Panangipakaammo iti Naimbag a Damag Kadagiti Kapagayan ti Taiwan

Datayo ti Kita nga Addaan Pammati

Panangipakaammo iti Naimbag a Damag Kadagiti Kapagayan ti Taiwan

MASANSAN nga agtudo idiay Taiwan, isut’ gapuna a mamindua iti makatawen nga agapit iti nasayaat nga irik. Nupay kasta, addada tiempo nga awan tudo idinto ta panagtutudo koman, isu a matay dagiti bunubon. No mapasamak daytoy, maawan kadin iti namnama ti mannalon? Saan. Ammona a masapul nga aganus. Agbunubon manen sa agraep. Kalpasanna, no sumayaat dagiti kasasaad, nawadwadto ti anienna. No dadduma, umarngi iti dayta ti naespirituan a panagmula ken panagani.

Panaganus iti Naespirituan a Panagani

Kadagiti naglabas a tawtawen, dagiti Saksi ni Jehova idiay Taiwan siaagawa a nagmula ken naganida kadagiti Nainkasuratan a bin-i ti kinapudno kadagiti lugar a kasla saan a nabunga idi. Maysa a pagarigan isu ti Miao-li County. Manmano idi ti agimdeng kadagiti sagpaminsan a panangasaba iti dayta a lugar. Isu nga idi 1973, naibaon dita ti agassawa nga special pioneer tapno agserbida kas amin-tiempo a manangiwaragawag iti Pagarian. Idi damo, adda dagidiay naginteres iti naimbag a damag. Nupay kasta, dagdagus met la a bimmaaw dayta nga interes. Nayalis ngarud dagiti special pioneer iti sabali a lugar.

Idi 1991, naibaon iti dayta a lugar ti dua a sabali manen nga special pioneer. Ngem kaskasdi, ipakita dagiti kasasaad a saan pay a panawen ti naespirituan a panagdakkel. Kalpasan ti sumagmamano a tawen, naibaon manen dagiti special pioneer kadagiti manamnama nga ad-adda a nabunga a tay-ak. Iti kasta, adda tiempo a di nakaskasabaan dayta a lugar.

Nagballigi ti Napabaro a Panagregget

Idi Setiembre 1998, naikeddeng a masukisok dagiti ad-adda a nabunga a lugar iti naglawa ngem di makaskasabaan a teritoria ti Taiwan. Kasano a maibanag daytoy? Babaen ti panangibaon iti agarup 40 a temporario nga special pioneer a mangtrabaho kadagiti aduan iti tattao ngem di makaskasabaan a teritoria.

Dua nga agkabangibang a siudad iti Miao-li County ti nairaman kadagiti teritoria a napili a mawanas. Uppat a kakabsat a babbalasang ti naibaon a mangasaba sadiay iti tallo a bulan tapno subokenda ti teritoria. Di nagbayag kalpasan ti isasangpetda, impadamagda dagiti makaparagsak a report maipapan iti bilang ti interesado a tattao a nasarakanda. Iti ngudo ti tallo bulan a panagpayunirda iti dayta a lugar, nakaad-adu ti iyad-adalanda iti Biblia. Nabuangay met ti maysa a grupo ti panagadal iti libro babaen ti tulong ti maysa a panglakayen a naggapu iti kabangibang a kongregasion.

Tallo kadagidiay a babbalasang ti nangyebkas a kayatda nga ituloy nga aywanan dagiti naganus a “bunubon” a nagsayaat ti panagdakkelda. Idi agangay, nadutokan kas permanente nga special pioneer ti dua kadakuada, ket nagtultuloy ti maikatlo kas regular pioneer. Maysa a panglakayen iti kabangibang a kongregasion ti immakar iti dayta a lugar tapno tumulong kadakuada. Nasurok nga 60 ti nagimdeng iti damdamo a palawag publiko iti dayta a lugar. Tultulongan ita ti kabangibang a kongregasion daytoy kabbuangay a grupo tapno adda regular a gimongda iti Domingo malaksid iti sumagmamano a panagadal iti libro. Nalabit nga iti saan a mabayag, mabuangayto ti maysa a baro a kongregasion iti dayta a lugar.

Nabendisionan ti Dadduma Pay a Paset ti Taiwan Gapu iti Panaganus

Nangipangag met ti dadduma a lugar. Iti I-lan County iti dumaya nga amianan ti isla, nabuangay ti maysa a baro a Panagadal ti Kongregasion iti Libro iti teritoria dagiti temporario nga special pioneer.

Kabayatan ti maysa a rabii a panangasaba iti binalaybalay, nakasarita ti temporario nga special pioneer ti maysa nga agtutubo a lalaki ket impakitana kenkuana ti polieto a nakailistaan dagiti gimong ti kongregasion. Dagdagus nga inyimtuod ti agtutubo: “Mabalinak kadi a tumabuno inton rabii no bigat? No mabalin, ania ngay ti isuotko?” Mangikonkondukta daytoy a payunir iti walo a panagadal iti Biblia kadagiti interesado a tattao kada lawas. Di nagbayag, dadduma kadagiti agad-adal iti Biblia ti agngayangay nga agbalin nga agibumbunannag iti naimbag a damag, a kalatda ti agpabautisar.

Iti dayta met la a lugar, maysa a babai a mannakimisa iti adun a tawen ti di makasarak iti mangisuro kenkuana iti Biblia. Idi nadamagna ti maipapan iti panagadal iti Biblia, ginundawayanna dayta. Naparegta nga isaganana a nasaksakbay ti adalenda. Idi simmangpet ti temporario nga special pioneer tapno agadalda, nakita ti payunir nga insagana ti babai ti “leksionna” babaen ti pananggatangna iti maysa a kuaderno a nangisuratanna kadagiti saludsod nga adda iti libro nga adalenda. Sana insurat dagiti sungbatna iti kada saludsod. Kinopiana met iti kuadernona ti amin a naisitar a kasuratan iti leksionna. Isu nga idi simmangpet ti kabsat a mangyadal kenkuana, naisaganan daytoy a babai ti umuna a tallo a leksion!

Adda met dagiti umarngi a resulta iti ili ti Dongshih iti sentro ti Taiwan. Naipaima dagiti temporario nga special pioneer ti nasurok a 2,000 a broshur iti uneg ti tallo a bulan a panangasabada sadiay. Kabayatan ti maikatlo a bulan, 16 ti iyad-adalanda iti Biblia. Dakkel ti nadadael iti dayta a siudad idi nagginggined iti sentro ti Taiwan idi Setiembre 21, 1999. Kaskasdi, nagtultuloy a rimmang-ay iti naespirituan ti dadduma nga interesado a tattao, nupay masapul nga agbiaheda iti agarup maysa nga oras tapno matabunuanda dagiti gimong iti kaasitgan a Kingdom Hall. Wen, masapul ti panaganus tapno adu ti maapit, material man wenno naespirituan a banag.

[Mapa iti panid 8]

(Para iti aktual a pannakaurnosna, kitaem ti publikasion)

CHINA

Taiwan Strait

TAIWAN

[Credit Line]