Adda Bileg ti Namnama a Panagungar

“Inawatko ti pannakaipukaw dagiti amin a bambanag . . . tapno . . . maammuak [ni Jesu-Kristo] ken ti pannakabalin ti panagungarna.”​—FILIPOS 3:8-10.

1, 2. (a) Adu a tawenen ti napalabas, kasano ti panangiladawan ti maysa a klero iti panagungar? (b) Kasanonto a mapasamak ti panagungar?

IDI rugrugi ti dekada 1890, impadamag ti maysa a pagiwarnak ti maipapan iti naidumduma a sermon ti maysa a klero idiay Brooklyn, New York, E.U.A. Kinunana a ti panagungar kaipapananna ti pannakaurnong ken panagbiag manen dagiti amin a tulang ken lasag a nakabuklan ti bagi ti tao, natay man dayta gapu iti uram wenno aksidente, kinnan ti ayup wenno nagbalin a ganagan. Insuro ti manangaskasaba a mapunnonto ti aglawlaw kadagiti ima, takiag, saka, ramay, tulang, pennet, ken kudil dagiti binilion a tattao a natay. Birokento dagitoy a kamkameng ti dadduma pay a paset ti isu met laeng a bagi. Kalpasanna dumteng dagiti kararua manipud langit ken impierno sada agtaeng kadagitoy nagungar a bagi.

² Di nainkalintegan ti panagungar babaen ti pannakabukel manen dagiti orihinal nga atomo, ken awanan dagiti tattao iti imortal a kararua. (Eclesiastes 9:5, 10; Ezequiel 18:4) Ni Jehova, ti Dios ti panagungar, saanna a masapul nga urnongen dagiti atomo ti banag a dati a nangbukel iti natauan a bagi. Kabaelanna ti agaramid kadagiti baro a bagi para kadagidiay mapagungar. Inikkan ni Jehova ni Jesu-Kristo nga Anakna iti pannakabalin a mangpagungar kadagiti natay, nga addaan iti posibilidad nga agbiag nga agnanayon. (Juan 5:26) Dayta ti gapuna a kinuna ni Jesus: “Siak ti panagungar ken ti biag. Ti mangalagad iti pammati kaniak, uray no matay, agbiagto.” (Juan 11:25, 26) Anian a makaliwliwa a kari! Pabilgennatay dayta a mangibtur kadagiti suot ken uray mangsango ken patay kas matalek a Saksi ni Jehova.

3. Apay a nasken nga idepensa ni Pablo ti panagungar?

³ Ti panagungar ket saan a maitunos iti ideya nga addaan dagiti tattao iti imortal a kararua​—kas insuro ti Griego a pilosopo a ni Plato. Gapuna, ania ti napasamak idi kinasabaan ni apostol Pablo dagiti prominente a Griego iti Areopago sadi Atenas, nga imbagana kadakuada a ni Jesus ket pinagungar ti Dios? “Ala ket,” kuna ti salaysay, “idi nangngegda maipapan ti panagungar dagiti natay, ti sumagmamano nangrugida a mangrabrabak.” (Aramid 17:29-34) Adu kadagiti nakaimatang iti panagungar ni Jesu-Kristo ti sibibiag pay laeng idi ket, nupay narabrabakda, pinaneknekanda a napagungaren ni Jesus. Ngem dagiti ulbod a mannursuro a naitimpuyog iti kongregasion idiay Corinto sinupiatda ti panagungar. Gapuna, sibibileg nga indepensa ni Pablo daytoy a Nakristianuan a sursuro iti 1 Corinto kapitulo 15. Ti naannad a panangusig kadagiti argumentona nalawag a paneknekanna ti kinatalged ken bileg ti namnama a panagungar.

Nalagda a Pammaneknek a Nagungar ni Jesus

4. Ania a pammaneknek dagiti nakaimatang iti panagungar ni Jesus ti impaay ni Pablo?

⁴ Imutektekanyo no kasano a rinugian ni Pablo ti panangikalinteganna. (1 Corinto 15:1-11) Malaksid no barengbareng ti panamati dagiti taga Corinto, salimetmetanda ti naimbag a damag maipapan iti pannakaisalakan. Natay ni Kristo gapu kadagiti basoltayo, naitanem, ken napagungar. Kinapudnona, nagparang ni napagungar a Jesus ken ni Cefas (Pedro), “kalpasanna kadagiti sangapulo ket dua.” (Juan 20:19-23) Agarup 500 dagiti nakakita kenkuana, nalabit idi imbilinna: ‘Inkay mangaramid kadagiti adalan.’ (Mateo 28:19, 20) Nagparang ken ni Santiago, agraman dagiti amin a matalek nga apostol. (Aramid 1:6-11) Iti asideg ti Damasco, nagparang ni Jesus ken ni Saulo “a kasla iti maysa a nayanak a kurang ti aldawna”​—a kas man la napagungaren iti espiritu a biag. (Aramid 9:1-9) Nagbalin a manamati dagiti taga Corinto gapu ta kinasabaan ida ni Pablo, ken inawatda ti naimbag a damag.

5. Ania ti argumento ni Pablo kas nailanad iti 1 Corinto 15:12-19?

⁵ Imutektekanyo ti panagrasrason ni Pablo. (1 Corinto 15:12-19) Yantangay ikaskasaba dagiti nakaimatang a napagungar ni Kristo, kasano a maikuna nga awan ti panagungar? No saan a napagungar ni Jesus, awan serserbi ti panangasaba ken ti pammatitayo, ket ulbodtayo a saksi ti Dios no kunatayo a pinagungarna ni Kristo. No saan a mapagungar dagiti natay, ‘addatayo pay laeng iti basbasoltayo,’ ket napukawen dagiti natay a naikaykaysa ken Kristo. Maysa pay, “no iti daytoy laeng a biag a nanginanamatayo ken Kristo, kadagiti amin a tattao datayo ti nakakaasi unay.”

6. (a) Ania ti kinuna ni Pablo kas panangpatalged iti panagungar ni Jesus? (b) Ania ti “maudi a kabusor,” ket kasanonto a mapukaw?

⁶ Pinasingkedan ni Pablo a nagungar ni Jesus. (1 Corinto 15:20-28) Yantangay ni Kristo ti “umuna a bungbunga” kadagidiay naturog ken patay, mapagungarto met dagiti dadduma. No kasano a nangibunga iti ipapatay ti panagsukir ti tao a ni Adan, ti panagungar ket babaen ti maysa a tao​—ni Jesus. Mapagungar dagidiay kukuana kabayatan ti kaaddana. ‘Pukawento [ni Kristo] ti isuamin a gobierno ken isuamin a kinaturay ken pannakabalin’ a bumusbusor iti kinasoberano ti Dios ket agturay a kas Ari agingga a maikabil ni Jehova amin a kabusor iti babaen dagiti sakana. Babaen ti bileg ti daton ni Jesus, mapukawto uray “ti maudi a kabusor”​—ti ipapatay nga impatawid ni Adan. Kalpasanna, iyawatto ni Kristo ti Pagarian iti Dios ken Amana, ket agpasakupto “iti Daydiay a nangipasakup ti isuamin a bambanag kenkuana, tapno ti Dios agbalinto nga isuamin a bambanag iti tunggal maysa.”

Mabautisaran Maipuon Kadagiti Natay?

7. Siasino dagiti “mababautisaran agpaay iti panggep a panagbalin a natnatay,” ket ania ti kaipapanan daytoy kadakuada?

⁷ Naisaludsod kadagiti di mamati iti panagungar: “Anianto ti aramiden dagidiay mababautisaran agpaay iti panggep a panagbalin a natnatay?” (1 Corinto 15:29) Di kayat a sawen ni Pablo a mabautisaran dagiti sibibiag maipuon kadagiti natay, ta dagiti adalan ni Jesus masapul a personal nga agsursuro, mamati, ken mabautisaranda. (Mateo 28:19, 20; Aramid 2:41) Dagiti napulotan a Kristiano “mababautisaran[da] agpaay iti panggep a panagbalin a natnatay” babaen ti pannakairaremda iti panagbiag a mangiturong iti ipapatay ken panagungar. Mangrugi ti kastoy a pannakabautisar iti kanito a parnuayen kadakuada ti espiritu ti Dios ti nailangitan a namnama ken agpatingga no mapagungarda iti imortal nga espiritu a biag idiay langit.​—Roma 6:3-5; 8:16, 17; 1 Corinto 6:14.

8. Ania ti masigurado dagiti Kristiano uray no patayen ida ni Satanas ken dagiti adipenna?

⁸ Kas ipamatmat ti sasao ni Pablo, ti namnama a panagungar matulonganna dagiti Kristiano a mangsango iti peggad ken ipapatay iti aniaman nga oras gapu iti panangikasabada iti Pagarian. (1 Corinto 15:30, 31) Ammoda a kabaelan ni Jehova a pagungaren ida no ipalubosna a patayen ida ni Satanas ken dagiti adipen ni Satanas. Ti Dios laeng ti makabael a mangpukaw iti kararua, wenno biagda, idiay Gehenna, a mangiladawan iti agnanayon a pannakadadael.​—Lucas 12:5.

Nasken ti Panagsiput

9. Tapno mapakirednatayo ti namnama a panagungar, ania ti masapul a liklikantayo?

⁹ Napakired ni Pablo iti namnama a panagungar. Idi adda idiay Efeso, dagiti bumusbusor kenkuana mabalin nga impuruakda iti arena tapno makiranget kadagiti narungsot nga ayup. (1 Corinto 15:32) No napasamak dayta, naispal ni Pablo, kas ken Daniel a naisalakan kadagiti leon. (Daniel 6:16-22; Hebreo 11:32, 33) Yantangay nangnamnama iti panagungar, saan a naaringan ni Pablo iti kababalin dagiti apostata idiay Juda idi panawen ni Isaias. Kinunada: “Mangan ken uminumtayo, ta inton bigat mataytayo.” (Isaias 22:13, Septuagint) Tapno mapakirednatayo ti namnama a panagungar kas ken Pablo, masapul a liklikantayo dagidiay addaan iti kasta a di umiso a kababalin. “Dikay payaw-awan,” namallaag ni Pablo. “Dagiti dakes a pannakitimpuyog dadaelenda dagiti makagunggona nga ug-ugali.” (1 Corinto 15:33) Siempre, agaplikar daytoy a prinsipio iti nadumaduma a benneg ti biag.

10. Kasano a mapagtalinaed a nabiag ti namnamatayo iti panagungar?

¹⁰ Kadagidiay agduadua iti panagungar, kinuna ni Pablo: “Agriingkayo a maipaay ti kinamanagparbeng iti nalinteg a pamay-an ket dikay iyugali ti panagbasol, ta ti sumagmamano awananda ti pannakaammo iti Dios. Agsasaoak tapno tignayenkayo nga agbain.” (1 Corinto 15:34) Iti daytoy “tiempo ti panungpalan,” masapul nga agtignaytayo a mayannurot iti umiso a pannakaammo iti Dios ken ni Kristo. (Daniel 12:4, NW; Juan 17:3) Daytoy ti mamagtalinaed a nabiag ti namnamatayo iti panagungar.

Iti Ania a Bagi a Mapagungar?

11. Kasano nga inyilustrar ni Pablo ti pannakapagungar dagiti napulotan a Kristiano?

¹¹ Insaruno ni Pablo nga imbuksilan ti sumagmamano a saludsod. (1 Corinto 15:35-41) Nalabit tapno pagparangenna a di nakappapati ti panagungar, mabalin nga isaludsod ti maysa ti kastoy: “Kasano a mapagungar dagiti natay? Wen, iti ania a kita ti bagi a bumangondanto?” Kas impakita ni Pablo, arigna matay ti maysa a bukel a naimula apaman nga agtubo. Umasping iti dayta, masapul a matay ti tao a nayanak iti espiritu. No kasano a ti mula ket naiduma a banag iti bukel a nagtaudanna, ti napagungar a bagi ti maysa a napulotan a Kristiano ket naiduma iti natauan a bagi. Nupay agtalinaed ti katataona sakbay a natay, mapagungar kas maysa a baro a parsua nga addaan iti espiritu a bagi nga agbiag idiay langit. Siempre, dagidiay mapagungar ditoy daga bumangondanto nga addaan iti natauan a bagi.

12. Ania ti kayat a sawen dagiti balikas a “nailangitan a bagbagi” ken “naindagaan a bagbagi”?

¹² Kas kinuna ni Pablo, naiduma ti lasag ti tao iti lasag dagiti animal. Saan nga agpapada uray ti lasag dagiti animal. (Genesis 1:20-25) Ti dayag ti “nailangitan a bagbagi” dagiti espiritu a parsua ket naiduma iti dayag dagiti “naindagaan a bagbagi” a lasag. Agduduma met ti dayag ti init, bulan, ken dagiti bituen. Ngem dakdakkel nga amang ti dayag dagiti napulotan a napagungar.

13. Sigun iti 1 Corinto 15:42-44, ania ti maitanem ken ania ti mapagungar?

¹³ Kalpasan a dinakamatna dagiti nagdudumaan, innayon ni Pablo: “Gapuna kasta met ti panagungar dagiti natay.” (1 Corinto 15:42-44) Kinunana: “Maimula iti panagrupsa, maibangon iti di panagrupsa.” Mabalin a ti grupo dagiti napulotan ti kayat a sawen ditoy ni Pablo. Agrupsa no matay, ngem saanen nga agrupsa no mapagungar, awananen iti basol. Nupay imbabain ti lubong, mapagungar iti nailangitan a biag ken sidadayag a maiparangarang a kadua ni Kristo. (Aramid 5:41; Colosas 3:4) No matay, maitanem a “pisikal a bagi” ket mapagungar a “naespirituan a bagi.” Yantangay posible daytoy kadagiti Kristiano a nayanak iti espiritu, masiguradotayo a mapagungarto met dagiti dadduma ditoy daga.

14. Kasano a pinaggidiat ni Pablo ni Kristo ken ni Adan?

¹⁴ Insaruno ni Pablo a pinaggidiat ni Kristo ken ni Adan. (1 Corinto 15:45-49) Ni Adan, ti umuna a tao, “nagbalin a sibibiag a kararua.” (Genesis 2:7, NW) “Ti maudi nga Adan”​—ni Jesus​—“nagbalin a mangted-biag nga espiritu.” Intedna ti biagna kas daton a pangsubbot, umuna, maipuon kadagiti napulotan a pasurotna. (Marcos 10:45) Kas tattao, ‘adda kadakuada ti ladawan daydiay naaramid iti tapok,’ ngem no mapagungarda, agbalinda a kas iti maudi nga Adan. Siempre, ti daton ni Jesus ket agpaay a pakagunggonaan ti amin a natulnog a tattao, agraman dagidiay mapagungar ditoy daga.​—1 Juan 2:1, 2.

15. Apay a saan a mapagungar iti lasag dagiti napulotan a Kristiano, ken kasanodanto a mapagungar kabayatan ti kaadda ni Jesus?

¹⁵ No matay dagiti napulotan a Kristiano, saanda a mapagungar iti lasag. (1 Corinto 15:50-53) Ti agrupsa a bagi a buklen ti lasag ken dara saanna a mabalin a tawiden ti di panagrupsa ken ti nailangitan a Pagarian. Mabiit la a maturog ken patay ti dadduma kadagiti napulotan. No maturposda a simamatalek ti biagda ditoy daga kabayatan ti kaadda ni Jesus, ‘mabaliwanda iti apagkanito, iti panagkirem ti mata.’ Giddato a mapagungarda iti espiritu a biag a di agrupsa ken nadayag. Iti kamaudianna, agdagupto iti 144,000 ti bilang ti nailangitan a “nobia” ni Kristo.​—Apocalipsis 14:1; 19:7-9; 21:9; 1 Tesalonica 4:15-17.

Pannakaparmek ni Patay!

16. Sigun ken Pablo ken kadagiti nagkauna a mammadto, anianto ti mapasamak iti ipapatay nga impatawid ni managbasol nga Adan?

¹⁶ Napnuan rag-o a kinuna ni Pablo a maparmekto ni patay iti agnanayon. (1 Corinto 15:54-57) Inton ti agrupsa ken matay ket makawesan iti di panagrupsa ken kinaawan ipapatay, matungpalto dagitoy a sasao: “Ni patay maalimon iti agnanayon.” “Patay, sadino ti yan ti panagballigim? Patay, sadino ti yan ti panniludmo?” (Isaias 25:8; Oseas 13:14) Ti pannilud a mangpataud iti ipapatay isu ti basol, ket ti pigsa ti basol isu ti Linteg, a nangkondenar kadagiti managbasol ken patay. Ngem gapu iti pannakaidaton ken pannakapagungar ni Jesus, saanton nga agballigi ti ipapatay nga impatawid ni managbasol nga Adan.​—Roma 5:12; 6:23.

17. Kasano nga agaplikar ita ti sasao ti 1 Corinto 15:58?

¹⁷ “Iti kasta, dungdungnguek a kakabsat,” kinuna ni Pablo, “agbalinkayo a natibker, di magaraw, a kankanayon nga aduankayo ti aramiden iti trabaho ti Apo, nga ammoyo a ti panagbannogyo saan nga ubbaw mainaig iti Apo.” (1 Corinto 15:58) Agaplikar dagita a sasao kadagiti napulotan a natda ita ken iti “sabsabali a karnero” ni Jesus uray no matayda kadagitoy maudi nga al-aldaw. (Juan 10:16) Saan nga ubbaw ti panagbannogda kas manangiwaragawag iti Pagarian, ta mapagungardanto. Kas ad-adipen ni Jehova, agtalinaedtayo ngarud a naagawa iti trabaho ti Apo bayat nga ur-urayentayo ti aldaw inton sirarag-o nga idir-itayo: “Patay, sadino ti yan ti panagballigim?”

Matungtungpalen ti Namnama a Panagungar!

18. Kasano katibker ti namnama ni Pablo iti panagungar?

¹⁸ Dagiti sasao ni Pablo a nailanad iti 1 Corinto kapitulo 15 nalawag nga ipakitada nga adda bileg iti biagna ti namnama a panagungar. Awan a pulos ti duaduana a napagungar ni Jesus ket maruk-atanto met dagiti dadduma pay iti tanem ti sangatauan. Addaankay kadi iti kasta a natibker a pammati? Imbilang ni Pablo “kas adu a basura” dagiti banag nga agpaay laeng iti bukod a bagi ken ‘imbilangna dagiti amin a bambanag a pukaw’ tapno ‘maammuanna ti Kristo ken ti pannakabalin ti panagungarna.’ Situtulok ti apostol a matay a kas iti ipapatay ni Kristo ta ninamnamana a magun-odnanto ti “nasapsapa a panagungar.” Maawagan met dayta iti “umuna a panagungar,” a mapasaran dagiti 144,000 a napulotan a pasurot ni Jesus. Wen, mapagungarda iti espiritu a biag idiay langit, idinto a ti “dadduma kadagiti natay” mapagungardanto ditoy daga.​—Filipos 3:8-11; Apocalipsis 7:4; 20:5, 6.

19, 20. (a) Siasino dagiti nailanad iti Biblia a mapagungarto ditoy daga? (b) Siasino ti namnamaenyo a mapagungar?

¹⁹ Sidadayag a matungtungpalen ti namnama a panagungar kadagiti napulotan a matalek agingga ken patay. (Roma 8:18; 1 Tesalonica 4:15-18; Apocalipsis 2:10) Dagiti makalasat iti “dakkel a rigat” makitadanto ti pannakatungpal ti in-inanamaenda a panagungar ditoy daga inton ‘ti baybay iyawatna dagidiay natay nga adda kenkuana, ket ni patay ken ti Hades iyawatda dagidiay natay nga adda kadakuada.’ (Apocalipsis 7:9, 13, 14; 20:13) Karamanto kadagidiay mapagungar ditoy daga ni Job, a naawanan iti pito nga annak a lallaki ken tallo a babbai. Iladawanyo ti rag-ona a mangabrasanto kadakuada​—ket anian a ragsakdanto ta adda pito pay a kakabsatda a lallaki ken tallo nga agkakapintas a kakabsatda a babbai!​—Job 1:1, 2, 18, 19; 42:12-15.

²⁰ Anian a bendision inton mapagungar ditoy daga da Abraham ken Sara, Isaac ken Rebecca​—wen ken adu pay, agraman dagiti “amin a mammadto”! (Lucas 13:28) Maysa ni Daniel kadagita a mammadto. Naikari kenkuana a mapagungarto iti sidong ti Mesianiko a turay. Agarup 2,500 a tawenen nga agin-inana ni Daniel iti tanem, ngem babaen ti pannakabalin ti panagungar, iti saanen a mabayag ‘agtakderto iti bingayna’ kas maysa kadagiti “piprinsipe iti amin a daga.” (Daniel 12:13; Salmo 45:16) Anian a makaparagsakto nga abrasaen saan laeng a dagiti matalek idi ugma no di pay ket ti mismo nga ama, ina, anak, wenno dadduma pay a patpatgenyo nga innala kadakayo ti kabusor a ni patay!

21. Apay a ditay koma itungtungkua ti agaramid iti naimbag kadagiti sabsabali?

²¹ Mabalin nga adun a dekada nga agserserbi iti Dios ken lallakay wenno babbaketen ti dadduma kadagiti gagayyem ken ing-ingungotentayo. Gapu iti edadda, mabalin a marigatanda a mangsango kadagiti karit iti biag. Anian a kinamanagayat nga aramidentayo ti aniaman a maitulongtayo kadakuada ita! Iti kasta, awanto ti pagbabawyantayo no bilang ta matayda. (Eclesiastes 9:11; 12:1-7; 1 Timoteo 5:3, 8) Masiguradotayo a dinto lipatan ni Jehova dagiti naimbag nga ar-aramidentayo kadagiti sabsabali, aniaman ti edad wenno kasasaadda. Insurat ni Pablo: “Bayat nga addaantayo iti mainugot a tiempo a maipaay iti dayta, aramidentayo koma ti naimbag kadagiti isuamin, ngem nangnangruna kadagidiay nainaig kadatayo iti pammati.”​—Galacia 6:10; Hebreo 6:10.

22. Bayat nga ur-urayentayo ti pannakatungpal ti namnama a panagungar, ania ti determinado koma nga aramidentayo?

²² Ni Jehova “ti Ama dagiti nadungngo nga asi ken ti Dios ti amin a liwliwa.” (2 Corinto 1:3, 4) Ti Saona liwliwaennatayo ken tulongannatayo a mangliwliwa kadagiti sabsabali babaen ti nabileg a namnama iti panagungar. Bayat nga ur-urayentayo ti pannakatungpal dayta a namnama inton agungar dagiti natay ditoy daga, tuladentay koma ni Pablo a nanginanama iti panagungar. Sapay koma ta tuladentayo a nangnangruna ni Jesus, a ti pananginanamana iti pannakabalin ti Dios a mangpagungar kenkuana ket natungpal. Iti saanen a mabayag, dagidiay adda kadagiti pakalaglagipan a tanem mangngegdanto ti timek ni Kristo ket rummuarda. Sapay koma ta mangyeg daytoy iti liwliwa ken rag-o kadatayo. Ngem kangrunaan iti amin, agyamantay koma ken Jehova, a nangparmek ken patay babaen ken ni Jesu-Kristo nga Apotayo!

Ania ti Sungbatyo?

• Ania a pammaneknek dagiti nakaimatang iti panagungar ni Jesus ti impaay ni Pablo?

• Ania ti “maudi a kabusor,” ket kasanonto a mapukaw?

• Maipanggep kadagiti napulotan a Kristiano, ania ti maitanem ken ania ti mapagungar?

• Siasino dagiti tattao a nailanad iti Biblia a kayatyo a makita inton mapagungarda ditoy daga?

[Ladawan iti panid 16]

Sibibileg nga indepensa ni apostol Pablo ti panagungar

[Dagiti Ladawan iti panid 20]

Mangyegto iti aglaplapusanan a rag-o ti pannakapagungar ni Job, ti pamiliana, ken dadduma pay!