Natalged ti Namnama a Panagungar!

“Adda inanamak iti Dios . . . nga addanto panagungar.”​—ARAMID 24:15.

1. Apay a manamnamatayo ti panagungar?

INIKKANNATAYO ni Jehova kadagiti nasayaat a rason a mangnamnama iti panagungar. Inkarina a bumangonto dagiti natay, agbiagdanto manen. Ket sigurado a matungpalto ti panggepna maipapan kadagidiay matmaturog ken patay. (Isaias 55:11; Lucas 18:27) Kinapudnona, naipakitan ti Dios ti pannakabalinna a mangpagungar kadagiti natay.

2. Kasano a makatulong kadatayo ti namnama a panagungar?

² Ti panagtalek iti urnos ti Dios a panangpagungarna kadagiti natay babaen ken Jesu-Kristo nga Anakna maliwliwanatayo kadagiti nariribuk a panawen. Ti kinatalged ti namnama a panagungar matulongannatay met nga agtalinaed a natarnaw iti nailangitan nga Amatayo uray agingga ken patay. Tumibker la ketdi ti namnamatayo iti panagungar no usigentayo dagiti panagungar a nailanad iti Biblia. Napasamak amin dagitoy a milagro babaen ti pannakabalin ni Soberano nga Apo Jehova.

Inawatda Dagiti Minatayda Babaen ti Panagungar

3. Ania ti nabalinan nga inaramid ni Elias idi natay ti anak ti maysa a balo idiay Sarepta?

³ Iti makagutugot a panangrepasona iti pammati dagiti saksi ni Jehova kasakbayan dagiti Kristiano, insurat ni apostol Pablo: “Dagiti babbai inawatda dagiti minatayda babaen ti panagungar.” (Hebreo 11:35; 12:1) Maysa kadagidi a babbai ti napanglaw a balo nga agnanaed sadi Sarepta nga ili ti Fenicia. Gapu ta naparabur ken ni Elias a propeta ti Dios, namilagruan a saan a naibusan iti bellaay ken lana kabayatan ti bisin a nakatayanna koma ken ti anakna. Di nagbayag kalpasanna, natay ti anakna. Impaidda ni Elias ti ubing iti sopa, nagkararag, namitlo nga immunnat iti rabaw ti ubing, sa impakpakaasina: “O Jehova a Diosko, agdawatak kenka, nga ipalubosmo a ti kararua daytoy nga ubing umay koma manen kenkuana.” Pinagsubli ti Dios ti kararua, wenno biag ti ubing. (1 Ar-ari 17:8-24) Iladawanyo ti rag-o daydi balo gapu ta nasupapakan ti pammatina babaen ti pannakapagungar ti dungdungnguenna nga anak! Dayta ti umuna a nairekord a panagungar.

4. Ania a milagro ti inaramid ni Eliseo idiay Sunem?

⁴ Agnanaed iti ili ti Sunem ti sabali pay a babai a nangawat iti minatayna babaen ti panagungar. Lakayen ti asawana. Nakaim-imbag daytoy a babai ken ni propeta Eliseo ken iti adipen ti propeta. Naparaburan iti anak a lalaki. Ngem sumagmamano a tawen kalpasanna, napanna inayaban ni Eliseo ket nasangpetan ti propeta iti pagtaengan ti babai a natayen ti ubing. Nagkararag ni Eliseo ken adda dadduma pay nga inaramidna. Kalpasanna, “ti lasag ti ubing pimmudot.” “Nagbaen iti namimpito a daras, ket ti ubing linuktanna dagiti matana.” Di pagduaduaan a naragsakan unay ti agina iti daytoy a pannakapagungar ti ubing. (2 Ar-ari 4:8-37; 8:1-6) Ngem naragragsakdanto nga amang inton mapasaranda ti “nasaysayaat a panagungar” ditoy daga​—ti panagungar a mangted kadakuada iti gundaway a saanen a matay uray kaano! Anian a yamandanto iti naayat a Dios ti panagungar, ni Jehova!​—Hebreo 11:35.

5. Kasano a nainaig ni Eliseo iti milagro uray idi natayen?

⁵ Uray idi natay ken naitabonen ni Eliseo, inikkan ti Dios iti pannakabalin dagiti tulang ti propeta babaen ti nasantuan nga espiritu. Mabasatayo: “Naaramid idi itabtabon [dagiti Israelita] ti maysa a tao, nga, adtoy, a nasiimda ti maysa a buyot [dagiti Moabita]; ket intapuakda di tao idi tanem ni Eliseo: ket apaman a daydi [natay a] tao nasagidna dagiti tultulang ni Eliseo, isu nagungar, ket timmakder kadagiti saksakana.” (2 Ar-ari 13:20, 21) Sigurado a nasdaaw ken naragsakan unay daydi a tao! Iladawanyo ti rag-o nga itdento ti pannakapagungar dagiti patpatgentayo maitunos iti di makeltay a panggep ni Jehova a Dios!

Ti Anak ti Dios Pinagungarna Dagiti Natay

6. Ania a milagro ti inaramid ni Jesus iti asideg ti siudad ti Nain, ket ania ti mabalin nga epekto kadatayo daytoy a pasamak?

⁶ Ni Jesu-Kristo nga Anak ti Dios inikkannatayo kadagiti nakappapati a rason a mabalin nga agungar dagiti natay ken maipaayanda iti gundaway nga agbiag nga agnanayon. Adda napasamak iti asideg ti siudad ti Nain a mangipabigbig kadatayo a posible ti kasta a milagro babaen ti pannakabalin nga aggapu iti Dios. Iti naminsan, naranaan ni Jesus ti maysa a pumpon a rumrummuar iti siudad. Ti natay isu ti bugbugtong nga anak a lalaki ti maysa a balo. Kinuna ni Jesus iti babai: “Sumardengka nga agsangsangit.” Kalpasanna, sinagidna ti idda ti natay sana kinuna: “Agtutubo a lalaki, kunak kenka, Bumangonka!” Iti dayta met la a kanito, bimmangon ket nagsao. (Lucas 7:11-15) Pabilgen la ketdi daytoy a milagro ti pammatitayo a natalged ti namnama a panagungar.

7. Ania ti napasamak mainaig iti anak a babai ni Jairo?

⁷ Usigenyo met ti maysa a pasamak a pakainaigan ni Jairo, maysa a mangidadaulo nga opisial ti sinagoga idiay Capernaum. Indawatna ken ni Jesus a kumuyog kenkuana ket paimbagenna ti 12 ti tawenna a patpatgenna nga anak a babai nga agngangabit ken patay. Iti saan a mabayag, naipadamag a natayen ti balasitang. Pinapigsa ni Jesus ti pammati ni Jairo a nalapunos iti liday. Kimmuyog ni Jesus kenkuana iti pagtaenganna ket nasangpetanda nga agsangsangit dagiti tattao. Nagkakatawada idi kinuna ni Jesus kadakuada: “Ti ubing saan a natay, no di ket matmaturog.” Pudno a natay ti balasitang, ngem ipakita ni Jesus a mabalin a pagungaren dagiti tattao no kasano a mabalin ida a riingen uray no nargaan ti turogda. Iniggamanna ti ima ti balasitang sana kinuna: “Balasitang, bumangonka!” Bimmangon a dagus ket “dagiti nagannak kenkuana nagragsakda iti napalalo.” (Marcos 5:35-43; Lucas 8:49-56) Sigurado nga ‘agragsakto iti napalalo’ dagiti kameng ti pamilia inton mapagungar dagiti natay a patpatgenda iti paraiso a daga.

8. Ania ti inaramid ni Jesus idi adda iti naikataneman ni Lazaro?

⁸ Uppat nga aldawen a natay ni Lazaro idi immasideg ni Jesus iti nakaitanemanna ket pinaikkatna ti bato a naiserra iti dayta. Nagkararag ni Jesus iti imatang dagiti tattao tapno maammuanda a naggapu iti Dios ti pannakabalinna, kalpasanna kinunana iti napigsa a timek: “Lazaro, rummuarka!” Ket rimmuar! Naputipotan pay laeng dagiti ima ken sakana, ken naabungotan ti rupana iti lupot. “Warwaranyo ket bay-anyo a mapan,” kinuna ni Jesus. Idi naimatanganda daytoy a milagro, namati ken Jesus ti adu kadagiti adda sadiay a nangliwliwa kada Maria ken Marta a kakabsat ni Lazaro. (Juan 11:1-45) Saan kadi a daytoy a salaysay punnuennakayo iti namnama a mapagungarto dagiti ay-ayatenyo iti baro a lubong ti Dios?

9. Apay a masiguradotayo a kabaelan ita ni Jesus a pagungaren dagiti natay?

⁹ Idi adda iti pagbaludan ni Juan a Mammautisar, pinaibaga ni Jesus kenkuana daytoy a makaparagsak a damag: “Dagiti bulsek makakitada manen, . . . ket dagiti natay mapagpagungarda.” (Mateo 11:4-6) Yantangay pinagungar ni Jesus dagiti natay idi adda ditoy daga, sigurado a kabaelanna nga aramiden dayta kas maysa a nabileg nga espiritu a parsua nga inikkan ti Dios iti pannakabalin. Ni Jesus “ti panagungar ken ti biag,” ket anian a makaliwliwa a maammuan nga iti asidegen a masanguanan “amin dagidiay adda kadagiti pakalaglagipan a tanem mangngegdanto ti timekna ket rummuardanto”!​—Juan 5:28, 29; 11:25.

Dagiti Dadduma Pay a Panagungar Pabilgenda ti Namnamatayo

10. Kasanoyo a deskribiren ti umuna a naipadamag a panangpagungar ti maysa nga apostol?

¹⁰ Idi imbaon ni Jesus dagiti apostolna a mangikasaba iti Pagarian, kinunana: “Pagungarenyo dagiti natay a tattao.” (Mateo 10:5-8) Ngem tapno maaramidda daytoy, nasken nga agpannurayda iti pannakabalin ti Dios. Idiay Joppe idi 36 K.P., naturog ken patay ti managbuteng-Dios a babai nga agnagan Dorcas (Tabita). Karaman kadagiti naimbag nga aramidna ti panagdait kadagiti pagan-anay nga agpaay kadagiti napanglaw ken balo a babbai, isu a kasta unay ti sangitda idi natay. Inyurnos dagiti adalan ti pumponna ken pinaayabanda ni apostol Pedro, nalabit tapno mangliwliwa. (Aramid 9:32-38) Pinaruar ni Pedro dagiti amin nga adda iti makinngato a siled, nagkararag, sana kinuna: “Tabita, bumangonka!” Nagmulagat ni Dorcas, bimmangon, iniggaman ni Pedro ti imana sana pinatakder. Daytoy ti umuna a naipadamag a panangpagungar ti maysa nga apostol ket adu ti nagbalin a manamati. (Aramid 9:39-42) Ikkannatay met dayta iti kanayonan a rason a mangnamnama iti panagungar.

11. Ania ti maudi a panagungar a nailanad iti Biblia?

¹¹ Napasamak idiay Troas ti maudi a panagungar a nailanad iti Biblia. Idi dimmagas sadiay ni Pablo iti maikatlo a panagdaliasatna kas misionero, nagpalawag agingga iti tengnga ti rabii. Gapu ta napaksuyanen ken nalabit gapu iti pudot ti adu a pagsilawan ken kaadu dagiti tao iti siled a nagtataripnonganda, nakaturog ti maysa nga agtutubo a lalaki nga agnagan Eutico ket natnag manipud iti tawa ti maikatlo a kadsaaran. “Inakupda a natay,” saan a basta naawanan iti puot. Nagtaray ni Pablo a nangarakup ken ni Eutico, sana kinuna kadagiti kumitkita: “Sumardengkayo nga agar-ariwawa, ta ti kararuana adda kenkuana.” Kayat a sawen ni Pablo a naisublin ti biag ni Eutico. ‘Di marukod ti pannakaliwliwa’ dagidi adda sadiay. (Aramid 20:7-12) Iti kaaldawantayo, makaliwliwa unay kadagiti adipen ti Dios ti pannakaammo a dagiti dati a kakaduada nga agserserbi iti Dios mapasarandanto ti pannakatungpal ti namnama a panagungar.

Panagungar​—Nabayagen a Namnama

12. Ania a pammati ti inyebkas ni Pablo idi naisaklang ken ni Romano a Gobernador Felix?

¹² Idi naisaklang ken ni Romano a Gobernador Felix, kinuna ni Pablo: “Patiek amin dagiti bambanag a naipasdek iti Linteg ken naisurat kadagiti Mammadto; ket adda inanamak iti Dios . . . nga addanto panagungar agpadpada dagiti nalinteg ken dagiti nakillo.” (Aramid 24:14, 15) Kasano nga ipakpakauna dagiti paset ti Sao ti Dios, kas ti “Linteg,” ti pannakapagungar dagiti natay?

13. Apay a maikuna nga imparipirip ti Dios nga adda panagungar idi insawangna ti kaunaan a padto?

¹³ Imparipirip a mismo ti Dios nga adda panagungar idi insawangna ti kaunaan a padto idiay Eden. Idi sinentensiaanna ti “orihinal a serpiente,” ni Satanas a Diablo, kinuna ti Dios: “Pagginnuraenkayto iti babai, ken ti kaputotam ken ti kaputotanna [“bin-ina,” NW]: daytoy sugatennanto ta ulom, ket sika sugatemto ti mukodna.” (Apocalipsis 12:9; Genesis 3:14, 15) Ti pannakasugat ti mukod ti bin-i ti babai kaipapananna ti pannakapapatay ni Jesu-Kristo. Kalpasanna, tapno mabaelan a sugaten dayta a Bin-i ti ulo ti serpiente, nasken ngarud a mapagungar ni Kristo.

14. Kasano a ni Jehova ket “Dios, saan a dagiti natay, no di ket dagiti sibibiag”?

¹⁴ Kinuna ni Jesus: “Uray ni Moises imbutaktakna a dagiti natay mapagungarda, iti salaysay maipapan iti bassit a kayo a siitan, idi awaganna ni Jehova a ‘ti Dios ni Abraham ken Dios ni Isaac ken Dios ni Jacob.’ Isu ket Dios, saan a dagiti natay, no di ket dagiti sibibiag, ta sibibiagda amin kenkuana.” (Lucas 20:27, 37, 38; Exodo 3:6) Natay idin da Abraham, Isaac, ken Jacob, ngem sigurado a matungpalto ti panggep ti Dios a panangpagungarna kadakuada, isu a kasda la sibibiag iti panangmatmatna.

15. Apay nga adda rason ni Abraham a mamati iti panagungar?

¹⁵ Adda rason ni Abraham a mangnamnama iti panagungar, ta idi lakay ken baketdan ken ni Sara nga asawana, ken kasla nataydan no maipapan iti panaganak, namilagruan nga insubli ti Dios ti pannakabalinda a maaddaan iti annak. Kasla panagungar daytoy. (Genesis 18:9-11; 21:1-3; Hebreo 11:11, 12) Idi agarup 25 ti tawen ni Isaac nga anakda, binilin ti Dios ni Abraham nga idatonna ni Isaac. Ngem idi patayen koman ni Abraham ni Isaac, inatipa ti anghel ni Jehova ti ima ni Abraham. “Pinanunot [ni Abraham a] . . . kabaelan ti Dios a pagungaren [ni Isaac] uray pay manipud kadagiti natay; ket manipud sadiay isu inawatna met iti mangiladawan a pamay-an.”​—Hebreo 11:17-19; Genesis 22:1-18.

16. Matmaturog ita ken patay ni Abraham, nga agur-uray iti ania?

¹⁶ Nangnamnama ni Abraham iti panagungar iti sidong ti panagturay ti Mesias, ti naikari a Bin-i. Idi sakbay a nagbalin a tao, naimutektekan ti Anak ti Dios ti pammati ni Abraham. Gapuna, idi nagbalin a tao ni Jesu-Kristo, kinunana kadagiti Judio: “Ni Abraham nga amayo nagrag-o unay iti inanama a pannakakita iti aldawko.” (Juan 8:56-58; Proverbio 8:30, 31) Matmaturog ita ken patay ni Abraham, nga agur-uray a mapagungar ditoy daga iti sidong ti Mesianiko a Pagarian ti Dios.​—Hebreo 11:8-10, 13.

Pammaneknek iti Linteg ken Kadagiti Salmo

17. Kasano nga impakpakauna dagiti “bambanag a naipasdek iti Linteg” ti panagungar ni Jesu-Kristo?

¹⁷ Ti pananginanama ni Pablo iti panagungar ket maitunos kadagiti “bambanag a naipasdek iti Linteg.” Kinuna ti Dios kadagiti Israelita: “Mangipankayto ti sangareppet nga umuna a bunga ti maapityo iti padi. Ket [iti Nisan 16] ililinanto ti rineppet iti saklang ni Jehova, tapno maawatto a maipaay kadakayo.” (Levitico 23:9-14) Nalabit a daytoy ti pampanunoten ni Pablo idi insuratna: “Ni Kristo napagungaren kadagiti natay, ti umuna a bungbunga kadagidiay nakaturog ken patay.” Kas “ti umuna a bungbunga,” napagungar ni Jesus idi Nisan 16, 33 K.P. Kabayatan ti kaaddana, mapagungar dagiti ‘sumaruno a bungbunga’​—dagiti pasurotna a napulotan iti espiritu.​—1 Corinto 15:20-23; 2 Corinto 1:21; 1 Juan 2:20, 27.

18. Kasano nga impakita ni Pedro a naipakpakauna kadagiti Salmo ti panagungar ni Jesus?

¹⁸ Pasingkedan met dagiti Salmo ti panagungar. Iti aldaw ti Pentecostes 33 K.P., nagadaw ni apostol Pedro iti Salmo 16:8-11, a kunkunana: “Ni David kunana maipapan [ken Kristo], ‘Patinayon nga adda kaniak ni Jehova iti sanguanan dagiti matak; agsipud ta isu adda iti makannawan nga imak tapno saanakto a pulos mapagkintayeg. Gapu itoy ti pusok maragragsakan ket ti dilak nagrag-o unay. Mainayon pay, uray ti lasagko agtaengto iti namnama; agsipud ta dikanto baybay-an ti kararuak idiay Hades, dikanto met ipalubos a ti nasungdom makitana ti panagrupsa.’” Kinuna pay ni Pedro: “[Ni David] nakitana a nasaksakbay ket nagsao maipapan ti panagungar ni Kristo, a di nabaybay-an iti Hades ket ti lasagna saanna met a nakita ti panagrupsa. Daytoy a Jesus pinagungar ti Dios.”​—Aramid 2:25-32.

19, 20. Kaano a nagadaw ni Pedro iti Salmo 118:22, ket kasano a nainaig daytoy iti ipapatay ken panagungar ni Jesus?

¹⁹ Sumagmamano nga aldaw kalpasanna, nagtakder ni Pedro iti saklang ti Sanhedrin ket nagadaw manen kadagiti Salmo. Idi sinaludsodda kenkuana no kasano a napaimbagna ti maysa a pilay nga agpalpalimos, kinuna ti apostol: “Maipakaammo koma kadakayo amin ken iti isuamin nga umili iti Israel, nga iti nagan ni Jesu-Kristo a Nazareno, nga inlansayo ngem pinagungar ti Dios manipud kadagiti natay, babaen iti daytoy a maysa sisasalun-at nga agtaktakder daytoy a lalaki ditoy sanguananyo. Daytoy [ni Jesus] ‘ti bato a dakayo a managibangon trinatoyo a kas awan patpategna ket nagbalin nga ulo ti nagsulian.’ Kanayonanna pay, awan ti asinoman a sabali a pakaisalakanan, ta awan ti sabali a nagan iti baba ti langit a naited kadagiti tattao a masapul a pakaisalakanantayo.”​—Aramid 4:10-12.

²⁰ Nagadaw ditoy ni Pedro iti Salmo 118:22, nga inyaplikarna dayta iti ipapatay ken panagungar ni Jesus. Iti panangisungsong dagiti panguluen ti relihion, linaksid dagiti Judio ni Jesus. (Juan 19:14-18; Aramid 3:14, 15) Ti panangilaksid ‘dagiti managibangon iti bato’ ket nagbanag iti ipapatay ni Kristo, ngem ti ‘panagbalin ti bato nga ulo ti nagsulian’ kaipapananna ti pannakapagungarna iti naespirituan a dayag idiay langit. Kas impakpakauna ti salmista, “naggapu daytoy ken Jehova a mismo.” (Salmo 118:23, NW) Ti panagbalin ti “bato” nga Ulo ti nagsulian inramanna ti pannakaitan-okna kas Nadutokan nga Ari.​—Efeso 1:19, 20.

Pinakired ti Namnama a Panagungar

21, 22. Ania a namnama ti inyebkas ni Job, kas nailanad iti Job 14:13-15, ket kasano a makaliwliwa daytoy kadagiti natayan ita?

²¹ Nupay ditay pay nakakita a mismo iti natay a napagungar, nausigtayo ti sumagmamano a salaysay iti Kasuratan a mangipatalged kadatayo iti panagungar. Mabalintay ngarud a namnamaen ti kas iti inyebkas ti nalinteg a tao a ni Job. Idi agsagsagaba, indawatna: “O sapay koma ta ilemmengnak [Jehova] idiay tanem, . . . tapno tudingam kaniak ti maysa a nadutokan a panawen, ket lagipennak! No matay ti tao, agbiagto aya manen? . . . Umawagka koma, ket sungbatanka: adda koma maysa a kalikagummo iti aramid dagita imam.” (Job 14:13-15) ‘Kalikagumanto [ti Dios] ti aramid dagiti imana,’ a tarigagayanna unay a pagungaren ni Job. Anian a namnama ti itden dayta kadatayo!

²² Mabalin nga agsakit iti nakaro ti maysa a managbuteng-Dios a kameng ti pamilia, kas ken Job, ket nalabit a sumuko pay ketdi iti kabusor a ni patay. Mabalin nga agsangit dagiti napanawan gapu iti ladingit, ta uray ni Jesus nagsangit idi natay ni Lazaro. (Juan 11:35) Ngem anian a makaliwliwa a maammuan nga umawagto ti Dios ket sumungbatto dagidiay adda iti lagipna! Kasladanto naggapu iti biahe​—nga awanen ti sakit wenno depektoda, no di ket nasalun-atda.

23. Kasano nga inyebkas dagiti dadduma ti namnamada iti panagungar?

²³ Idi natay ti maysa a matalek a Kristiano a baket, natignay dagiti kapammatianna a nagsurat: “Naimpusuan a makipagladingitkami iti ipupusay ni nanangyo. Apagbiit laeng a tiempo ti palabsentayo ket addanto manen iti dennatayo​—nalasbang ken nakaradkad!” Kinuna dagiti nagannak a natayan iti anak a lalaki: “Anian a panangsegseggami iti aldaw inton agriing ni Jason! Iwarasnanto ti panagkitana ket makitana ti Paraiso a tinartarigagayanna unay. . . . Agserbi daytoy nga inspirasion kadakami amin a mangipatpateg kenkuana nga addakaminto met koma sadiay.” Wen, ken anian a yamantayo ta natalged ti namnama a panagungar!

Ania ti Sungbatyo?

• Kasano a makatulong kadatayo ti panagtalek iti urnos ti Dios a pannakapagungar dagiti natay?

• Aniada a pasamak a nailanad iti Kasuratan ti mangted kadatayo iti rason a mangnamnama iti panagungar?

• Apay a maikuna a ti panagungar ket nabayagen a namnama?

• Ania a makaliwliwa a namnama maipanggep kadagiti natay ti mabalin a maadda kadatayo?

[Ladawan iti panid 10]

Babaen ti pannakabalin a naggapu ken Jehova, pinagungar ni Elias ti anak ti maysa a balo

[Ladawan iti panid 12]

Idi pinagungar ni Jesus ti anak a babai ni Jairo, napalalo ti ragsak dagiti nagannak kenkuana

[Ladawan iti panid 15]

Iti aldaw ti Pentecostes 33 K.P., situtured a pinaneknekan ni apostol Pedro a napagungaren ni Jesus