Inaramidda ti Pagayatan ni Jehova

Napagballigian ni Pablo ti Rigat

NAPEGGAD ti sasaaden ni Pablo. Naranaan ti bagyo a managan Euroaquilo​—ti kapigsaan nga angin iti Mediteraneo​—ti barko a naglugananna ken dagiti 275 a sabsabali pay. Nakaro unay ti bagyo nga uray la saanda a makita ti init iti aldaw, wenno dagiti bituen iti rabii. Natural laeng nga iyam-amak dagiti pasahero ti biagda. Ngem liniwliwa ida ni Pablo babaen ti panangisaritana iti impalgak ti Dios kenkuana iti tagtagainep: “Awanto ti mapukaw nga uray maysa a kararua kadakayo, no di laeng ti barangay.”​—Aramid 27:14, 20-22.

Iti maika-14 a rabii ti bagyo, naklaat dagiti marinero iti natakuatanda​—20 a deppa laengen ti kaadalem ti baybay.a Iti saan unay nga adayo, tinukodda manen, ket 15 a deppa laengen ti kaadalemna. Asidegen ti takdang! Ngem makapadanag daytoy a naimbag a damag. Tangay mayalloallon iti ababaw a baybay iti rabii, mabalin a maidungpar ti barko kadagiti bato ket marba. Nainsiriban nga intinnag ngarud dagiti marinero dagiti angkla. Kayat ti dadduma kadakuada nga ibaba ti bilog sada lumugan iti dayta, ket makigasanggasatda iti taaw.b Ngem inatipa ida ni Pablo. Kinunana iti opisial ti armada ken kadagiti soldado: “Malaksid no dagitoy a lallaki agtalinaedda iti barangay, saankayo a maisalakan.” Impangag ti opisial ni Pablo, ket amin dagiti 276 nga adda iti barko sigagagar a pinadaananda a bumigat.​—Aramid 27:27-32.

Pannakarba ti Barko

Kabigatanna, nakakitada iti kadaratan iti igid ti baybay. Nabang-aran dagiti marinero. Pinugsatda dagiti angkla ket ingngatoda ti layag iti parupa ti barko sa binaybay-anda nga iturong ti angin. Nangrugi nga agpaigid ti barko. Sigurado a nagririawda gapu iti nalaus a ragsakda.​—Aramid 27:39, 40.

Ngem kellaat a naisadsad ti barko iti kadaratan. Nakarkaro pay, nalasanglasang ti kutit ti barko gapu kadagiti napigsa a dalluyon. Masapul a panawan amin a pasahero ti barko! (Aramid 27:41) Ngem adda problema. Adu kadagidiay nakalugan​—a pakairamanan ni Pablo​—ti balud. Iti babaen ti linteg ti Roma, no makalibas ti balud a bambantayan ti maysa a guardia, masapul a sagabaen ti guardia ti dusa a nairanta iti balud nga adda iti aywanna. Kas pagarigan, no nakalibas ti maysa a mammapatay, masapul a mapapatay ti naliway a guardia.

Gapu ta amkenda ti kasta a mapasamak, pinanggep dagiti soldado a patayen dagiti balud. Ngem inatipa ida ti opisial ti armada a naimbag ken Pablo. Imbilinna kadagiti amin a makalangoy a tumapuakda nga agpaigid. Dagidiay saan a makalangoy kumpetda kadagiti tabla wenno iti dadduma pay nga aruaten iti barko. Saggaysa a nagpatakdangda a nangpanaw iti narba a barko. Kas kinuna ni Pablo, awan ti natay uray maysa kadakuada!​—Aramid 27:42-44.

Milagro Idiay Malta

Malta ti nagan ti puro a sinangladan ti napaksuyan a grupo. Dagiti agnaed sadiay ket “ganggannaet-pagsasaoda a tattao,” a ti literal a kaipapananna, “barbaro” (Griego, barʹba·ros).c Ngem saan a nauyong dagiti umili iti Malta. Imbes ketdi, impadamag ni Lucas, a kadua ni Pablo a nagdaliasat, nga “impakitaandakami ti nalablabes ngem iti gagangay a natauan a kinamanangaasi, ta nangpasgedda iti apuy ket inawatdakami amin buyogen ti panangtulong gapu iti tudo nga agtintinnag idi ken gapu iti lam-ek.” Timmulong ni Pablo kadagiti umili ti Malta a nangurnong kadagiti kayo ken nangsungrod iti apuy.​—Aramid 28:1-3, footnote iti Reference Bible.

Pagammuan, adda karasaen a kimpet iti ima ni Pablo! Impagarup dagiti umili a mammapatay la ketdi ni Pablo. Nalabit impapanda a dusaen ti Dios dagiti managbasol babaen ti panangkabilna iti paset ti bagida a nausar iti basol nga inaramidda. Ngem adtoy! Nasdaaw dagiti umili idi inwarsi ni Pablo ti karasaen iti apuy. Kas kuna ti salaysay ni Lucas a nakaimatang iti dayta a pasamak, “padpadaananda a lumtegto nga umbal wenno kellaat a mapasagto a matay [ni Pablo].” Nagbalbaliw ti panunot dagiti umili ket kinunada a maysa la ketdi a dios ni Pablo.​—Aramid 28:3-6.

Nagyan ni Pablo idiay Malta iti simmaganad a tallo a bulan. Iti kaaddana sadiay, pinaimbagna ti ama ni Publio, ti panguluen ti puro, a nangsangaili ken Pablo, ken dagiti dadduma pay a masakit. Maysa pay, nangitukit ni Pablo kadagiti bukel ti kinapudno, a nangibunga iti adu a bendision kadagiti managpasangbay nga umili ti Malta.​—Aramid 28:7-11.

Ti Maadaltayo

Iti ministeriona, adu a karit ti nakaipasanguan ni Pablo. (2 Corinto 11:23-27) Iti nadakamat a salaysay, naibalud ni Pablo gapu iti naimbag a damag. Kalpasanna, naipasango kadagiti di ninamnama a pakasuotan: nadawel a bagyo ken pannakarba ti barko a naglugananna. Iti baet amin dagitoy, pulos a di kimmapuy ti determinasion ni Pablo a mangikasaba a sireregta iti naimbag a damag. Maibatay iti kapadasanna, insuratna: “Iti isuamin a kasasaad naadalko ti palimed agpadpada no kasano ti mabsog ken no kasano ti mabisinan, agpadpada no kasano ti maaddaan iti kinaruay ken no kasano ti agsagaba iti kinakirang. Ta kadagiti amin a bambanag addaanak iti bileg gapu iti daydiay mangted kaniak iti pannakabalin.”​—Filipos 4:12,13.

Pulos a ditay koma palubosan dagiti parikut iti biag a mangpakapuy iti determinasiontayo nga agbalin a nareregta a ministro ti pudno a Dios! No tumaud ti di ninamnama a pakasuotan, iyallatiwtayo ken Jehova ti pakadagensenantayo. (Salmo 55:22) Kalpasanna, siaanus nga aguraytayo ket kitaentayo no kasano ti panangtulongna kadatayo a mangibtur iti pakasuotan. Kabayatanna, itultuloytayo ti agserbi a simamatalek kenkuana, nga agtalgedtayo nga isu ket maseknan kadatayo. (1 Corinto 10:13; 1 Pedro 5:7) Babaen ti panagtalinaedtayo a natibker, aniaman ti mapasamak, mapagballigiantayo ti rigat, kas ken Pablo.

[Dagiti Footnote]