“School and Jehovah’s Witnesses—Tumultulong ti Broshur
Dagiti ubbing nga agsubli iti eskuelaan iti daytoy nga otonio kasapulanda ti amin a tulong a mabalinda a magun-odan, nangnangruna dagidiay a mangpadpadas a mangalagad kadagiti nadiosan a prinsipio. Dua a tawenen ti napalabas ti 32-panid a publikasion a School and Jehovah’s Witnesses naipaay tapno mangipaay iti daytoy a tulong.
KAS maysa a pamilia, narepasoyo kadin ti linaon ti School and Jehovah’s Witnesses? Paliiwenyo dagiti panglukat a sasao ti publikasion: “Daytoy a broshur naipablaak a mangparang-ay iti pannakaawat ken kooperasion iti nagbaetan dagiti Saksi ni Jehova ken dagiti autoridad iti eskuelaan. Tarigagaymi ti makitinnulong kadagiti amin nga agtartrabaho a maipaay iti panagballigi ti kangrunaan a programa ti edukasion a maitukon kadagiti eskuelaan.”
Gapuna mabalin a tarigagayanyonto a siguraduen a dagiti mannursuro ken prinsipal makaawatda iti personal a kopia. “Napateg a dagiti nagannak am-ammuenda dagiti mannursuro dagiti annakda—a mangaramid iti urnos a makisabet ken makisarita kadakuada,” kunaen ti broshur. Ngarud, no ti mannursuro saan pay a nakaawat iti broshur, daytoy a panagsabet ti mainugot a tiempo a mangiparang iti dayta ken mangilawlawag kadagiti linaonna. Pudno a maysa a tulong dayta!
Tulong kadagiti Mannursuro
Maysa nga ina manipud Peoria, Illinois, nagsurat: “Ti mannursuro ti anakmi a lalaki nagyaman kadakami iti namin-adu a daras gapu iti panangitedmi kenkuana iti broshur. Kinunana a daytat’ nangtulong kenkuana ‘saan laeng a tapno makibagay ngem pudno a tapno maawatanna ti takder dagiti Saksi kadagiti adu nga isyu.’
“Gapu itoy, nabaelanmi ti naaddaan iti silulukat a linea iti komunikasion. Imbaga ti mannursuro ti anakmi a lalaki kadakami a kankanayon nga adda kenkuana ti broshur, ket no saan a sigurado no ti anakmi a lalaki masapul a makipaset kadagiti ar-aramid ti eskuelaan, kitaenna ti broshur sakbay ti klase ket siuulimek a mangibaon kenkuana kadagiti dadduma a proyekto no kasapulan. . . .
“Namin-adu a daras a nagsurat iti asawak ken siak a maipaay iti kanayonan pay a panangilawlawag. Nakaipaaykami kadagiti kanayonan nga impormasion kenkuana iti isuamin a tawen ti panageskuela, ket nabaelanmi ti nanglawlawag kadagiti adu a di umiso nga impormasion a nagun-odanna maipapan kadagiti Saksi.
“Daytoy a broshur ti pudno a nangibanag iti panggepna iti kasomi, a nangipaay iti nasaysayaat a relasion iti nagbaetan ti eskuelaan, estudiante, ken dagiti nagannak.”
No dadduma ti maysa a mannursuro ti mabalin a saan nga umiso ti pannakaawatna iti pammati dagiti Saksi ni Jehova. Ket isut’ makagun-od iti pakasarsaritaan nga isu saan a mannakitinnulong. Maysa nga ina manipud Salem, Oregon, ti nagsurat maipapan iti mannursuro iti anakna a babai iti maikatlo a grado nga addaan iti kasta a pakasarsaritaan:
“Di nagbayag kalpasan ti panangrugi ti panageskuela naaddaankami iti damo a panaggigimong dagiti nagannak ken mannursuro. Imparangko iti mannursuro ti broshur a School and Jehovah’s Witnesses. Intudok ti mannakitinnulong a kababalinna, nga impakitak a dagiti tattao ni Jehova tarigagayanda ti agbalin a pareha dagiti mannursuro. Insingasingko a mabalin a kayatna nga idulin daytoy a broshur kas maysa a mangigiya iti pannakaawat iti anakmi ken dagiti dadduma a Saksi nga estudiante a mabalin a maaddanto kenkuana kadagiti umay a tawtawen.
“Ti isusungbatna ti pudno a nangpasiddaaw kaniak, ta namnamaek a maaddaanak ti damo a kapadasan iti maysa a saan a mannakitinnulong a mannursuro. Sigagagar nga innalana ti broshur, minatmatanna iti apagbiit dayta ket kasla napasnek idi simmungbat a pudno nga apresiarenna ti maaddaan iti maysa a banag a mangilawlawag iti pammatitayo ken ar-aramidtayo.
“Nagsubliak sumagmamano nga aldaw kalpasanna ket inimtuodko ti mannursuro no isut’ naaddaanen iti tiempo a nangsukimat iti broshur. Imbagana nga isut’ nagtugaw iti kama ket binasana nga interamente dayta—manipud rugi agingga iti ngudo. Immanamong a ti impormasion ket nakasaysayaat ti pannakaiparangna ket apresiarenna unay ti pannakagun-odna iti dayta. Imbagak kenkuana a no addaan iti aniaman a saludsod maipapan iti dayta wenno kadagiti panagtigtignay ti anakmi pangngaasina ta ipakaammona kaniak. Impanamnamana nga aramidennanto dayta.
“Maysa a bulan kalpasanna, idi a ti klase okupado nga agsagsagana iti Halloween, ti anakmi a babai ti nangipakita kadakami iti maysa a workbook ket inlawlawagna nga isu laeng ti addaan iti kasta iti klase. Dayta ti inted ti mannursurona kenkuana ket imbagana a dayta ti aramidenna no ti klase ti mangar-aramid iti maysa a banag a mariknana a saanna nga aramiden.
“Daytoy a broshur, School and Jehovah’s Witnesses, ti pudno a kasasayaatan a taktika ken mannakitinnulong nga espiritu ken praktikal unay.”
Adu a dadduma pay a pampamilia a nangusar iti broshur nga School ti addaan iti kasta met laeng nga ebkas. Maragsakanda kadagiti positibo a sungbat dagiti mannursuro a nangapresiar kadagiti pagalagadan nga ipaayna.
Tulong a Maipaay kadagiti Estudiante a Saksi
Iti partikular, dagiti estudiante a Saksi magunggonaanda, ket adu ti nangiyebkas iti panagyamanda. Maysa nga ubing a babai manipud Ontario, Canada, ipadamagna:
“Ti mannursuromi iti historia ti mangisalsalaysay iti klase maipapan iti panagriknana no dagiti tattao kadagiti pagay-ayaman iti hockey ken dagiti dadduma pay a nga ay-ayam saanda nga agtakder a maipaay iti antipona iti nasion. Kinunana a daytoy ket saan a panagraem saan laeng nga iti pagilian no di ket kadagiti pay sabsabali. Tarigagayak ti makisarita kenkuana kalpasan ti klase, ngem awananak ti gundaway a mangaramid iti kasta. Imbes ketdi nagsuratak kenkuana ket nangilukonak iti broshur. . . . Iti pakasdaawak isut’ nagsubalit. Daytoy ti insuratna.
“‘Ti relihiuso a pammatim ket bukodmo. Daytoy ket personal unay a banag a mainugot a raemen, ken ipaayam, ken dagiti dadduma a saan a mangsalimetmet iti pammatim, iti konsiderasion. Pangngaasim, ta saanmo a pulos nga ipagarup a ti riknak ken dagiti kapanunotak ket maysa a panangbabalaw kenka ken iti pammatim. Inanamaek ti mangiyebkas iti panagraem ken ti di panangikankano ket siaktibo a suportarak ti kalintegan ken wayawaya iti relihion ti aniaman a tao. . . . Agyamanak a maipaay iti broshur, ta daytoy makalawlawag.’”
Maulit-ulit ti broshur nga School nakatulongen kadagiti mannursuro a mangapresiar iti pammati dagiti Saksi ni Jehova ken ti makilangen a buyogen ti pannakaawat kadagiti estudiante. Dagiti agtutubo a mangpadpadas a mangalagad kadagiti nadiosan a prinsipio ngarud ti natulongan. Kas ti kinuna ti babai manipud Ontario: “Daytoy ti namagbalin a nalaklaka unay para kadakami a makisarita kadagiti mannursuro ken pada nga estudiante maipapan iti pammatida.” Gapuna siguraduenyo a makaawat dagiti mannursuro iti broshur ken maparegtada a mangbasa iti dayta.