Sadino ti Pakasarakanyo iti Talna ti Panunot?
Adu ti naggidiatan ti panawentayo ken ti panawen ni Thoreau, a nadakamat iti immuna nga artikulo. Maysa a dakkel a nagdumaanda isu ti kinaruay ita ti balakad no kasano a maaddaan iti natalna a panunot. Dagiti sikologo ken mannurat kadagiti libro a mangipapaay iti balakad—uray dagiti kolumnista ti pagiwarnakan—mangitukonda kadagiti singasing. Nalabit apagbiit laeng ti tulong nga itden ti balakadda; ngem no kadagiti manayon a solusion, adda napatpateg pay a kasapulan. Dayta ti nasarakan dagiti tattao a nadakamat iti immuna nga artikulo.
NAGDUDUMA ti kasasaad da Antônio, Marcos, Gerson, Vania, ken ni Marcelo ket nagduduma met ti parikutda. Ngem adda tallo a banag a pagpapadaanda. Umuna, adda tiempo idi nga ‘awan ti namnamada ken iti lubong awananda iti Dios.’ (Efeso 2:12) Maikadua, tarigagayanda ti maaddaan iti natalna a panunot. Ken ti maikatlo, nasarakanda amin ti sapsapulenda a talna ti panunot idi nakipagadalda iti Biblia kadagiti Saksi ni Jehova. Bayat ti panagadalda, naammuanda a maseknan ti Dios kadakuada. Kas kinuna ni Pablo kadagiti taga Atenas idi kaaldawanna, “saan nga adayo [ti Dios] manipud iti tunggal maysa kadatayo.” (Aramid 17:27) Satay la maaddaan iti natalna a panunot no pudpudno a kombinsidotayo iti daytoy a banag.
Apay a Naatap ti Talna?
Dakamaten ti Biblia ti dua a rason no apay a naatap ti talna iti lubong—talna man iti panunot wenno talna iti nagbabaetan dagiti tattao. Nailawlawag ti umuna iti Jeremias 10:23: “Ti dalan ti tao saan nga agtaud kenkuana met laeng; saan nga agtaud iti tao a magna ti panangiturong kadagiti addangna.” Saan a maiturong ti tao ti bagina a bukbukodna gapu ta awan kenkuana ti sirib wenno pannakaammo iti masanguanan, ket ti Dios laeng ti pudpudno a makatulong. Dagiti tattao a di agpaiwanwan iti Dios saanda a pulos a magun-od ti manayon a talna. Maipapan iti maikadua a rason no apay nga awan ti talna, kuna ni apostol Juan: “Ti intero a lubong adda iti pannakabalin daydiay nadangkes.” (1 Juan 5:19) No awan ti panangiwanwan ti Dios, kanayonto a mapaay dagiti panagregget ti tao a manggun-od iti talna gapu kadagiti aramid ti di makita ngem sibibiag ken nakabilbileg a “nadangkes,” ni Satanas.
Gapu kadagitoy dua a rason—ti di panagpaiwanwan iti Dios ti kaaduan a tattao ken ti napigsa nga impluensia ni Satanas iti lubong—nakaay-ay-ay ti sangatauan. Maitutop la unay ti panangdeskribir ni apostol Pablo: “Isuamin a sangaparsuaan agtultuloyda nga agas-asug a sangsangkamaysa ken agpapaut-otda a sangsangkamaysa agingga ita.” (Roma 8:22) Asinot’ di umanamong iti dayta a panangiladawan? Kadagiti nabaknang ken napanglaw a pagilian, saan a natalna ti panunot dagiti tattao gapu kadagiti parikut ti pamilia, krimen, kinaawan hustisia, di panagkikinnaawatan, saan a natalged nga ekonomia, gura maipuon iti tribu ken puli, panangirurumen, sakit, ken nakaad-adu pay.
Ti Pakasarakan iti Talna ti Panunot
Nagbalbaliw ti biag da Antônio, Marcos, Gerson, Vania, ken Marcelo gapu kadagiti naadalda iti Sao ti Dios, ti Biblia. Naammuanda nga agbaliwto ti kasasaad ditoy lubong. Saan daytoy a basta namnama a mapagduaduaan no pumudno met laeng kamaudiananna. Makapagtalektayo a talaga nga adda panggep ti Dios iti sangatauan ket pakagunggonaantayo dayta a panggep uray ita no tungpalentayo ti pagayatanna. Inyaplikarda iti biagda dagiti naadalda iti Biblia ket simmayaat ti kasasaadda. Dakdakkel a ragsak ken talna ti nasarakanda ngem ti ninamnamada.
Saanen a makiramraman ni Antônio kadagiti protesta ken welga. Ammona a limitado ken temporario laeng ti panagbalbaliw nga itden dayta. Naammuan daytoy dati a lider dagiti mangmangged ti maipapan iti Pagarian ti Dios. Isu dayta ti Pagarian nga ikarkararag ti minilion a tattao no baliksenda ti Kararag ti Apo (wenno, ti Amami) a kunkunada iti Dios: “Umay koma ti pagariam.” (Mateo 6:10a, New International Version) Naammuan ni Antônio a ti Pagarian ti Dios ket maysa a pudpudno a nailangitan a gobierno a mangyeg iti napaypayso a talna iti sangatauan.
Nasursuro ni Marcos nga iyaplikar ti nainsiriban a balakad ti Biblia maipapan iti panagasawa. Kas resultana, naragsak itan daytoy dati a politiko gapu ta nagsinnublianda ken baketna. Segseggaanna met ti tiempo nga asidegen nga umay inton ti Pagarian ti Dios sukatanna iti nasaysayaat a kasasaad daytoy naagum ken managimbubukod a sistema ti lubong. Naun-uneg nga amang ti pannakaawatna kadagiti sasao iti Kararag ti Apo nga agkuna: “Maaramid koma ti pagayatam kas sadi langit kasta met ditoy daga.” (Mateo 6:10b, NIV) Inton maaramid ti pagayatan ti Dios ditoy daga, tagiragsakento dagiti tattao ti klase ti biag a di pay pulos nasagrap.
Ni Gerson met ngay? Saanen a walang ken mannanakaw. Addan direksion ti biag daytoy dati a walang nga ubing gapu ta ar-aramatenna ti pigsana a tumulong iti sabsabali a maaddaan iti natalna a panunot. Kas ipakita dagitoy a kapadasan, ti panagadal iti Biblia ken panangyaplikar iti ibagbagana itdenna ti dakkel a panagbalbaliw nga ad-adda a mangpasayaat iti biag ti maysa a tao.
Natalna a Panunot iti Nariribuk a Lubong
Ni Jesu-Kristo ti nakaisentruan ti pannakatungpal ti pagayatan ti Dios. No makipagadal iti Biblia dagiti tattao kadagiti Saksi ni Jehova, adu ti masursuroda maipapan ken Jesus. Iti daydi rabii a pannakayanakna, nagkanta dagiti anghel kadagiti pagdayaw iti Dios: “Dayag iti Dios kadagiti kangatuan, ket iti daga talna kadagiti tattao nga addaan naimbag a nakem.” (Lucas 2:14) Idi nataenganen ni Jesus, maseknan iti pannakapasayaat ti biag dagiti tattao. Ammona ti marikriknada ken impakitana ti naisangsangayan nga asi kadagiti marigrigat ken masakit. Ket kas maitunos iti sasao dagiti anghel, impaayanna dagiti naemma iti talna ti panunot. Iti ngudo ti ministeriona, kinunana kadagiti adalanna: “Ibatik kadakayo ti talna, itedko kadakayo ti talnak. Diak ited dayta kadakayo iti wagas a panangited ti lubong. Dikay palubosan a mariribukan dagiti pusoyo wenno uray palubosan ida nga agalikenken gapu ti buteng.”—Juan 14:27.
Saan la a naparabur ni Jesus kadagiti tattao. Inyarigna ti bagina iti maysa a pastor ket inyarigna dagiti naemma a pasurotna kadagiti karnero idi a kinunana: “Immayak tapno maaddaanda iti biag ket maaddaanda a siwawadwad iti dayta. Siak ti nasayaat a pastor; ti nasayaat a pastor isukona ti kararuana maigapu kadagiti karnero.” (Juan 10:10, 11) Wen, saan a kas iti adu a panguluen ita nga iyun-unada ti bagida, inted ni Jesus ti biagna agpaay kadagiti karnerona.
Kasanotay a magunggonaan iti inaramid ni Jesus? Adu ti pamiliar kadagitoy a sasao: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangalagad iti pammati kenkuana saan koma a madadael no di ket maaddaan iti agnanayon a biag.” (Juan 3:16) Tapno mawatwat ti pammati ken Jesus, masapul nga umuna ti pannakaammo maipapan kenkuana ken iti Amana, ni Jehova. Ti pannakaammo maipapan iti Dios ken ni Jesu-Kristo ipasdekna ti nasinged a relasion ken Jehova a Dios a tumulong kadatayo a maaddaan iti natalna a panunot.
Kinuna ni Jesus: “Dagiti karnerok imdenganda ti timekko, ket am-ammok ida, ket surotendak. Ket itedko kadakuada ti agnanayon a biag, ket nikaanoman saandanto a pulos madadael, ket awanto ti asinoman a mangrabsut kadakuada manipud iti imak.” (Juan 10:27, 28) Anian a naayat ken makaliwliwa a sasao! Pudno, agarup dua ribu a tawenen ti napalabas idi inyebkas dagitoy ni Jesus, ngem saan a nagbalbaliw ti kaipapananda. Diyo liplipatan a sibibiag ken aktibo pay laeng ni Jesu-Kristo, nga agturturay itan kas naisaad nga Ari iti Pagarian ti Dios idiay langit. Maseknan pay la ni Jesus kadagiti naemma nga agtarigagay a maaddaan iti natalna a panunot, kas iti pannakaseknanna idi adda ditoy daga adu a tawenen ti naglabas. Maysa pay, isu pay la ti Pastor dagiti karnerona. No surotentayo, ipaayna kadatayo ti talna ti panunot, a pakairamanan ti natalged a namnama a pannakakita iti naan-anay a talna iti masanguanan—a kaipapananna ti pannakaikkat ti kinaranggas, gubat, ken krimen.
Pudno a pagsayaatantayo no bigbigen ken patientayo a tulongannatayo ni Jehova babaen ken Jesus. Malagipyo pay ni Vania, a napabaklayan kadagiti nadagsen a responsabilidad idi ubing pay ken impagarupna a binaybay-anen ti Dios? Ita, ammon ni Vania nga isu ket di binaybay-an ti Dios. Kunana: “Naadalko a pudpudno a persona ti Dios nga addaan kadagiti nakaay-ayat a galad. Gapu iti ayatna, imbaonna ti Anakna ditoy daga tapno agbiagtayo. Nagpateg unay daytoy a maammuan.”
Paneknekan ni Marcelo a napaypayso ti relasionna iti Dios. Kuna daytoy dati a mannaki-party: “Masansan a di ammo dagiti agtutubo no ania ti aramidenda, ket agbanag a madangranda ti bagida. Agdroga ti dadduma, kas kaniak idi. Sapay koma ta adu pay ti magunggonaan a kas kaniak babaen ti panagadalda iti kinapudno maipapan iti Dios ken iti Anakna.”
Napabileg da Vania ken Marcelo ti pammatida iti Dios ken kompiansa iti kinamasindadaanna a tumulong a mangrisut kadagiti parikutda babaen ti napasnek a panagadalda iti Biblia. No aramidentayo ti inaramidda—agadal iti Biblia ken iyaplikar iti ibagbagana—masarakantayo ti dakkel a talna ti panunot a tinagiragsakda. Iti kasta, talaga a maitutop iti kasasaadtayo ti pammaregta ni apostol Pablo: “Dikay maringgoran iti aniaman, no di ket iti amin a banag babaen ti kararag ken araraw agraman panagyaman maipakaammo koma dagiti dawdawatyo iti Dios; ket ti talna ti Dios a mangringbaw iti amin a panunot aywanannanto dagiti pusoyo ken dagiti pannakabalin ti isipyo babaen ken Kristo Jesus.”—Filipos 4:6, 7.
Panangsagrap iti Pudpudno a Talna Ita
Iwanwanwan ni Jesu-Kristo dagiti tattao nga agsapsapul iti kinapudno iti dalan nga agturong iti biag nga agnanayon iti maysa a paraiso a daga. Bayat nga iwanwanwanna ida iti nasin-aw a panagdayaw iti Dios, tagtagiragsakenda ti talna a kas iti nailadawan iti Biblia: “Ti ilik agnaedto ti natalna a pagyanan; ken iti namayengmeng a pagtaengan, ken kadagiti natalingenngen a paginanaan.” (Isaias 32:18) Ket pakauna laeng dayta ti talna a sagrapenda iti masanguanan. Mabasatayo: “Dagiti naemma tawidendanto ti daga, ket maay-ayatandanto iti kinaruay ti talna. Ti sililinteg tawidennanto ti daga ket agtaengto kenkuana nga agnanayon.”—Salmo 37:11, 29.
Isu a mabalintay kadi ti maaddaan iti natalna a panunot ita? Wen. Kanayonanna, masiguradotayo nga iti asideg a masanguanan, paraburanto ti Dios ti natulnog a sangatauan iti awan pulos kaaspingna a talna. Apay ngarud a diyo ikararag kenkuana nga ikkannakayo iti talna? No maburiborkayo gapu kadagiti parikutyo, agkararagkayo a kas iti panagkararag ni Ari David: “Dagiti dandanag toy pusok dimmadakkelda: ay alawennak kadi kadagiti pakarigatak. Imatangam ti dukotko ken ti bannogko; ket pakawanem amin dagiti basbasolko.” (Salmo 25:17, 18) Namnamaenyo nga ipangag ti Dios dagiti kasta a kararag. Yunnatna ti imana ket itdenna ti talna iti amin a sipapasnek a mangbirbirok iti dayta. Siaayat a naipanamnama kadatayo: “Ni Jehova siaarpad kadagiti amin nga umawag kenkuana, kadagiti amin nga umawag kenkuana iti kinapudno. Tungpalennanto ti tarigagay dagiti agbuteng kenkuana; denggennanto met ti ikkisda, ket isalakannanto ida.”—Salmo 145:18, 19.
[Blurb iti panid 5]
Saan a maiturong ti tao ti bagina a bukbukodna gapu ta awan kenkuana ti sirib wenno pannakaammo iti masanguanan, ket ti Dios laeng ti pudpudno a makatulong
[Blurb iti panid 6]
Ti pannakaammo maipapan iti Dios ken ni Jesu-Kristo ipasdekna ti nasinged a relasion ken Jehova a Dios a tumulong kadatayo a maaddaan iti natalna a panunot
[Ladawan iti panid 7]
Natalna ti biag ti pamilia no maannurot dagiti balakad ti Biblia