Panangibangon ti Nakristianuan a Personalidad Kadagiti Annaktayo

TI INA ni Wanda, a pinanawan ti asawana, nagtrabaho a sigagaget a mangibangon kadagiti Nakristianuan a kualidad iti anakna a babai. Idi agtawen ni Wanda iti 12, naikabil iti pannakasubok daytoy a panangsanay. Iti dayta a tiempo, ni Wanda, agraman ti inaudi a kabsatna a lalaki ken babai, masapul a panawanna ni nanangna ket makipagnaed iti sumagmamano a tiempo iti amana. Di manamati ni tatangna, gapuna kasanot’ panagtignay ni Wanda no awan ni nanangna a mangsiput kenkuana?

Dumtengto ti tiempo kadagiti amin a Kristiano a nagannak a dagiti annakda masapul a mangaramidda iti bukodda a pangngeddeng, a pakasubokan ti pammatida. Mabalin a maisina dagiti annak manipud kadagiti Kristiano a nagannakda, kas ken ni Wanda. Mabalin a sanguenda ti panangpilit dagiti kapatadada nga agaramid iti dakes idiay eskuelaan. Wenno mabalin a sanguenda ti nakaro a pannakasulisog. Inanamaen ken ikarkararag dagiti Kristiano a nagannak nga inton dumteng dayta a tiempo, dagiti annakda addaandanto iti Nakristianuan a personalidad nga addaan bileg a mangsaranget iti pannakasubok.

Kasano a maibangon dagiti nagannak ti nabileg a Nakristianuan a kualidad kadagiti annakda? Sakbay nga ammuentayo no aniat’ napasamak ken ni Wanda, kitaentayo no kasano a makatulong kadatay ti Biblia a mangsungbat iti dayta a saludsod. Ti pangibatayan iti sungbat ket masarakan kadagitoy a sasao ni apostol Pablo kadagiti Kristiano idiay Corinto: “Ta awan ti makabalin a mangikabil iti sabali a pundasion no di laeng ti naikabilen, nga isu ni Jesu-Kristo. No adda agbalay iti rabaw daytoy a pundasion ti balitok, pirak, napateg a batbato, kayo, ruot, garami, ti aramid ti tunggal maysa maiparangarangto, ta ti aldaw ipakitananto ta maipalgakto babaen iti apuy; ket ti met laeng apuy padasennanto ti aramid ti tunggal maysa.”​—1 Corinto 3:11-13.

Ti Pundasion

Apay nga insurat ni Pablo dagitoy a sasao? Rinugianna ti maysa a programa iti panangibangon kadagiti Nakristianuan a personalidad idiay Corinto, ngem ti programa naaddaan kadagiti parikut. Siempre, ti programa ni Pablo a panagibangon dina iraman dagiti annakna a nainlasagan. Ramanenna dagidiay a nagbalin a Kristiano babaen iti panangasabana. Ngem pinanunotna dagitoy a kas dagiti naespirituan nga annakna, ket ti imbagana napateg met kadagiti nagannak.​—1 Corinto 4:15.

Immay idin ni Pablo ditoy Corinto iti nasapsapa a tiempo ket nakaipasdeken iti maysa a kongregasion Kristiano sadiay. Dagidiay nga immawat iti panangasabana nakaaramiddan kadagiti dakkel a panagbalbaliw iti personalidadda. Daddumat’ dati nga imoral a tattao, mannanakaw, managrukbab kadagiti ladladawan, ken mammartek. (1 Corinto 6:9-11) Ngem nagbalbaliwda iti Nakristianuan a panagpampanunot agsipud ta ni Pablo nangikabil iti nasayaat a pundasion, kas pagarupentayo. Ania dayta a pundasion? “Awan ti makabalin a mangikabil iti sabali a pundasion no di laeng ti naikabilen, nga isu ni Jesu-Kristo.”​—1 Corinto 3:11.

Kasano ti panangikabil ni Pablo itoy a pundasion bayat ti panangisurona kadagitoy kabbaro a manamati idiay Corinto? Ibagana kadatayo: “Siak, kakabsat, idi immayak kadakayo saanak nga immay a buyogen ti kinalaing ti panagsao wenno ti kinasirib nga inwaragawagko kadakayo ti sagrado a palimed ti Dios. Ta inkeddengko a di ammuen ti uray aniaman iti nagtetengngaanyo malaksid ken Jesu-Kristo, ken ti pannakailansana.” (1 Corinto 2:1, 2; Aramid 18:5) Dina inturong ti atension iti bagina wenno inarkosan ti kinapudno tapno maaddaan iti narabaw a makaawis a kinalaing. Imbes ketdi, inturongna ti atension ken Jesu-Kristo ken ti pamay-an ti panangusar ti Dios iti daytoy.

Kinapudnona, ni Jesus ket maysa a nadayag a nabileg a pundasion iti Nakristianuan a panagibangon. Impaayna ti daton a subbot. Itan isut’ maysa a nailangitan nga Ari ket iti kasta dadaelennanton iti mabiit dagiti kabusor ti Dios idiay Armagedon. Kalpasanna iyaplikarnanton ti kinalinteg ti Dios bayat ti sangaribu a tawen a panagturayna, ken kas Nangato a Padi ti Dios, in-inut nga iragpatna ti natauan a rasa iti kinaperpekto. Ania pay koma ti sabali a pundasion a tarigagayan ti tao?

Gapuna, iti panangibangon iti Nakristianuan a personalidad kadagiti annaktayo, nagsayaatan no tuladentayo ni Pablo ket masiguradotayo nga apresiarendanto dagitoy a napapateg a kinapudno. Manipud iti kinaubingda, masapul nga isurotayo dagiti annaktayo a mangayat ken ni Jesus gapu ti inaramidna ken ar-aramidenna agpaay kadatayo.​—1 Pedro 1:8.

Ti Panagibangon

Nupay kasta, nupay naikabilen ni Pablo daytoy nagsayaatan a pundasion, nagsagaba ti trabaho a panagibangon kadagiti pakaupayan kalpasan ti ipapanawna. (1 Corinto 3:10) Umasping ti parikut iti mapadpadasan dagiti adu a nagannak itatta. Pinadakkelda dagiti annakda iti Nakristianuan a pammati ket masiguradoda a naawatan dagiti annakda ti kinapudno. Ngem idi nataengandan, binaybay-an dagiti annak wenno linaksidda ti pammati. Apay a kasta? Masansan gapu kadagiti materiales a nausar.

Kinuna ni Pablo a dagiti personalidad mabalin a maibangon kadagiti napapateg a materiales: balitok, pirak, ken napapateg a batbato. Wenno mabalin a maibangonda kadagiti narukop a materiales: kayo, ruot, ken garami. (1 Corinto 3:12) Ita, no ti agibangon usarenna ti balitok, pirak, napapateg a batbato, mabalin nga isut’ agibangbangon iti nagsayaatan a kita iti estruktura, maysa a naisangsangayan ti kinapategna. Ngem ti agibangbangon a mangusar iti kayo, ruot, ken garami agibangbangon laeng iti maysa a banag a maisandi, temporario, ken narukop.

Kasla dagiti nakapuy a naespirituan a material ti nausar idiay Corinto. Dadduma a timmulad iti panangikabil ni apostol Pablo iti pundasion nagibangbangonda iti kinanarukop, dida nagibangon kadagiti nabileg, agpaut nga estruktura. Rinugian dagiti taga Corinto ti nangmatmat kadagiti tao, ket naadda ti panagsisina, panagimun, ken panagsusuppiat kadakuada. (1 Corinto 1:10-12; 3:1-4) Kasano koma a nalapdan daytoy? Babaen ti panangusarda kadagiti nasaysayaat-kualidadna, nalagda a materiales.

Dagitoy irepresentarda dagidiay napapateg a kababalin a nasken a paset ti Nakristianuan a personalidad. Aniada a kababalin? Dinakamat ni apostol Pedro ti maysa: “Ti pannakasuot ti pammatiyo, a napatpateg ngem iti balitok.” (1 Pedro 1:6, 7) Dinakamat ni Ari Salomon ti dua pay: sirib ken pannakaawat, a ti pannakagun-od iti dayta “nasaysayaat ngem ti pannakagun-od iti pirak.” (Proverbio 3:13-15) Ken pinalagipannatay ni Ari David a ti panagbuteng ken ni Jehova ken ti panangapresiar kadagiti bilinna “ad-adda a matarigagayan ngem ti balitok.”​—Salmo 19:9, 10.

Dagitoy ken dadduma pay a napateg a materiales maibangonda iti Nakristianuan a personalidad tapno tumulong kadagiti annaktayo a makalasat kadagiti pannakasubok. Kasano, nupay kasta, a masiguradotayo nga agibangbangontayo kadagita a materiales? Babaen ti panangaywantayo kadagiti puso, agpadpada ti puso dagiti annaktayo ken ti pusotayo.

Maysa a Naballigi a Trabaho a Panagibangon

Ti paset ti puso dagiti nagannak iti daytoy a trabaho a panagibangon ket makita iti bilin nga inted ni Jehova kadagiti nagannak iti nasion ti Israel idi ugma: “Dagitoy a sasao nga ibilinko kenka iti daytoy nga aldaw aggiandanto ita pusom.” Sana intuloy a kinuna: “Ket isuromto a siagawa daytoy iti anakmo.” (Deuteronomio 6:6, 7) Gapuna, sakbay nga agibangontayo kadagiti sabsabali, masapul nga ibangontay pay ti bagbagitayo. Masapul a makita dagiti annaktayo kadagiti bambanag a sawentayo ken aramidentayo a ti personalidadtayo ket naaramid kadagiti umiso a materiales.​—Colosas 3:9, 10.

Kalpasanna, masapul a dumanon iti pusoda ti isursurotayo. Ni Jesus, ti kababalligian a managibangon iti Nakristianuan a personalidad, dinanonna dagiti puso babaen ti panangusarna kadagiti ilustrasion ken salsaludsod. (Mateo 17:24-27; Marcos 13:34) Dagiti nagannak masarakanda a dagitoy met laeng a pamay-an ti panangisuro ket epektibo unay. Mangusarda kadagiti ilustrasion tapno pagbalinen dagiti Nakristianuan a kinapudno a makaawis iti puspuso dagiti agtutubo nga annakda, ken mangusarda kadagiti napanunot a naimbag a salsaludsod a mangsukisok iti pudno a pampanunoten dagiti natataenganen nga annakda, no kasano ti panagrasrason ti pusoda.​—Proverbio 20:5.

Idi padpadasen ni Moises nga ibangon kadagiti Israelitas ti panagtarigagay nga agtalinaed a matalek, kinunana: “Salimetmetam dagiti bilin ni Jehova ken dagiti alagadenna . . . tapno agimbagka.” (Deuteronomio 10:13) Umasping iti dayta, nasayaat no dagiti nagannak saanda laeng nga ilawlawag a naimbag kadagiti annakda no ania dagiti pagalagadan ti Dios no di ket ipakitada met a buyogen ti panangkumbinsir no apay a dagiti bambanag a kas iti kinasingpet, moral a kinadalus, ken naimbag a pannakilangen agpaay a pagimbaganda.

Kamaudiananna, kinuna ni Jesus: “Daytoy kaipapananna ti biag nga agnanayon, ti pananggun-odda iti pannakaammo kenka a maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) No personal a maam-ammo dagiti annak ni Jehova iti nasapa pay nga edad, masursuroda ti makisarita kenkuana maipapan kadagiti parikutda, ken mapadasanda ti panangsungbatna iti karkararagda, makapataudda iti kapapatgan a paset ti Nakristianuan a personalidad: maysa a personal a pannakirelasion iti Namarsuada.

Ti Apuy

Nasarakan ni Pablo nga idi a ti panagibangon idiay Corinto di umiso ti pannakaaramidna, dagiti nailubongan nga ug-ugali, kas iti sektarianismo ken panagsisina, timmaudda. Napeggad daytoy agsipud ta, kas inlawlawagna, “ti met laeng apuy padasennanto ti aramid ti tunggal maysa.”​—1 Corinto 3:13.

Ania ti apuy? Mabalin a dayta ket aniaman a pannakasubok nga iyeg ni Satanas iti maysa a Kristiano. Mabalin a dayta ti panangpilit dagiti kapatada, pannakasulisog ti lasag, materialismo, pannakaidadanes, uray pay ti makareggaay nga impluensia ti panagduadua. Dagita a panangsubok sigurado a dumteng. “Ti aramid ti tunggal maysa maiparangarangto, ta ti aldaw ipakitananto, ta maipalgakto babaen iti apuy.” Dagiti nasirib a nagannak ibangonda ti personalidad dagiti annakda iti pananginanama a dagiti annakda ti masubok. Ngem makapagtalekda a babaen ti tulong ni Jehova, malasantan dagiti annakda ti pannakasubok. No dagiti nagannak addaanda ti kastoy a kababalin, mabendisionandanto iti kasta unay.

Ti Gunggona

Kinuna ni Pablo: “No ti aramid nga imbangon ti siasinoman a tao mataginayonto, awatennanto ti gunggona.” (1 Corinto 3:14) Nakaawat ti gunggona ni apostol Pablo. Kadagiti Kristiano idiay siudad ti Tesalonica, isu a nagibangonanna met, isut’ nagsurat: “Ta ania ti inanamami wenno rag-o wenno balangat a pakaidayawanmi​—saan aya a dakayo met laeng?​—iti sanguanan ni Apotayo a Jesu-Kristo iti iyaayna? Kinapudnona dakayo ti dayaw ken ragsakmi.”​—1 Tesalonica 2:19, 20.

Nagun-odan ti ina ni Wanda daytoy a gunggona. Idi ti 12-tawenna a ni Wanda nasarakanna ti bagina a naisina ken inana, nagsangit agingga a nakaturog idi damo. Kalpasanna nalagipna ti balakad ti inana a saritaenna dagiti parikutna ken ni Jehova babaen iti kararag. Isut’ nagkararag ket di nagbayag napanunotnan ti panangbiruk iti libro ti telepono no adda aniaman a Saksi ni Jehova iti asidegda. Nakiuman kadakuada ket naammuanna a ti pamilia agnanaedda laeng iti kalsada nga yan ti balay ni tatangna. “Naragsakanak idi!” kuna ni Wanda.

Babaen ti pammaregta daytoy a pamilia, inurnos ni Wanda dagiti inaudi a kakabsatna a lalaki ken babai tapno agsublida iti Nakristianuan nga aramid. “Biangko ti panagsaganami para kadagiti gimong,” inlawlawagna. “Labaak dagiti kawesmi, sagaysayek dagiti buokmi, ken siguraduek a nadaluskami ken presentable.” Narigat a trabaho dayta para iti agtutubo a babai, ngem naaramidna dayta. Naminsan pinadas a lapdan ni tatangna ti itatabunoda kadagiti gimong, ngem nagpakpakaasi dagiti ubbing kenkuana, ket pinalubosanna ida.

Kamaudiananna, dagiti ubbing naikaykaysadan iti inada. Idi agtawen ni Wanda iti 15, nabautisaranen a Kristiano, ket kalpasanna inyebkasna ti ambisionna nga isut’ panagbalin a misionera. Wen, ti trabaho ti ina ni Wanda nalasatanna ti pannubok. Tinagiragsakna ti gunggona a makakita iti anakna a babai a nagtakder a sititibker a bukodna iti kinapudno. Sapay koma ta amin a Kristiano a nagannak maaddaanda iti umasping a balligi bayat ti panagtrabahoda a mangibangon kadagiti Nakristianuan a personalidad iti annakda.

[Kahon iti panid 27]

Nupay, kas ipakita daytoy nga artikulo, padpadasen dagiti nagannak ti mangibangon kadagiti Nakristianuan a personalidad iti annakda, dagiti annak a mismo addaanda met iti rebbengen. Dagitoy, kas kadagiti amin a Kristiano, masapul nga agaramidda a mismo iti panagibangon. (Efeso 4:22-24) Nupay no dagiti nagannak addaanda iti nagsayaatan a gundaway a tumulong iti daytoy, kamaudiananna tunggal indibidual masapul a mangaramid iti bukodna a pangngeddeng nga agserbi ken ni Jehova.