Aldaw ti Ibabales ti Dios

KAS nakitatayon iti immuna nga artikulo, adda dagiti sumagmamano a rason no apay a dakes para kadatayo nga ipamuspusan ti panagibales. Dakes dayta gapu ta inton agangay, di makarisut dayta iti parikut. Dakes dayta gapu ta patangkenenna ti panagginnura imbes a rangtayanna ti pannakipagayam. Ken dakes dayta gapu ta makadangran a mismo dayta iti daydiay agimula kadagiti managibales a pampanunot.

Ti kapapatgan a rason, nupay kasta, no apay a dakes ti natauan a panagibales ket makita kadagiti sasao ni Moises iti Israel: “Ni Jehova a Diosmo isu ti Dios a manangaasi.” (Deuteronomio 4:31) Yantangay ti Dios ket manangaasi, rebbeng nga agbalintayo met a manangaasi kas kenkuana. Kuna ni Jesus kadagiti pasurotna: “Itultuloyyo ti agbalin a naasi, a kas ken ni Amayo a manangaasi.”​—Lucas 6:36.

Nupay kasta, deskribiren met ti Biblia ni Jehova kas maysa a “Dios dagiti ar-aramid ti panagibales.” (Salmo 94:1) Agsao ni propeta Isaias maipapan “ti tawen ti parabur ni Jehova” ken kasta met “ti aldaw ti ibabales ti Diostayo.” (Isaias 61:2) Kasano nga agbalin ti Dios nga agpadpada a naasi ken managibales? Ket no kayattayo a tuladen ti kinaasi ti Dios, apay nga isut’ ditay tuladen iti panagibales?

Tapno masungbatan ti umuna a saludsod, naasi ti Dios agsipud ta ay-ayatenna ti sangatauan, ken isut’ mamakawan aginggat’ kabaelanna tapno iti kasta ikkanna dagiti tattao ti gundaway nga agbalbaliw manipud dakes a kababalinda. Adu, kas ken apostol Pablo, ti nangaprobitsaren iti daytoy a kinaasi. Ngem managibales met ti Dios​—iti anag ti panangiwayatna ti kinahustisia​—gapu ta ti kasta a kinaasi adda met patinggana. Inton dadduma imparangdan a dida pulos balbaliwan dagiti dalanda, iwayatton ti Dios ti panangukom iti dayta maaw-awagan aldaw ti ibabalesna.

Iti panangsungbat iti maikadua a saludsod, saan, ditay maikalintegan ti panagbalintayo a managibales gapu ta ti Dios ti mangkalikagum ti panagibales. Ni Jehova ket naan-anay iti kinahustisia. Dagiti tattao ket saan. Makita ti Dios dagiti amin a dasig ti maysa a banag ket kanayon nga isut’ mangaramid kadagiti nalinteg a pangngeddeng. Di maitalek kadatayo ti panagaramid ti kasta. Isut’ gapuna nga imbalakad ni Pablo: “Saankayo a bumalbales, ay-ayatek, no di ket bay-anyo laeng iti pungtot ti Dios; ta adda a naisurat: ‘Kuak ti pammales; siak supapakakto, kuna ni Jehova.’” (Roma 12:19) Maipaay iti paglaingantayo, rebbeng nga ipabus-oytayo ti panagibales kadagiti ima ni Jehova.

Apay adda Aldaw ti Ibabales?

Nupay kasta, kadagiti adu a paset ti Biblia bigbigenna ti panagkasapulan ti panangsingir kadagiti di managbabawi a managdakdakes. Kas pangarigan, impakpakauna nga imbaga ni apostol Pablo a ti Dios, baeten ken Jesus, “balsennanto dagiti saan a makaammo iti Dios ken dagiti di agtulnog iti ebanghelio ni Apotayo a Jesus.” (2 Tesalonica 1:8) Addaantayo kadagiti naimbag a rason nga ipapuso dagidiay a sasao. Apay?

No maminsan, agsipud ta ti kaaduan ita ket agtultuloy iti panangkaritda iti kinasoberano ti Namarsua, dida ikabkabilangan dagiti nasin-aw a lintegna. Kunaenda man a mamatida iti Dios wenno saan, silalawag nga ipakita ti konduktada a dida marikna nga agsungsungbatda iti sanguanan ti Dios. Agaplikar dagiti sasao ti salmista kadagiti kakasta: “Apay-apay ti nadangkes umsienna ti Dios? Kunana iti pusona: ‘Saankanto nga agsingir.’” (Salmo 10:13) Sigurado, saanto nga agnanayon nga ipalubos ni Jehova a marabrabak ti bagina iti kastoy a pamay-an. Nupay no isu ket Dios ti ayat, isut’ Dios met ti kinahustisia. Ipangagnanto ti ikkis dagidiay pudpudno a maseknan iti kinahustisia: “Bumangonka koma, O Jehova. O Dios, ilayatmo koma ta imam. Dika koma lipaten ti napanglaw.”​—Salmo 10:12.

Kasta pay met, dagiti mangkarkarit-linteg a tattao ket daddadaelenda ti daga a mismo a pagbibiagantayo. Rugrugitanda ti angin, ti daga, ken ti danum; punnuenda ti daga iti di kinahustisia ken kinaulpit. Ken agipempenda iti umdas a kemikal, nuklear, ken sabsabali pay a makapapatay nga igam tapno pagpeggadenda ti ilalasat ti sangatauan. Nainkapilitan ngarud ti nadiosan nga ibaballaet tapno maipasiguro ti natalged a masanguanan para iti natulnog a sangatauan. (Apocalipsis 11:18) Daytoy nga ibaballaet ket isu ti tinukoy ni Isaias kas ti aldaw ti ibabales.

Anianto ti Aramiden ti Aldaw ti Ibabales ti Dios?

Sigun iti Vine’s Expository Dictionary of Old and New Testament Words, idiay Griego a Kasuratan, ti sao para iti panagibales, no mausar mainaig iti Dios, literal a kayatna a sawen “‘daydiay tumaud gapu iti kinahustisia,’ saan, a kas kasansan ti ibabales ti tao, maigapu iti rikna ti panangdangran wenno gapu laeng iti pungtot.” Ngarud, ti ibabales ti Dios kadagiti kabusorna ket saanto a tiempo ti di matengngel a panangibukbok ti dara, kas iti personal a panagginnura. “Ni Jehova ammona nga isalakan dagiti tattao iti nadiosan a debosion iti pannakasulisogda, ngem aywananna dagiti managdakdakes maipaay iti pannakadusa iti aldaw ti pannakaukom,” kunaen ti Biblia kadatayo.​—2 Pedro 2:9.

Dagiti adipen ti Dios kumitada iti aldaw ti ibabales ti Dios kas tiempo a pannakaitan-ok ti umiso a kondukta ken pannakaispal dagiti nalinteg manipud panangparigat dagiti nadangkes. Di kaipapanan daytoy a manangpadakesda wenno manangipapanda. “Ti agragsak iti kinadaksanggasat ti sabali saanto a di madusa,” ipakdaar ti Biblia. (Proverbio 17:5) Iti kasumbabangirna, sukayanda ti kinaasi ken kinaanus, nga ipabus-oyda iti Dios aniaman a pangngeddeng maipapan ti panagibales.

Pudno, saan a nalaka para kadagiti agpungpungtot nga indibidual nga agtignay iti daytoy a pamay-an. Ngem posible daytoy, ket adun ti nakaaramid ti kasta. Kas pangarigan, naliday ni Pedro bayat ti kinaubingna ket masansan idi a bauten ni manongna. Gapuna nga isut’ dimmakkel a naranggas, a kankanayon a makiriri kadagiti polis ket pagipapasanna ni baketna ken dagiti annakna iti rurod a mariknana ken manongna. Kamaudiananna, isut’ nagimdeng iti maysa a Saksi ni Jehova ket idi agangay inrugina ti agadal ti Biblia. “Babaen tulong ni Jehova”, isalaysayna, “nagbalbaliwak, ket ita, imbes a makilabanak kadagiti tattao, tultulongak ida kas maysa a Kristiano a panglakayen.” Babaen tulong ti Biblia ken ti nasantuan nga espiritu, di mabilang a sabsabali pay ti umasping met a nagbalbaliw manipud panagbalin a managpudpudot wenno managibales a mangipakita ti ayat ken kinaanus kadagiti sabsabali.

Aniat’ Aramidenyonto?

Ti pananglaglagip iti iyaay ti aldaw ti ibabales ti Dios tulongannatayo a mangaprobitsar iti kinaanus ni Jehova. Ngem ti gundaway a panangaramid ti kasta ket saan a di nakedngan. Din agbayag dumtengen dayta nga aldaw. Impakita ni apostol Pedro no apay a daytat’ di pay dimteng: “Saan a namayamay ni Jehova maipapan iti karina, kas iti panangibilang dagiti dadduma a kinabayag, no di ket agur-uray a siaanus kadakayo a dina kayat a mapukaw ti uray siasino no di ket agturongda koma amin iti panagbabawi.”​—2 Pedro 3:9.

Naganat, ngaruden, ti panagsagana itan maipaay iti aldaw ti panagsingir ti Dios babaen ti panangadal kadagiti Kasuratan ken panangiyaplikar kadagiti balakadda. Daytoy ti tumulongto kadatayo a mangsurot kadagiti sasao ti salmista: “Sardayam ti pungtot ket lipatem ti gura; dika agalimuteng tapno agduyos laeng iti panagaramid ti dakes. Ta dagiti agaramid ti dakes magessatdanto, ngem dagidiay agpannuray ken Jehova tawidendanto ti daga.”​—Salmo 37:8, 9.

[Ladawan iti panid 7]

Kalpasan aldaw ti ibabales ti Dios, ‘dagidiay agpannuray ken Jehova tawidendanto ti daga’