Dagiti Saludsod Manipud Kadagiti Agbasbasa
Iti Roma 12:19, ipaspasimudaag kadi ni apostol Pablo a saan koma nga agpungtot dagiti Kristiano idi kinunana: “Dikay ibalesan ti bagbagiyo, dungdunguen, no di ket ipaayanyo ti lugar ti pungtot”?
Saan, no talaga nga an-anagen. Tuktukoyen ditoy ni apostol Pablo ti pungtot ti Dios. Siempre, saan a kayat a sawen daytoy nga awan dakesna no agpungtot dagiti Kristiano. Nalawag ti balakad ti Biblia a ditay koma agpungtot. Usigenyo ti sumagmamano a balakad ti Dios.
“Sardayam ti pungtot, ket lipatem ti gura: dika agalimuteng, daytoy agduyos laeng iti panagaramid iti dakes.” (Salmo 37:8) “Tunggal maysa nga agtultuloy a sipupungtot iti kabsatna manungsungbatto iti pangukoman ti kinahustisia.” (Mateo 5:22) “Dagiti aramid ti lasag maiparangarangda, ket isuda ti pannakiabig, kinarugit, nalulok a kababalin, panagrukbab iti didiosen, panangannurot iti espiritismo, guranggura, ringgor, imun, dagiti irarasuk ti unget.” (Galacia 5:19, 20) “Maikkat koma kadakayo ti isuamin a makadangran a kinapait ken unget ken pungtot ken panagririaw ken nabassawang a panagsasao.” (Efeso 4:31) “Tunggal tao masapul a nasiglat koma maipapan iti panagdengngeg, nainayad maipapan iti panagsao, nabannayat maipapan iti panagpungtot.” (Santiago 1:19) Kanayonanna, maulit-ulit a ballaagannatayo ti libro ti Proverbio a saantay koma a managpungpungtot wenno nalaka nga agung-unget gapu laeng kadagiti babassit a banag ken pagkamkamalian ti tao.—Proverbio 12:16; 14:17, 29; 15:1; 16:32; 17:14; 19:11, 19; 22:24; 25:28; 29:22.
Maitunos kadagita a balakad ti konteksto ti Roma 12:19. Imparegta ni Pablo a saan koma a managinsisingpet ti ayattayo, a bendisionantayo dagidiay mangidaddadanes kadatayo, a nasayaat koma ti panunotentayo kadagiti padatayo a tao, a ditay subadan ti dakes iti dakes, ken makikappiatayo iti isuamin a tattao. Kalpasanna, indagadagna: “Dikay ibalesan ti bagbagiyo, dungdunguen, no di ket ipaayanyo ti lugar ti pungtot; ta adda a naisurat: ‘Kukuak ti pammales; supapakakto, kuna ni Jehova.’”—Roma 12:9, 14, 16-19.
Wen, ditay ipalubos nga iduronnatayo ti pungtot nga agibales. Agkamali ti pannakaammotayo kadagiti kasasaad ken ti panangmatmattayo iti kinahustisia. Masansan a dakes ti maaramidtayo no gapu iti pungtot ket agibalestayo. Pagragsakan dayta ti Kabusor ti Dios, ti Diablo. Kinuna pay ni Pablo iti sabali a suratna: “Agpungtotkayo, ngem nupay kasta dikay agbasol; ti init saannakay koma a malnekan a sipupungtot, dikay met ilugaran ti Diablo.”—Efeso 4:26, 27.
Ti nasaysayaat ken ad-adda a nainsiriban nga aramiden isu ti panangitalek iti Dios no kaano nga agibales ken siasino ti balsenna. Kabaelanna nga aramiden daytoy gapu ta ammona ti amin a mapaspasamak, ken naibasar iti awan pagkuranganna a kinahustisiana ti aniaman a pangngeddengna. Matarusantayo a daytoy ti kayat a sawen ni Pablo iti Roma 12:19 no usigentayo ti Deuteronomio 32:35, 41 a dinakamatna, a pakairamanan dagitoy a sasao: “Kukuak ti pammales ken pananggunggona.” ( Idiligyo ti Hebreo 10:30.) Uray di ngarud karaman iti Griego a teksto, innayon ti sumagmamano a moderno a managipatarus ti sasao a “ti Dios” iti Roma 12:19. Nagbanag daytoy kadagiti patarus a kas “ti Dios koma ti agibales” (The Contemporary English Version); “iwayaanyo ti pungtot ti Dios” (American Standard Version); “ti Dios koma ti mangdusa no pagayatanna” (The New Testament in Modern English); “ipaayanyo ti lugar ti nadibinuan a pannusa.”—The New English Bible.
Uray no abusuen wenno idadanesdatayo dagiti bumusbusor iti kinapudno, makapagtalektayo iti pannakadeskribir ni Jehova a Dios a nangngegan ni Moises: “Jehova, Jehova, Dios a manangngaasi ken managparabur, nainayad nga agpungtot, ken aglaplapusanan iti kinaimbag a siaayat ken kinapudno; manalimetmet iti kaasi a siaayat a maipaay kadagiti rinibribu, mamakawan iti kinadakes ken salungasing ken basol; ket iti uray kaano dina kanunongan ti nakabasol.”—Exodo 34:6, 7.