dagita a balikas. Saan a maikeddeng dagiti Kristiano no siasino dagiti mangipangag iti ikaskasabada. Awan pangibatayanda a mangibilang iti asinoman kas kalding. Saantay a maipakpakauna no anianto ti pagbanaganna inton umay paglalasinen ni Jesus dagiti “karnero” ken “kalding.” (Mateo 25:31-46) Ni Jesus ti nadutokan nga ukom; saan a datayo. Maysa pay, adda dagidiay nangipangag iti mensahe ti Biblia, nagbalbaliw, ken nagbalinda a natatakneng a Kristiano nupay nagdakes idi ti kabibiagda. Gapuna, nupay adda dagiti tao a ditay kayat a makapulapol, ditay bumdeng a makisarita kadakuada maipapan iti namnama iti Pagarian no adda gundaway. Saritaen ti Kasuratan ti maipapan kadagiti tattao a nupay saanda pay idi a manamati, “siuumiso a maikari[da] iti agnanayon a biag.” Nagbalinda a manamati idi kamaudiananna. (Aramid 13:48) Ditay ngarud ammo no siasino dagiti maikari malaksid no makasabaantayo ida—nalabit iti adu a daras. No kasta, tratuentayo a ‘siaalumamay’ ken buyogen ti “nauneg a panagraem” dagidiay saan pay a nangawat iti mensahe ti pannakaisalakan, bareng no addanto pay kadakuada ti mangipangag iti mensahe ti biag.—2 Timoteo 2:25; 1 Pedro 3:15.
16. Ania ti maysa a makagapu a kayattayo nga ipakat ti “arte ti panangisuro”?
16 Rumayray ti gagartayo a mangipakaammo iti naimbag a damag no parang-ayentayo ti abilidad a mangisuro. Kas panangyilustrar: Mabalin a saan a makapainteres iti maysa a tao ti makapagagar nga ay-ayam no dina ammo nga ay-ayamen dayta. Ngem iti tao a nalaing iti dayta nga ay-ayam, magusgustuanna. Kasta met, ad-adda a maragsakan dagiti Kristiano iti ministerioda no ipakatda ti “arte ti panangisuro.” (2 Timoteo 4:2; Tito 1:9) Binalakadan ni Pablo ni Timoteo: “Aramidem ti amin a kabaelam a mangiparang iti bagim a naanamongan iti Dios, maysa a mangmangged nga awan ti aniaman nga ibainna, nga aramatem a siuumiso ti sao ti kinapudno.” (2 Timoteo 2:15) Kasanotay a mapasayaat ti abilidadtayo a mangisuro?
17. Kasanotay a ‘mapatanor ti panagtarigagay’ iti pannakaammo nga adda iti Biblia, ket kasano a makatulong iti ministeriotayo ti kasta a pannakaammo?
17 Ti maysa a pamay-an ket babaen ti pananggun-od iti kanayonan nga umiso a pannakaammo. Imparegta kadatayo ni apostol Pedro: “Kas kayanak a maladaga, patanorenyo ti panagtarigagay iti awan lalaokna a gatas a kukua ti sao, tapno babaen iti dayta dumakkelkayo koma nga agturong iti pannakaisalakan.” (1 Pedro 2:2) Naikasigudan a tarigagayan ti nasalun-at a maladaga ti gatas. Ngem iti maysa a Kristiano, mabalin a nasken a ‘patanoren[na] ti panagtarigagay’ iti pannakaammo nga adda iti Biblia. Maaramid daytoy babaen ti panangpatanor kadagiti nasayaat nga ugali iti panagadal ken panagbasa. (Proverbio 2:1-6) Kasapulan ti panagregget ken disiplina iti bagi no kayattayo ti agbalin a nasigo a mannursuro iti Sao ti Dios, ngem makagunggona ti kasta a panagregget. Ti ragsak nga itden ti panangsukimat iti Sao ti Dios pagbalinennatayo a nasged iti espiritu ti Dios, a paggagarennatayo a mangiranud kadagiti sabsabali iti maad-adaltayo.
18. Kasano a makatulong kadatayo dagiti Nakristianuan a gimong a mangaramat a siuumiso iti sao ti kinapudno?
18 Napateg met ti paset dagiti Nakristianuan a gimong iti nasigo a panangaramattayo iti Sao ti Dios. No maibasa dagiti teksto ti Biblia kadagiti diskurso publiko ken dadduma pay a diskusion a naibatay iti Kasuratan, nasayaat no ukagentayo dagiti mismo a Bibliatayo. Nainsiriban nga agatensiontayo a naimbag kadagiti paset ti gimong, agraman kadagiti adda pakainaiganna iti trabahotayo a panangasaba. Ditay koma tagibassiten ti pateg dagiti demostrasion, a nalabit ipalubostayo a masingatayo. Nasken met ditoy ti disiplina iti bagi ken konsentrasion. (1 Timoteo 4:16) Dagiti Nakristianuan a gimong pabilgenda ti pammatitayo, patanorenda ti panagtarigagaytayo iti Sao ti Dios, ken sanayendatayo a mangiwaragawag a sigagagar iti naimbag a damag.
Manamnamatayo ti Tulong ni Jehova
19. Apay a nasken ti regular a pannakiraman iti trabaho a panangasaba?
19 Dagiti Kristiano a ‘nasged iti espiritu’ ken magagaran a mangipakaammo iti naimbag a damag ikagumaanda ti makiraman a regular iti ministerio. (Efeso 5:15, 16) Pudno, agduduma ti kasasaad, ket saan nga agpapada ti kaadu ti panawen a mabusbostayo iti daytoy makaispal-biag a trabaho. (Galacia 6:4, 5) Nupay kasta, ti napatpateg ket no kasano kasansan nga isarsaritatayo kadagiti dadduma ti maipapan iti namnamatayo imbes a ti kaadu ti oras a mabusbostayo iti panangasaba. (2 Timoteo 4:1, 2) No masansan a mangasabatayo, ad-adda met a rumayray ti panangipategtayo iti daytoy a trabaho. (Roma 10:14, 15) Ad-adda nga agbalintayo a naasi ken mannakipagrikna no regular a makisaritatayo kadagiti napasnek a tattao nga agsensennaay ken umas-asug ken awanan namnama.—Ezequiel 9:4; Roma 8:22.
20, 21. (a) Ania a trabaho ti nasken a sanguentayo pay? (b) Kasano a tultulongannatayo ni Jehova?
20 Intalek ni Jehova kadatayo ti naimbag a damag. Daytoy ti damo nga annongen nga intedna kadatayo kas “katrabahuan[na].” (1 Corinto 3:6-9) Magagarantayo a mangitungpal iti daytoy a rebbengen nga inted ti Dios buyogen ti amin a kararua, iti amin a kabaelantayo. (Marcos 12:30; Roma 12:1) Adu pay dagiti maikari a tattao iti lubong a mabisin iti kinapudno. Adu ti aramiden, ngem manamnamatayo ti tulong ni Jehova bayat a naan-anay nga itungpaltayo ti ministeriotayo.—2 Timoteo 4:5.
21 Ipapaay ni Jehova kadatayo ti espirituna ken intedna kadatayo ti “kampilan ti espiritu,” ti Sao ti Dios. Iti tulongna, mabalintay a luktan ti ngiwattayo “a buyogen ti wayawaya iti panagsao tapno ipakaammo[tayo] ti sagrado a palimed ti naimbag a damag.” (Efeso 6:17-20) Sapay koma ta maikuna kadatayo ti insurat ni apostol Pablo kadagiti Kristiano idiay Tesalonica: “Ti naimbag a damag nga ikaskasabami saan a dimteng kadakayo buyogen ti sasao laeng no di ket kasta met a buyogen ti pannakabalin ken buyogen ti nasantuan nga espiritu ken nabileg a panamati.” (1 Tesalonica 1:5) Wen, sigagagar nga ipakaammotayo ti naimbag a damag!
Ababa a Repaso
• Gapu kadagiti pakaringgoran iti biag, ania ti mabalin a mapasamak iti regtatayo iti ministerio?
• Iti ania a pamay-an a ti tarigagaytayo a mangipakaammo iti naimbag a damag ket kasla koma “sumsumged nga apuy” iti pusotayo?
• Aniada a negatibo a panangmatmat iti ministerio ti iwaksitayo?
• Kasano ti panangmatmattayo kadagidiay ditay kapammatian?
• Kasanonatay a tulongan ni Jehova a mangtaginayon iti regtatayo a mangasaba?
[Dagiti Ladawan iti panid 9]
Tuladen dagiti Kristiano ti regta da Pablo ken Jeremias
[Dagiti Ladawan iti panid 10]
Sigagagar nga itungpaltayo ti ministeriotayo gapu ta ay-ayatentayo ti Dios ken ti padatayo a tao