Roma 12:12—“Agbiagkayo a Siraragsak Gapu iti Namnamayo. Ibturanyo Dagiti Rigatyo, ket Kanayon nga Agkararagkayo”

“Agrag-okayo iti namnama. Agibturkayo iti rigat. Itultuloyyo ti agkararag.”—Roma 12:12, Baro a Lubong a Patarus.

“Agbiagkayo a siraragsak gapu iti namnamayo. Ibturanyo dagiti rigatyo, ket kanayon nga agkararagkayo.”—Roma 12:12, Ti Baro a Naimbag a Damag Biblia.

Kaipapanan ti Roma 12:12

Iti daytoy a bersikulo, pinaregta ni apostol Pablo dagiti Kristiano idiay Roma nga aramidenda ti tallo a banag tapno agtalinaedda a matalek uray maidadanesda ken maipasangoda iti dadduma a pakarigatan.

“Agrag-okayo iti namnama.” Dagiti Kristiano ket addaan iti nakaskasdaaw a namnama a biag nga agnanayon—dadduma idiay langit ken kaaduanna iti paraiso a daga. (Salmo 37:29; Juan 3:16; Apocalipsis 14:1-4; 21:3, 4) Karaman iti dayta a namnama ti pannakakitada a solbaren ti Pagarian ti Diosa ti amin a problema a mangparparigat iti amin a tattao. (Daniel 2:44; Mateo 6:10) Naragsak dagiti agdaydayaw iti Dios uray no maipasangoda iti pakarigatan ta kombinsidoda a natalged ti namnamada ken maparagsakda ti Dios gapu iti panagibturda.—Mateo 5:11, 12; Roma 5:3-5.

“Agibturkayo iti rigat.” Iti Biblia, ti Griego a sao nga “agibtur” masansan a kaipapananna ti “agtalinaed imbes a pumanaw; agregget; agtalinaed a natibker.” Dagiti pasurot ni Kristo ket ‘saan a paset ti lubong,’b namnamaenda ngarud a maidadanesda isu a kasapulanda ti panagibtur. (Juan 15:18-20; 2 Timoteo 3:12) No simamatalek nga agserbi iti Dios ti maysa a Kristiano uray no masapul nga agibtur kadagiti pannubok, tumibker ti pammatina a bendisionanto ti Dios. (Mateo 24:13) Kas resultana, makaanus ken naragsak latta uray agib-ibtur kadagiti pakarigatan.—Colosas 1:11.

“Itultuloyyo ti agkararag.” Maulit-ulit a naparegta dagiti Kristiano nga itultuloyda ti agkararag tapno agtalinaedda a matalek iti Dios. (Lucas 11:9; 18:1) Kanayonda nga agpaiwanwan ken agdepende iti Dios iti amin nga aramidenda. (Colosas 4:2; 1 Tesalonica 5:17) Kombinsidoda a sungbatan ti Dios dagiti dawdawatenda ta agtultulnogda kadagiti bilinna ken ar-aramidenda ti amin a kabaelanda a mangparagsak kenkuana. (1 Juan 3:22; 5:14) Ammoda met a no agtultuloyda nga agkararag, ikkan ida ti Dios iti bileg tapno agtalinaedda a matalek, aniaman a pannubok ti pakaipasanguanda.—Filipos 4:13.

Konteksto ti Roma 12:12

Insurat ni Pablo ti suratna kadagiti Kristiano idiay Roma idi agarup 56 C.E. Iti kapitulo 12 dayta a surat, nangted kadagiti praktikal a pammagbaga no kasano a maipakita dagiti kualidad ti maysa a Kristiano, no kasano ti panangtrato kadagiti kapammatian ken iti dadduma, ken no kasano ti agtalinaed a kalmado no maidadanes. (Roma 12:9-21) Naintiempuan daytoy a pammagbaga para kadagiti Kristiano idiay Roma ta asidegen a maipasangoda iti naranggas a pannakaidadanes.

Sumagmamano a tawen kalpasanna, idi 64 C.E., nadadael ti siudad ti Roma gapu iti nakaro nga uram. Adu ti mangibagbaga a ni Emperor Nero ti makingapuanan. Sigun ken ni Tacitus, a maysa a Romano a historiador, pinabasol ni Nero dagiti Kristiano tapno protektaranna ti bagina. Dayta ti nangrugian ti nakaro a pannakaidadanes dagiti Kristiano. Nakatulong ti pammagbaga ni Pablo maipapan iti panangibtur tapno masangoda dayta a narigat a situasion nga addaan pammati ken dignidad. (1 Tesalonica 5:15; 1 Pedro 3:9) Ti ulidanda ket nagsayaat a pagtuladan dagiti agdaydayaw iti Dios ita.

Buyaem daytoy ababa a video tapno makitam ti pakabuklan ti libro a Roma.