Report Dagiti Manangiwaragawag ti Pagarian
Nabendisionan Dagiti Ubbing nga Ages-eskuela a Taga Nigeria Gapu iti Kinamatalek
INSURAT ni apostol Pablo: “No mabalin, agingga iti kabaelanyo, agbalinkayo a mannakikappia kadagiti amin a tao.” (Roma 12:18) Dagiti ubbing nga ages-eskuela a Saksi ni Jehova idiay Nigeria ipakpakatda daytoy a balakad, uray no maidaddadanesda. Kas resultana, binendisionan ida ni Jehova.
◻ Maysa a mannursuro kagurgurana unay dagiti Saksi ni Jehova. Kabayatan ti maysa a panagtitipon iti agsapa, inayabanna amin dagiti Saksi iti sango ket minandaranna ida nga agkanta iti kanta ti pagilian. Nagkedkedda, a kunkunada a kayatda ti mangted iti naipamaysa a debosion iti Dios. Kalpasanna aminda ti inruar ti mannursuro ket kunana kadakuada nga agparutda ti ruot. Kabayatanna, intultuloy dagiti sabsabali nga estudiante dagiti klaseda.
Maysa a nataengan a Saksi ti nangala iti broshur nga School and Jehovah’s Witnesses ket impakitana dayta iti mannursuro, nga inlawlawagna ti neutral a takder dagiti Saksi ni Jehova. Nupay kasta, nagkedked ti mannursuro a mangsalaysay iti dayta a banag wenno mangawat iti broshur. Kinapudnona, dagdagus nga inkarkarona pay ti panangdusana kadagiti ubbing.
Intultuloy nga inibturan dagiti agtutubo a Saksi daytoy a panangdusa ket nagtultuloyda nga agparut ti ruot uray no awan ti mannursuro. Maysa nga aldaw naglemmeng ti mannursuro ket sinisiimna ida bayat a nagtultuloyda a nagtrabaho ken nagkankantada kadagiti kanta ti Pagarian. Isut’ nasnasdaaw unay anianta insublina ida iti klase, nga iyeb-ebkasna ti panagsiddaawna iti kababalinda. Aniat’ resultana? Ti mannursuro ket makipagad-adal itan ti Biblia kadagiti Saksi ni Jehova!
Nabendisionan la ketdi dagitoy nga ubbing nga ages-eskuela gapu iti kinamatalekda ken Jehova ken kadagiti prinsipiona.—Proverbio 10:22.
◻ Nabendisionan met da Ruth ken dagiti gagayyemna gapu iti kinamatalekda iti kalikagum ni Jehova nga agbalin a “saan a paset ti lubong.” (Juan 17:16) Ni Ruth, a 18 ti tawenna, ket nangrugi a nagpayunir idi isu ket agtawen ti 12. Isu ken dagiti sabsabali pay a Saksi ket immawat iti ibubusor manipud kadagiti kameng ti manangimaton iti eskuelaan gapu iti panagkedkedda nga agkanta iti kanta ti pagilian. Maysa a mannursuro ti nagkiddaw a kasaritana dagiti nagannak dagiti babbalasitang. Kalpasan a nangipaayda iti panangilawlawag, nga inaramatda ti School a broshur, napnek ti mannursuro ket dinan siningsinga dagiti estudiante.
Maysa nga aldaw, nupay kasta, maysa a mannursuro manipud India ti nanginsulto ken nangdusa iti maysa kadagiti babbalasitang iti sango ti klase idi a ti balasitang ket di nagkanta iti kanta ti pagilian. Situtured nga inkalintegan ti balasitang ti pammatina ket isut’ impan ti mannursuro iti prinsipal ti eskuelaan. Idi nakagtengda sadiay, nakita ti agtutubo a Saksi a ti bise prinsipal ket adda met. Iti pannakaklaatna, nangrugi a nagpaggaak ti prinsipal ken ti bise-prinsipal. Iti panangsangona iti mannursuro, kuna ti prinsipal: “Maestra, dika pakadanagan dagitoy a babbalasitang. Uray papatayem ida, kaykayatda ti matay ngem ti agkanta iti kanta ti pagilian. Dika kadi pay nangnangngegan ti maipapan kadakuada?” Kalpasanna isu ken ti katulonganna ti nagsao maipapan iti pammati ken tured dagiti Saksi ni Jehova. Iti panagsaona iti balasitang, kuna ti prinsipal nga isu ket maladingitan unay iti sinagrapna a pannakaibabain. Kalpasanna innayonna: “Itultuloymo dagiti aramid ti pammatim. Pagesmak ti relihionyo ken ti natured a takderyo agpada iti ruar ken ditoy uneg ti eskuelaan.” Idi agangay, ti bumusbusor a mannursuro ket nagpadispensar iti Saksi, a kunkunana a maawatanna itan ti neutral a takder nga al-alaen dagiti Saksi.
Dagitoy nga ubbing sinurotda ti ulidan dagiti tallo a Hebreo a di mangdadael iti kinatarnawda iti Dios babaen iti panagrukbabda iti maysa a ladawan, ken uray met ni Daniel, a nagkedked nga agsardeng nga agkararag ken Jehova. Dagitoy a lallaki ket binendisionan ni Jehova gapu ta matalekda kadagiti nalinteg a paglintegan ti Dios.—Daniel, kapitulo 3 ken 6.