Inaramidda ti Pagayatan ni Jehova

Nalapdan ti Maysa a Manakem a Babai ti Didigra

MAYSA a manakem a babai nga asawa ti awan serserbina a lalaki​—daytat’ situasion da Abigail ken Nabal. Ni Abigail ket “nasaririt unay, ken napintas ti langana.” Iti kasupadina, ni Nabal ket “nasabrak ken managdakdakes.” (1 Samuel 25:3) Ti pasamak a napagteng maipanggep iti daytoy di agbagay a pagassawaan ti nakaigapuan ti pannakaimaldit ti naganda iti pakasaritaan ti Biblia. Kitaentayo no kasano.

Pabor a Nayaleng-aleng

Maika-11 a siglo K.K.P. idi. Napulotan idin ni David kas masanguanan nga ari ti Israel, ngem imbes nga agturay, agliblibas. Ti agturturay nga ari, ni Saul, determinado a mangpatay kenkuana. Kas resultana, napilitan ni David nga agbiag kas maysa a pugante. Kamaudiananna nakasarak ken ti 600 a kakaduana iti pagkamangan idiay let-ang ti Paran, iti abagatan ti Juda ken asideg idiay let-ang ti Sinai.​—1 Samuel 23:13; 25:1.

Kabayatan nga addada sadiay, nasarakanda dagiti pastor nga agpapaay iti maysa a tao nga agnagan Nabal. Daytoy nabaknang a kaputotan ni Caleb addaan 3,000 a karnero ken 1,000 a kalding, ket pinukpukisanna dagiti karnerona idiay Carmelo, maysa a siudad iti abagatan ti Hebron ken nalabit ag-40 kilometro laeng manipud Paran.a Tinulongan ni David ken dagiti tattaona dagiti pastor ni Nabal a mangbantay kadagiti arbanda maibusor kadagiti mannanakaw nga agdakdakiwas idiay let-ang.​—1 Samuel 25:14-16.

Kabayatanna, nangrugin ti panangpukis kadagiti karnero idiay Carmelo. Naragsak daytoy nga okasion, nga umasping iti panagaapit dagiti mannalon. Panawen met dayta ti kinamanagparabur, a gunggonaan dagiti makinkukua kadagiti karnero dagidiay nagtrabaho kadakuada. Gapuna saan a nakuspag ni David idi nangibaon iti sangapulo a lallaki iti siudad ti Carmelo tapno dumawat iti taraon ken Nabal kas subad iti serbisioda maigapu kadagiti arbanna.​—1 Samuel 25:4-9.

Saan a pulos nagyaman ni Nabal. “Asino aya ni David?” immusiigna. Kalpasanna, iti panangipasimudaagna a ni David ken dagiti tattaona ket nagtalaw laeng nga ad-adipen, insaludsodna: “Alaekto ngarud ti tinapayko ken ti danumko ken ti kukuak a lasag a pinartik, a maipaay kadagiti pagpukisek, ket itedko ida kadagiti lallaki isuda a diak ammo no taga anoda?” Idi nadamag ni David daytoy, kinunana kadagiti tattaona: “Ibarikesyo tunggal maysa a lalaki ti kampilanna!” Agarup 400 a lallaki ti nagsagana a makigubat.​—1 Samuel 25:10-13.

Kinamanakem ni Abigail

Ti agkakadakes a sasao ni Nabal nakadanon ken Abigail nga asawana. Nalabit saan a daytoy ti kaunaan a gundaway a nakibiang ken nagtignay kas manangikappia maipaay ken Nabal. Aniaman ti kasasaad, nagtignay a dagus ni Abigail. Dina imbagbaga ken Nabal, nagurnong kadagiti suplay​—a pakairamanan ti lima a karnero ken nawadwad a taraon​—ket napanna sinabat ni David idiay let-ang.​—1 Samuel 25:18-20.

Idi makita ni Abigail ni David, dagus a nagruknoy iti sanguananna. “Dawatek kenka, nga apok saanna koma, nga ikankano daytoy dakes a tao, a ni Nabal met laeng,” impakpakaasina kenkuana. “Daytoy sagut a ti adipenmo yegna iti apok, isu ti maited koma kadagiti agtutubo a lallaki a sumurot iti apok.” Innayonna: “A daytoy [a kasasaad maipanggep ken Nabal] saan a pagtibkolan kenka, wenno makadadael ti puso iti apok.” Ti Hebreo a sao ditoy a naipatarus a “pagtibkolan” ipaspasimudaagna ti pannakaburibor ti konsiensia. Gapuna pinakdaaran ni Abigail ni David maibusor iti sidadarasudos a panagtignay a pagbabawyannanto.​—1 Samuel 25:23-31.

Dimngeg ni David ken ni Abigail. “Bendito koma ta kinasaluadmo, ken benditaka koma, a nangiliklik kaniak ita nga aldaw iti pannakabiddut iti dara,” kinunana kenkuana. “Ta no dika koma nagdaras nga immay simmabet kaniak, pudno nga idiay awan malabsan ken Nabal agingga iti aglawag ti bigat nga uray asinoman nga umis-isbo iti pader.”b​—1 Samuel 25:32-34, NW.

Dagiti Maadaltayo

Ipakpakita daytoy a salaysay ti Biblia a sigurado nga awan pagdaksanna para iti nadiosan a babai a mangyun-una nga agaramid iti maitutop nga addang no kasapulan. Nagtignay ni Abigail maibusor iti pagayatan ni lakayna a Nabal, ngem saan a binabalaw ti Biblia gapu iti daytoy. Iti kasunganina, daytoy ti nangpadayaw kenkuana kas maysa a babai a nasaririt ken manakem. Iti panagtignayna iti daytoy narikut a kasasaad, naispal ni Abigail ti adu a biag.

Nupay kaaduanna rumbeng a mangipakita iti nadiosan a panagpasakup ti maysa nga asawa a babai, mabalin a siuumiso a dina kanunongan ni lakayna no nakatayá dagiti umiso a prinsipio. Siempre, rumbeng nga ikagumaanna a pagtalinaeden ti “naulimek ken naalumamay nga espiritu” ken rumbeng a di agtignay nga agbukbukod gapu laeng iti pungtot, kinapalangguad, wenno panagrebelde. (1 Pedro 3:4) Nupay kasta, di koma mapilit ti maysa a nadiosan nga asawa a babai a mangaramid iti aniaman a banag nga ammona a nalawag a di nainsiriban wenno maisalungasing kadagiti prinsipio iti Biblia. Wen, ti salaysay maipapan ken ni Abigail mangipaay iti natibker nga argumento maibusor kadagidiay mangipilit a dagiti babbai iladladawan ti Biblia kas tagabo laeng.

Isuronatay met daytoy a salaysay maipapan iti panagteppel. Adda dagiti tiempo a naan-anay nga imparangarang ni David daytoy a kababalin. Kas pagarigan, nagkedked a mangpapatay ken ni manangibales nga Ari Saul, nupay adut’ gundawayna a mangaramid iti kasta ket ti ipapatay ni Saul nangyeg koma iti talna ken David. (1 Samuel 24:2-7) Iti kasunganina, idi linalais ni Nabal, nabigla ni David ket nagkari nga agibales. Maysa daytoy a nalawag a pakdaar kadagiti Kristiano, a mangikagkagumaan a ‘di mangsubad ti dakes iti dakes iti asinoman.’ Iti amin a kasasaad, surotenda koma ti balakad ni Pablo: “No mabalin, sigun iti panagpannurayna kadakayo, makikappiakayo iti isuamin a tattao. Dikay ibalesan ti bagbagiyo, dungdunguen, no di ket ipaayanyo ti lugar ti pungtot.”​—Roma 12:17-19.

[Dagiti Footnote]

[Ladawan iti panid 15]

Nangyeg ni Abigail kadagiti sagut ken David