Panangparmek iti Kinadakes

“APAY-APAY daytoy aso a natay ilunodna ni apok nga ari? Agdawatak kenka, a palubosannak koma a mapan, ket putolek ti ulona.” Kiddaw daytoy ni Abisai, a panguluen ti buyot ti Israel. Daytoy ti makapungtot a sungbatna idi nangngegna a sigugura nga inlunod ni Semei a Benjamenita ti apona, ni Ari David.​—2 Samuel 16:5-9.

Timmulok ni Abisai iti pilosopia a gagangay a maiparparegta ita​—ti prinsipio a panangsebseb iti apuy babaen ti apuy. Wen, kayat ni Abisai nga agsagaba ni Semei gapu kadagiti indissuorna nga insulto ken David.

Ngem ania ti reaksion ni David? Linapdan ni David ni Abisai, a kunkunana: “Bay-anyo.” Nupay saan a pudno dagiti pammabasol ni Semei, sipapakumbaba a di timmulok ni David iti pannakagargari nga agibales. Imbes ketdi, impabiangna dagiti bambanag ken Jehova.​—2 Samuel 16:10-13.

Idi nagsubli ni David iti trono kalpasan nga intarayanna ti natungday nga iyaalsa ti anakna a lalaki, maysa ni Semei kadagiti immuna a nangkablaaw kenkuana ken dimmawat iti pammakawan. Kayat man idin ni Abisai a papatayen, ngem saan a pinalubosan ni David a mapasamak dayta.​—2 Samuel 19:15-23.

Iti daytoy a gundaway, pinaneknekan ni David nga isu ket maitutop a mangiladawan ken Jesu-Kristo, a maipapan kenkuana insurat ni apostol Pedro: “Idi narabrabngis, dina sinubadan iti panangrabngis . . . no di ket intultuloyna nga intalek ti bagina iti daydiay mangukom a sililinteg.”​—1 Pedro 2:23.

Iti kaaldawantayo, dagiti Kristiano mabalakadanda nga agbalin a “napakumbaba iti panagpampanunot, a saan nga isupapak ti panangdangran iti panangdangran.” (1 Pedro 3:8, 9) Babaen ti panangtulad iti ulidan nga impakita da David ken Jesu-Kristo, mabalintayo met a “parmeken ti dakes babaen ti naimbag.”​—Roma 12:17-21.