Agbirbirokkayo Aya ti Asawa?
“AWANEN ti adda a nakaay-ayat, nainggayyeman ken makaay-ayo a relasion, ti pannakisasao wenno pannakikadkadua ngem iti nasayaat a panagasawa.” Kasta ti adda a naibaga. Gapuna, saanen a pagsidsiddaawan a minilmilion kadagiti agsolsolo a tattao ket kayatda ti maaddaan iti asawa.
Dadduma mapanda iti maysa a kompiuter a mangbirok iti katupagda, dadduma kumitada kadagiti bituen. Ngem anian a nasaysayaat pay ti ikikita iti Namarsuatayo, ti Namunganay ti panagasawa! (Genesis 2:18-24) Ti naayat nga interes ken kinasirib ti Dios ti mangted iti natibker a pangibatayan iti panagtalek iti balakad ken kadagiti prinsipiona a mangtulong kadatayo a mangammo no ania ti masapul a biruken iti maysa nga asawa. (Salmo 19:7) Ti Saona bilinennatayo kas iti sumaganad
‘Mangasawa Laeng iti Apo’
Apay? Agsipud ta ni Jehova a Dios ti maseknan iti agnanayon a pagimbagantayo. Ti balakad ni apostol Pablo a ‘mangasawa laeng iti Apo’ ti maitunos iti ugali dagiti immuna nga ad-adipen ni Jehova a nangpili kas asawada dagidiay padada a pudno a managdaydayaw. (1 Corinto 7:39; Deuteronomio 7:3, 4) Dagiti gunggona ti panangaramid iti dayta nakaad-aduda ket rebbeng nga isu koma ti pampanunoten.
Kas pangarigan, ti nadiosan a kadua iti panagasawa ti makatulong iti agtultuloy a panagmatalek iti naayat a nailangitan nga Amatayo. (Idiligyo iti Eclesiastes 4:9-12.) Dagiti assawa a Kristiano ti makapagpipinnaregta iti maysa ken maysa ken isuda a dua ti makasaranget a sibaballigi kadagiti nagduduma a pakasuotan. Sangsangkamaysa, mabalinda a labanan dagiti pammarigat a mabalin a mangpakapuy iti singgalut ti panagasawa. Yantangay agpadpada a kumitkitada ken ni Jehova ken iyap-aplikar dagiti nakaskasdaaw a balakadna, buyogen ti dakdakkel a kinalaka mabalinda a palamuyoten dagiti nakersang a paspasetna ket agtrabahoda a sangsangkatunos imbes nga aglinnaslasanda. Dagiti napasnek a panagreggetda nga agserbi ken ni Jehova ken mangsukog ti biagda a maitunos kadagiti daldalanna ti makatulong iti naballigi a panagasawa a mangted dayaw iti Namarsuatayo.
Sumagmamano a tawen ti napalabasen maysa a babai nga agnagan Gloria ti addaan nasinged a pannakikadkadua iti maysa nga agtutubo a lalaki a tumabtabuno kadagiti Nakristianuan a panaggigimong ken agkomkomento payen iti Panagadal ti Pagwanawanan. Ti kabsat a babai nabagbagaan a dina itultuloy daytoy nasinged a pannakikuykuyog iti daytoy di pay nabautisaran a tao, ngem isu ti “agayat unay” a saanna nga inyaplikar ti balakad. Kaskasdi, ammona a ti balakad ti nasayaat. Gapuna maysa nga aldaw nagkararag a sipapasnek ken ni Jehova, nga impakpakaasi ti tulongna iti dayta a banag. Di nagbayag kalpasanna, nadiskubrena a ti agtutubo a lalaki ket imoral, ket gapu itoy dagus ngarud a ginuped ni Gloria ti pannakigayyemna kenkuana. Idi agangay isu ti naiyasawa iti maysa a nasaysayaat nga agtutubo a Kristiano a lalaki. Itattan, ti lalaki ti nadutokanen a panglakayen, ket dagiti dua nga annakda aktiboda iti kinapudno. Ket bayat ti itataliawna iti nalikudan, maikunana: “Pagyamanan ken Jehova ta naliklikak dagiti adu a problema. Gapu iti panangiturongna, immawatak ti kasayaatan a balakad a nangipalubos ti panagbiagko a siraragsak a kadua ti naayat a lakayko.”
Apay Tumaltaliaw iti Sabali?
Apay, ngarud, a dagiti tattao a dedikado ken ni Jehova ket tumaltaliawda pay iti sabali nga agpaay iti agbalin nga asawada? Saan kadi a kumbinsido ti Kristiano nga ammo ken tartarigagayan ni Jehova no ania ti kasayaatan nga agpaay kadatayo? (Proverbio 3:1-7; Salmo 145:16) Dakayo met ngay? Patienyo aya a ni Jehova isu “ti Dios ti kinapudno”? (Salmo 31:5) No kasta, pagaammoyo ngarud a kanayon nga isut’ mangipapaay kadagiti mapagtalkan a pammagbaga a maiyanatop ken makagunggona. (Isaias 48:17, 18) Wen, ti naayat a nailangitan nga Amatayo ti mangbalbalakad a silalagip iti agnanayon a pagimbagantayo, ngem mabalin a buyogen ti di panangpampanunot iti napaut a banagna kedkedngantayo dagiti planotayo iti asideg laeng a masanguanan. No agbirbirokkayo iti asawa, nupay kasta, saan aya nga agplanokayo iti ad-adda pay ngem basta iti asideg a masanguanan?—Salmo 37:11, 29.
Patienyo met laeng aya a ti Pagarian ket asidegen ken isunton ti agtignay a mangdalus iti daga? Ken makitkitayo aya ti bagiyo nga addanto idiay naipadto a sangalubongan a Paraiso? Wenno tarigagayanyo ketdi a tagiragsaken a naan-anay ti agdama a sistema dagiti bambanag? Agbirbirokkayo aya ti asawa nga addaan ti abilidad a mangipaay kadakayo iti nasayaat nga estilo ti panagbiag? Wenno agsapsapul ti maysa a mangsalimetmet iti pudno a panagdayaw a nangnangruna iti biagna? (Mateo 6:33) Wen, ania aya ti nangnangruna iti biagyo? Nainsiriban ti intay panangsukimat kadagiti nauneg a pampanunot ken motibotayo. Sa, no kasapulan, mabalintayo ti agbalbaliw ket iti kasta maliklikan ti kurso ti panagtignay a di makaay-ayo ken ni Jehova.—Idiligyo iti Salmo 78:40, 41.
Ti Manangallilaw a Pusotayo
Ti Jeremias 17:9 mamakdaar a “ti puso manangallilaw a nakarkaro ngem kadagiti amin a banag.” Gapuna kasapulan ti intay panangtengngel iti dayta. Nasayaat met a laglagipen a dagidiay di mangikankano kadagiti naipaltiing a pammagbaga ken patigmaan ti Biblia a siayat nga ipapaay dagiti panglakayen ti kongregasion ken dagiti dadduma ti masansan nga agluada ken agsagabadanto iti sakit ti nakem.
‘Ngem kasanoyo a maikuna dayta?’ mabalin a maisaludsod ti maysa. ‘Adda ammok a kabsat a lalaki a di nangasawa iti padana a managdaydayaw, ket itan agserserbidan a dua ken ni Jehova.’ Pudno, iti sumagmamano a kaso dagiti bambanag nagtungpalda a kasta, ket maragsakantayo ta isuda nga agassawa itan ti “magmagna iti kinapudno.” (3 Juan 4) Nupay kasta, ti kabsat a mangasawa iti di pay nabautisaran a tao ti nasukir. Agparangto manen aya dayta nga agwaywayas nga espiritu? Mabalin aya nga isunto ti masulisog nga agpanunot manen a nasaysayaat ti ammona ngem iti Dios ket iti kasta dinanto ikaskaso ti balakad ti Biblia ket agtalekto iti bukodna a kinasirib iti sabalinto manen a kasasaad? Maparparegtatayo nga ‘agtalek ken ni Jehova iti amin a pusotayo.’ (Proverbio 3:5) Ipamatmat dayta ti managpasakop a panagtulnog iti nadiosan a pagayatan iti isuamin a bambanag. Gapuna partuatentay koma ti natulnog a puso, daydiay maragpatna ti suot iti panagtulnog uray pay kadagiti babassit a bambanag. (Lucas 16:10) No agsukirtayo iti Dios, ania a kita ti padron ti parpartuatentayo? Daydiay kabsat a di ‘nangasawa iti Apo’ nalabit mabigbignan ti biddutna ita iti panagaramidna kadagiti bambanag a kabukbukodanna ket dinawatnan ti pammakawan ni Jehova. Kasta aya ti kayatyo a panangrugi iti panagasawayo?
‘Ngem rinugian metten ti nobiok ti makipagadal ti Biblia ket tumabtabuno metten iti Nakristianuan a panaggigimong,’ mabalin a maikuna ti maysa. Wen, ngem apay nga isu ti makipagad-adal? Tapno makagun-od ti maysa nga asawa wenno tapno maamuanna ti maipapan ken Jehova a Dios ken agserbi kenkuana? Iti intero a panawen ti panagin-innarem mabalin a mapagduaduaan dagiti motibo ti lalaki. Anianto ti masukalanyo kalpasan ti aldaw ti kasar? Siempre, mabalin nga urayenyo agingga a ti nobioyo ket mabautisaran ket di agbayag kalpasan dayta ikeddengyon ti petsa ti kasar. Iti istrikto a panagsao, ‘mangas-asawakayo iti Apo.’ Ngem agtigtignaykayo aya a maitunos iti espiritu dayta a balakad?
Nadlawyon aya a no kaano a mairekomendar ti maysa a kabsat a lalaki a maipaay kadagiti pribilehio iti serbisio? Umdas aya nga isu ti nabautisaran laeng? Saan, imbes ketdi, dayta a kabsat ti ‘masuot nga umuna.’ (1 Timoteo 3:10) Makaadaltayo aya ti leksion manipud iti dayta? Wen. Agsardengkayo, kumitakayo, ken dumngegkayo. Agsardeng ken panunotenyo ti maipapan iti kinaserioso ti panagasawa. Kitaenyo ti indibidual, saan a babaen kadagiti napakudrepan a mata ti maysa a nakayawan, no di ket addaan panggep. Ken dumngegkayo met. Isu a ti agsasao manipud iti puso babaen kadagiti naayat a balbalikas a panangidaydayaw iti Dios? Iti kalalainganna a tiempo, nangteden aya iti pammaneknek iti Nakristianuan nga irarang-ayna? Kalpasan ti panangipakitana ti kinamatalek ken ti naespirituan a kualipikasionna, santo laeng mabalinen a rugian ti panangusig iti maysa a lalaki (wenno maysa a babai) kas posible nga agbalin nga asawa. Kas panangadaw ti maysa a naaangaw a bumiberso:
“Babbalasang! ti estoria nga innak salaysayen
Ti addaan iti daytoy a leksion—
Dikay laeng agmaymaysa a mangpili ti umiso nga asawayo,
No di ket iti umiso a tiempo a panangasawayo.”
Aniat’ mapasamak no tignayennatay ti pusotayo a mangiwaksi kadagiti nasayaat a balakad ken nainkalintegan a panagrason? Ti bungana ti mabalin a makadidigra. Laglagipenyo, ti Biblia balakadannatayo:
‘Apitenyo No Ania ti Immulayo’
Panunotenyo no ania ti napasamak ken ni Jacqueline. Maysa a panglakayen ti nangbalakad kenkuana maipapan iti pannakigaygayyemna iti maysa nga agtutubo a lalaki iti ruar ti kongregasion Kristiano. Ngem agsipud ta pagarupna a dagiti kakabsat ti istrikto unay, saanna nga impangpangag dagiti naibatay iti Biblia a rekomendasion. No pampanunotenna ti mismo a kababalinna, iti kamaudiananna inaminna: “Ti maysa makitkitana ti kayatna a makita a saan ket a no ania ti makitkita ken ibagbaga ni Jehova.” Rinugian ti agtutubo a lalaki ti makipagadal ti Biblia ket iti kamaudiananna nabautisaran met laeng. Iti las-ud ti tallo a bulan nagasawadan.
Dagus met a rimsua dagiti parikut. Iti kinapudnona, nangrugida iti honeymoon! Dagiti di makaay-ayo nga ugali a di nadnadlaw idi ni Jacqueline wenno saanna laeng nga inkaskaso nangrugidan nga agparang. Inar-arapaapna ti maysa a naragsak ken addaan panagkaykaysa a panagasawa, ngem, daksanggasat, ti kasunganina ti pimmudno. Nailaksid ti lakayna ket isu ti pinanawanna agraman dua nga annakda. Itan sanguenna saan laeng a dagiti rigat iti panagbiag iti daytoy dumakdakes a sistema no di pay ket kasta met ti karit iti inna panangpadakkel kadagiti dua nga annak, nga aywanan agpadpada dagiti emosional ken pisikal a kasapulanda. Aniat’ naadal ni Jacqueline manipud iti daytoy napait a kapadasan? “Ti panagtulnog,” kunana. “Nupay ti balakad ti kasla nasakit wenno agparang a saan nga isu ti kasayaatan para kadakayo, rebbeng a panunoten ti maysa a daytat’ naggapu ken ni Jehova ket rebbeng a pagtulnoganna a naan-anay dayta.”—Galacia 6:7; Salmo 86:11.
Usigenyo pay met ti maysa a pangarigan. Nagam-ammo ni Maritza ken ti lakayna iti masanguanan iti maysa a pagtrabahuan. Ti lalaki ti nangipakita kenkuana kadagiti bambanag iti lubong a sanna pay a naam-ammuan idi—ket kasla saanda met unay a dakes iti babai. Ti lalaki ket edukado, nasayaat dagiti kababalinna, ket makapagsao nga intelihente kadagiti adu a tema. Numan pay ti babai ti naikkan kadagiti adu a Nainkasuratan a pakdaar, saanda a pulos nga immukuok kenkuana. Isu ti “agayat unay.”
Di nagbayag dagiti panaggigimong a Kristiano nagbalindan a makauma ken ni Maritza, nga awananda iti ragsak kas kadagiti rabii a kakkakuyogna ti mananglinglingay a kaduana. Sakbay ti kasarda, inkari ti lalaki a saanna a bibiangan ti itatabunona kadagiti Nakristianuan a panaggigimong, ket kasta nga agpayso. Nupay kasta, nagin-inot a nasarakan ti babai nga isu ti okupado kadagiti dadduma a bambanag a dagiti naespirituan nga ar-aramidna naikabildan iti maikadua a lugar, ket isu ti nagbalin nga inaktibo.
Ket dagidiay ngay makaliwliwa a panagpatpatangda? Nagin-inot met a nagawanda, ket idi agangay ti lakayna ti nangidiborsio kenkuana, a pinanawanna agraman ti uppat nga annakda nga agtawen iti uppat agingga iti siam. Ti pannakakellaat ni Maritza ti kasla pay nangbibineg kenkuana, ket kalpasan laeng ti tallo a tawen santo makarikna ti bassit a kinatalna tapno masukimat no ania ti napasamak ken no ania ti rebbeng nga aramidenna iti biagna. Masansan nga ibagbagana iti bagina: “Ti panagbiag ket isu ti panagsagaba.” Ngem dayta ti saan a nakapnek kenkuana agsipud ta malaglagipna pay dagiti tawtawen idi isut’ nakaragragsak, idi a tagtagiragsakenna pay ti nalamiis a pul-oy ti angin iti rupana bayat nga adda iti tay-ak ti ministerio, nga iranranudna kadagiti dadduma ti naimbag a damag ti Pagarian.
“Ay, anian nga adu nga ut-ot ken pannakapaay ti naliklikak koma no nagimdengak laeng!” indir-i ni Maritza. Babaen kadagiti kaeskuelaan dagiti annakna, isu manen ti naidenna kadagiti Saksi ni Jehova. Ti interesna iti kinapudno ken ti ayatna ken ni Jehova ti rimsik manen, ket itan isu ken dagiti annakna aktibodan iti serbisio. Itan naimpusuan a mairekomendar ni Maritza: “Adalenyo ti agpasakop iti panangiwanwan nga ipapaay ni Jehova ken bigbigenyo nga us-usaren ni Jehova dagiti tattao a dikay pagarupen a makaipakaammo kadagiti pagayatanna kadakayo.” Kas kinuna ni Jesu Kristo: “Imdenganyo ngarud kas mangngegyo.” (Lucas 8:18) Wen, agsardengkayo, tumaliawkayo, ken dumngegkayo!
Kumitakayo iti aglawlawyo bayat ti sumaganad a panaggigimongyo idiay Kingdom Hall. Awan duadua nga adu dagiti makitayo a naragsak a Kristiano a pagassawaan ket makitayo ti ragsakda nga agririnnanud ti tiempo ken kapadasan. Iti kasumbangirna, mabalin a makitayo dagiti sumagmamano idiay nga agmaymaysa gapu ta addaanda kadagiti di mamati nga assawa. Ay, anian iti panagtarigagayda a dagiti lallakay wenno babbaketda ket kaduada koma met! Masansan aggarasugasdan nga agawid kalpasan ti gimong ket maikapisda kadagiti makapabileg a panagpapatang ken pannakilangenlangen kadagiti kapammatianda. Situtulokkayo aya a mangala iti risgo iti di kasapulan a pannakakita iti bagiyo kadagiti umas-asping a kasasaad gapu iti dikay panangikankano ti pammagbaga a ‘makiasawa laeng iti Apo’? Imbes ketdi, anian a nainsiriban ti panangsurot kadagiti pannursuro ni Jehova ket iti kasta maliklikan dagiti nakalkaldaang a bungana!—Salmo 119:9; Proverbio 28:26.
Aguray ken Jehova
‘Ngem,’ mabalin a maikunayo, ‘awan met ti masarakak iti kongregasion. Mammano laeng dagiti tattao a katawenak.’ Mabalin a pudno dayta. Ngem kumbinsidokayo aya a ni Jehova kayatna nga agbalinkayo a naragsak? “Ta isu aluadannakayo.” (1 Pedro 5:6, 7) Malaglagipyo pay aya ti Proverbio a kunana: “Ti manakem a babai nga asawa aggapu ken ni Jehova”? (Proverbio 19:14) Ngarud, apay a dikay usigen ti tema maipapan ti panagasawa a buyogen ti panagkararag?—Filipos 4:6, 7.
Malaglagipyo pay aya ni Ana ken ti tarigagayna a maaddaan iti anak? Ania ti inaramidna? Imparukpokna ti pusona iti panagararaw ken ni Jehova, a nagtalek a naan-anay kenkuana. Kalpasanna impabiangna dagiti bambanag kadagiti im-imana. Idi agangay, isut’ immawat iti nakaskasdaaw a sungbat ti kararagna—ti pannakaipasngay ti maysa nga anak a lalaki.—1 Samuel 1:9-11, 18-20; Salmo 62:8.
Nupay mammano laeng dagiti tattao a katawenanyo nga adda iti lokal a kongregasion, dagiti met ngay asamblea sirkito ken kumbension distrito? Tumabtabunotayo kadagita a panagtataripnong a maipaay kadagiti naespirituan a rason. Ngem dagidiay mangiboluntario ti serbisioda kadagita a tiempo addaanda iti pannakapnek nga agserserbi kadagiti dadduma ken maiyam-ammoda kadagiti kakabsat a lallaki ken babbai nga agserserbi ken ni Jehova iti amin a kararua. Ket kadagita nga okasion, addada posibilidad a mabalin a maiyam-ammokayo iti masanguanan a kaduayonto iti biag.
Ngem uray pay no saankayo a makasarak ita iti maitutop a Kristiano nga asawa, sikakararag nga agpannuraykayo ken ni Jehova a tulongannakayo a mangitultuloy iti nadalus a panagbiag kas agsolsolo. Ket bayat a di pay naiyasawa, sukayanyo dagiti kualidad ken abilidad a mamagbalin kadakayo a nasayaat nga asawa a lalaki ken ama ken maysa a nasayaat nga asawa a babai ken ina. (Galacia 5:22, 23) Adut’ natulongan a mangaramid iti dayta babaen iti iseserrekda iti amin-tiempo a ministerio kas payunir. Ania pay ti nasaysayaat a pamay-an a pangusaran ti tiempo ken pigsayo!
No agbirbirokkayo iti asawayo, ngarud, sadino ti pangrugianyo? Sapay koma ta kadagiti padayo nga aktibo a managdaydayaw ken ni Jehova, dagidiay addaan ti padayo a kalat iti panagbiag ken addaan ti nainget a tarigagay nga agserbi nga agnanayon kenkuana. (2 Timoteo 2:22) Ket no bendisionannakayto ni Jehova iti maysa nga asawa a managbuteng iti Dios, sapay koma ta ti panagasawayo ket daydiay mangyeg dayaw iti naayat a Diostayo.
[Blurb iti panid 29]
“Ay, anian nga adu nga ut-ot ken ladingit ti naliklikak koma no dimngegak laeng!”